ହୋମ / ସ୍ଵାସ୍ଥ୍ୟ / ଶିଶୁ ସ୍ଵାସ୍ଥ୍ୟ / ବର୍ଷାଦିନେ ଶିଶୁଙ୍କ ଯତ୍ନ
ସେଆର କରନ୍ତୁ

ବର୍ଷାଦିନେ ଶିଶୁଙ୍କ ଯତ୍ନ

ବର୍ଷାଦିନେ ଶିଶୁଙ୍କ ଯତ୍ନ ସମ୍ବନ୍ଧରେ ସୂଚନା ।

ଉପକ୍ରମ

ପ୍ରବଳ ଖରା ପରେ ବର୍ଷାଋତୁର ଆଗମନକୁ ସମସ୍ତେ ଅପେକ୍ଷା କରି ରହିଥା’ନ୍ତି  । ଜଳଦାନ କରିବା ସହ ବିଭିନ୍ନ ସଂକ୍ରାମକ ରୋଗ ସଙ୍ଗରେ ନେଇ ଆସିଥାଏ ଏହି ଋତୁ  । ଏହି ସଂକ୍ରାମକ ରୋଗଗୁଡିକରେ ସାଧାରଣତଃ ଶିଶୁମାନେ ଅଧିକ ପ୍ରଭାବିତ ହୁଅନ୍ତି  ।

ବର୍ଷାଋତୁରେ ଦେଖାଦେଉଥିବା ସଂକ୍ରାମକ ରୋଗଗୁଡିକ ହେଲା : ସିଜନାଲ୍ ଫ୍ଲୁ, କମନ୍ କୋଲ୍ଡ, ତରଳ ଝାଡାବାନ୍ତି, ଲାଳରକ୍ତ ଝାଡା, ଆମାଶୟ, ଜଣ୍ଡିସ୍, ଟାଇଫଏଡ, ଡେଙ୍ଗୁ, ମ୍ୟାଲେରିଆ, ଫ୍ୟାଲେରିଆ । ଓଡିଶାରେ ଗତ ୩/୪ ବର୍ଷ ଧରି ଟିଙ୍କଜାତୀୟ ପୋକ କାମୁଡିବା ଦ୍ଵାରା ମଧ୍ୟ ସ୍କ୍ରବ ଟାଇଫସ୍ ଏହି ଋତୁରେ ହୋଇଥାଏ  । ଚର୍ମ ଓ ଶ୍ଵାସର ଆଲର୍ଜି ଅଧିକତର ଏହି ଋତୁରେ ଦେଖାଯାଏ  । ଅତ୍ୟଧିକ ଆରଦ୍ରତା ଯୋଗୁ ଚର୍ମର ଫଙ୍ଗାଲ୍ ଇନ୍ ଫେକ୍ସନ ହୋଇଥାଏ  ।

ରୋଗଗୁଡିକର ସାଧାରଣ ଲକ୍ଷଣ ଓ ଏହାର ପ୍ରତିକାର ସମ୍ପର୍କରେ

  1. ସିଜନାଲ୍ ଫ୍ଲୁ
  2. ଏହା ସାଧାରଣତଃ ନିଃଶ୍ଵାସ ପ୍ରଶ୍ଵାସ ଦ୍ଵାରା ବ୍ୟାପିଥାଏ  । ଭାଇରସ୍ ଦ୍ଵାରା ଏହି ରୋଗ ହୋଇଥାଏ  । ଜ୍ଵର, ଛିଙ୍କ, ଥଣ୍ଡା, ମୁଣ୍ଡବିନ୍ଧା, ଗୋଡହାତ ବିନ୍ଧା ଏବଂ ହାଲିଆ ଲାଗିବା ଏହି ରୋଗର ଲକ୍ଷଣ  । କମନ୍ କୋଲ୍ଡ ସାଧାରଣତଃ ୩-୫ ଦିନ ମଧ୍ୟରେ ଭଲ ହୋଇଯାଏ  । ଉତ୍ତମ ଖାଦ୍ୟ, ଓଆରଏସ୍ ପାଣି, ବିଶ୍ରାମ ଓ ପାରାସିଟାମଲଏବଂ ସାଧାରଣ ଥଣ୍ଡା ଔଷଧରେ ଏହି ରୋଗ ଭଲ ହୋଇଥାଏ  । ଏଥିରେ କୌଣସି ଆଣ୍ଟିବାଇଟିକ୍ ର ଆବଶ୍ୟକତା ନାହିଁ  । ସିଜନାଲ୍ ଫ୍ଲୁ କିନ୍ତୁ ପୁଷ୍ଟିହୀନ ଓ ରୋଗ ପ୍ରତିରୋଧକ ଶକ୍ତି କମ୍ ଥିବା ପିଲାଙ୍କ ପାଇଁ ମାରାତ୍ମକ ହୋଇପାରେ  । ଏହି ରୋଗର ଲକ୍ଷଣ ଦେଖାଦେଲେ ତୁରନ୍ତା ଶିଶୁ ଡାକ୍ତରଙ୍କ ସହ ପରାମର୍ଶ କରିବା ଉଚିତ୍  ।

