ଜୀବିକାର୍ଜନ ସହିତ ଯେଉଁ କେତେକ ବୃତ୍ତିରେ ଜନସେବା ମଧ୍ୟ କରିହୁଏ, ସେହିଭଳି ଏକ ବୃତ୍ତି ହେଉଛି ସରକାରୀ ଓକିଲାତି ।ଏଥିରେ ସମ୍ପୃକ୍ତ ବୃତ୍ତିଧାରୀଙ୍କୁ ସରକାରୀ ଓକିଲ ବା ପବ୍ଲିକ୍ ପ୍ରସିକ୍ୟୁଟର କୁହାଯାଏ।
ସେମାନେ ରାଷ୍ଟ୍ର ଓ ଦେଶବାସୀଙ୍କ ସ୍ଵାର୍ଥରକ୍ଷା ପାଇଁ ଅଦାଲତରେ ଲଢେଇ କରନ୍ତି । ଦେଶରେ ଆଇନ ଉଲ୍ଲଂଘନର ମାତ୍ରା ବଢି ଚାଲିଥିବାରୁ କ୍ରମେ ଏଭଳି ଓକିଲଙ୍କ ଗୁରୁତ୍ଵ ଓ ଚାହିଦା ବୃଦ୍ଧି ପାଇବାରେ ଲାଗିଛି।
ସରକାରୀ ଓକିଲ ନ୍ୟାୟିକ ବ୍ୟବସ୍ଥାର ଅପରିହାର୍ଯ୍ୟ ଅଂଶ । ସେମାନେ ନ୍ୟାୟ ପ୍ରଦାନ ପ୍ରକ୍ରିୟାରେ ବିଭିନ୍ନ ଭୂମିକା ନିର୍ବାହ କରନ୍ତି । କୌଣସି ଏକ ମାମଲାରେ ତଦନ୍ତକାରୀ ସଂସ୍ଥା ଚାର୍ଜଶିଟ ଦାଖଲ କରିବା ପରେ ସେମାନଙ୍କ ଦାୟିତ୍ଵ ଆରମ୍ଭ ହୁଏ । ସେମାନଙ୍କୁ ସବୁ ପ୍ରକାର ବାହ୍ୟ ପ୍ରଭାବରୁ ଦୂରେଇ ରହି ନିଜ ଦାୟିତ୍ଵକୁ ନିରପେକ୍ଷ ଭାବେ ସମ୍ପାଦନ କରିବାକୁ ପଡେ । ରାଷ୍ଟ୍ରକୁ ପ୍ରତିନିଧିତ୍ଵ କରି ମାମଲାର ବିଭିନ୍ନ ଦିଗ ସମ୍ପର୍କରେ ନ୍ୟାୟାଳୟଙ୍କୁ ଅବଗତ କରାଇବାକୁ ହୁଏ । କେନ୍ଦ୍ର ସରକାର କିମ୍ବା ରାଜ୍ୟ ସରକାର ପ୍ରତ୍ୟେକ ହାଇକୋର୍ଟରେ ପବ୍ଲିକ ପ୍ରସିକ୍ୟୁଟର ନିଯୁକ୍ତ କରନ୍ତି । ସେହିପରି ସବୁ ଜିଲ୍ଲାରେ ରାଜ୍ୟ ସରକାରଙ୍କ ପକ୍ଷରୁ ଜଣେ ପବ୍ଲିକ ପ୍ରସିକ୍ୟୁଟର କିମ୍ବା ଏକାଧିକ ସହାୟକ ପବ୍ଲିକ୍ ପ୍ରସିକ୍ୟୁଟର ନିଯୁକ୍ତ କରାଯିବା ବ୍ୟବସ୍ଥା ରହିଛି । ଏହି ସହାୟକ ପବ୍ଲିକ ପ୍ରସିକ୍ୟୁଟରଙ୍କୁ ସାକ୍ଷ୍ୟପ୍ରମାଣ ସଂଗ୍ରହ, କୋର୍ଟଙ୍କ ଲାଗି ଦସ୍ତାବିଜ ପ୍ରସ୍ତୁତି ଆଦି କାର୍ଯ୍ୟରେ ସାହାଯ୍ୟ କରନ୍ତି ।
ପବ୍ଲିକ ପ୍ରସିକ୍ୟୁଟର ହେବ ପାଇଁ ଜଣେ ବ୍ୟକ୍ତି ଦେଶର ନାଗରିକ ହୋଇଥିବା ଆବଶ୍ୟକ । ସେ ଜଣେ ବ୍ୟକ୍ତି ଦେଶର ନାଗରିକ ହୋଇଥିବା ଆବଶ୍ୟକ । ସେ ଜଣେ ଓକିଲ ଭାବେ ଅତିକମରେ ୭ବର୍ଷ କାର୍ଯ୍ୟ କରିଥିବା ଆବଶ୍ୟକ । ତାଙ୍କ ବୟସ ୩୫ରୁ କମ୍ କିମ୍ବା ୪୫ରୁ ଅଧିକ ହୋଇ ନ ଥିବା ଆବଶ୍ୟକ । ତେବେ ଅନୁସୂଚିତ ଜାତି/ଜନଜାତି ପ ପଛୁଆବର୍ଗ ପ୍ରାର୍ଥୀଙ୍କ ପାୟନ ସରକାର ଭିନ୍ନ ବୟସସୀମା ନିର୍ଦ୍ଧାରଣ କରିପାରନ୍ତି । ସେସନ୍ସ ଜଜ୍ ଙ୍କ ସହ ବିଚାର ବିମର୍ଶ କରି ଜିଲା ଜଜ୍ ଜିଲାରେ ପବ୍ଲିକ୍ ପ୍ରସିକ୍ୟୁଟର ହେବା ପାଇଁ ଯୋଗ୍ୟ ପ୍ରାର୍ଥୀଙ୍କ ତାଲିକା ପ୍ରସ୍ତୁତ କରନ୍ତି । ରାଜ୍ୟ ସରକାର ଏହି ତାଲିକାରେ ନାମ ନ ଥିବା କୌଣସି ବ୍ୟକ୍ତିଙ୍କୁ ପବ୍ଲିକ ପ୍ରସିକ୍ୟୁଟର ଭାବେ ନିଯୁକ୍ତି ଦେଇପାରିବ ନାହିଁ । ତେବେ କେତେକ କ୍ଷେତ୍ରରେ ସରକାର ୧୦ ବର୍ଷରୁ ଉର୍ଦ୍ଧ୍ଵ ଅଭିଜ୍ଞତା ଥିବା ଓକିଲଙ୍କୁ ସ୍ଵତନ୍ତ୍ର ପବ୍ଲିକ ପ୍ରସିକ୍ୟୁଟର ଭାବେ ନିଯୁକ୍ତ କରିପାରନ୍ତି । ପବ୍ଲିକ ପ୍ରସିକ୍ୟୁଟର କାର୍ଯ୍ୟକାଳ ଅବଧି ସରକାରଙ୍କ ଦ୍ଵାରା ସ୍ଥିର ହୁଏ ।
ଜିଲାରେ ସହ-ପବ୍ଲିକ ପ୍ରସିକ୍ୟୁଟର ନିଯୁକ୍ତି ପାଇଁ ପ୍ରାର୍ଥୀଙ୍କର ଆଇନରେ ସ୍ନାତକ ଡିଗ୍ରୀ ସହ ଯେ କୌଣସି ରାଜ୍ୟର ବାର୍ କାଉନସିଲରେ ୨ବର୍ଷର ଅଭିଜ୍ଞତା ଥିବା ଆବଶ୍ୟକ । ଏଥିସହିତ ତାଙ୍କ ବୟସ ୩୫ବର୍ଷରୁ ଉର୍ଦ୍ଧ୍ଵ ହୋଇ ନ ଥିବା ଉଚିତ । ସମ୍ପୃକ୍ତ ରାଜ୍ୟର ଲୋକସେବା ଆୟୋଗ ଦ୍ଵାରା ଏହି ପଦବୀ ଲାଗି ପରୀକ୍ଷା କରାଯାଏ । ପବ୍ଲିକ ପ୍ରସିକ୍ୟୁଟରଙ୍କୁ ସରକାରୀ କର୍ମଚାରୀ ଭାବେ ବେତନ ଓ ଅନ୍ୟ ସୁବିଧା ସୁଯୋଗ ମିଳେ ।
ଆଧାର – ଦୈନିକ ଧରିତ୍ରୀ
Last Modified : 1/26/2020