ଚାଷପାଇଁ ଛାଡ଼ିଲେ ଚାକିରି

ବ୍ୟାଙ୍କ ଚାକିରି ଛାଡି ଜଣେ ଚାଷ କାମ କରିବାର ମନୋବୃତ୍ତି

ମୋଟ ଅଙ୍କ ଦରମାର ବ୍ୟାଙ୍କ ଚାକିରି ଛାଡି ଜଣେ ଚାଷ କାମ କରିବାର ମନୋବୃତ୍ତି ଏହା କରି ଦେଖାଇଛନ୍ତି ସଂକଳ୍ପ ଶର୍ମା ନାମକ ଜଣେ ବ୍ୟକ୍ତି । ସଂକଳ୍ପ ମେକାନିକାଲ ଇଞ୍ଜିନିୟରିଂରେ ଶିକ୍ଷା ଲାଭ କରିବା ପରେ ଏମ୍‌ବିଏ କରିଥିଲେ । ଏହାପରେ ମୋଟା ଅଙ୍କ ଦରମାର ଚାକିରି ପାଇଥିଲେ ବ୍ୟାଙ୍କରେ ।

କିନ୍ତୁ ଜୀବରେ କିଛି କରିବାର ଚାଲେଞ୍ଜ ନେଇ ସେ ଏହା ଛାଡିଲେ । ତାଙ୍କ ପରିବାର ଦୀର୍ଘକାଳ ହେଲା ଚାଷକୁ ନିଜର ବୃତ୍ତି ଭାବରେ ଗ୍ରହଣ କରିଆସିଛନ୍ତି । ପିଲାଦିନୁ ସେ ପରିବାର ଲୋକଙ୍କୁ ଜମିରେ କାମ କରିବା ଦେଖିଆସିଛନ୍ତି । ଏହା ତାଙ୍କୁ କୃଷି ପ୍ରତି ଆକୃଷ୍ଟ କରିଥିଲା ।

ପ୍ରାକୃତିକ କୃଷି ପଦ୍ଧତିରେ ଚାଷ

ମଧ୍ୟପ୍ରଦେଶର ବିଦିଶାରେ ତାଙ୍କ ପରିବାରର ବଡ ଜମି ରହିଛି ଏବଂ ସେଠାରେ ସେମାନେ ଚାଷ କାମ କରନ୍ତି । ସେହି ଜମିରୁ ୧୦ ଏକରକୁ ନେଇ ସଂକଳ୍ପ ୨୦୧୫ରେ ତାଙ୍କ ବାପାଙ୍କ ସହିତ ମିଶି ଚାଷ କାମ ଆରମ୍ଭ କଲେ । ଏବେ ସେ ଜଣେ ପୁର୍ଣ୍ଣଙ୍ଗ ଚାଷୀ ପାଲଟିଯାଇଛନ୍ତି । ୩୬ ବର୍ଷ ବୟସ୍କ ସଂକଳ୍ପ ଯେତେବେଳେ ଏହି ବୁଢିକୁ ପ୍ରବେଶ କଲେ ସେତେବେଳେ ତାଙ୍କର ଏକମାତ୍ର ଉଦ୍ଦେଶ୍ୟ ଥିଲା, ତାହା ହେଉଛି ବିନା ସାର, ବିନା କୀଟନାଶକ ଏବଂ ରାସାୟନିକ ପଦାର୍ଥର ବ୍ୟବହାର ନକରି କିଭଳି ଚାଷ କରାଯାଇପାରିବ ।

ସେ ପ୍ରାକୃତିକ ଉପାୟରେ ଚାଷ କରିବାକୁ ଚାହିଁଥିଲେ ଯେଉଁଥିରେ ଦୁଇ ମୁଖ୍ୟ ଫସଲ ମଧ୍ୟବର୍ତ୍ତୀ ସମୟରେ ଅନ୍ୟ ଫସଲ ଚାଷ କରାଯାଇପାରିବ । ଏଥିରେ ଉତ୍ପାଦନ ଖର୍ଚ୍ଚ କିଛି ନାହିଁ କହିଲେ ଚଳେ । ଇନ୍ଦୋରରେ ସୁଭାଷ ପାଲୋକରଙ୍କ ଦ୍ଵାରା ଆୟୋଜିତ ଏକ କର୍ମଶାଳାରେ ସଂକଳ୍ପ ଯୋଗଦେବା ସହିତ ପ୍ରାକୃତିକ ଚାଷ ସମ୍ପର୍କରେ ଜାଣିବାକୁ ଏକାଧିକ ଥର ନାଗପୁର ଯାଇଥିଲେ ।

କୃଷି କ୍ଷେତ୍ର

ପ୍ରାକୃତିକ କୃଷି ପଦ୍ଧତିରେ ଚାଷୀ ସ୍ଥାନୀୟ ସ୍ତରରେ ମିଳୁଥିବା ଖତ ସାର ଏବଂ ପରିବେଶ ଉପରେ ପ୍ରତିକୂଳ ପ୍ରଭାବ ପକାଉନଥିବା ପ୍ରାକୃତିକ କୀଟନାଶକ ବ୍ୟବହାର କରିଥାନ୍ତି । ବହୁ ପରୀକ୍ଷା ନିରୀକ୍ଷା ପରେ ସଂକତ୍ର ତାଙ୍କ ଜମିରେ ପ୍ରାକୃତିକ ଉପାୟରେ ବିଲାତି ବାଇଗଣ, ପିଆଜ, ରସୁଣ, ଅଦା, ଲଙ୍କା, ସମସ୍ତ ପ୍ରକାର ଡାଲି, ମକା ଆଦି ଚାଷ କଲେ । ଭୋପାଳଠାରୁ ପ୍ରାୟ ୭୦ କିଲୋମିଟର ଦୂରରେ ତାଙ୍କର ବିଦିଶା ଫାର୍ମ ଅବସ୍ଥିତ । ସେ ପ୍ରତିଦିନ ୭୦ କିଲୋମିଟର ଯାତ୍ରାକରି ନିଜ କୃଷି କ୍ଷେତ୍ରକୁ ଯାଆନ୍ତି ଏବଂ ସକାଳ ୮ ରୁ ୯ ଟା ମଧ୍ୟରେ ସେଠାରେ ସେ ପୁରାଦିନ ବିତାନ୍ତି । କୃଷି ଉତ୍ପାଦର ପାଇକାରୀ ଓ ଖୁଚୁରା ମୂଲ୍ୟ ମଧ୍ୟରେ ରହୁଥିବା ବିରାଟ ପାର୍ଥକ୍ୟକୁ ଦୂର କରିବା ସକାଶେ ସେ ଲକ୍ଷ୍ୟ ରଖିଛନ୍ତି । ଯେଭଳି ମଧ୍ୟସ୍ଥିଙ୍କୁ ହଟାଇ ଚାଷୀଙ୍କୁ ପ୍ରକୃତ ମୂଲ୍ୟ ମିଳିପାରିବ ସେ ଦିଗରେ ସେ କାମ କରୁଛନ୍ତି ।

ସମସ୍ୟା ପାଇଁ ମନକୁ ସୁଦୃଢ

ପ୍ରଥମେ ପ୍ରଥମେ ସେ ଚାଷ କାମରେ ବହୁ ସମସ୍ୟାର ସମ୍ମୁଖୀନ ହୋଇଥିଲେ । ବିଶେଷକରି ଅନିଶ୍ଚିତ ପାଣିପାଗ ତାଙ୍କ ପାଇଁ ମୁଖ୍ୟ ପ୍ରତିବନ୍ଧକ ସାଜିଥିଲା । ବେଳେବେଳେ ସେ ଭାବିଥିଲେ। ଏହାକୁ ଛାଡି ପୁଣି ନିଜର ଚାକିରିକୁ ଫେରିଯିବେ । କିନ୍ତୁ ନିଜ ମନକୁ ସୁଦୃଢ କରି ସେ ଏଥିରେ ରହିଲେ ଏବଂ ସେଥିରୁ ସୁଫଳ ମିଳିବା ଆରମ୍ଭ ହୋଇଛି । ସାହସ ଓ ଧୈର୍ଯ୍ୟ ଦ୍ଵାରା ସବୁକିଛି ସମ୍ଭବ ହୋଇପାରିବ ବୋଲି ସେ କହିଛନ୍ତି ।

ଆଧାର – କୃଷି ବିଭାଗ