ହୋମ / କୃଷି / କୃଷି ନିର୍ଦେଶିକା / ଫସଲ ସୁରକ୍ଷାକାରୀ ବିଷ (ଫସଲ ସୁରକ୍ଷାକାରୀ ବିଷର ପ୍ରୟୋଗ ସମୟରେ ସାବଧାନତା)
ସେଆର କରନ୍ତୁ

ଫସଲ ସୁରକ୍ଷାକାରୀ ବିଷ (ଫସଲ ସୁରକ୍ଷାକାରୀ ବିଷର ପ୍ରୟୋଗ ସମୟରେ ସାବଧାନତା)

ଫସଲ ସୁରକ୍ଷାକାରୀ ବିଷ ର ପ୍ରୟୋଗ ସମୟରେ ସାବଧାନତା ବିଷୟରେ ଶିକ୍ଷା ଦେବା I

ଅଧିବେଶନ ୭.୩

ଫସଲ ସୁରକ୍ଷାକାରୀ ବିଷ ର ପ୍ରୟୋଗ ସମୟରେ ସାବଧାନତା I

ଉଦ୍ଦେଶ୍ୟ

ଫସଲ ସୁରକ୍ଷାକାରୀ ବିଷ ର ପ୍ରୟୋଗ ସମୟରେ ସାବଧାନତା ବିଷୟରେ ଶିକ୍ଷା ଦେବା I

ପଦ୍ଧତି

ବ୍ୟାଖ୍ୟାନ ଏବଂ ପୋଷ୍ଟର ମାଧ୍ୟମରେ ସିଆରପିମାନେ ଫସଲ ସୁରକ୍ଷାକାରୀ ବିଷ ର ପ୍ରୟୋଗ ସମୟରେ ସାବଧାନତା ଗ୍ରହଣ ବିଷୟରେ ବୁଝାଇବେ I ଏହା ପରେ ସେମାନଙ୍କୁ ଚାଷୀର କ୍ଷେତକୁ ନେଇ ଏହାର ପ୍ରଦର୍ଶନ କରାଯିବ I

ଅଂଶଗ୍ରହଣକାରୀ

ସ୍ୱୟଂ ସହାୟକ ଦଳ ଏବଂ ସମୂହର ମହିଳା ଚାଷୀ ମାନେ I

ସଭା ସ୍ଥାନ

ଗୋଷ୍ଠୀ ସଭାଗୃହ/କୃଷକ କ୍ଷେତ୍ର ଓ ବ୍ୟବସାୟ ବିଦ୍ୟାଳୟ ମଞ୍ଚ ଏବଂ ପ୍ରଦର୍ଶନ ପାଇଁ ଚାଷୀର କ୍ଷେତ I

ଦରକାରୀ ସାମଗ୍ରୀ

ପୋଷ୍ଟର, କିଛି ଫସଲ ସୁରକ୍ଷାକାରୀ ବିଷ ଉତ୍ପାଦର ପ୍ୟାକେଟ୍/ବୋତଲ, ସୁରକ୍ଷା ଉପକରଣ, ସ୍ପ୍ରେୟର, ମୁଖା, ଗ୍ଲୋଭ ଇତ୍ୟାଦି I

ସମୟସୀମା

ଶ୍ରେଣୀ କକ୍ଷ ଅଧିବେଶନ- ୩୦ ମିନିଟ୍ | ପ୍ରଦର୍ଶନ – ୬୦ ମିନିଟ୍ |

ପୃଷ୍ଠଭୁମୀ

ବଜାରରେ ମିଳୁଥିବା ସମସ୍ତ ପ୍ରକାର ରାସାୟନିକ କୀଟ ନାଶକ ସଦା ସର୍ବଦା ବିଷାକ୍ତ ହୋଇଥାଏ ଏବଂ ସଜୀବ ପଦାର୍ଥ ଯଥା ମଣିଷ ଏବଂ ଗୃହ ପାଳିତ ପଶୁମାନଙ୍କ ଉପରେ କ୍ଷତିକାରକ ପ୍ରଭାବ ପକାଇଥାଏ I ଏହା ସାଧାରଣ ଚର୍ମ ଜ୍ୱଳନ ଠାରୁ ଆରମ୍ଭ କରି ଅକାଳ ପ୍ରସବ କିମ୍ବା ମଣିଷ ଏବଂ ପଶୁମାନଙ୍କ ମଧ୍ୟରେ କର୍କଟ ରୋଗର କାରଣ ହୋଇପାରେ I ଏହା ଖାଦ୍ୟରେ ରସାୟନର ଅବଶେଷ ଛାଡିଥାଏ ଯାହା ମଣିଷ ଏବଂ ଗୃହ ପାଳିତ ପଶୁମାନଙ୍କ ଭିତରେ ପହଞ୍ଚି ଥାଏ I ଏହାଛଡା, ପରିବେଶରେ ଥିବା ଅନ୍ୟାନ୍ୟ ଅଣ-ଲକ୍ଷ୍ୟ ସଜୀବ ପଦାର୍ଥ ଉପରେ ମଧ୍ୟ ଏହାର ପ୍ରଭାବ ପଡିଥାଏ I ପ୍ରଶିକ୍ଷଣ ଟୁଲ୍ ଚାଷୀମାନଙ୍କୁ ସବୁଠାରୁ ଅଧିକ ମହତ୍ୱପୂର୍ଣ୍ଣ ସୁରକ୍ଷାର ଦିଗ, ଯଥା ନିଜ ବିଲରେ ଫସଲ ସୁରକ୍ଷାକାରୀ ବିଷ ଉତ୍ପାଦର ପ୍ରୟୋଗ ସମୟରେ ସାବଧାନତା ଗ୍ରହଣ ବିଷୟରେ ଶିକ୍ଷା ଦାନ କରିବ ।

ସୋପାନ-ପର-ସୋପାନ କାର୍ଯ୍ୟକ୍ରମ

ସୋପାନ -: ପ୍ରାରମ୍ଭିକ ଅଭ୍ୟାସ: ଆଲୋଚନାକୁ ଆରମ୍ଭ କରି ଚାଷୀମାନଙ୍କୁ ପଚାରନ୍ତୁ ଯେ ନିଜ ଜମିରେ ଫସଲ ସୁରକ୍ଷାକାରୀ ବିଷ ପ୍ରୟୋଗ କଲାବେଳେ ସେମାନେ କେଉଁ ପ୍ରକାର ସୁରକ୍ଷା ଉପାୟ ଅନୁସରଣ କରିଥାଆନ୍ତି I ଏହାସହ କୁହନ୍ତୁ ଯେ ଫସଲ ସୁରକ୍ଷାକାରୀ ବିଷର ସଂସ୍ପର୍ଶରେ ଆସିଲେ ଚର୍ମ ଜ୍ୱଳନ ସହ ଅନେକ ପ୍ରକାର ରୋଗ ହେବାର ଆଶଙ୍କା ଥାଏ I

ସୋପାନ -: ଫସଲ ସୁରକ୍ଷାକାରୀ ବିଷ ପ୍ରୟୋଗ ସମୟରେ ସାବଧାନତା: ଫସଲ ସୁରକ୍ଷାକାରୀ ବିଷର ପ୍ରୟୋଗ ସମୟରେ ସତର୍କତା ଅବଲମ୍ବନ କରିବାର ଆବଶ୍ୟକତାକୁ ଚାଷୀମାନଙ୍କୁ ବୁଝାନ୍ତୁ:

  • ଫସଲ ରକ୍ଷାକାରୀ ରସାୟନର ପ୍ରୟୋଗ ସମୟରେ ଏହାକୁ କିପରି ସଞ୍ଚାଳନ କରିବେ: ଉତ୍ପାଦକୁ ମାପିବା ଏବଂ ସ୍ଥାନାନ୍ତର କରିବା ପାଇଁ ଉପଯୁକ୍ତ ଉପକରଣ ବ୍ୟବହାର କରନ୍ତୁ I ହାତକୁ କେବେହେଲେ ସୁଦ୍ଧା ମାପିବା ପାଇଁ କିମ୍ବା ମିଶ୍ରଣକୁ ଘାଣ୍ଟିବା ପାଇଁ ବ୍ୟବହାର କରନ୍ତୁ ନାହିଁ I ଫସଲ ସୁରକ୍ଷାକାରୀ ବିଷକୁ ମିଶ୍ରଣ କରିବା, ଢାଳିବା ଏବଂ ପୂରଣ କରିବା ସମୟରେ ହାତରେ ସବୁବେଳେ ଗ୍ଲୋବ ବ୍ୟବହାର କରନ୍ତୁ I ସାଧାରଣ ଭାବେ, ଶରୀରକୁ ଆବୃତ କରିବା ପାଇଁ ଏକ ଆପ୍ରୋନ ବ୍ୟବହାର କରାଯାଇପାରେ ଏବଂ ଆଖିକୁ ସୁରକ୍ଷା ଦେବାପାଇଁ ଏକ ଚଷମା ମଧ୍ୟ ବ୍ୟବହାର କରିହେବ I
  • ସ୍ପ୍ରେୟରରେ ଭର୍ତ୍ତୀକରିବା ପୂର୍ବରୁ ସଠିକ ପରିମାଣର ମିଶ୍ରଣ ପ୍ରସ୍ତୁତ କରନ୍ତୁ: ପ୍ରସ୍ତୁତ ମିଶ୍ରଣର ପରିମାଣ ସବୁବେଳେ ଜମିର ଆୟତନ ଅନୁଯାୟୀ ଏବଂ ବିଶେଷଜ୍ଞଙ୍କ ଅନୁମୋଦିତ ମାତ୍ରା ଉପରେ ପର୍ଯ୍ୟବେସିତ ହେବା ଉଚିତ I ମିଶ୍ରଣକୁ ଢାଲିଲା ସମୟରେ କିମ୍ବା ଗାଢ ଉତ୍ପାଦକୁ ମିଶ୍ରଣ କଲାବେଳେ ସତର୍କ ରୁହନ୍ତୁ ଯେପରିକି ଏହା ଚର୍ମ ଉପରେ କିମ୍ବା ପିନ୍ଧା ଲୁଗା ଉପରେ ଢାଳି କିମ୍ବା ଚହଲିଯାଇ ପଡି ନ ଯାଏ I ଯଦି ଉତ୍ପାଦ କିମ୍ବା ମିଶ୍ରଣର କିଛି ଅଂଶ ଚର୍ମ ଉପରେ କିମ୍ବା ଆଖି ଭିତରେ ଅଜାଣତରେ ପଡିଯାଇଥାଏ, ତେବେ ଏହାକୁ ଯେତେ ଶୀଘ୍ର ସମ୍ଭବ ଧୋଇ ଦିଅନ୍ତୁ I ଅଧିକ ପରିମାଣରେ ମିଶ୍ରଣ ପଡିଯାଇଥିବା ଲୁଗାକୁ ସାଙ୍ଗେ ସାଙ୍ଗେ ବାହାର କରିଦେଇ ସାବୁନ ଓ ପାଣିରେ ସଫା କରିବା ଦରକାର I
  • କ୍ଷରିତ ହେଉଥିବା କିମ୍ବା ଖରାପ ଉପକରଣ ବ୍ୟବହାର କରନ୍ତୁ ନାହିଁ: ଫସଲ ଉପରେ ଔଷଧକୁ ପ୍ରୟୋଗ କରିବା ପାଇଁ ଉପଯୁକ୍ତ ଉପକରଣ ବ୍ୟବହାର କରିବା ଉଚିତ ଏବଂ ଏହାକୁ ଠିକ ଭାବେ ରକ୍ଷଣାବେକ୍ଷଣ କରାଯାଉଥିବା ଉଚିତ I କୌଣସି ସମୟରେ କ୍ଷରିତ ହେଉଥିବା ଉପକରଣ ବ୍ୟବହାର କରନ୍ତୁ ନାହିଁ କାରଣ ଏହା ଦ୍ୱାରା ଔଷଧ ଚର୍ମ କିମ୍ବା ଲୁଗା ଉପରେ ପଡିବାର ଆଶଙ୍କା ଥାଏ I ଜାମ ହୋଇଯାଇଥିବା ସ୍ପ୍ରେୟର ମୁହଁକୁ ପାଟିରେ ଫୁଙ୍କି ସଫା କରିବାକୁ ଚେଷ୍ଟା କରନ୍ତୁ ନାହିଁ I ଏହାକୁ ପାଣି କିମ୍ବା କୁଟା ସାହାଯ୍ୟରେ ସଫା କରନ୍ତୁ I
