অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ସୂର୍ଯ୍ୟ ମୁଖୀ

ଉପକ୍ରମ

ପୂର୍ବେ ଉଦ୍ୟାନର ଶୋଭାବର୍ଦ୍ଧନ ପାଇଁ ଲଗାଯାଉଥିଲା  । କିନ୍ତୁ ବର୍ତ୍ତମାନ ତୈଳବୀଜ ଫସଲ ହିସାବରେ ଭାରତ ବର୍ଷର ରାଜସ୍ଥାନ, ଗୁଜୁରାଟ, କର୍ଣ୍ଣାଟକ, ତାମିଲନାଡୁ, ହରିଆନା, ଆନ୍ଧ୍ରପ୍ରଦେଶ, ପଞ୍ଜାବ ଓ ବିହାର ପ୍ରଭୃତି ପ୍ରଦେଶରେ ବହୁଳଭାବେ ଚାଷ ହେଉଛି  । ଓଡିଶାରେ ଅଳ୍ପ ଜମିରେ ସୂର୍ଯ୍ୟମିଖି ଚାଷ କରାଯାଉଛି   । ଏଥିରେ ଶତକଡା ୪୫-୫୦ ଭାଗ ତୈଳ ଅଂଶ ଅଛି   । ସୂର୍ଯ୍ୟମୁଖୀ କମ୍ ଦିନରେ ଅମଳ ହୁଏ ଓ ଆଲୋକ ଅସମ୍ବେଦୀ  । ଏହି ଫସଲ ମରୁଡି ସହିପାରେ  । ଏହା ବର୍ଷସାରା ଚାଷ କରାଯାଇ ପାରିବ   । ଏହା ମଧ୍ୟବର୍ତ୍ତୀ ଫସଲ ରୂପେ ମଧ୍ୟ ଚାଷ କରାଯାଏ  । ଏହାର ତୈଳ ଫିକା ହଳଦିଆ ରଙ୍ଗର ରୋଷେଇ କରିବା ପାଇଁ ଅନ୍ୟାନ୍ୟ ତେଲ ଠାରୁ କେତେକ ଗୁଣରେ ଉତ୍ତମ  । ସୂର୍ଯ୍ୟମୁଖୀ ତେଲରୁ ଡାଲଡା ମଧ୍ୟ ତିଆରି କରାଯାଏ  । ସୂର୍ଯ୍ୟମୁଖୀ ତେଲରେ ୬୪% ଲିନୋନିକ୍ ଅମ୍ଳ ରହିଛି ଯାହାକି ହୃଦୟର ଶିରା ପ୍ରଶିରାରୁ କୋଲେଷ୍ଟର ଧୋଇଦିଏ  । ଏଣୁ ଏହି ତେଲ ହୃଦରୋଗୀମାନଙ୍କ ପାଇଁ ବହୁତ ଉପାଦେୟ   । ବିଭିନ୍ନ ପ୍ରକାର ପ୍ରସାଧନ ଓ ସାବୁନ ତିଆରି କରିବା ପାଇଁ ଏହି ତେଲ ବ୍ୟବହାର ହୁଏ  । ସୂର୍ଯ୍ୟମୁଖୀ ପିଡିଆରେ ୪୦-୪୪% ଉଚ୍ଚମାନର ପୁଷ୍ଟିସାର ରହିଛି   । ଏଣୁ ଗୋଖାଦ୍ୟ ଓ କୁକୁଡା ଖାଦ୍ୟ ରୂପେ ଏହା ବ୍ୟବହାର ହୁଏ  । ଏଥିରୁ ବିଭିନ୍ନ ପ୍ରକାର ଶିଶୁ ଖାଦ୍ୟ ତିଆରି ହୁଏ  । ସୂର୍ଯ୍ୟମୁଖି ମଞ୍ଜି ଭାଜି କରି ମଧ୍ୟ ଖାଆନ୍ତି   ।

ଉଦ୍ଭବ କେନ୍ଦ୍ର

ଯୁକ୍ତରାଷ୍ଟ୍ର ଆମେରିକା ଏବଂ ମେକ୍ସିକୋ ଏହାର ଉଦ୍ଭବ କେନ୍ଦ୍ର  ।

କ୍ଷେତ୍ରଫଳ ଓ ବଣ୍ଟନ :