    ପ୍ରତିକାର

    ମୁହଁ ବା ନାକରେ ହାତ ଲଗାଇବା ପୂର୍ବରୁ ହାତସଫା କରନ୍ତୁ  । ଘର ଭିତରକୁ ମୁକ୍ତ ବାୟୁ ଚଳାଚଳ ଓ ସୂର୍ଯ୍ୟକିରଣ ଆସିବାକୁ ଦିଅନ୍ତୁ  ।  ଥଣ୍ଡା, କାଶରେ ସଂକ୍ରମିତ ବ୍ୟକ୍ତି ପିଲାକୁ ଧରନ୍ତୁ ନାହିଁ  । ପିଲାର ମୁହଁକୁ ଚାହିଁ ଛିଙ୍କ କିମ୍ବା କାଶନ୍ତୁ ନାହିଁ  । ସିଜନାଲ୍ ଫ୍ଲୁ ପାଇଁ ଫ୍ଲୁଟିକା ପ୍ରତିବର୍ଷ ବର୍ଷାଋତୁ ପୂର୍ବରୁ ନେଇପାରିବେ  । ଅତିକମ୍ ବୟସର ଶିଶୁ, ଆଲର୍ଜି ଓ ପୁଷ୍ଟିହୀନ ପିଲାଙ୍କ ପାଇଁ ଏହା ନିହାତି ଜରୁରୀ  ।

  3. ତରଳ ଝାଡା ଓ ଲାଳରକ୍ତ ଝାଡା
  4. ଏହା ସାଧାରଣତଃ ଦୂଷିତ ଜଳ ଓ ଖାଦ୍ୟ ଦ୍ଵାରା ବ୍ୟାପିଥାଏ  । ଏହାର ଲକ୍ଷଣ ଜ୍ଵର, ପତଳା ଝାଡା, ବାନ୍ତି, କମ୍ ପରିସ୍ରା, ପେଟ ଫମ୍ପାଇବା  । ଏଥିରେ ଶରୀରର ଜଳୀୟ ଅଂଶ କମିବା ଦ୍ଵାରା କିଡନୀ ଉପରେ ପ୍ରଭାବ ପଡିଥାଏ  । ଓଆରଏସ୍ ବାରମ୍ବାର ଅଳ୍ପ ଅଳ୍ପ ପରିମାଣରେ ପିଇ  ଜଳୀୟ ଅଂଶ ବଜାୟ ରଖିବା ଏହି ରୋଗର ମୁଖ୍ୟ ଚିକିତ୍ସା  ।

    ଲାଳରକ୍ତ ଝାଡ଼ାର ଲକ୍ଷଣ

    ଜ୍ଵର, ମୁଣ୍ଡବିନ୍ଧା, ପେଟକାଟିବା, ଅଳ୍ପ ଅଳ୍ପ ପରିମାଣରେ ବାରମ୍ବାର ଲାଳରକ୍ତ ଝାଡା ହେବା ସହ ହାଲିଆ ଲାଗିଥାଏ  । ଏହା ସାଧାରଣତଃ ବ୍ୟାକ୍ଟେରିଆ ଦ୍ଵାରା ହୋଇଥାଏ  । ଓଆରଏସ୍ ଓ ଆଣ୍ଟିବାୟୋଟିକ୍ ଏହାର ମୁଖ୍ୟ ଚିକିତ୍ସା  ।

  5. ଆମାଶୟ ଲକ୍ଷଣ
  6. ଜ୍ଵର, ମୁଣ୍ଡବିନ୍ଧା, ବାନ୍ତି, ପେଟକାଟିବା, ଅତି ଦୁର୍ଗନ୍ଧ ଖଇରିଆ ରଙ୍ଗର ଝାଡା (ପ୍ୟାନରୁ ସହଜରେ ନଛାଡିବା) ହୋଇଥାଏ  । ଓଆରଏସ୍ ଓ ମେଟ୍ରୋନିଡାଜୋଲ ଏହାର ମୁଖ୍ୟ ଚିକିତ୍ସା  ।