  • ଅତି ଅଧିକ ତାପମାତ୍ରାଥିଲେ ଫସଲ ସୁରକ୍ଷାକାରୀ ବିଷ ପ୍ରୟୋଗ କରନ୍ତୁ ନାହିଁ: ଗରମ ଏବଂ ଆଦ୍ର ପାଣିପାଗରେ ସିଞ୍ଚନ କଲେ ଅଧିକ ରକ୍ଷାତ୍ମକ ପୋଷାକ ପିନ୍ଧିବାକୁ ପଡିଥାଏ ଯାହା ଅତ୍ୟଧିକ କ୍ଲେଶ ଏବଂ ଶାରୀରିକ ପୀଡା ସୃଷ୍ଟି କରିଥାଏ I ଯଦି ସମ୍ଭବ ହୁଏ, ତେବେ ଦିନର ଅପେକ୍ଷାକୃତ କମ ଗରମ ରହୁଥିବା ସମୟରେ ଏହାକୁ ସିଞ୍ଚନ କରନ୍ତୁ କାରଣ ଏହି ସମୟରେ ହାଲୁକା ରକ୍ଷାତ୍ମକ ପୋଷାକ ପିନ୍ଧି ସିଞ୍ଚନ କରିହେବ I
  • ବାୟୁ ପ୍ରବାହର ପ୍ରତିକୂଳ ଦିଗରେ ସିଞ୍ଚନ କରନ୍ତୁ ନାହିଁ: ମିଶ୍ରଣକୁ ସବୁବେଳେ ବାୟୁ ପ୍ରବାହର ଅନୁକୂଳ ଦିଗରେ ସିଞ୍ଚନ କରନ୍ତୁ ଏବଂ ଏହାର ପ୍ରତ୍ୟକ୍ଷ ସଂସ୍ପର୍ଶକୂ ଏଡାନ୍ତୁ I ତାଜାଭାବେ ସିଞ୍ଚିତ ହୋଇଥିବା ପତ୍ରର ସଂସ୍ପର୍ଶକୂ ମଧ୍ୟ ଏଡାନ୍ତୁ I
  • ଖାଇବା, ପିଇବା କିମ୍ବା ଧୂମ ପାନ କରିବା ପୂର୍ବରୁ ହାତ ଆଉ ମୁହଁ ଭଲକରି ଧୁଅନ୍ତୁ: ଫସଲ ସୁରକ୍ଷାକାରୀ ବିଷ ପ୍ରୟୋଗ କରି ସାରିଲା ପରେ ହାତ, ମୁହଁ ଏବଂ ଲୁଗାପଟାକୁ ସାବୁନ ଓ ପାଣି ବ୍ୟବହାର କରି ସଫା କରନ୍ତୁ I
  • ଫସଲ ସୁରକ୍ଷାକାରୀ ବିଷ ପ୍ରୟୋଗ କରି ସାରିବା ପରେ ସ୍ନାନ କରନ୍ତୁ ଏବଂ ନିଜର ଲୁଗା ପଟା ସଫା କରନ୍ତୁ: ଫସଲ ସୁରକ୍ଷାକାରୀ ବିଷର ପ୍ରୟୋଗ ସମୟରେ ପିନ୍ଧିଥିବା ଲୁଗାପଟାକୁ ଅନ୍ୟ ପୋଷାକପତ୍ର ସହ ମିଶାନ୍ତୁ ନାହିଁ I ସବୁବେଳେ ଏହାକୁ ଅଲଗା ସଫାକରିବା ଉଚିତ I ଜଳକୁ ଦୂଷିତ ନ କରିବା ପାଇଁ ଲୁଗାପଟା କୌଣସି ଜଳର ଉତ୍ସ ନିକଟରେ ଯଥା ଝରଣା କିମ୍ବା ପୋଖରୀ ପାଖରେ ସଫା କରନ୍ତୁ ନାହିଁ I
  • ଗର୍ଭବତୀ ମହିଳା, ଅସୁସ୍ଥ ଥିବା ବ୍ୟକ୍ତି ଏବଂ ପିଲାମାନେ ଫସଲ ସୁରକ୍ଷାକାରୀ ବିଷ ପ୍ରୟୋଗ କରିବା ଉଚିତ ନୁହେଁ: ଗର୍ଭବତୀ ମହିଳା, ଅସୁସ୍ଥ ଥିବା ବ୍ୟକ୍ତି ଏବଂ ପିଲାମାନେ ଫସଲ ସୁରକ୍ଷାକାରୀ ବିଷ କୌଣସି ପରିସ୍ଥିତିରେ ମଧ୍ୟ ପ୍ରୟୋଗ କରିବା ଉଚିତ ନୁହେଁ I ବିଶେଷତଃ, ଗର୍ଭବତୀ ମହିଳାମାନେ ଫସଲ ସୁରକ୍ଷାକାରୀ ବିଷର ସଂସ୍ପର୍ଶରେ ଆସିଲେ ଗର୍ଭସ୍ଥ ଶିଶୁ ଉପରେ କୁପ୍ରଭାବ ପଡିଥାଏ I
  • ଅମଳ କରିବାର ଠିକ କିଛି ଦିନ ପୂର୍ବରୁ ଫସଲ ରକ୍ଷାକାରୀ ରସାୟନ ପ୍ରୟୋଗ କରନ୍ତୁ ନାହିଁ: ସବୁବେଳେ ଫସଲ ସୁରକ୍ଷାକାରୀ ବିଷ ପ୍ରୟୋଗ କରିବାର କିଛିଦିନ ପର୍ଯ୍ୟନ୍ତ ସଶ୍ୟ, ଡାଲି, ପନିପରିବା ଏବଂ ଫଳ ଉପରେ ଏହାର ବିଷାକ୍ତତା ପ୍ରଭାବ ରହିଥାଏ I ତେଣୁ ଅମଳର ଠିକ ପୂର୍ବରୁ ଏହାକୁ ପ୍ରୟୋଗ କରିବା ଉଚିତ ନୁହେଁ କାରଣ ଉପଭୋକ୍ତାଙ୍କୁ ଏହା ପ୍ରଭାବିତ କରିପାରେ I