ପୃଥିବୀର ମୁଖ୍ୟ ସୂର୍ଯ୍ୟମୁଖୀ ଉତ୍ପାଦନ କରୁଥିବା ଦେଶଗୁଡିକ ହେଲା – ସୋଭିଏତ ଦେଶ, ଯୁକ୍ତରାଷ୍ଟ୍ର ଆମେରିକା, ଆର୍ଜେଣ୍ଟିନା, ରୋମାନିଆ, ସ୍ପେନ, ଯୁଗୋସ୍ଲୋଭିଆ, ତୁର୍କୀ ଏବଂ ଦକ୍ଷିଣ ଆମେରିକା, ଭାରତରେ ଏହି ଫସଲ ତୈଳବୀଜ ଉତ୍ପାଦନ ପାଇଁ ୧୯୬୯ରୁ ଚାଷ ହେଉଛି   । ବର୍ତ୍ତମାନ ଭାରତରେ ୩,୮୮,୦୦୦ ହେକ୍ଟର ଜମିରେ ସୂର୍ଯ୍ୟମୁଖୀ ତୈଳବୀଜ ଉତ୍ପାଦନ ପାଇଁ ଚାଷ କରାଯାଉଛି   ।

ସୂର୍ଯ୍ୟମୁଖୀର ଶ୍ରେଣୀ ଭିଭାଗ:

ସୂର୍ଯ୍ୟମୁଖୀ – କମ୍ପୋଜିଟ ପରିବାର ଭୁକ୍ତ  । ପ୍ରଜାତି ‘ହେଲିଆନ୍ଥସ୍’  । ଏହି ପ୍ରଜାତିର ୧୬୪ ଜାତି ରହିଛି  । କିନ୍ତୁ ଭାରତ ଓ ସୋଭିଏତ ରୁଷରେ ଚାଷ କରାଯାଉଥିବା ବିହନ କିସମଗୁଡିକୁ ତିନିଭାଗରେ ବିଭକ୍ତ କରାଯାଇଛି   । ଯଥା : -

  1. କ୍ଷୁଦ୍ରାକୃତି ବୀଜ କିସମ ବଗିଚା ଶୋଭାବର୍ଦ୍ଧନ କରେ   ।
  2. ବୃହଦାକୃତି ଧଳାବୀଜ କିସମ ତୈଳପ୍ରଦ ସୂର୍ଯ୍ୟମୁଖୀ  ।
  3. ମଧ୍ୟମାକୃତି ବୀଜ ତୈଳପ୍ରଦ  ।

ଉଦ୍ଭିଦ ବର୍ଣ୍ଣନା :

କାଣ୍ଡ :

ସୂର୍ଯ୍ୟମୁଖୀ ଗଛ ଏକ ଋତ୍ଵିକ, କାଣ୍ଡ – ଶାକୀୟ ଉଚ୍ଚତା ୧.୫ ରୁ ୬ ମିଟର ପର୍ଯ୍ୟନ୍ତ ହୋଇପାରେ   । କାଣ୍ଡର ବ୍ୟାସ ୨.୫ ରୁ ୭.୫ ସେ.ମି. ହୋଇଥାଏ   । କାଣ୍ଡ – ରୁକ୍ଷ – ଲୋମଶ ବା ଖରଲୋମ, ସାଧାରଣତଃ ଶାଖା ପ୍ରଶାଖା ନଥାଏ ଏବଂ କାଣ୍ଡ ଗୋଟିଏ ମୌଳିକ ରେ ଶେଷ ହୋଇଥାଏ   ।

ପତ୍ର :

ପତ୍ରଗୁଡିକ ସରଳ, ଏକାନ୍ତର, ମୋଟା, ଡେମ୍ଫଯୁକ୍ତ – କେତାକାଂଶରେ ବର୍ଚ୍ଛାକାର, ୫-୨୫ ସେ.ମି. ଲମ୍ବା ପତ୍ରଗୁଡିକର ଉଭୟ ପାର୍ଶ୍ଵ - ଅନିୟମିତ ଭାବେ ଦନ୍ତୁରିତ ଧାର  ।

