ଆମ ରାଜ୍ୟର ଅଧିକାଂଶ ଜମିରେ 'ସୋଲାନାସି' ଜାତୀୟ ପରିବା ବା ବିଲାତି ବାଇଗଣ, ଲଙ୍କା, ଆଳୁ, କ୍ୟାପସିକମ୍ ବହୁ ମାତ୍ରାରେ ଚାଷ କରାଯାଏ ।
ଅଧିକାଂଶ ସମୟରେ ଏହି ପରିବାରେ ଝାଉଁଳା ରୋଗ ଦେଖାଯାଉଥିବାରୁ ଚାଷୀକୁ ମଧ୍ୟ କ୍ଷତି ସହିବାକୁ ପଡିଥାଏ । ଏନେଇ ଝାଉଁଳା ରୋଗ ବିଷୟରେ ଜାଣି ତାର' ଉପଯୁକ୍ତ ପ୍ରତିକାର କରିବା ଆବଶ୍ୟକ ।
ଝାଉଁଳା ରୋଗ ମୁଖ୍ୟତଃ ତିନି ପ୍ରକାରର । ସୂତ୍ରକୃମି ଜନିତ ଝାଉଁଳା, କବକ ଜନିତ ଝାଉଁଳା ଏବଂ ବୀଜାଣୁ ଜନିତ ଝାଉଁଳା ।
ସୂତ୍ର ଜୀବଗୁଡିକ ସୂତା ଭଳି ଦେଖାଯାଉଥିବା କୃମିଜାତୀୟ ଜୀବ । ଏମାନେ ଖାଲି ଆଖିରେ ଦେଖାଯାଆନ୍ତି ନାହିଁ । ଏମାନେ ସୋଲାନାସି ଜାତୀୟ ପରିବା ଗଛର ଚେରରେ ଗଣ୍ଠି ସୃଷ୍ଟି କରନ୍ତି । ଗଣ୍ଠି ମଧ୍ୟରେ ଗଛର ଜଳୀୟ ଅଂଶ ଓ ଖାଦ୍ୟ ଶୋଷଣ କରନ୍ତି।
ଲକ୍ଷଣ : ଗଛର ଚେରରେ ଗଣ୍ଠି ଦେଖାଯାଏ । ଗଛ ଦିନ ବେଳେ ଝାଉଁଳି ପଡ଼ୁଥିବା ବେଳେ ରାତିରେ ପୁଣି ସତେଜ ହୋଇଯାଏ । ସୂତ୍ର ଜୀବର ବଂଶବୃଦ୍ଧି ହେଲେ ଶେଷ ଭାଗରେ ଗଛ ମରିଯାଏ ।
ପ୍ରତିକାର: ଜମି ପ୍ରସ୍ତୁତି ସମୟରେ ଜମିରେ ଫ୍ୟୁରାଡନ୍ କିମ୍ବା ନିମାଗନ୍ ପ୍ରୟୋଗ କରନ୍ତୁ । ବିଲାତି ବାଇଗଣ, ଲଙ୍କା ଆଦି ଲଗାଇବା ଜମିରେ ମଝିରେ ମଝିରେ ଗେଣ୍ଡୁ ଲଗାନ୍ତୁ । ସୂତ୍ରଜୀବୀ ସହଣୀ କିସମ ଜମିରେ ଲଗାନ୍ତୁ । ନିମାଗନ୍୨ ମିଲି.ଲିଟର ହିସାବରେ ମାଟିକୁ ଓଦା କରନ୍ତୁ ।
ଏହା ମାଟିରେ ଥିବା ଫ୍ୟୁଜାରିୟମ୍ କବକ ଦ୍ଵାରା ହୋଇଥାଏ । କବକ ଗୁଡିକ ଗଛର କୌଣସି ଦୁର୍ବଳ ଅଂଶ ଦେଇ ଗଛରେ ପ୍ରବେଶ କରନ୍ତି ଓ ଗଛରେ ଥିବା ଖାଦ୍ୟ ପରିବହନ ବ୍ୟବସ୍ଥା (ଜାଇଲେମ୍, ଫ୍ଲୋଏମ୍.)କୁ ବନ୍ଦ କରିଦିଅନ୍ତି । ଯାହା ଫଳରେ ଗଛ ଝାଉଁଳିଯାଏ ।
ଲକ୍ଷଣ: ପତ୍ରଗୁଡିକ ହଳଦିଆ ପଢିଯାଏ ଓ ଧୀରେ ଧୀରେ ଝାଉଁଳେ । ସମ୍ପୂର୍ଣ୍ଣ ଗଛ ନଝାଉଁଳି କେବଳ ଗୋଟିଏ ବା ଦୁଇଟି କାଣ୍ଡ ବା ଆଶିକ ଝାଉଁଳା ମଧ୍ୟ ପରିଲକ୍ଷିତ ହୁଏ । ମାଟିରେ ଛୁଇଁଥିବା କାଣ୍ଡକୁ ଭଙ୍ଗି ଦେଖିଲେ ସେଥିରେ କର୍କ ଭଳି ଦେଖାଯାଏ ଓ କାଣ୍ଡ ଶୁଖିଲା ଓ ଟାଣ ଥାଏ ।
ପ୍ରତିକାର: ସାହଣୀ କିସମ ଲଗାନ୍ତୁ, ଜମିରେ ଅମ୍ଳତା ୬-୭ ମଧ୍ୟରେ ରଖନ୍ତୁ । ମାନକୋଜେବ୍ ୨ ଗ୍ରା/ଲି କିମ୍ବା ମେଟାଲାକ୍ସିଲ୍ + ମାନ୍କୋଜେବ୍ (ରିଡୋମିଲ) ୧ ଗ୍ରା/ଲି ଗଛରେ ସ୍ପ୍ରେ କରନ୍ତୁ ।
ମୃତ୍ତିକା ସଂକ୍ରମିତ ବୀଜାଣୁ ଦ୍ଵାରା ଏହା ହୋଇଥାଏ । ବୀଜାଣୁ ଗୁଡିକ ଗଛର ଚେରରେ ପ୍ରବେଶ କରି ଗଛର କୋଷଗୁଡିକୁ ଆକ୍ରମଣ କରିବା ଦ୍ଵାରା ଚେର ପଚିଯାଏ ।
ଲକ୍ଷଣ: ଚେରଗୁଡିକ ସଢିଯାଏ । ଚେରକୁ ଚିପିଲେ। ସେଥିରୁ ପାଣି ବାହାରେ ଓ ଦୁର୍ଗନ୍ଧ ହୁଏ । ଆକ୍ରାନ୍ତ ଗଛକୁ ମୂଳରୁ କାଟି ସଫା କାଚ ଗ୍ଳାସରେ ପାଣିରେ ପକାଇଲେ ସେଥିରୁ ଧଳା ରଙ୍ଗର ପୂଜ ବାହାରିଲା ପରି ଦେଖାଯାଏ । ଗଛଗୁଡିକ ସମ୍ପୁର୍ଣ୍ଣ ମରିଯାଆନ୍ତି ଓ ଏହା ଅକସ୍ମାକ ହୋଇଥାଏ।
ପ୍ରତିକାର: ଫସଲ ପର୍ଯ୍ୟାୟ ଅବଲମ୍ବନ କରନ୍ତୁ । ଜମିରେ ପାଣି ଜମି ରହିବାକୁ ଦିଅନ୍ତୁ ନାହିଁ । ପ୍ଲାଣ୍ଟୋମାଇସିନ୍ ୧ ଗ୍ରାମ/ ଲିଟର କିମ୍ବା ଷ୍ଟେପଟୋସାଇକ୍ଳିନ୍ ୧୦ ଲିଟର ପାଣିରେ ୧ ଗ୍ରାମ୍ ହିସାବରେ ସ୍ପ୍ରେ କରନ୍ତୁ । ବେଳେ ବେଳେ ସମସ୍ତ ପ୍ରକାରର ଝାଉଁଳା ମିଶି ଏକା ସାଙ୍ଗରେ ଗଛକୁ ଆକ୍ରାନ୍ତ କରିଥାଏ । ସେ କ୍ଷେତ୍ରରେ ୨-୩ ପ୍ରକାର ଔଷଧ ମିଶାଇ ସିଞ୍ଚନ କରିବାକୁ ପଡେ । ସୂତ୍ରଜୀବ ଆକ୍ରମଣ କରିବା ଫଳରେ ସେହି ଦୁର୍ବଳ ଅଂଶ ଦେଇ କବକ ଓ ବୀଜାଣୁ ଗଛ ମଧ୍ୟକୁ ପ୍ରବେଶ କରନ୍ତି ଓ ଆକ୍ରମଣ କରନ୍ତି ।
ଜମି ପ୍ରସ୍ତୁତି ସମୟରେ ମୃତ୍ତିକା ବିଶୋଧନ ଫର୍ମାଲିନ୍ କିମ୍ବା ସୂର୍ଯ୍ୟକିରଣ ଦ୍ଵାରା କରନ୍ତୁ।
ସଂଗୃହିତ - ତପନ କୁମାର ଗିରି ଗବେଷଣାରତ ଛାତ୍ର, ଓୟୁଏଟି
Last Modified : 1/16/2020