ଉପସଂହାର

ଅଧିବେଶନର ଶେଷ ଆଡକୁ ଅଂଶଗ୍ରହଣକାରୀମାନଙ୍କ ମନରେ ଥିବା ସମସ୍ତ ସନ୍ଦେହକୁ ଦୂର କରନ୍ତୁ I ଏହାପରେ ଚାଷୀମାନଙ୍କ ଠାରୁ ପ୍ରତିଶୃତି ଆଣନ୍ତୁ ଯେ ସେମାନେ ଫସଲ ସୁରକ୍ଷାକାରୀ ବିଷ ପ୍ରୟୋଗ କରିବା ବେଳେ ସୁରକ୍ଷା ଉପାୟ ସବୁ ଗ୍ରହଣ କରିବେ ଏବଂ ଉଚିତ ଭାବେ ଆବଶ୍ୟକତା ଅନୁଯାୟୀ ଏହାକୁ ପ୍ରୟୋଗ କରିବେ I ଏଥି ସହିତ ଏହି ଅଧିବେଶନକୁ ସମାପ୍ତ କରନ୍ତୁ I

ଆଧାର – ପୋର୍ଟାଲ ଟିମ

4.0
ଆପଣଙ୍କର ପରାମର୍ଶକୁ ପୋଷ୍ଟ କରନ୍ତୁ

( ଯ଼ଦି ଆପଣଙ୍କର କିଛି କମେଣ୍ଟ / ପରାମର୍ଶ ଉକ୍ତ ବିଷଯ଼ବସ୍ତୁକୁ ନେଇ ରହିଛି ତେବେ ଦଯାକରି ତାହାକୁ ଏଠାରେ ପୋଷ୍ଟ କରନ୍ତୁ

Enter the word
ନେବିଗତିଓଂ
Back to top