ପୁଷ୍ପ ସ୍ତବକ :

ସ୍ତବକଟି ଗେଣ୍ଡୁ ପରିବାରଭୁକ୍ତ ସୂର୍ଯ୍ୟମୁଖୀ ପୂର୍ବ ପୁଂପକ୍ଵ ଯେଉଁଥିରେ ପୁଂ ଅଂଶ ଓ ସ୍ତ୍ରୀ ଅଂଶ ଭିନ୍ନ ଭିନ୍ନ ସମୟରେ ପରିପକ୍ଵ ହୁଏ  । ପୁଂ ଓ ସ୍ତ୍ରୀ ଅଂଶ ମଧ୍ୟରେ ୧୮ – ୨୪ ଘଣ୍ଟା ଫରକ ରହେ  । ଏଣୁ ପୁଷ୍ପ ପରାଗରାଗ ଧର୍ମୀ  । ପୀଠ ପୁଷ୍ପ ପୂର୍ବ ପୁଂପକ୍ଵ  । ପରାଗ ପେଟୀ ନଳୀ ପାଖୁଡା ବାହାରକୁ ବାହାରିଥାଏ  । ପରାଗ ପେଟୀ ନଳୀରୁ ପରାଗରେଣୁ ଝଡେ  । ଫୁଲମୂଳରେ ମହୁଥାଏ   । ମହୁ ସଂଗ୍ରହ ବେଳେ ମହୁମାଛି ଦ୍ଵାରା ପରାଗ ସଙ୍ଗମ ହୁଏ, ସ୍ପପରାଗ ଧର୍ମୀ ହୋଇନଥିବାରୁ ଏବଂ ଏନେକ ଫୁଲରେ ଗର୍ଭପାତ ଯୋଗୁଁ ମଞ୍ଜି ଧରିପାରେ ନାହିଁ, ଫମ୍ପା ହୋଇଯାଏ  । ଫୁଲ ଗୁଡକା ହଳଦିଆ ରଙ୍ଗ  । ହେଡ ୧୦ – ୧୫ ସେ.ମି. ବ୍ୟାସ  । ଗୋଟିଏ ହେଡରେ ୩୫୦-୨୦୦୦ ପର୍ଯ୍ୟନ୍ତ ମଞ୍ଜି ହୁଏ   । ମଞ୍ଜିଗୁଡିକ ୧.୫ ସେ.ମି. ଲମ୍ବା ମୂଳ ଗୋଜିଆ ଏବଂ ଶେଷ ଗୋଲିଆ  । ମଞ୍ଜିର ଗଣ୍ଡି ଧଳା ବା କଳା ବା କଳା ଓ ଧଳା ଡୋର ଥାଏ   ।

ଋତୁ ଓ ଜଳବାୟୁ :

ଗଜା ହେବା ଓ ପ୍ରାଥମିକ ବୃଦ୍ଧି ସମୟରେ ଥଣ୍ଡା ପାଗ ଦରକାର  । ତଳିଗୁଡିକ ୪-୬ ପତ୍ର ପର୍ଯ୍ୟନ୍ତ ମୃଦୁ କରକାପାତ ସହିପାରେ   । ତଳି ପରଠାରୁ ଫୁଲ ଓ ଫଳ ପର୍ଯ୍ୟନ୍ତ ଗରମ ଓ ଖରାପାଗ ଦରକାର  । ଅଧିକ ଆଦ୍ରତା, ମେଘୁଆପାଗ ଏବଂ ଅଧିକ ବର୍ଷା ଫୁଲ ହେବା ସମୟରେ ମଞ୍ଜି ଗଠନରେ ବାଧା ସୃଷ୍ଟିକରେ  । ପରିପକ୍ଵ ଅବସ୍ଥାରେ ଅତ୍ୟଧିକ ଉତ୍ତାପ ହେଲେ ଲିନୋଲିକ୍  ଅମ୍ଳ ଭାଗ କମିଯାଏ  । ସୂର୍ଯ୍ୟମୁଖୀ ଆଲୋକ ଅସମ୍ବେଦି ଫସଲ  । ଏଣୁ ବର୍ଷର ଯେ କୌଣସି ସମୟରେ ଚାଷ କରାଯାଇ  ପାରିବ   । ଏହି ଫସଲଟି ୮୦-୯୦ ଦିନ ଭିତରେ ଖରିଫରେ ହୁଏ  । ୧୦୫-୧୩୦ ଦିନରେ ରବି ଋତୁରେ ହୁଏ ଏବଂ ୧୦୦ – ୧୧୦ ଦିନ ଭିତରେ ବସନ୍ତ ଋତୁରେ ହୁଏ   । ସୂର୍ଯ୍ୟମୁଖୀ ମରୁଡି ସହଣି ଫସଲ ଓଡିଶାର ଜଳବାୟୁରେ ସୂର୍ଯ୍ୟମୁଖୀ ଖରିଫ ଓ ରବି ଫସଲ ରୂପେ ଚାଷ କରାଯାଇପାରେ  । ଏହି ଫସଲ ଅଧିକ ଗରମ ସହିପାରେ ନାହିଁ   । ବର୍ଷାଦିନେ – ଲଗାତାର ବର୍ଷାଯୋଗୁ – ଜଳବାୟୁର  ଆରଦ୍ରତା ବୃଦ୍ଧି ପାଇଲେ କବକରୋଗ ହୋଇ ଗଛ ସଢିଯାଏ   ।

ମୃତ୍ତିକା :

ବର୍ଷାଦିନେ ସୂର୍ଯ୍ୟମୁଖୀ ଢିପ, ନିଗିଡା ଦୋରସା ଓ ବାଲିଆ ମାଟିରେ ଚାଷ କରାଯାଏ   । ରିବି ଋତୁରେ ଦୋରସା, ପଟୁ ଦୋରସା, ମଟାଳ ଦୋରସା ମାଟିରେ ଭଲ ହୁଏ   । ସନ୍ତସନ୍ତିଆ ଓ ଅମ୍ଳ ମୃତ୍ତିକାରେ ସୂର୍ଯ୍ୟମୁଖୀ ଭଲ ହୁଏ ନାହିଁ   । ସୂର୍ଯ୍ୟମୁଖୀ ଫସଲ ଅଳ୍ପ ଲୁଣା ଜମିରେ ହୋଇପାରେ  । ଏହି ଫସଲ ୬.୫ – ୮.୫ ପି. ଏଚ୍ ରେ ଭଲ ହୁଏ   ।

ସୂର୍ଯ୍ୟମୁଖୀ ବିହନ କିସମ :

କିସମ

ଅମଳ ସମୟ (ଦିନ)

ମଡର୍ଣ୍ଣ

85

ବି.ଏମ.ଏଚ୍. – 1

90

ଇ.ସି. – 78414

90

ଇ.ସି. – 68415

100

ସନରାଇଜ

100

ଲଗାଇବା ସମୟ :

ବର୍ଷାଋତୁ – ଜୁନ୍ – ଜୁଲାଇ

ଶୀତଋତୁ – ଅକ୍ଟୋବର ମଧ୍ୟଭାଗରୁ ନଭେମ୍ବର

ଗ୍ରୀଷ୍ମଋତୁ – ଫେବୃୟାରୀ ଓ ମାର୍ଚ୍ଚ

ଜମି ପ୍ରସ୍ତୁତି :

ସୂର୍ଯ୍ୟମୁଖୀ ଘାସଯୁକ୍ତ ଗୁଣ୍ଡ ଚାଷ ଦରକାର କରେ   । ଜମିରେ ଯଥେଷ୍ଟ ଆଦ୍ରତା ରହିବା ଉଚିତ  । ଏଣୁ ମାଟି ବତର ନଥିଲେ ପାଣି ମଡାଇ ଜମି ପାଗିଗଲେ ଚାଷ ହୁଏ କାରଣ ସୂର୍ଯ୍ୟମୁଖୀ ମଞ୍ଜିର ମୋଟି ଚଷୁ ଭିଡିବା ପାଇଁ ଜମିରେ ଯଥେଷ୍ଟ ବତର ଥିବା ଦରକାର  । ମୋଟା ଚଷୁ ଯୋଗୁଁ ଜଳ ମଞ୍ଜିକୁ ଧୀରେ ଧୀରେ ଭିଜାଏ   । ପ୍ରଥମେ ଚାଷ ଲୁହା ଲଙ୍ଗଳରେ ହୁଏ   । ତାପରେ ଦେଶୀ ଲଙ୍ଗଳରେ ୩-୪ ଓଡ ଚାଷ କରି ମାଟିଗୁଣ୍ଡ କରି ମଇ ଦେଇ ଦାବି ଦିଆଯାଏ  । ଘାସ ବାଛି ସଫା କରାଯାଏ   । ରବି ଋତୁରେ ଜଳସେଚନ ଥିବା ସ୍ଥାନରେ ସୂର୍ଯ୍ୟମୁଖୀ ଚାଷ କରିବା ପୂର୍ବରୁ ଜଳସେଚନ କରି ମାଟି ପାଗିଲେ ଚାଷ କରାଯାଏ   ।

ବିହନ ପରିମାଣ ଓ ବିଶୋଧନ :

ହେକାର ପିଛା ୧୦ କେ.ଜି ବିହନ ଦରକାର  । ପ୍ରତି ବିହନ କେଜି ପିଛା ତିନି ଗ୍ରାମ ହିସାବରେ ଥିରାମ ଗୁଣ୍ଡ ଗୋଳାଇ ବିଶୋଧନ କରାଯାଏ   ।

ବୁଣିବା ପ୍ରଣାଳୀ :

ମାଟିରେ ବତର ଥିବା ସମୟରେ ବିହନ ବୁଣାଯାଏ  । ଧାଡିକୁ ଧାଡି ୪-୫ ସେ.ମି. ଓ ଗଛକୁ ଗଛ ୩୦ ସେ.ମି. ବ୍ୟବଧାନରେ ୪-୫ ସେ.ମି. ଗଭୀର ସିଆରରେ ବିହନ ବୁଣାଯାଏ   ।

ଖତ ଓ ସାର ପ୍ରୟୋଗ :

ହେକ୍ଟର ପିଛା ୫ଟନ୍ ଗୋବର ଖତ ଓ ଶେଷ ଓଡ ଚାଷ ସମୟରେ ପ୍ରୟୋଗ କରି ମାଟିରେ ଭଲଭାବେ  ମିଶାଇ ଦିଆଯାଏ  । ଏହା ବ୍ୟତୀତ ହେକ୍ଟର ପିଛା ନିମ୍ନଲିଖିତ ପରିମାଣ ସାର ପ୍ରୟୋଗ କରାଯାଏ  ।

ଯବକ୍ଷାରଜାନ – ୪୦ କେଜି.

ଫସଫରସ୍  - ୪୦ କେଜି.

ପଟାସ୍  - ୨୦ କେଜି.

ଜଳସେଚିତ ଫସଲରେ ବୁଣିବା ପୂର୍ବରୁ ୫୦% ଯବକ୍ଷାରଜାନ ସବୁତକ ସୁପର ଓ ପଟାସ ସାରକୁ ମିଶାଇ ସିଆରରେ ପ୍ରୟୋଗ ପ୍ରୟୋଗ କରାଯାଏ  । ଗଛ ୩ ସପ୍ତାହ ବେଳକୁ ବାକି ୫୦% ଯବକ୍ଷାରଜାନ ସାର ଘାସ ବାଛି କୋଡା ଖୁସା କରି ପ୍ରୟୋଗ କରାଯାଏ   । ଅଣ ଜଳସେଚିତ ଜମିରେ ଏକା ବେଳକେ ଯବକ୍ଷାରଜାନ ୨୦ କେଜି ଓ ସୁପର ୨୦ କେଜି ମିଶାଇ ଥରେ ମାତ୍ର ବୁଣିବା ସମୟରେ ପ୍ରୟୋଗ କରାଯାଏ  ।

ଘାସ ବଛା ଓ ହିଡ ଟେକା :

ଗଛଗୁଡିକ ୨-୩ ସପ୍ତାହ ବେଳକୁ ଥରେ ଓ ୬ ସପ୍ତାହ ବେଳକୁ ଆଉଥରେ ଏହି ପରି ଦୁଇଥର କୋଡାଖୁସା କରି ଘାସ ବାଛି ହୁଡା ଟେକାଯାଏ   ।

ରାସାୟନିକ ପ୍ରଣାଳୀରେ ତୃଣକ ଦମନ :

ସିରମେଟ୍  ଚାରିକେଜି ହେକ୍ଟର ପିଛା ବିହନ ବୁଣିବା ପୂର୍ବଦିନ ବାଲିରେ ମିଶାଇ ଜମି ବତର ସମୟରେ ଚାରିଆଡେ  ସମାନ ଭାବେ ବୁଣାଯାଏ  । ସିରମେଟ୍ ନମିଳିଲେ ବାସାଲିନ୍ ହେକ୍ଟର ପିଛା ୧ କେଜି ଏ.ଆଇ.୧୦୦୦ ଲିଟର ପାଣିରେ ଗୋଳାଇ ବିହନ ବୁଣିବା ଦିନାକା ପୂର୍ବରୁ ସ୍ପ୍ରେ କରିବା ଉଚିତ୍  ।

ଜଳସେଚନ :

ସୂର୍ଯ୍ୟମୁଖୀ ଫସଲ ମଧ୍ୟମ ଧରଣର ଜଳସେଚନ ଦରକାର କରେ  । ସାଧାରଣତଃ ଖରିଫ ଋତୁରେ ଜଳସେଚନ ଦରକାର  ନାହିଁ   । କିନ୍ତୁ ଅନିୟମିତ ବୃଷ୍ଟିପାତ ଯୋଗୁଁ ଗୋଟିଏ  ଜଳସେଚନ ସମୟେ ସମୟେ ଦରକାର ପଡିପାରେ   । ରବି ସୂର୍ଯ୍ୟମୁଖୀ ଫସଲ ବିହନ ବୁଣିବା ପୂର୍ବରୁ ପ୍ରଥମେ ଜମିରେ ଜଳସେଚନ କରି ଜମି ପାଗିବା ପରେ ଚାଷ କରି ବିହନ ବୁଣାଯାଏ  । ଏହାଦ୍ଵାରା ଜମିରେ ଚାରିଆଡେ  ସମାନ ଭାବେ ଗଛ ଉଠେ  । ତାପରେ ଗଛ ୪-୫ ପତ୍ର ଅବସ୍ଥାରେ ଥରେ ଫୁଲ ଧରିବା ସମୟରେ ଥରେ ଓ ଦାନା ପୂରଣ ହେବା ସମୟରେ ଥରେ ଏହିପରି ତିନିଥର ଜଳସେଚନ କରିବା ଉଚିତ   । ଅର୍ଥାତ ଗଜା ହେବାର ୨୫-୩୦ ଦିନରେ ଥରେ, ୬୦-୬୫ ଦିନରେ ଥରେ ଓ ୮୦-୮୫  ଦିନରେ ଥରେ ଜଳସେଚନ ଦରକାର କରେ  । ଫୁଲ ହେବା ଓ ଦାନା ପୂରଣ ହେବା ସମୟରେ ଜଳାଭାବ ହେଲେ ଫସଲ ସହ୍ୟ କରିପାରେ ନାହିଁ   । ଏହି ସମୟ ସୂର୍ଯ୍ୟମୁଖୀ ଫସଲର ସଂକଟ କାଳ  । ଏହି ସମୟରେ ଅନ୍ୟୁନ ଥରେ ଜଳସେଚନ କରିବା ଉଚିତ   । ଖରାଦିନିଆ  ଫସଲ ପାଇଁ ୧୦-୧୫ ଦିନ ବ୍ୟବଧାନରେ ୬-୭ ଟି ଜଳସେଚନ ଦରକାର ହୋଇଥାଏ   । ସମୟରେ ଗଛ ପଡି ନଯିବା ପାଇଁ ଦାନା ପୂରଣ ହେବା ସମୟରେ ଜଳସେଚନ ହାଲୁକା ହେବା ଦରକାର ଓ ଅପରାହ୍ନରେ ପବନ ବହୁ ନଥିବା ଅବସ୍ଥାରେ କରିବା ଉଚିତ୍  । ସୂର୍ଯ୍ୟମୁଖୀ ଫୁଲ ଫୁଟି ପାକଲା ହେଲେ ସମଗ୍ର ମଣ୍ଡକଟି ଓଜନିଆ ହୋଇ ଗଛ ମୋଡି ହୋଇ ପଡି ଭାଙ୍ଗିଯାଏ  । ଏଣୁ ବଡମୁଣ୍ଡିଆ ଫୁଲ କିସମ ନ ଲଗାଇ ସାନମୁଣ୍ଡିଆ ଫୁଲ କିସମ ଲଗାଇବା ଉଚିତ  । ବଡମୁଣ୍ଡିଆ ଫୁଲ ଜାତିରେ ବେଶି  ଫମ୍ପା ମଞ୍ଜି ବାହାରେ ଏବଂ ଆଦାୟ କମିଯାଏ   । ଗଛକୁ ସିଧାସଳଖ ରଖିବା ପାଇଁ ଅନୁମୋଦିତ ବ୍ୟବଧାନରେ ବିହନ ବୁଣିବା ଉଚିତ୍  । କୋଡା ଖୁସା ବେଳେ ୧୦-୧୫ ସେ.ମି. ଉଚ୍ଚ ହିଡ ଟେକିବା ଆବଶ୍ୟକ  । କେତେକ କ୍ଷେତ୍ରରେ ଫୁଲମୁଣ୍ଡକୁ ଟେକି ରଖିବା ବାଉଁଶ ଡେରା ଦିଆଯାଇଥାଏ   ।

