<div id="MiddleColumn_internal"> <p style="text-align: justify; "><img class="image-right" src="https://static.vikaspedia.in/media_vikaspedia/or/images/agriculture/b15b43b37b3f-b09b26b4db2fb2e/roseapple2.jpg" />ଗୋଲାପଜାମୁ ଓ ଜାମୁରୋଳ ବିଶେଷକରି ପିଲାମାନଙ୍କର ଆଦରର ଫଳ । କେତେକ କିସମର ଲିଚୁକୁ ଛାଡିଦେଲେ ଗୋଲାପ ବାସ୍ନାଥିବା ଫଳ ବହୁତ କମ୍ । ଗୋଲାପଜାମୁ ଓ ଜାମୁରୋଳର ଗୋଲାପ ବାସ୍ନା ବହୁତ ଉଚ୍ଚ ଗୋଲାପଜାମୁ ଓ ଜାମୁରୋଳର ସ୍କ୍ୱାସ ଖୁବ ସ୍ଵାଦିଷ୍ଟ ।</p> <p style="text-align: justify; "><strong>ଉତ୍ପତ୍ତି</strong></p> <p style="text-align: justify; ">ଭାରତ ଓ ଇଣ୍ଡୋନେସିଆ ।</p> <h3 style="text-align: justify; ">ଜଳବାୟୁ</h3> <p style="text-align: justify; ">ଗୋଲାପ ଜାମୁ ଓ ଜାମୁରୋଳ ଉଭୟେ ଗ୍ରୀଷ୍ମମଣ୍ଡଳୀୟ ଫଳ । ଭଲ ବର୍ଷା ହେଉଥିବା ଜାଗାରେ ଏହା ଭଲ ହୁଏ । ସମୁଦ୍ର ପତ୍ତନଠାରୁ ୬୦୦ ମିଟର ଉଚ୍ଚତା ପର୍ଯ୍ୟନ୍ତ ଏହାର ଚାଷ କରାଯାଇପାରିବ ।</p> <h3 style="text-align: justify; ">ମୃତ୍ତିକା</h3> <p style="text-align: justify; ">ଅଧିକାଂଶ ମାଟିରେ ଗୋଲାପ ଜାମୁ ଓ ଜାମୁରୋଳ ଚାଷ ହୋଇ ପାରିବ ସନ୍ତସନ୍ତିଆ ମାଟିରେ ଏ ଗଛ ଉଧାଏ ନାହିଁ । ନିଗିଡା ଦୋରସା ମାଟିରେ ବିନା ଖତ ସାରରେ ମଧ୍ୟ ଭଲ ଅମଳ ଦିଏ ।</p> <h3 style="text-align: justify; ">କିସମ</h3> <p style="text-align: justify; ">ସେପରି ଉନ୍ନତ କିସମ ନାହିଁ । ଭଲ ଫଳୁଥିବା ଗଛରୁ କଲମୀ କରି ଗଛ ଲଗାଇବା କଥା ।</p> <p style="text-align: justify; "><strong>ବଂଶ ବିସ୍ତାର</strong></p> <p style="text-align: justify; ">ମଞ୍ଜିରୁ ଓ ଗୁଟି କଲମୀ ଦ୍ଵାରା ଏହାର ବଂଶ ବିସ୍ତାର କରାଯାଏ ।</p> <h3 style="text-align: justify; ">ରୋପଣ</h3> <p style="text-align: justify; ">ଜୁନ-ଜୁଲାଇ ଓ ସେପ୍ଟେମ୍ବର ଅକ୍ଟୋବର ମାସରେ ଗଛ ଲଗାଯାଇ ପାରିବ । ଗୋଲାପ ଜାମୁ ୫/୬ ମିଟର ଦୂରତାରେ ଓ ଜାମୁରୋଳ ୭/୮ ମିଟର ଦୂରତାରେ ଲଗାଯାଏ । ଗଛ ଲଗାଇବା ପାଇଁ ୬୦ ସେମି ଗୋଲେଇ ଓ ୬୦ ସେମି ଗଭୀରରେ ଗାତ କରାଯାଏ । ଗଛ ଲଗାଇବା ପୂର୍ବରୁ ଗାତରେ ଏକ ଝୁଡି ଖତ ସହ ଏକ କେଜି ଜୈବିକସାର ଓ ୫୦ଗ୍ରାମ କ୍ଲୋରପାଇରିଫସ ଗୁଣ୍ଡ ଦେଇ ଗଛ ଲଗାଯାଏ ।</p> <h3 style="text-align: justify; ">ଖତ ଓ ସାର</h3> <p style="text-align: justify; ">ଗୋଲାପଜାମୁ ଓ ଜାମୁ ରୋଳ ଗଛରେ ସାଧାରଣତଃ କେହି ଖତ ସାର ଦିଅନ୍ତିନି । କିନ୍ତୁ ଗଛ ପିଛା ବର୍ଷକୁ ଝୁଡିଏ ଖତ ଓ ଏକ କେଜି ଜୈବିକସାର ଦେଲେ ଭଲ ଅମଳ ମିଳେ ।</p> <p style="text-align: justify; "><strong>କାଟଛାଣ୍ଟ</strong></p> <p style="text-align: justify; ">ଗୋଲାପଜାମୁ ଓ ଜାମୁରୋଳ ଗଛରେ ବିଶେଷ କାଟଛାଣ୍ଟ କରାଯାଏନି ।</p> <h3 style="text-align: justify; ">ଜଳସେଚନ</h3> <p style="text-align: justify; ">ଗଛଲଗାଇବାରେ ପ୍ରଥମ ବର୍ଷ ଜଳସେଚନ ଦର୍କାର କରେ । ଗଛ ଥରେ ଭଲ ଭାବରେ ବଞ୍ଚିଗଲାପରେ , ବର୍ଷା ଜଳ ଉପରେ ନିର୍ଭର କରି ଭଲ ଫଳ ଦିଏ । ତେବେ ଯେଉଁ ବର୍ଷ ଭଲ ବର୍ଷା ନହୁଏ ଖରାଦିନେ ଜଳସେଚନ ଜଳସେଚନ ଦର୍କାର ହୁଏ ।</p> <h3 style="text-align: justify; ">ରୋଗ ଓ ପୋକ</h3> <p style="text-align: justify; ">ଗୋଲାପ ଜାମୁ ଓ ଜାମୁରୋଳ ଗଛରେ ଗଲଫ୍ଲାଇ, କାତିପୋକ ଓ ପତ୍ରଖିଆ ଶଁବାଳୁଆ ଲାଗନ୍ତି । ମାଲାଥିଆନ ରୋଗର ଇତ୍ୟାଦି ପକାଇ ପୋକକୁ ଆୟତ କରାଯାଏ । କାଉ, ବାଦୁଡି, ଗୁଣ୍ଡିଚି ମୂଷା ଇତ୍ୟାଦି ଫଳକୁ ଖାଇ ନଷ୍ଟ କରିଦିଅନ୍ତି ।</p> <h3 style="text-align: justify; ">ଅମଳ</h3> <p style="text-align: justify; "><img class="image-right" src="https://static.vikaspedia.in/media_vikaspedia/or/images/agriculture/b15b43b37b3f-b09b26b4db2fb2e/roseapple.jpg" />ଗୋଲାପ ଜାମୁରେ ଫୁଲ ବସନ୍ତ ଋତୁରେ ଫୁଟେ ଓ ଗ୍ରୀଷ୍ମ ଋତୁରେ ଅମଳ ହୁଏ । ଫଳ ଦେଖିବାକୁ ଗଲଫବଲ ପରି ଏବଂ ଏହାର ରଙ୍ଗ ଈଷତ ସବୁଜ । ଫଳ ସ୍ପଞ୍ଜ ପରି ନରମ ଓ ବିଶେଷ ସୁଗନ୍ଧ ଯୁକ୍ତ । ଜାମୁରୋଳ ଫଳ ସାମାନ୍ୟ ପାଣିଚିଆ ଓ ଏହା ଗୋଲାପଜାମୁ ପରି ଏତେ ସ୍ଵାଦୁକର ଓ ସୁଗନ୍ଧଯୁକ୍ତ ନୁହଁ । ଗୋଲାପ ଜାମୁ ଗଛରୁ ବର୍ଷକୁ ପ୍ରାୟ ୧୫କେଜି ଫଳ ଓ ଜାମୁରୋଳ ଗଛରୁ ୩୦କେଜି ଫଳ ମିଳେ । ହାରାହାରି ଆୟ ହେକ୍ଟର ପିଛା ଟ ୧୫,୦୦୦ ।</p> <p style="text-align: justify; "><strong>ଆଧାର : ଡାକ୍ତର ସୂର୍ଯ୍ୟ ନାରାୟଣ ବେହେରା</strong></p> </div>