  7. ଟାଇଫଏଡ ଲକ୍ଷଣ
  8. ଜ୍ଵର ଧୀରେ ଧୀରେ ଅଧିକରୁ ଅଧିକତର ହେବା, ପେଟ ଫମ୍ପାଇବା, ଜିଭ ଉପରେ ଧଳା ପରସ୍ତ ଦେଖାଦେବା, ଭୋକ ନ ହେବା, ହାଲିଆ ଲାଗିବା, ପିଲାଙ୍କର ସମୟ ସମୟରେ ପତଳା ଝାଡା ହେବା ଏହାର ଲକ୍ଷଣ  । ସାଲମେଲା ବ୍ୟାକ୍ଟେରିଆ ଏହାର କାରକ ଜୀବାଣୁ  । ସାଧାରଣ ଭାବେ ଜ୍ଵର ୪/୫ ଦିନ ନ ଛାଡିବା ବା ବିନା ଥଣ୍ଡା, କାଶରେ ଜ୍ଵର ଲାଗି ରହିଲେ ଏହି ରୋଗକୁ ସନ୍ଦେହ କରାଯାଏ  । ଉତ୍ତମ ଖାଦ୍ୟ, ଓଆରଏସ୍ ଓ ଆଣ୍ଟି ବାୟୋଟିକ୍ କୋର୍ସ ୧୦ – ୧୪ ଦିନ ର୍ହାର ଚିକିତ୍ସା ଅଟେ  ।

  9. ଜଣ୍ଡିସ୍
  10. ସାଧାରଣତଃ ହେପାଟାଇଟସ୍ ‘ଏ’ ବା ‘ଇ’ ଦ୍ଵାରା ଏହା ହୋଇଥାଏ  । ଜ୍ଵର ହେବା, ବାନ୍ତି ବାନ୍ତି ଲାଗିବା, ବିଲକୁଲ ଭୋକ ନ ଲାଗିବା, ହାଲିଆ ଲାଗିବା, ପରିସ୍ରା ହଳଦିଆ ହେବା, ଧୀରେ ଧୀରେ ଆଖି ଓ ଦେହ ହଳଦିଆ, ଡାହାଣପଟ ପେଟ କାଟିବା ଓ ଦରଜ ହେବା ଏହି ରୋଗର ଲକ୍ଷଣ  । ଏହାର କୌଣସି ନିର୍ଦ୍ଧିଷ୍ଟ ଚିକିତ୍ସା ନାହିଁ  । ବିଶ୍ରାମ, ଗ୍ଲୁକୋଜ ପାଣି, କମ୍ ପ୍ରୋଟିନ ଓ ସ୍ନେହସାରଯୁକ୍ତ ଖାଦ୍ୟ, ଭିଟାମିନ୍ ଏହାର ସଫଳ ଚିକିତ୍ସା  । ଅତ୍ୟଧିକ ଶୋଇ ରହିବା ଓ ରାତିରେ ନିଦ ନ ହେବା, ଦେହ ଅତ୍ୟଧିକ ହଳଦିଆ ହେବା  ଓ ଅତ୍ୟଧିକ ବାନ୍ତି ରୋଗ ମାରାତ୍ମକ ଦିଗରେ ଗତି କରୁଥିବାର ଲକ୍ଷଣ  । ଏଥିରେ ପିଲାକୁ ହସ୍ପିଟାଲରେ ରଖି ଚିକିତ୍ସା କରିବା ଉଚିତ୍  ।

  11. ମ୍ୟାଲେରିଆ
  12. ବିନା ଥଣ୍ଡା କାଶରେ ଜ୍ଵର ହେବା, ମୁଣ୍ଡ ବିନ୍ଧିବା, ବାନ୍ତି ହେବା, ଶୀତକମ୍ପ ହୋଇ ଜ୍ଵର ଆସିବା ଆଦି ମ୍ୟାଲେରିଆ ସାଧାରଣତଃ ଶିଶୁମାନଙ୍କରଠାରେ ଅଧିକ ମାରାତ୍ମକ ହୋଇଥାଏ  । ତେଣୁ ମ୍ୟାଲେରିଆପ୍ରବଣ ଅଞ୍ଚଳରେ ରହୁଥିବା ଶିଶୁର ପ୍ରତ୍ୟକ ଜ୍ଵରରେ ମ୍ୟାଲେରିଆ ପରୀକ୍ଷା କରାଇନେବା ଉଚିତ୍  ।