ଫସଲ କଟା ଓ ଅମଳ :

ଗଛରୁ ପତ୍ର ଶୁଖିଗଲେ ପତ୍ର ଝଡି ପଡି କେବଳ ଶୁଖିଲା ଫୁଲଗୁଡିକ ରହିଲେ ମଞ୍ଜିର ୨୦% ଜଳୀୟ ଅଂଶ ଥିବା ସମୟରେ ଆଗରୁ ମଣ୍ଡଗୁଡିକ କାଟିଆଣି ଖଳାରେ ୪-୫ ଦିନ ଖରାରେ ଶୁଖାଇବା ଆବଶ୍ୟକ  । ସବୁ ମୁଣ୍ଡ ଏକାବେଳକେ  ପାଚ୍ୟ ନ ପାରେ  । ଏଣୁ ଅମଳ ୨-୩ ଥରେରେ କରାଯାଏ  । କାରଣ ସବୁ ଏକାବେଳେ ପାଚିବା ପାଇଁ ଅପେକ୍ଷା କଲେ ମଞ୍ଜି ଝଡି ପଡିବା ସମ୍ଭାବନା ରହିଛି   । ସବୁମୁଣ୍ଡି ଶୁଖିଗଲେ ଗୋଟିଏ ଛୋଟିଆ ଠେଙ୍ଗାରେ ବାଡେଇ ମଞ୍ଜି ଅମଳ କରାଯାଏ  । ତାପରେ ମଞ୍ଜିକୁ ଖରାରେ ଶୁଖାଇ ଯେତେବେଳେ ଜଳୀୟ ଅଂଶ ୧୦%ରୁ କମ୍ ହେବ ସେତେବେଳେ ସାଇତି ରଖାଯାଏ   ।

ଅମଳ :

ଭଲ ଫସଲ ହୋଇଥିଲେ (ଜଳସେଚିତ ଜମିରୁ) ୧୮-୨୦ କୁଇଣ୍ଟାଲ ହେକ୍ଟରରେ ପିଛା ଅମଳ ହୁଏ  ।

ଓଡିଶାର ଜଳବାୟୁରେ ଜଳସେଚିତ ଫସଲରୁ ୯-୧୦ କୁଇଣ୍ଟାଲ ଅମଳ ଏବଂ ଅଣଜଳସେଚିତ ଫସଲରୁ ୬-୮ କୁଇଣ୍ଟାଲ ଅମଳ ହେକ୍ଟର ପିଛା ମିଳିଥାଏ   ।

ଆଧାର - ଶିକ୍ଷକ ଶିକ୍ଷା ନିର୍ଦ୍ଦେଶାଳୟ ଓ ରାଜ୍ୟ ଶିକ୍ଷା ଗବେଷଣା ଏବଂ ପ୍ରଶିକ୍ଷଣ ପରିଷଦ

Last Modified : 4/27/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate