অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ଭଂଜନଗରର ଭୂମିହୀନ ଶଙ୍କର

ଭଂଜନଗରର ଭୂମିହୀନ ଶଙ୍କର

ଶଙ୍କର ନାୟକ ପରିଚୟ

ଶଙ୍କର ନାୟକ(୩୫) ହେଉଛନ୍ତି ଭଞ୍ଜନଗର ବ୍ଲକ ଦଦରାଲୁଣ୍ଡା ପଂଚାୟତର ବଞ୍ଜରଗାଁର ଜଣେ ଜମିହୀନ ଚାଷୀ । ଗାଁରେ ଅଛି ଏକ ଛୋଟ ଚାଳଛପର ଘର । ଜଣେ ଭଲ ଚାଷୀ ହୋଇଥିଲେ ମଧ୍ୟ ତାଙ୍କ ପାଖରେ ନିଜର ଖଣ୍ଡେ ଜମି ନାହିଁ। ତଥାପି ଅନ୍ୟର ଜମିକୁ ଲିଜରେ ନେଇ ସେଥିରେ ଚାଷ କରି ଏବେ ସେ ସେହି ଅଂଚଳରେ ନିଜର ପରିଚୟ ସୃଷ୍ଟି କରିପାରିଛନ୍ତି ।

ବଞ୍ଜରଗାଁ ଏକ ଛୋଟ ଆଦିବାସୀ ଗାଁ । ଗାଁରେ ଜଳସେଚନର ସେପରି କିଛି ସୁବିଧା ନାହିଁ । ଗାଁ ନିକଟରେ ବହି ଯାଇଛି କଦମନାଳ । ଦୁଇବର୍ଷ ତଳେ ଜଳସେଚନର ସୁବିଧା ପାଇଁ ଏହି ନାଳରେ ନିର୍ମାଣ ହୋଇଥିଲା ଏକ ଚେକଡ୍ୟାମ । ଭଞ୍ଜନଗର କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ପ୍ରାୟ ୨୦ ଲକ୍ଷ ଟଙ୍କା ବ୍ୟୟରେ ଏହି ଚେକଡ୍ୟାମ ନିର୍ମାଣ କରାଯାଇଛି । ଚେକଡ୍ୟାମ୍ ଫଳରେ ଲୋକେ ଉପକୃତ ହୋଇଥିଲେ । ଜମିହୀନ ଶଙ୍କର ଚେକଡ୍ୟାମ ନିକଟରେ ପଡ଼ିଆ ପଡ଼ିଥିବା ଏକ ଟାଙ୍ଗରା ଜମିକୁ ଦଦରାଲୁଣ୍ଡାର ଜଣେ ଜମି ମାଲିକଙ୍କ ଠାରୁ ବର୍ଷକୁ ୧୫ ହଜାର ଟଙ୍କାରେ ଲିଜସୂତ୍ରରେ ନେଇଥିଲେ । ଚାଷ କରି ଏବେ ପ୍ରଚୁର କୃଷି ଉତ୍ପାଦ ସୃଷ୍ଟି କରି ନିଜକୁ ସ୍ୱାବଲମ୍ବୀ କରି ପାରିଛି ।