  13. ଡେଙ୍ଗୁ
  14. ଅଧିକ ଜ୍ଵର ହେବା, ମୁଣ୍ଡ ଅତ୍ୟଧିକ ବିନ୍ଧା, ଗୋଡହାତ ଓ ଅଣ୍ଟା ବିନ୍ଧା, ଜ୍ଵରର ପ୍ରଥମ ଦିନରୁ ଅଧିକ ହାଲିଆ ଲାଗିବା, ବାନ୍ତି ଲାଗିବା, ଦେହରେ ଲାଲ୍ ଲାଲ୍ ଛୋଟ ଛୋଟ ଦାଗ ଦେଖାଯିବା ଏହାର ଲକ୍ଷଣ  । ଏହାର କୌଣସି ନିର୍ଦ୍ଧିଷ୍ଟ ଚିକିତ୍ସା ନାହିଁ  । ଓଆରଏସ୍ ଓ ପାରାସିଟାମଲ୍ ଏହାର ମୁଖ୍ୟ ଚିକିତ୍ସା  । ସାଧାରଣତଃ ୪/୫ ଦିନ ପରେ ଏହା ମାରାତ୍ମକ ରୂପ ନେଇପାରେ  । ତେଣୁ ବିନା ଥଣ୍ଡାକାଶରେ ପ୍ରବଳ ମୁଣ୍ଡବିନ୍ଧା ସହ ଜ୍ଵର ଓ ବାନ୍ତି ହେଉଥିଲେ ମ୍ୟାଲେରିଆ ଓ ଡେଙ୍ଗୁ ପରୀକ୍ଷା କରାଇ ନେବା ଉଚିତ୍  ।

  15. ସ୍କ୍ରବ ଟାଇଫସ୍
  16. ଏହା ଅତିକ୍ଷୁଦ୍ର (ଖାଲି ଆଖିକୁ ଦେଖାଯାଉ ନ ଥିବା) ଟିଙ୍କଜାତୀୟ ପୋକ କାମୁଡିବା ଦ୍ଵାରା ହୋଇଥାଏ  । ଜ୍ଵର ଧୀରେ ଧୀରେ ବଢିବା ଓ ଯକୃତ ବଢିବା ଶରୀରରେ ସିଗାରେଟ ଚେଙ୍କା ପରି ପୋକ ବା ଦାଗ ଦେଖାଯିବା ଏବଂ କୌଣସି କମନ୍ ଆଣ୍ଟିବାୟୋଟିକ୍ ଏହି ଜୀବାଣୁ ଉପରେ କାଟୁ ନ କରିବା ଏହି ରୋଗର ଲକ୍ଷଣ  । ଆଜିଥ୍ରୋମାଇସିନ ଓ ଡକ୍ସିସାଇକ୍ଲିନ ଏହି ରୋଗପାଇଁ ଉପଯୁକ୍ତ ଆଣ୍ଟିବାୟୋଟିକ୍  । ଉପଯୁକ୍ତ ସମୟରେ ରୋଗ ଚିହ୍ନଟ ଓ ଚିକିତ୍ସା ନ କଲେ ଏହି ଜୀବାଣୁ ମଣିଷର ସବୁ ଅଙ୍ଗକୁ ପ୍ରଭାବିତ ଓ ନିଷ୍କ୍ରିୟ କରିପାରେ  ।

  17. ଆଲର୍ଜି ଓ ଆଜମା
  18. ବର୍ଷାଋତୁ ଆରମ୍ଭ ହେବାର ୧୦-୧୫ ଆଗରୁ ଆଣ୍ଟି ଆଲର୍ଜିକ ଔଷଧ ବ୍ୟବହାର କରନ୍ତୁ  । ଯଥା :- ମଣ୍ଟେଲ୍ୟୁକାଷ୍ଟ  ଆଲର୍ଜିର ଉପଶମ ପାଇଁ ହିନହେଲର, କଫ୍ ସିରଫ, ସ୍କିନ ଲୋଶନ ନିଜ ପାଖରେ ରଖନ୍ତୁ ଓ ଏହାର ଉପଯୁକ୍ତ ବ୍ୟବହାର କରନ୍ତୁ  । ଅତି ଥଣ୍ଡାପାଣିରେ ଗାଧୋଇବା ଥଣ୍ଡା, ପାନୀୟ, ଆଇଷକ୍ରିମ ଆଦି ଖାଇବା ଓ ବର୍ଷାରେ ଭିଜିବା ଆଡିକୁ ଆଭଏଡ କରନ୍ତୁ  ।

  19. ଚର୍ମରୋଗ
  20. ଯାଦୁ, ଫୁଲଛଉ ଏହି ସମୟରେ ଅଧିକ ହୋଇଥାଏ  । ଶୁଖିଲା ପୋଷାକ ପିନ୍ଧିବା, ପ୍ରତିଦିନ ଗାଧୋଇବା, ଝାଳ ପୋଛିବା ସଙ୍ଗେ ସଙ୍ଗେ ବଦଳାଇଲେ ଏହା ହୁଏ ନାହିଁ   । ପିଲାଙ୍କ ଶରୀରର ଭାଙ୍ଗକୁ ସଫା ଶୁଖିଲା ରଖନ୍ତୁ  । ଟରବେନାଫିନ, କ୍ଲୋଟ୍ରିମାଜୋଲ କ୍ରିମ କିମ୍ବା ଡଷ୍ଟିଙ୍ଗ ପାଉଡର ଏହାର ଚିକିତ୍ସା ପାଇଁ ବ୍ୟବହାର କରାଯାଇପାରେ  ।

ଉପରୋକ୍ତ ରୋଗଗୁଡିକ ପାଇଁ ସାଧାରଣ ପ୍ରତିକାର

  • ଫ୍ରିକୁଏଣ୍ଟ ହ୍ୟାଣ୍ଡ ୱାସିଂ (ବାରମ୍ବାର ହାତ ଧୋଇ ସଫା କରିବା)
  • ଗାଧୋଇବା ପାଇଁ ସାଧାରଣ ଆଣ୍ଟିସେପ୍ଟିକଡେଟଳ କିମ୍ବା ସାଭଲନ୍ ସୋପ୍ ବା ନିମ୍ ସୋପ୍ ର ବ୍ୟବହାର
  • ଫୁଟାପାଣି ପିଇବା, ସଦ୍ୟ ପ୍ରସ୍ତୁତ ଘରରନ୍ଧା ଖାଇବା  ।
  • ଘର ଓ ଘରର ଚତୁଃପାର୍ଶ୍ଵ ପରିଷ୍କାର ପରିଚ୍ଛନ୍ନ ରଖିବା  ।
  • ମଶାରି ଲଗାଇ ଶୋଇବା  ।
  • ବାହାରେ ଖେଳିଲେ , ପାର୍କ ଆଦି ଗଲେ ଫୁଲ୍ ସାର୍ଟ ବା ଫୁଲ୍ ପ୍ୟାଣ୍ଟ ପିନ୍ଧିବା
  • ବର୍ଷା ଋତୁ ଆରମ୍ଭରେ ପ୍ରତିବର୍ଷ ଫ୍ଲୁ ଟିକା ନେବା
  • ଯେଉଁ ଶିଶୁମାନେ ହେପାଟାଇଟିସ୍ ଏ, ଟାଇଫଏଡ ଟିକା ନେବା ଉଚିତ୍  ।

ବିଶେଷ ଦ୍ରଷ୍ଟବ୍ୟ

ମ୍ୟାଲେରିଆ ଓ ଡେଙ୍ଗୁର କୌଣସି ନିର୍ଦ୍ଧିଷ୍ଟ ଟିକା ନାହିଁ  । ଏହା ଜଲ୍ଦି ମାରାତ୍ମକ ରୂପ ଧାରଣ କରେ । ତେଣୁ ଏଥିପ୍ରତି ସତର୍କ ରହିବା ଜରୁରୀ  ।

ବର୍ଷାଦିନେ ପିଲାର ସ୍ୱାସ୍ଥ୍ୟ

ସାଧାରଣତଃ ବର୍ଷାଦିନେ ପିଲାମାନଙ୍କୁ ଥଣ୍ଡା, ଜ୍ଵର, କାଶ, ଝାଡାବାନ୍ତି ପରି ସମସ୍ୟା ଦେଖାଦେଇଥାଏ । ଏହି ସମୟରେ ମା’ ମାନେ କିପରି ସତର୍କ ରହିବା ଦରକାର ସେ ସମ୍ପର୍କରେ –

ବର୍ଷାଦିନେ ଜଣ୍ଡିସ୍ ବା ଡାଇରିଆ ଖୁବ ଶୀଘ୍ର ବ୍ୟାପିଥାଏ । ପିଲାଙ୍କୁ ପାଣି ଫୁଟାଇ ପିଇବାକୁ ଦେବା ସହ ବାହାର ଖାଦ୍ୟ  ଯେପରିକି ଦହିବରା, ଗୁପଚୁପ୍ ଆଦି ଖାଇବାକୁ ଦିଅନ୍ତୁ ନାହିଁ । ଘର ଚାରିପଟେ ପାଣି ଜମାହୋଇ  ରହିଲେ ମଶା ବଂଶ ବୃଦ୍ଧି ହୋଇଥାଏ । ତେଣୁ ସେସବୁ ସ୍ଥାନକୁ  ପରିଷ୍କାର ରଖନ୍ତୁ । ଘର ଚତୁଃପାର୍ଶ୍ଵରେ କୌଣସି ଭଙ୍ଗା ଟିଣ  ସାମଗ୍ରୀ ରଖନ୍ତୁ ନାହିଁ । କାରଣ ଏଥିରେ ପାଣି ଜମି ରହିବା ଦ୍ଵାରା ଖୁବ ଶୀଘ୍ର ମଶା ବୃଦ୍ଧି ପାଇଥାନ୍ତି । ଡେଙ୍ଗୁ ଜ୍ଵର ମାରାତ୍ମକ ହୋଇଥିବାରୁ ସଚେତନ ରହିବା ଆବଶ୍ୟକ । ଏହି ଦିନେ ଥଣ୍ଡା, ଜ୍ଵର, କାଶ ଝାଡାବାନ୍ତି ହୋଇଥାଏ । ଏଥିପ୍ରତି ସଚେତନ ରହିବା ଆବଶ୍ୟକ । ଏହିଦିନେ ଥଣ୍ଡା, ଜ୍ଵର, କାଶ, ଝାଡାବାନ୍ତି ହୋଇଥାଏ । ଏଥିପ୍ରତି ସଚେତନ ରହିବା ଆବଶ୍ୟକ । କେତେକ ଘର ସନ୍ତସନ୍ତିଆ ରହିବାରୁ ଜୀବାଣୁ ବୃଦ୍ଧି ପାଇଥାଏ । ଘରଦ୍ଵାର ସବୁବେଳେ ସଫାସୁତୁରା ରଖନ୍ତୁ । ପନିପରିବା ଆଣିବା ପରେ ତାକୁ ଭଲଭାବେ ଧୁଅନ୍ତୁ । କାରଣ ଏଥିରେ ବହୁ ଜୀବାଣୁ ରହିଥାଏ । ବର୍ଷାଦିନେ ସାଧାରଣତଃ ଲୁଗାପଟା ଶୀଘ୍ର ସୁଖି ନ ଥାଏ । ଏପରି ପୋଷାକ ପିଲାଙ୍କୁ ପିନ୍ଧାଇଲେ ଶରୀର ଖୁବ ଶୀଘ୍ର ଇନଫେକସନ୍ ହେବାର ଆଶଙ୍କା ଥାଏ।

ବର୍ଷାଦିନେ ପିଲାର ସ୍ୱାସ୍ଥ୍ୟ ପାଇଁ  ସଚେତନ

  • ବର୍ଷାଦିନେ ଘରକୁ ଶୁଖିଲା ଓ ପରିଷ୍କାର ରଖନ୍ତୁ । ପିଲା ଶୋଇଥିବା ରୁମକୁ ସାଧାରଣ ତାପମାତ୍ରାରେ ରଖନ୍ତୁ ।
  • ପିଲାଙ୍କୁ ଉଷୁମ ପାଣିରେ ଗାଧୋଇବାକୁ କୁହନ୍ତୁ । ବର୍ଷାଦିନେ ପିଲାମାନଙ୍କୁ ଆଣ୍ଟିସେପ୍ଟିକ ସାବୁନରେ ଗାଧୋଇ ଦିଅନ୍ତୁ । ଏହାଦ୍ଵାରା ଶରୀର ଜୀବାଣୁମୁକ୍ତ ରହିବା ସହ ସେମାନଙ୍କୁ ଫ୍ରେଶ୍ ଲାଗିଥାଏ ।
  • ପିଲା ସୋଇଥିବା ବେଡରେ ମଶାରୀ ଟାଣନ୍ତୁ । ସନ୍ଧ୍ୟାହେଲେ ପିଲାମାନଙ୍କ ରୁମର କବାଟ ବନ୍ଦ କରି ଦିଅନ୍ତୁ । ଏହାଦ୍ଵାରା ମଶା କିମ୍ବା ଅନ୍ୟ କୀଟପତଙ୍ଗ ଘର ଭିତରକୁ ପଶି ପାରିବେ ନାହିଁ । ମଶାରୁ ବର୍ତ୍ତିବା ପାଇଁ ଏହିଦିନେ ଝରକାରେ ଜାଲି ଲଗାନ୍ତୁ।
  • ଘରେ ଥଣ୍ଡା,ଜ୍ଵର ଓ ବାନ୍ତି ଔଷଧ ଷ୍ଟକ ରଖନ୍ତୁ । ଏହା କେତେ ଥର  ଦିଆହେବ ସେ ବିଷୟରେ ଯଦି ଜାଣି ନାହାନ୍ତି ତେବେ ଡାକ୍ତରଙ୍କ ସହ ପରାମର୍ଶ କରନ୍ତୁ । ଏପରି ପରିସ୍ଥିତିରେ ପ୍ରାଥମିକ ଚିକିତ୍ସା (ଘରେ) ପରେ ଡାକ୍ତରଙ୍କ ନିକଟକୁ ନେଇଯାଆନ୍ତୁ । ଯେ ପିଲାର ସ୍ୱାସ୍ଥ୍ୟ ପରୀକ୍ଷା କରି ଯେଉଁ ଔଷଧ ଖାଇବାକୁ ପରାମର୍ଶ ଦେବେ ତାହାକୁ ଅକ୍ଷରେ  ଅକ୍ଷରେ ମାନନ୍ତୁ ।
  • ବର୍ଷାଦିନେ ଘରେ ଏସି ବ୍ୟବହାର କରନ୍ତୁ ନାହିଁ । ଏହା ରୁମର ତାପମାତ୍ରାକୁ କମ ରଖିଥାଏ ।
  • ଘରେ ପିଲା ଶୋଇଥିବା ରୁମରେ କଏଲ ବ୍ୟବହାର କରିବା ପରିବର୍ତ୍ତେ ମଶାରୀ ଟାଣନ୍ତୁ ।
  • ପୋଷାକ ଯଦି ଆଂଶିକ ଓଦା ରହିଛି ତେବେ ତାହାକୁ ପିଲାଙ୍କୁ ପିନ୍ଧିବାକୁ ଦିଅନ୍ତୁ ନାହିଁ । ବେଳେବେଳେ ଏହା ଇନଫେକସନର କାରଣ ହୋଇଥାଏ ।
  • ପିଲାର ପାଦକୂ ପରିଷ୍କାର ଏବଂ ଶୁଖିଲା ରଖନ୍ତୁ ।
  • ଏହିଦିନେ ଯେତେସମ୍ଭବ ଉଷୁମ ତଥା ତଟକା ଖାଦ୍ୟ ପିଲାଙ୍କୁ ଦିଅନ୍ତୁ । ଯେପରିକି ଗରମ ସୁପ୍, ଗରମ କ୍ଷୀର ଇତ୍ୟାଦି ।
  • ପିଲାର ବ୍ୟାଗ, ରେନକୋଟ୍, ଖେଳଣାକୁ ଶୁଷ୍କ ଏବଂ ପରିଷ୍କାର ରଖନ୍ତୁ । ଏହିଦିନ ଘରର ଚତୁଃପାର୍ଶ୍ଵକୁ ପରିଷ୍କାର ରଖନ୍ତୁ ।
  • ବଡ ବଡ ବୃକ୍ଷର ଡାଳ ଗୁଡିକୁ କାଟି ଦିଅନ୍ତୁ । କୌଣସି ସ୍ଥାନରେ ପାଣି ଜମି ରହିବାକୁ ଦିଅନ୍ତୁ ନାହିଁ । ଏହାଦ୍ଵାରା ମଶାବଂଶ ବୃଦ୍ଧି ପାଇଥାଏ । ଆପଣ ଚାହିଁଲେ ପିଲାଙ୍କୁ ମଶା ନ କାମୁଡିବା ପାଇଁ ମିଳୁଥିବା କ୍ରିମ ଲଗାଇ ଦିଆନ୍ତୁ କିମ୍ବା ମଶା ନ ହେବା ପାଇଁ ମିଳୁଥିବା ଲିକୁଇଡ୍ ଘରେ ଲଗାନ୍ତୁ ।
  • ଏହିଦିନେ ଟାଇଫଏଡ ବହୁତ ଶୀଘ୍ର ହୋଇଥାଏ । ଏଥିପ୍ରତି ସଚେତନ ରୁହନ୍ତୁ । ଯେତେ ସମ୍ଭବ ପିଲାକୁ ବାହାର ଖାଦ୍ଯ ଦିଅନ୍ତୁ ନାହିଁ । ଘରେ ପ୍ରସ୍ତୁତ ଖାଦ୍ୟ ପିଲାର ସ୍ୱାସ୍ଥ୍ୟ ପାଇଁ ଉତ୍ତମ ।
  • ଅଦା, ହଳଦୀ ପରି ହରବାଲ୍ ଜାତୀୟ ଜିନିଷ ପିଲାର ଖାଦ୍ୟ ତାଲିକାରେ ସାମିଲ କରନ୍ତୁ । ସେମାନଙ୍କୁ ଫଳ ମୂଳ ଖାଇବାକୁ ଦେବା ପୂର୍ବରୁ ସେଗୁଡିକୁ ଭଲଭାବେ ଧୁଅନ୍ତୁ । ପ୍ରସ୍ତୁତ ହୋଇ ଦୀର୍ଘ ସମୟ ଧରି ରହିଥିବା ଖାଦ୍ୟକୁ ଭଲଭାବରେ ଗରମ କରି ଖାଇବାକୁ ଦିଅନ୍ତୁ । ବର୍ଷାଦିନେ ଦହି ଲସି ଆଦି ପିଲାକୁ ଖାଇବାକୁ ଦିଅନ୍ତୁ ନାହିଁ । ପିଲାଙ୍କୁ ପ୍ରଚୁର ପାଣି ପିଇବାକୁ କୁହନ୍ତୁ ।
  • ବର୍ଷାଦିନେ ପାଣି ଏବଂ କାଦୁଅରେ ଅନେକ ପିଲା ଖେଳିବାକୁ ପସନ୍ଦ କରିଥାନ୍ତି । ଯଥା ସମ୍ଭବ ଏଥିରୁ ପିଲାଙ୍କୁ ଦୂରେଇ ରଖନ୍ତୁ । ପିଲା ବାହାରେ ଖେଳି ସାରି ଘରକୁ ଫେରିଲେ ଅପରିଷ୍କାର ହୋଇଥିବା କପଡାକୁ ସଙ୍ଗେ ସଙ୍ଗେ ବଦଳାଇ ସେମାନଙ୍କୁ ଭଲ ଭାବେ ଧୋଇ ଦିଅନ୍ତୁ ।
  • ଓଦା ଥିବା ଜୋତା କିମ୍ବା ମୋଜା ପିନ୍ଧିଲେ ଜୀବାଣୁ ସଂକ୍ରମଣ ହେବାର ଆଶଙ୍କା ଥାଏ । ତେଣୁ ଯେତେ ସମ୍ଭବ ମୋଜା ଓ ଜୋତାକୁ ଶୁଷ୍କ ରଖନ୍ତୁ ।
  • ଲେଦର ଚପଲ ବଦଳରେ ବର୍ଷାଦିନେ ଚପଲ ପିନ୍ଧିବାକୁ କୁହନ୍ତୁ ।
  • ପିଲା ନଖ କାମୁଡୁଥିଲେ ଏଥିରୁ ସେମାନଙ୍କୁ ବାରଣ କରନ୍ତୁ କାରଣ ଏହାଦ୍ୱାରା ପିଲାର ନଖରେ ଥିବା ସମସ୍ତ ମଇଳା ପେଟକୁ ଯାଇଥାଏ ଏବଂ ବିଭିନ୍ନ ରୋଗ ସୃଷ୍ଟି କରିଥାଏ ।
  • ସମସ୍ତ ଖାଦ୍ୟକୁ ଘୋଡାଇ ରଖନ୍ତୁ ।

ସଂଗୃହୀତ –

  • ଡା. ସ୍ଵର୍ଣ୍ଣଲତା ଦାସ
  • ସ୍ୱାସ୍ଥ୍ୟ ବିଭାଗ
2.82352941176
ଆପଣଙ୍କର ପରାମର୍ଶକୁ ପୋଷ୍ଟ କରନ୍ତୁ

( ଯ଼ଦି ଆପଣଙ୍କର କିଛି କମେଣ୍ଟ / ପରାମର୍ଶ ଉକ୍ତ ବିଷଯ଼ବସ୍ତୁକୁ ନେଇ ରହିଛି ତେବେ ଦଯାକରି ତାହାକୁ ଏଠାରେ ପୋଷ୍ଟ କରନ୍ତୁ

Enter the word
ନେବିଗତିଓଂ
Back to top