ହୋମ / କୃଷି / କୃଷି କ୍ଷେତ୍ର ରେ ସଫଳ ବ୍ୟକ୍ତି / ଜଣେ ଚାହିଁଲେ ନିଶ୍ଚିତ ସ୍ଵାବଲମ୍ବୀ ହୋଇପାରିବ
ସେଆର କରନ୍ତୁ

ଜଣେ ଚାହିଁଲେ ନିଶ୍ଚିତ ସ୍ଵାବଲମ୍ବୀ ହୋଇପାରିବ

ସଫଳ ମହିଳା କୃଷିଜୀବୀ ରେଖା ସାହୁ ରୋଜଗାର କରିବା ପାଇଁ ଚାଷ କାମରେ ମନବୃତ୍ତି ଦେଇ ସଫଳ ହୋଇଛନ୍ତି ।

ରେଖା ସାହୁଙ୍କ ପରିଚୟ

ପରିବାରର ଆର୍ଥିକ ଅବସ୍ଥା କିପରି ସ୍ୱଚ୍ଛଳ ହେବ ଏଇ ଚିନ୍ତା ତାଙ୍କୁ ଘାରୁଥିଲା । ଦିନେ ତାଙ୍କ ମନକୁ ତୁଟିଲା ଯେ ଘର କାମ ପରେ ସ୍ଵାମୀଙ୍କୁ ଯଦି ଚାଷ କାର୍ଯ୍ୟରେ ସାହାଯ୍ୟ କରନ୍ତେ ତାହେଲେ ରୋଜଗାର ବି ବଢନ୍ତା । ଏବିଷୟରେ ସେ ତାଙ୍କ ସ୍ଵାମୀଙ୍କୁ କହିଲେ । ସେ ବି କଥାଟିକୁ ଭଲରେ ଗ୍ରହଣ କଲେ । ଏହାପରେ ହିଁ ନିଷ୍ପତ୍ତି ଅନୁସାରେ ଆରମ୍ଭ କଲେ ଛତୁଚାଷ । ସତକୁ ସତ ଏହି ଛତୁଚାଷ ପ୍ରାରମ୍ଭିକ ଭାବେ ତାଙ୍କ ପାଇଁ ଲାଭଜନକ ହେଲା ।

ତା’ପରେ ଏହି ଚାଷକୁ କ୍ରମାଗତ ଭାବେ ବଢାଇଲେ । ଲାଭ ବି ବଢିଲା ଆଉ ପରିବାରର ଆର୍ଥିକ ଅବସ୍ଥା ବି । ପୁଣି ତାଙ୍କ ଗ୍ରାମର ଆଉ କେତେଜଣ ମହିଳାଙ୍କୁ ଛତୁଚାଷ ମାଧମରେ ରୋଜଗାରର ବାଟ ଦେଖାଇବାରେ ସେ ହୋଇଛନ୍ତି ସକ୍ଷମ । ସେ ହେଲେ ରେଖା ସାହୁ (ମୋ: ୯୪୩୯୪o୮୯୬୦) । ତାଙ୍କ ସ୍ଵାମୀଙ୍କ ନାମ କ୍ଷୀରୋଦ ସାହୁ ।  ଅନୁଗୋଳ ଜିଲା ବଅଁରପାଳ ବ୍ଲକ ଅନ୍ତର୍ଗତ ମହୀଧରପୁର ଗାଁରେ ତାଙ୍କ ଶାଶୁଘର ।

ରୋଜଗାର କରିବା ପାଇଁ ଚାଷ କାମରେ ମନବୃତ୍ତି

ଦଶମ ଶ୍ରେଣୀ ଯାଏ ପାଠ ପଢ଼ିଥିବା ରେଖା ସମୟକ୍ରମେ ବିବାହ ହୋଇ ଶାଶୂଘରକୁ ଆସିଲେ । କିଛିମାସ ପରେ ଶାଶୁଘରର ଆର୍ଥିକ ଅବସ୍ଥାକୁ ଅନୁଭବ କଲେ । ତେଣୁ କିପରି ପରିବାରର ରୋଜଗାର ବଢିବ ଚିନ୍ତା କରି ସ୍ୱାମୀଙ୍କୁ ମନକଥା କହିଲେ । ଆଉ ସ୍ଵାମୀଙ୍କ ସହଯୋଗରେ ଛତୁଚାଷ ଆରମ୍ଭ କଲେ । ଜିଲା କୃଷି ବିଜ୍ଞାନ କେନ୍ଦ୍ର ସହାୟତାରେ ଛତୁଚାଷ ପାଇଁ ଗ୍ରେନିଂ ନେଲେ। ଏପ୍ରିଲରୁ ଅଗଷ୍ଟ ମାସ ପର୍ଯ୍ୟନ୍ତ ମାସକୁ ହାରାହାରି ୩୫୦ ବେଡ୍ ପାଳଛତୁ ପକାଇ ଚାଷ କଲେ । ବେଡ୍ ପ୍ରତି ୧ କିଗ୍ରା ଛତୁ ଅମଳ ହେଲା । ଏଥିରେ, ପ୍ରାୟ ୧୪ ହଜାର ଟଙ୍କା ଖର୍ଚ୍ଚ କରିଥିବାବେଳେ ୨୮ ହଜାର ଟଙ୍କା ଲାଭ ମିଳିଲା । ସେହିପରି ଭାବେ ପ୍ରଥମେ ମାସକୁ ୪୫୦ ବ୍ୟାଗ ଧଙ୍ଗରି ଛତୁ ଚାଷ କରି ୪ ମାସରେ ପ୍ରାୟ ୭୦ ହଜାର ଟଙ୍କା ଲାଭ କରିଥିଲେ । ସେବେଠାରୁ ବର୍ଷତମାମ ଛତୁଚାଷ କରି ପରିବାରର ଆର୍ଥିକ ଅବସ୍ଥା ସୁଧାରିବାରେ ସହାୟକ ହୋଇ ପାରୁଛନ୍ତି । ରେଖା କୁହନ୍ତି, ଚଳିତ ବର୍ଷ ଛାୟାଘରେ ଛତୁଚାଷ ଆରମ୍ଭ କରିଛି, ଆଗାମୀ ଦିନରେ ପଲିଥିନ ଘରେ ଛତୁଚାଷ ପାଇଁ ଯୋଜନା ରଖୁଛି। ପାଳଛତୁ ଚାଷ ପାଇଁ ପ୍ରଥମେ ନଡ଼କୁ ସଂଗ୍ରହ କରାଯାଏ । ତା’ପରେ ୧୮ଇଞ୍ଚ ସାଇଜ୍‌ରେ କଟାଯାଇଥିବା ନଡ଼ାଖଣ୍ଡକୁ ପ୍ରାୟ ୧୨ ଘଣ୍ଟା ଧରି ଥଣ୍ଡା ପାଣିରେ ଭିତ୍ତାଇ ରଖାଯାଏ । ବିଶୋଧନ ଲାଗି ସେହି ନଡ଼ାବିଡ଼ାରେ ଚୂନ କିମ୍ବା ଛିଟି ପାଉଡର ପକାଯାଏ । ଗୋଟିଏ ଦିନ ପରେ ଉକ୍ତ ନଡ଼ାକୁ ବିଶୋଧୂତ ପାଣିରୁ ବାହାର କରଯାଇ ତା’ପରେ ପାଳଛତୁ ବେଡ୍ ପ୍ରସ୍ତୁତ କରାଯାଇଥାଏ । ପ୍ରଥମେ ବେଡ୍ ଉପରେ ଦୁଇ ବିଡ଼ା ନଡ଼ା ବିଛାଯାଇ ଚାରିପାଖରୁ ପ୍ରାୟ ୬ ଇଞ୍ଚ ବ୍ୟବଧାନରେ ବେସନଗୁଣ୍ଡ କିମ୍ବା ଚେକଡ଼ ବିଛାଯାଏ । ତା’ପରେ ନଡ଼ା ବିଛାଯାଇ ତା' ଉପରେ ଛତୁ ପାଇଁ ପ୍ରସ୍ତୁତ ମଞ୍ଜିକୁ ପକାଯାଇ ପୁଣି ତା' ଉପରେ ନଡ଼ା ପକାଯାଏ । ଏହାପରେ ଧଳାପଲିଥିନରେ ପ୍ରାୟ ୩ ଦିନ ଧରି ଏହି ବେଡ୍ କୁ ଘୋଡ଼ାଇ ରଖାଯାଇଥାଏ । ଯଦି ନଡ଼ା ଟିକେ ଶୁଖଲା ରହିଲା, ସେଥିରେ ଅଳ୍ପମାତ୍ରାରେ ଗରମ ପାଣି ଛିଞ୍ଚବାକୁ ହୁଏ । ପୁଣି ତାପମାତ୍ରା ଯଦି ୩୦ରୁ ୩୫ ଡିଗ୍ରୀ ରହେ, ତେବେ ୬ରୁ ୮ ଦିନ ମଧ୍ୟରେ ଛତୁ ପାଇଁ ଫିମ୍ପି ବାହାରି ଯାଇଥାଏ । ପ୍ରାୟ ୧୩ ଦିନ ମଧ୍ୟରେ ଛତୁ ହୋଇ ଯାଇଥାଏ । ସେହିପରି କେବଳ ଶୀତଦିନେ ଧୂଙ୍ଗର ଛତୁ ଚାଷ କରାଯାଏ । ଏଥିରେ ନଡ଼ାକୁ ଛୋଟ ଛୋଟ ଆକାରରେ କଟାଯାଏ । ସୂଚନାଯୋଗ୍ୟ ରେଖାଙ୍କ ଦ୍ଵାରା ଚାଷ ହେଉଥିବା ଛତୁକୁ ଅନୁଗୋଳ ବଜାରରେ ବିକ୍ରି କରଯାଇଥାଏ ।

ଅନ୍ୟ ଚାଷୀଙ୍କ ପାଇଁ ରେଖାଙ୍କର ବାର୍ତ୍ତା

ଏହିପରି ଭାବେ ଛତୁଚାଷରୁ ନିଜ ପରିବାରର ଆର୍ଥିକ ଅବସ୍ଥା ବଦଳାଇବାରେ ସହାୟକ ହେଉଥିବା ରେଖା କୁହନ୍ତି ଖାଲି ଭବି ଦେଲେ କ’ଣ ହେବ, ଭାବିବା କଥାକୁ ସତ କରିବା ଲାଗି ପରିଶ୍ରମ କରିବାକୁ ହେବ । ପରିଶ୍ରମକୁ ଆପଣେଇ ନେଲେ ଜଣେ ନିଶ୍ଚିତ ସ୍ଵାବଲମ୍ବୀ ହୋଇ ପାରିବ ବୋଲି ଦୃଢୋକ୍ତି ବ୍ୟକ୍ତ କରନ୍ତି। ଏହି ମହିଳା ।

ଆଧାର - ଡ. ବିନିତା ଶତପଥୀ (ସିନିୟର ସାଇଣ୍ଟିଷ୍ଟ ଆଣ୍ଡ ହେଡ୍, କୃଷି ବିଜ୍ଞାନ କେନ୍ଦ୍ର, ଅନୁଗୋଳ)

3.05
ତାରକା ଚିହ୍ନ ଉପରେ କ୍ଲିକ କରି ପୃଷ୍ଟାଟିକୁ ମୂଲ୍ୟାଙ୍କନ କରନ୍ତୁ
ଆପଣଙ୍କର ପରାମର୍ଶକୁ ପୋଷ୍ଟ କରନ୍ତୁ

( ଯ଼ଦି ଆପଣଙ୍କର କିଛି କମେଣ୍ଟ / ପରାମର୍ଶ ଉକ୍ତ ବିଷଯ଼ବସ୍ତୁକୁ ନେଇ ରହିଛି ତେବେ ଦଯାକରି ତାହାକୁ ଏଠାରେ ପୋଷ୍ଟ କରନ୍ତୁ

Enter the word
ନେବିଗତିଓଂ
Back to top