କୃଷି ଉତ୍ପାଦନ

ଏହି ଚେକ୍ ଡ୍ୟାମର ଗୋଟିଏ ପଟେ ଜଳ ସ୍ୱପ୍ରବାହିତ ହୋଇ ସେଥିରେ ଧାନ,କଦଳି ପ୍ରଭୃତି ଚାଷ ହେଉଥିବା ବେଳେ ଅନ୍ୟପଟେ ପମ୍ପ ସାହାଯ୍ୟରେ ଜଳ ଉତ୍ତୋଳନ କରାଯାଇ ଚାଷ କରାଯାଇପାରୁଛି । ଆଉ ଏହାର ସୁଯୋଗ ନେଇଛନ୍ତି ଶଙ୍କର । ଶଙ୍କର ଏକ ଡ଼ିଜେଲ ପମ୍ପ ସାହାଯ୍ୟରେ ଜଳସେଚନ କରି ସେହି ଶୁଖିଲା ଟାଙ୍ଗରା ଜମିକୁ ଶସ୍ୟସାମଳା କରି ପାରିଛି । ଲିଜରେ ନେଇ ଥିବା ୨୦ ଭରଣ ଜମିରେ ସେ କନ୍ଦମୂଳ, ବାଇଗଣ, ଲଙ୍କା, ଦେଶୀଆଳୁ, ମକା, ବୋଇତାଳୁ, ମୂଳା, ବିଲାତି ବାଇଗଣ, କଲରା, ବିନ୍ ,ଶାଗ, ଝୁଲଣ ପ୍ରଭୃତି ପନିପରିବା ସାଙ୍ଗକୁ କୋଳଥ,ରାଶି ଭଳି ଫସଲ ଉତ୍ପାଦନ କରି ପାରିଛନ୍ତି । ଏହି କୃଷି ଉତ୍ପାଦକୁ ଭଞ୍ଜନଗର ତଥା ବିଭିନ୍ନ ସ୍ଥାନରୁ ଆସୁଥିବା ବ୍ୟବସାୟୀ ଜମିରୁ ହିଁ କ୍ରୟ କରି ନେଇଥାନ୍ତି ।

ଶଙ୍କର କହିଛନ୍ତି ଯେ ଜଣେ ଗରୀବ ଜମିହୀନ ଚାଷୀ । ନିଜର ଚାଷଜମି ନଥିବାରୁ ଅନ୍ୟର ଜମିରେ ମୂଲ ଲାଗିବା ଥିଲା ତାଙ୍କର କାମ । ତେବେ ଚେକଡ୍ୟାମ ନିର୍ମାଣ ହେବା ପରେ ସେ ଏଠାରେ ନିଜେ ବିଭିନ୍ନ ଚାଷ କରିବା ପାଇଁ ମନ ବଳାଇଥିଲେ । ଚେକଡ୍ୟାମ୍ ନିକଟରେ ଜମି ଖଣ୍ଡେ ଲିଜରେ ମିଳିଯିବାପରେ ସେ ଜାରି ରଖିଲେ ତାଙ୍କର ପରିଶ୍ରମ । ପ୍ରଥମ ବର୍ଷ ସେ ଏହି ଚାଷ ଆରମ୍ଭ କରିଛନ୍ତି । ପ୍ରଥମ ଥର ସେ ପ୍ରାୟ ୪୦ ହଜାର ଟଙ୍କା ବିନିଯୋଗ କରି ପ୍ରାୟ ୧୨ ଭରଣ ଜମିରେ କନ୍ଦମୂଳ ଚାଷ କରିଥିଲେ । ଭଲ ଅମଳ ହୋଇଥିବାରୁ ସେଥିରୁ ଖର୍ଚ୍ଚ ଯାଇ ଆହୁରି ୫୦ ହଜାର ଟଙ୍କା ଲାଭ କରିଥିବା କହିଛନ୍ତି । ବଳକା ଜମିରେ ଅନ୍ୟାନ୍ୟ ପନିପରିବା କରିଛନ୍ତି । ଏଥିସହିତ କିଛି ଗୋରୁଗାଈ ଓ ବନରାଜ କୁକୁଡ଼ା ମଧ୍ୟ ପାଳନ କରି ତାଙ୍କ ପରିବାର ଖୁସିରେ ଚଳୁଛନ୍ତି । ତେବେ ଜମିରେ ବାଡ଼ ନଥିବାରୁ ଗ୍ରାମର ଗୋରୁଗାଈ ପଶି ବହୁ ଚାଷ ନଷ୍ଟ କରୁଥିବା ସେ କୁହନ୍ତି । ଦିନ ରାତି ଜମିକୁ ଜଗି ରହିବାକୁ ପଡ଼େ । ଗୋରୁଗାଈ, ମାଙ୍କଡ଼ ଉପଦ୍ରବ ସାଙ୍ଗକୁ ସବୁ ପ୍ରକାର ପ୍ରତିକୂଳ ପରିସ୍ଥିତିକୁ ସମ୍ମୁଖୀନ ହୋଇଛନ୍ତି ଶଙ୍କର ।

ଆଧାର – PK writer

Last Modified : 12/27/2019



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate