ତରଳ ଝାଡା ଯୋଗୁଁ ଜଳଶୂନ୍ୟତା ଏବଂ ମନ୍ଦପୁଷ୍ଟି ହେବା ଫଳରେ ପ୍ରତି ବର୍ଷ ପ୍ରାୟ ଏକ ନିୟୁତ ଶିଶୁ ମରୁଛନ୍ତି । ବଡଙ୍କ ଅପେକ୍ଷା ଶିଶୁମାନେ ବେଶୀ ମରନ୍ତି , କାରଣ ସେମାନଙ୍କ ଦେହ ଜଳଶୂନ୍ୟ ହୋଇଯାଏ । କେବଳ ତରଳ ଝାଡାରୁ ହେଉଥିବା ଜଳଶୂନ୍ୟତା ଯୋଗୁଁ ଦୁଇଶହ ଶିଶୁଙ୍କ ଭିତରୁ ଜଣକର ମୃତ୍ୟୁ ହୋଇଥାଏ । ତରଳ ଝାଡା ଜୀବାଣୁ ଦ୍ଵାରା ହୋଇଥାଏ ଓ ଏହି ଜୀବାଣୁ ମଳ ବାଟ ଦେଇ ଆସିଥାଏ । ମୁଖ୍ୟତଃ ଏଠି ସେଠି ଖୋଳାରେ ଝାଡା ଫେରିବା , ଅସ୍ଵାସ୍ଥ୍ୟକର ଅଭ୍ୟାସ , ପରିଷ୍କାର ପିଇବା ପାଣିର ଅଭାବ ଏବଂ ଶିଶୁକୁ ମା’କ୍ଷୀର ଦିଆଯାଉ ନଥିଲେ ତରଳ ଝାଡା ହୋଇଥାଏ । ମା’କ୍ଷୀର ଖାଉଥିବା ଶିଶୁକୁ ପ୍ରାୟ ତରଳ ଝାଡା ହୁଏନାହିଁ ।
ଯଦି ସରକାର ଓ ବେସରକାରୀ ସଂସ୍ଥାଙ୍କ ସହ ପରିବାର ଏବଂ ଗୋଷ୍ଠୀ ଏକାଠି ମିଶି କାମ କରିବେ ତେବେ ଅବସ୍ଥାକୁ ଅନେକ ପରିମାଣରେ ସୁଧାରି ପାରିବେ ।
୧. ଦେହର ଜଳୀୟ ଅଂଶ ଚାଲିଯିବା ବା ଜଳଶୂନ୍ୟତା ଯୋଗୁଁ ତରଳ ଝାଡାରେ ଶିଶୁର ମୃତ୍ୟୁ ହୁଏ । ତେଣୁ ତରଳ ଝାଡା ଆରମ୍ଭ ହେବା ମାତ୍ରେ ଶିଶୁକୁ ଅଧିକ ପରିମାଣର ପାଣି ଏବଂ ନିୟମିତ ଖାଦ୍ୟ ଓ ପାନୀୟ ଦିଆଯିବା ଉଚିତ ।
୨. ଯଦି ଘଣ୍ଟାକ ଭିତରେ ଅନେକ ଥର ତରଳ ଝାଡା ହୁଏ କିମ୍ବା ଝାଡାରେ ରକ୍ତ ପଡେ ତେବେ ଶିଶୁର ଜୀବନ ପ୍ରତି ବିପଦ ଆସିଥାଏ । ସାଙ୍ଗେ ସାଙ୍ଗେ ଜଣେ ପ୍ରଶିକ୍ଷିତ ସ୍ଵାସ୍ଥ୍ୟକର୍ମୀଙ୍କ ସହାୟତା ନେବା ଦରକାର ।
୩. ମା’କ୍ଷୀର ଦେଲେ ତରଳ ଝାଡା ହେବା ଏବଂ ତା’ର ତୀବ୍ରତା ଅନେକ ପରିମାଣରେ କମି ଯାଇପାରେ ।
୪. ତରଳ ଝାଡା ଫେରୁଥିବା ଶିଶୁ ତା’ର ସାଧାରଣ ଖାଦ୍ୟ ଖାଇବା ଜରୁରୀ । ତରଳ ଝାଡାର ଚିକିତ୍ସା ସମୟରେ ଦୁଇ ସପ୍ତାହ ଯାଏଁ ଶିଶୁକୁ ଦିନକୁ ଅନ୍ତତଃ ଗୋଟିଏ ଥର ଅଧିକା ଖାଦ୍ୟ ଦେବା ଆବଶ୍ୟକ ।
୫. ତରଳ ଝାଡା ଯୋଗୁଁ ଶିଶୁ ଦେହରେ ଜଳଶୂନ୍ୟତା ଦେଖାଦିଏ ତେବେ କେବଳ ପ୍ରଶିକ୍ଷିତ ସ୍ଵାସ୍ଥ୍ୟକର୍ମୀଙ୍କ ପରାମର୍ଶ ଅନୁସାରେ ତରଳ ପାନୀୟ ଏବଂ ଔଷଧ ଦିଆଯିବା ଦରକାର । ତରଳା ଝାଡାର ଅନ୍ୟ ଔଷଧଗୁଡିକ ସାଧାରଣତଃ କାମ କରେନାହିଁ ଏବଂ ତାହା ଶିଶୁ ପାଇଁ କ୍ଷତିକାରକ ମଧ୍ୟ ହୋଇପାରେ ।
୬. ତରଳ ଝାଡା ପ୍ରତିରୋଧ ପାଇଁ ପାଇଖାନା ବ୍ୟବହାର କରିବା କିମ୍ବା ମଳକୁ ପୋତିଦେବା ଦରକାର ।
୭. ସ୍ଵାସ୍ଥ୍ୟକର ଜୀବନ ଧାରଣ ପ୍ରକ୍ରିୟା ତରଳ ଝାଡାରୁ ବଞ୍ଚାଇ ଥାଏ । ଝାଡା ଫେରିବା ପରେ ଓ ଖାଦ୍ୟ ଖାଇବା ବା ଛୁଆକୁ ଖୁଆଇବା ଆଗରୁ ହାତକୁ ସାବୁନ , ପାଉଁଶ ଆଦିରେ ଭଲ କରି ଧୋଇବା ଜରୁରୀ ।
୧. ଦେହର ଜଳୀୟ ଅଂଶ ଚାଲିଯିବା ବା ଜଳଶୂନ୍ୟତା ହେବା ଯୋଗୁଁ ତରଳ ଝାଡାରେ ଶିଶୁର ମୃତ୍ୟୁ ହୁଏ । ତେଣୁ ତରଳ ଝାଡା ଆରମ୍ଭ ହେବା ମାତ୍ରେ ଶିଶୁକୁ ଅଧିକ ପରିମାଣର ପାଣି ଏବଂ ନିୟମିତ ଖାଦ୍ୟ ଓ ପାନୀୟ ଦିଆଯିବା ଉଚିତ ।
ଯଦି ଜଣେ ଶିଶୁର ଦିନକୁ ତିନି ବା ତା’ଠାରୁ ଅଧିକ ଥର ପାଣିଆ ଝାଡା ହୁଏ ତେବେ ଆମେ ଜାଣିବା ଯେ ତାକୁ ତରଳ ଝାଡା ହୋଇଛି ।
କେତେକ ଲୋକ ବିଶ୍ଵାସ କରନ୍ତି ଯେ ତରଳ ଝାଡା ସମୟରେ ପାଣି ପିଇଲେ ଅଧିକ କ୍ଷତି ହୁଏ । କିନ୍ତୁ ଏହା ଠିକ୍ ନୁହେଁ । ଝାଡା ବନ୍ଦ ହେବା ଯାଏଁ ପିଲାକୁ ଯେତେ ଥର ସମ୍ଭବ ତରଳ ପାନୀୟ ଦେବା ଦରକାର । ଯଥେଷ୍ଟ ପାଣି ପିଇବା ଯୋଗୁଁ ତରଳ ଝାଡା ସମୟରେ ଦେହରୁ ଚାଲି ଯାଇଥିବା ଜଳୀୟ ଅଂଶ ପୁଣି ଥରେ ଭରଣା ହୋଇଯାଏ ।
ଜଳଶୂନ୍ୟତା ନହେବା ପାଇଁ ଶିଶୁ ଯେତେ ଥର ସମ୍ଭବ ମା’କ୍ଷୀର ଖାଇବା ଦରକାର । ମା’କ୍ଷୀର ଖାଉନଥିବା ଶିଶୁ ପ୍ରତି ଥର ଝାଡା ଯିବା ପରେ ତଳ ଲେଖା ଅନୁସାରେ ପାନୀୟ ପିଇବା ଉଚିତ ।
ଗୋଟିଏ ପରିଷ୍କାର କପ୍ ରେ ପିଇବାକୁ ଦେବା ଉଚିତ । ଦୁଧଖିଆ ବୋତଲ ସଫା କରିବା ସହଜ ନୁହେଁ , ତେଣୁ ସେଥିରେ ପିଇବାକୁ ଦେବା ଠିକ ନୁହେଁ । ଭଲ କରି ଧୁଆ ହୋଇନଥିବା ବୋତଲରୁ ତରଳ ଝାଡାର ଜୀବାଣୁ ଆସିପାରେ
ଶିଶୁର ବାନ୍ତି ହେଉଥିଲେ ଦଶ ମିନିଟ ଅପେକ୍ଷା କରି ତା’ ପରେ ଧୀରେ ଧୀରେ ଅଳ୍ପ ଅଳ୍ପ କରି ପିଇବାକୁ ଦେବା ଦରକାର ।
ତରଳ ଝାଡା ବନ୍ଦ ହେବା ଯାଏଁ ଶିଶୁକୁ ଅଧିକ ତରଳ ପାନୀୟ ଦେବା ଜରୁରୀ ।
ସାଧାରଣତଃ ତିନି ଚାରି ଦିନ ପରେ ତରଳ ଝାଡା ବନ୍ଦ ହୋଇଯାଏ । ଯଦି ଏହା ସପ୍ତାହରୁ ଅଧିକ ଦିନ ଧରି ଲାଗିରହେ ତେବେ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ।
୨. ଯଦି ଘଣ୍ଟାକ ଭିତରେ ଅନେକ ଥର ତରଳ ଝାଡା ହୁଏ କିମ୍ବା ଝାଡାରେ ରକ୍ତ ପଡେ ତେବେ ଶିଶୁର ଜୀବନ ପ୍ରତି ବିପଦ ଆସିଥାଏ । ସାଙ୍ଗେ ସାଙ୍ଗେ ଜଣେ ପ୍ରଶିକ୍ଷିତ ସ୍ୱାସ୍ଥ୍ୟକର୍ମୀଙ୍କ ସହାୟତା ନେବା ଦରକାର ।
ଯଦି ଶିଶୁର ତଲଲିଖିତ ଲକ୍ଷଣମାନ ଦେଖାଯାଏ ତେବେ ତାକୁ ସାଙ୍ଗେ ସାଙ୍ଗେ ଡାକ୍ତର ଦେଖାଇବା ଦରକାର ।
ଉପର ଲିଖିତ ଯେକୌଣସି ଲକ୍ଷଣ ଦେଖାଗଲେ ସାଙ୍ଗେ ସାଙ୍ଗେ ଡାକ୍ତରଙ୍କୁ ଦେଖାଇବା ଦରକାର । ଏହି ସମୟ ଭିତରେ ଶିଶୁକୁ ଓ.ଆର.ଏସ୍. ବା ଅନ୍ୟ ତରଳ ପାନୀୟ ଦେବା ଜରୁରୀ ।
ଯଦି ଘଣ୍ଟାକ ଭିତରେ ଅନେକ ଥର ତରଳ ଝାଡା ହେବା ସହିତ ବାନ୍ତି ମଧ୍ୟ ହୁଏ ତେବେ ବିପଦର ସମ୍ଭାବନା ରହିଛି । କାରଣ ଏହା ହେଉଛି ହାଇଜାର ଲକ୍ଷଣ । ହାଇଜାରେ ଅଳ୍ପ କେତେ ଘଣ୍ଟା ଭିତରେ ଶିଶୁର ମୃତ୍ୟୁ ହୋଇପାରେ । ତେଣୁ ସାଙ୍ଗେ ସାଙ୍ଗେ ଡାକ୍ତରୀ ସହାୟତା ନେବା ଜରୁରୀ ।
୧. ପାଇଖାନାରେ ଝାଡା ବସିବା କିମ୍ବା ଝାଡା ବସିବା ପରେ ତାକୁ ପୋତି ଦେବା
୨. ଝାଡା ଯିବା ପରେ ହାତକୁ ସାବୁନ କିମ୍ବା ପାଉଁଶ ଓ ପାଣିରେ ଭଲ କରି ଧୋଇବା
୩. ପରିଷ୍କାର ପିଇବା ପାଣି ବ୍ୟବହାର କରିବା
୪. ଖାଦ୍ୟକୁ ଭଲ କରି ଧୋଇବା , ଚୋପା ଛଡାଇବା କିମ୍ବା ରାନ୍ଧିବା
୩. ମା’କ୍ଷୀର ଦେଲେ ତରଳ ଝାଡା ଏବଂ ତା’ର ତୀବ୍ରତା ଅନେକ ପରିମାଣରେ କମି ଯାଇପାରେ ।
ତରଳ ଝାଡା ହେଉଥିବା ଶିଶୁ ପାଇଁ ମା’କ୍ଷୀର ହେଉଛି ସବୁଠାରୁ ଭଲ ଖାଦ୍ୟ ଓ ପାନୀୟ । ଏହା ପୁଷ୍ଟିକର ଓ ପରିଷ୍କାର ଏବଂ ରୋଗ ସଂକ୍ରମଣରୁ ରକ୍ଷା କରିଥାଏ । କେବଳ ମା’କ୍ଷୀର ଖାଉଥିବା ଶିଶୁକୁ ତରଳ ଝାଡା ପ୍ରାୟ ହୁଏନାହିଁ ।
ମା’କ୍ଷୀର ଜଳଶୂନ୍ୟତା ଏବଂ ମନ୍ଦପୁଷ୍ଟିରୁ ରକ୍ଷା କରିଥାଏ ଏବଂ ଦେହରୁ ଚାଲିଯାଇଥିବା ଜଳୀୟ ଅଂଶକୁ ଭରଣା କରିଥାଏ । ଶିଶୁକୁ ତରଳ ଝାଡା ହେଉଥିଲେ ମା’କ୍ଷୀର ଖୁଆଇବା କମାଇ ଦେବାକୁ କେହି କେହି କହନ୍ତି । କିନ୍ତୁ ଏହା ଭୁଲ । ବରଂ ତରଳ ଝାଡା ହେଉଥିଲେ ଅନ୍ୟ ସମୟ ଅପେକ୍ଷା ଅଧିକ ଥର ଖୁଆଇବା ଦରକାର ।
୪. ତରଳ ଝାଡା ଫେରୁଥିବା ଶିଶୁ ତା’ର ସାଧାରଣ ଖାଦ୍ୟ ଖାଇବା ଜରୁରୀ । ତରଳ ଝାଡାର ଚିକିତ୍ସା ସମୟରେ ଦୁଇ ସପ୍ତାହ ଯାଏଁ ଶିଶୁକୁ ଦିନକୁ ଅନ୍ତତଃ ଗୋଟିଏ ଥର ଅଧିକା ଖାଦ୍ୟ ଦେବା ଆବଶ୍ୟକ ।
ତରଳ ଝାଡା ହେଲେ ଶିଶୁର ଓଜନ କମିଯାଏ ଓ ସେ ମନ୍ଦପୁଷ୍ଟ ହୋଇଯାଏ । ତେଣୁ ତା’ର ଅଧିକ ଖାଦ୍ୟ ଓ ପାନୀୟ ଦରକାର । ଠିକ୍ ଭାବରେ ଖାଦ୍ୟ ଖାଇଲେ ଝାଡା ବନ୍ଦ ହୋଇ ଯାଇପାରେ ଓ ଶିଶୁ ଶୀଘ୍ର ଭଲ ହୋଇ ଯାଇପାରେ ।
ତରଳ ଝାଡାରେ ଆକ୍ରାନ୍ତ ଶିଶୁ ଖାଇବାକୁ ଇଚ୍ଛା କରେନାହିଁ କିମ୍ବା ତା’ର ବାନ୍ତି ମଧ୍ୟ ହୋଇପାରେ । ତେଣୁ ତାକୁ ଖୁଆଇବା କଷ୍ଟକର ହୋଇପଡେ । ଶିଶୁର ବୟସ ଛଅମାସ ବା ତା’ଠାରୁ ଅଧିକ ହୋଇଥିଲେ ସେ ଯେତେ ବେଶୀ ଖାଇବ ଭଲ । ଖାଦ୍ୟରେ ଅଳ୍ପ ଲୁଣ ପଡି ତାହା ନରମ ହୋଇ ଚକଟା ହୋଇଥିବା ବା ଶିଶୁକୁ ଭଲ ଲାଗୁଥିବା ଦରକାର । କଠିନ ଖାଦ୍ୟ ଅପେକ୍ଷା ନରମ ଖାଦ୍ୟ ଖାଇବାକୁ ସୁବିଧା ହୁଏ ଓ ସେଥିରେ ଅଧିକ ପରିମାଣର ତରଳ ରହିଥାଏ ।
ତରଳ ଝାଡା ହେଉଥିଲେ ଶିଶୁକୁ ସିଝା ଡାଲି ଓ ବିନ୍ ଚକଟା , ମାଛ , ଭଲ କରି ରନ୍ଧା ହୋଇଥିବା ମାଂସ , ଦହି ଓ ଫଳ ଦିଆଯାଇ ପାରିବ । ଡାଲି ଓ ପରିବାରେ ଛାମୁଚେ ଦୁଇ ଚାମଚ ତେଲ ପକାଯାଇ ପାରିବ । ଖାଦ୍ୟ ସାଙ୍ଗେ ସାଙ୍ଗେ ରାନ୍ଧି ଦିନକୁ ଅନ୍ତତଃ ପାଞ୍ଚ ଥର ଦେବା ଦରକାର ।
ତରଳ ଝାଡା ବନ୍ଦ ହେବା ପରେ ପୂରା ସୁସ୍ଥ ହେବା ପାଇଁ ଅଧିକ ଖାଇବା ଜରୁରୀ । ଏହି ସମୟରେ ଶିଶୁକୁ ଅନ୍ତତଃ ପକ୍ଷେ ଦୁଇ ସପ୍ତାହ ଯାଏଁ ଅଧିକ ଥର ଖାଦ୍ୟ କିମ୍ବା ମା’କ୍ଷୀର ଖାଇବାକୁ ଦେବା ଦରକାର । ଏହା ଦ୍ଵାରା ତରଳ ଝାଡା ସମୟରେ ଦେହରୁ ଚାଲିଯାଇଥିବା ଶକ୍ତି ଓ ପୋଷଣ ଭରଣା ହୋଇପାରେ
ଶିଶୁର ଦେହ ଖରାପ ହେବା ଆଗରୁ ଥିବା ଓଜନ ସହ ସମାନ ନହେବା ଯାଏଁ ସେ ପୂରା ସୁସ୍ଥ ହୋଇନାହିଁ ବୋଲି ଧରାଯିବ ।
ଜୀବସାର କ ବଟିକା ଓ ଜୀବସାର କ ଥିବା ଖାଦ୍ୟ ଶିଶୁକୁ ଶୀଘ୍ର ଭଲ ହେବାରେ ସାହାଯ୍ୟ କରେ । ମା’କ୍ଷୀର , କଲିଜା , ମାଛ , ଦହି ଓ କ୍ଷୀରଜାତ ଅନ୍ୟ ଜିନିଷ , କମଳା ଓ ଅନ୍ୟ ହଳଦିଆ ଫଳ ଓ ପାରିବା , ଶାଗ ଆଦିରେ ବହୁତ ପରିମାଣର ଜୀବସାର କ ରହିଛି ।
୫. ଯଦି ତରଳ ଝାଡା ଯୋଗୁଁ ଶିଶୁ ଦେହରେ ଜଳଶୂନ୍ୟତା ଦେଖାଦିଏ ତେବେ କେବଳ ପ୍ରଶିକ୍ଷିତ ସ୍ୱାସ୍ଥ୍ୟକର୍ମୀଙ୍କ ପରାମର୍ଶ ଅନୁସାରେ ତରଳ ପାନୀୟ ଏବଂ ଔଷଧ ଦିଆଯିବା ଦରକାର । ତରଳ ଝାଡାର ଅନ୍ୟ ଔଷଧଗୁଡିକ ସାଧାରଣତଃ କାମ କରେନାହିଁ ଏବଂ ତାହା ଶିଶୁ ପାଇଁ କ୍ଷତିକାରକ ମଧ୍ୟ ହୋଇପାରେ ।
କିଛି ଦିନ ଭିତରେ ତରଳ ଝାଡା ଆପେ ଆପେ ଭଲ ହୋଇଯାଏ । ଦେହରୁ ଜଳୀୟ ଅଂଶ ଓ ପୋଷଣ ଚାଲିଯିବା ହିଁ ହେଉଛି ସବୁଠାରୁ ବିପଦଜନକ ।
ତରଳ ଝାଡା ହେଉଥିବା ଶିଶୁକୁ ଡାକ୍ତରୀ ପରାମର୍ଶ ବିନା କୌଣସି ବଟିକା କିମ୍ବା ଔଷଧ ଦେବା ଉଚିତ ନୁହେଁ ।
ତରଳ ଝାଡାର ସବୁଠାରୁ ଭଲ ଚିକିତ୍ସା ହେଉଛି ପ୍ରଚୁର ପରିମାଣର ତରଳ ପାନୀୟ ଏବଂ ଠିକ ପରିମାଣର ପରିଷ୍କାର ପାଣିରେ ଓ.ଆର.ଏସ୍. ମିଶାଇ ତିଆରି ହୋଇଥିବା ଘୋଳ ପିଇବା ।
ଓ.ଆର.ଏସ୍. ପୁଡିଆ ମିଳୁନଥିଲେ ଏକ ଲିଟର ପରିଷ୍କାର ପାଣିରେ ଚାରି ଚାମଚ ଚିନି ଓ ଅଧା ଚାମଚ ଲୁଣ ମିଶାଇ ଏହି ଘୋଳ ତିଆରି କରାଯାଇ ପାରିବ । ଘୋଳ ତିଆରି ବେଳେ ଜିନିଷର ପରିମାଣ ଯେପରି ଠିକ ରହେ । କାରଣ ଅଧିକ ଚିନି ଜଳଶୂନ୍ୟତାକୁ ବଢାଇ ଦେଇପାରେ ଏବଂ ଅଧିକ ଲୁଣ ମଧ୍ୟ ଶିଶୁ ପାଇଁ ବହୁତ କ୍ଷତିକାରକ । ଘୋଳଟି ଟିକିଏ ପାନିଆ ହୋଇଗଲେ ବିଶେଷ କ୍ଷତି ନାହିଁ ।
ମିଳିମିଳା ହେଲେ ତରଳ ଝାଡା ମଧ୍ୟ ହୁଏ । ମିଳିମିଳା ପାଇଁ ପ୍ରତିଷେଧକ ଟୀକା ନେଇଥିବା ଶିଶୁକୁ ଏହି ପ୍ରକାର ତରଳ ଝାଡା ହେବାର ସମ୍ଭାବନା ନଥାଏ ।
ତରଳ ଝାଡା ପାଇଁ ବିଶେଷ ପାନୀୟ
ଓ.ଆର.ଏସ୍ . କ’ଣ ?
ତରଳ ଝାଡାରେ ଚାଲି ଯାଇଥିବା ଲବଣ ଓ ଜଳୀୟ ଅଂଶକୁ ଭରଣା କରିବା ପାଇଁ ପରିଷ୍କାର ପାଣିରେ ମିଶା ଯାଉଥିବା ସ୍ଵତନ୍ତ୍ର ପ୍ରକାରର ଲବଣ ।
ଓ.ଆର.ଏସ୍. କେଉଁଠାରୁ ମିଳିପାରିବ ?
ଅଧିକାଂଶ ଦେଶରେ ଓ.ଆର.ଏସ୍. ପୁଡିଆ ସ୍ଵାସ୍ଥ୍ୟକେନ୍ଦ୍ର , ଔଷଧ ଦୋକାନ ଆଦିରେ ମିଳେ ।
ଓ.ଆର.ଏସ୍. ଘୋଳ ତିଆରି
୧. ଓ.ଆର.ଏସ୍. ପୁଡିଆ ଖୋଲି ଗୋଟିଏ ପରିଷ୍କାର ପାତ୍ରରେ ରଖନ୍ତୁ । ପୁଡିଆର ଲେଖା ଅନୁସାରେ ସେଥିରେ ପାଣି ମିଶାନ୍ତୁ । ପାଣି ବେଶୀ କମିଗଲେ ଝାଡା ବଢିଯାଇପାରେ ।
୨. କେବଳ ପାଣି ମିଶାନ୍ତୁ । କ୍ଷୀର , ଝୋଳ , ଫଳରସ କିମ୍ବା ମୃଦୁପାନୀୟରେ ଓ.ଆର.ଏସ୍. ମିଶାନ୍ତୁ ନାହିଁ । ଚିନି ମିଶାନ୍ତୁ ନାହିଁ ।
୩. ଭଲ କରି ଘାଣ୍ଟନ୍ତୁ ଓ ଗୋଟିଏ ପରିଷ୍କାର କପ୍ ରେ ନେଇ ଶିଶୁକୁ ପିଆନ୍ତୁ । ବୋତଲ ବ୍ୟବହାର କରନ୍ତୁ ନାହିଁ ।
କେତେ ପରିମାଣର ଓ.ଆର.ଏସ୍. ଦେବେ ?
ଯେତେ ପରିମାଣର ସମ୍ଭବ ପିଇବାକୁ ଦିଅନ୍ତୁ ।
ଦୁଇ ବର୍ଷରୁ କମ୍ ବୟସର ଶିଶୁ ପ୍ରତି ଥର ଝାଡା ହେବା ପରେ ଗୋଟିଏ ବଡ କପ୍ ରେ ଏକ ଚତୁର୍ଥାଂଶରୁ ଅଧା ଯାଏଁ ପିଇବା ଦରକାର ।
ଦୁଇ ବର୍ଷରୁ ଅଧିକ ଶିଶୁ ପ୍ରତି ଥର ଝାଡା ହେବା ପରେ ଗୋଟିଏ ବଡ କପ୍ ର ଅଧାରୁ ପୂରା କପ୍ ଯାଏଁ ପିଇବା ଦରକାର
ତରଳ ଝାଡା ସାଧାରଣତଃ ତିନି ଚାରି ଦିନରେ ବନ୍ଦ ହୋଇଯାଏ ।
ସପ୍ତାହେ ପରେ ମଧ୍ୟ ଝାଡା ବନ୍ଦ ନହେଲେ ଡାକ୍ତରଙ୍କୁ ପରାମର୍ଶ କରନ୍ତୁ ।
୬. ତରଳ ପ୍ରତିରୋଧ ପାଇଁ ପାଇଖାନା ବ୍ୟବହାର କରିବା ଉଚିତ କିମ୍ବା ମଳକୁ ପୋତିଦେବା ଦରକାର ।
ପିଇବା ପାଣି , ଖାଦ୍ୟ , ହାତ , ବାସନକୁସନ ବା ରନ୍ଧା ଜାଗା ମଇଳା ହେଲେ ଏସବୁ ସଂକ୍ରମିତ ହେବ ଏବଂ ଜୀବାଣୁ ଶିଶୁ ଓ ବଡଙ୍କ ଦେହକୁ ଯିବ । ମାଛି ମଧ୍ୟ ମଳରେ ବସି ଖାଦ୍ୟ ଉପରେ ବସିଲେ ଜୀବାଣୁ ସଂକ୍ରମିତ ହୋଇଥାଏ । ଖାଦ୍ୟ ଓ ପିଇବା ପାଣି ଢାଙ୍କି ରଖିଲେ ମାଛି ହେବେନାହିଁ ।
ସମସ୍ତଙ୍କ ମଳ ଏପରିକି ଛୋଟ ପିଲାଙ୍କ ମଳରେ ମଧ୍ୟ ଜୀବାଣୁ ଥାଏ । ଶିଶୁ ପାଇଖାନା ବ୍ୟବହାର କରୁନଥିଲେ ତା’ର ମଳକୁ ସାଙ୍ଗେ ସାଙ୍ଗେ ପାଇଖାନାରେ ପକାଇବା ବା ପୋତି ଦେବା ଦରକାର । ପାଇଖାନା ସଫା ରହିଲେ ଜୀବାଣୁ ସଂକ୍ରମଣ ହୁଏନାହିଁ ।
ଯଦି ପାଇଖାନାର ସୁବିଧା ନଥାଏ , ତେବେ ପିଲା ଓ ବଡ ଘର , ରାସ୍ତା , ପିଇବା ପାଣି , ପିଲାଙ୍କ ଖେଳିବା ଜାଗା ଆଦିରୁ ଦୂରରେ ଝାଡା ଯିବା ଏବଂ ମଳକୁ ମାଟିରେ ପୋତି ଦେବା ଉଚିତ ।
ପାଇଖାନା ନଥିବା ଗୋଷ୍ଠୀରେ ସମସ୍ତେ ଏକାଠି ମିଶି ପାଇଖାନା ପାଇଁ ବ୍ୟବସ୍ଥା କରିବା ଦରକାର ।
ପିଇବା ପାଣିର ଉତ୍ସକୁ ମଣିଷ ଓ ପଶୁଙ୍କ ମଳଠାରୁ ଦୂରେଇ ରଖିବା ଜରୁରୀ ।
୭. ସ୍ଵାସ୍ଥ୍ୟକର ଜୀବନ ଧାରଣ ପ୍ରକ୍ରିୟା ତରଳ ଝାଡାରୁ ବଞ୍ଚାଇ ଥାଏ । ଝାଡା ଫେରିବା ପରେ ଓ ଖାଦ୍ୟ ଖାଇବା ବା ଛୁଆକୁ ଖୁଆଇବା ଆଗରୁ ହାତକୁ ସାବୁନ , ପାଉଁଶ ଆଦିରେ ଭଲ କରି ଢୋଇବା ଜରୁରୀ ।
ଝାଡା ଯିବା ପରେ , ଶିଶୁକୁ ପରିଷ୍କାର କରିବା ପରେ , ଶିଶୁକୁ ଖୁଆଇବା ଆଗରୁ , ଖାଦ୍ୟ ଛୁଇଁବା ଓ ଖାଇବା ହାତ ସାବୁନ ବା ପାଉଁଶ ଓ ପାଣିରେ ଭଲ କରି ଧୋଇବା ଦରକାର ।
ଛୋଟ ପିଲା ସବୁବେଳେ ପାଟିରେ ହାତ ପୂରାଏ । ତେଣୁ ଘର ସଫା ରଖିବା ଏବଂ ପିଲାର ହାତକୁ ବାରମ୍ବାର , ବିଶେଷ କରି ଖାଇବା ଆଗରୁ , ଭଲ କରି ଧୋଇବା ଦରକାର ।
ଅନ୍ୟ କିଛି ପରିମଳ ବ୍ୟବସ୍ଥା ମଧ୍ୟ ତରଳ ଝାଡାର ପ୍ରତିରୋଧ କରିପାରେ ।
ଆଧାର : Unicef
Last Modified : 12/11/2019