ରାଜ୍ୟରେ ପଶୁ ସମ୍ପଦର ବିକାଶ ପାଇଁ ବିଭିନ୍ନ ଯୋଜନା

ଆମ ରାଜ୍ୟରେ ଗାଈ,ଗୋରୁ, ଛେଳି,ମେଣ୍ଢା, ଘୁଷୁରୀ, କୁକୁଡା, ବତକ ପାଳନ କରୁଥିବା ଚାଷୀଙ୍କ ପାଇଁ ରାଜ୍ୟ ସରକାରଙ୍କ ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗ ତରଫରୁ ନିମ୍ନଲିଖିତ ଉନ୍ନତିମୂଳକ ଯୋଜନାମାନ ପ୍ରଚଳନ କରିଛନ୍ତି ।

ଭ୍ରାମ୍ୟମାଣ ପ୍ରାଣୀ ଚିକିତ୍ସା ସେବା

ଏ ବ୍ୟବସ୍ଥା ରାଷ୍ଟ୍ରୀୟ କୃଷି ବିକାଶ ଯୋଜନା ଏବଂ ରାଜ୍ୟ ସରକାରଙ୍କ ଯୋଜନା ମାଧ୍ୟମରେ ରାଜ୍ୟର ସମସ୍ତ ବ୍ଲକରେ କାର୍ଯ୍ୟକାରୀ ହେଉଛି । ମାସରେ ୨୦ଦିନ ଭ୍ରାମ୍ୟମାଣ ପ୍ରାଣୀଚିକିତ୍ସା ସେବା ପୂର୍ବନିର୍ଦ୍ଧାରିତ ସୂଚୀ ଅନୁସାରେ ଚାଷୀଙ୍କ ଦ୍ଵାରଦେଶରେ ଯୋଗାଇ ଦିଆଯାଉଛି । ଏହି ଯୋଜନା ମାଧ୍ୟମରେ ପ୍ରାଣୀ ରୋଗଗୁଡିକର ମାଗଣା ଚିକିତ୍ସା ତଥା ରୋଗ ସର୍ବେକ୍ଷଣ ସହ ପ୍ରାଣୀପାଳନ ପାଇଁ ଜନସଚେତନତା ସୃଷ୍ଟି କରାଯାଉଛି ।

ଯୋଗାଯୋଗ : ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ, ଉପନିର୍ଦେଶକ , ରୋଗ ନିୟନ୍ତ୍ରଣ, ନିର୍ଦ୍ଦେଶାଳୟ, କଟକ

ସଙ୍କର ମାଈ ବାଛୁରୀ ପରିପାଳନ ଯୋଜନା

ରାଷ୍ଟ୍ରୀୟ କୃଷି ବିକାଶ ଯୋଜନା ମାଧ୍ୟମରେ ଆମ ରାଜ୍ୟରେ ସଙ୍କର ମାଈ ବାଛୁରୀ ପାଳନ ଯୋଜନା ଆରମ୍ଭ କରାଯାଇଛି । ଏହି ଯୋଜନାରେ ଦୁଗ୍ଧ ସମବାୟ ସମିତିର ପରିସର ମଧ୍ୟରେ ଚାଷୀମାନଙ୍କ କୃତ୍ରିମ ପ୍ରଜନନ ମାଧ୍ୟମରେ ଜନ୍ନିତ ସଙ୍କର ମାଈ ବାଛୁରୀମାନଙ୍କୁ ଅଗ୍ରାଧିକାର ଭିତ୍ତିରେ ସହାୟତା ମିଳିଥାଏ । ୪-୨୮ ମାସ ପର୍ଯ୍ୟନ୍ତ ୨୪ ମାସ ପାଇଁ ସର୍ବାଧିକ ୧୩୬୦ କିଗ୍ରା ବାଛୁରୀ ଦାନା ୫୦% ଅନୁଦାନରେ ତ୍ରୈମାସିକ କିସ୍ତିରେ ସମିତି ମାଧ୍ୟମରେ ଯୋଗାଇ ଦିଆଯାଏ । ଯୋଜନାଭୁକ୍ତ ବାଛୁରୀମାନଙ୍କର ବୀମା କରାଯାଇଥାଏ ଏବଂ ପ୍ରତିଷେଧକ ଟିକା ଓ କୃମି ନିବାରକ ଔଷଧ ମାଗଣାରେ ଯୋଗାଇ ଦିଆଯାଇଥାଏ।

ଯୋଗାଯୋଗ : ନିକଟସ୍ଥ ଦୁଗ୍ଧ ସମବାୟ ସମିତି କିମ୍ବା ପଶୁ ଚିକିତ୍ସାଳୟ

ଡାଏରୀ ଉଦ୍ୟୋଗୀ ପ୍ରୋତ୍ସାହନ ଯୋଜନା

ଏହି ଯୋଜନା ରାଜ୍ୟ ସରକାରଙ୍କ ଉଦ୍ୟମରେ କାର୍ଯ୍ୟକାରୀ କରାଯାଉଛି, ଯାହାକି ସମସ୍ତ ଆର୍ଥିକ ବର୍ଗର ଚାଷୀଙ୍କ ପାଇଁ ଉର୍ଦ୍ଧିଷ୍ଟ । ଏହି ଯୋଜନାରେ ଜଣେ ସାଧାରଣ ବର୍ଗର ଚାଷୀ ବା ହିତାଧିକାରୀ ଶତକଡା ୨୫ ଭାଗ ଏବଂ ଅନୁସୂଚିତ ଜାତି ଓ ଜନଜାତି ଶତକଡା ୩୩.୩୩ ଭାଗ ସବସିଡ ବା ଛାଡ ପାଇପାରିବେ । ଏହି ଯୋଜନାରେ ଚାଷୀ ସର୍ବନିମ୍ନ ୨ଟିରୁ ଆରମ୍ଭ କରି ସର୍ବାଧିକ ୧୦ଟି ଗାଈ ପାଇଁ ଋଣ ନେଇପାରିବେ ଏବଂ ଋଣ ଲାଗି ୨ଲକ୍ଷ ଟଙ୍କାରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ପ୍ରଦାନ କରାଯାଉଛି ।

ଏହି ଯୋଜନାରେ ଦୁଗ୍ଧ ସମବାୟ ସମିତି ଅଞ୍ଚଳରେ ଓମଫେଡ ର ଉନ୍ନତ ମାର୍କେଟିଂ ନେଟୱାର୍କ ଥିବାରୁ ଦୁଗ୍ଧ ଚାଷୀମାନଙ୍କୁ ବ୍ୟାଙ୍କ ତରଫରୁ ଋଣ ପ୍ରଦାନରେ ଅଗ୍ରାଧିକାର ଦିଆଯାଏ । ରାଜ୍ୟ ସରକାରଙ୍କ ତରଫରୁ ଚଳିତ ଆର୍ଥିକ ବର୍ଷରେ ୧୦ହଜାର ଉଦ୍ୟୋଗୀଙ୍କୁ ଏହି ଯୋଜନାରେ ରାଜ୍ୟର ନିଜସ୍ଵ ପାଣ୍ଠିରୁ ସହାୟତା ରାଶି ଯୋଗାଇ ଦିଆଯାଉଛି ।

ଯୋଗାଯୋଗ : ନିକଟସ୍ଥ ଦୁଗ୍ଧ ସମବାୟ ସମିତି କିମ୍ବା ପଶୁ ଚିକିତ୍ସାଳୟ, ଉପନିର୍ଦେଶକ, ଦୁଗ୍ଧ ବିକାଶ, ନିର୍ଦ୍ଦେଶାଳୟ , କଟକ

ଗୋ-ଉଦ୍ୟୋଗୀଙ୍କ ପାଇଁ ଦୀର୍ଘ ଓ ସ୍ୱଳ୍ପ ମିଆଦି ଋଣରେ ସୁଧ ଛାଡ

ରାଜ୍ୟ ସରକାର ଏହି ଯୋଜନା ଗୋପାଳନ ମାନଙ୍କୁ ବୈଜ୍ଞାନିକ ପଦ୍ଧତିରେ ଗାଈ ରଖି ଦୁଗ୍ଧ ଉତ୍ପାଦନ ବଢେଇବା ପାଇଁ ୨ଲକ୍ଷ ଟଙ୍କା ପର୍ଯ୍ୟନ୍ତ ସ୍ୱଳ୍ପ ମିଆଦୀ ଋଣ ଉପରେ ୫%ସୁଧ ଉପରେ ଛାଡ ଦିଆଯାଇଛି । ଠିକ ସମୟରେ ଋଣ ପରିଶୋଧ କଲେ ପୁଣି ୩%ସୁଧ ଛାଡ ମିଳେ ।

ସେହିପରି ୧୦ଲକ୍ଷ ପର୍ଯ୍ୟନ୍ତ ବ୍ୟାଙ୍କରୁ ଦୀର୍ଘମିଆଦି ଋଣ ନେଇ ଗାଈ ଫାର୍ମ କରିଥିବା ଚାଷୀଙ୍କୁ ଋଣର ସୁଧ ଉପରେ ୩%ରିହାତିର ସୁବିଧା ଅଛି। ଠିକ ସମୟରେ (୮୦%) ଋଣ ପରିଶୋଧ କଲେ ପୁଣି ୨% ଋଣ ଉପରେ ସୁଧ ରିହାତି ମିଳିଥାଏ।

ସମନ୍ଵିତ ପ୍ରାଣୀ ସମ୍ପଦ ବିକାଶ ଯୋଜନା(କଲ୍ୟାଣୀ)

ଓଡିଶା ସରକାର ଓ ବାଏଫ ଅନୁସନ୍ଧାନ ଓ ବିକାଶ ଫାଉଣ୍ଡେସନ, ପୁନା ଅନୁଷ୍ଠାନର ମିଳିତ ସହଯୋଗରେ କଲ୍ୟାଣୀ ନାମକ ଏକ ପାଞ୍ଚ ବର୍ଷିଆ ଯୋଜନା କାର୍ଯ୍ୟକାରୀ ହୋଇଆସୁଛି । ଏ ଯୋଜନାରେ ଗୋ-ମହିଷାଦିର ବିକାଶ , ଛେଳି ଚାଷର ଉନ୍ନତି, ସବୁଜ ଘାସ ଚାଷରେ ଉନ୍ନତି ଏବଂ ବୈଷୟିକ ଜ୍ଞାନକୌଶଳର ସହଭାଗିତା ହେଉଅଛି । ଗୋମହିଷାଦି ବିକାଶ ମାଧ୍ୟମରେ ରାଜ୍ୟର ୧୦ଟି ଜିଲ୍ଲା ଯଥା ଅନୁଗୁଳ, ସମ୍ବଲପୁର, ବରଗଡ, ବଲାଙ୍ଗୀର, ସୋନପୁର, ବୌଦ୍ଧ, କଳାହାଣ୍ଡି, ନୂଆପଡା, କୋରାପୁଟ ଏବଂ ନବରଙ୍ଗପୁର ଜିଲ୍ଲାର ୧୦୦ଟି ଗୋମହିଷାଦି କେନ୍ଦ୍ରମାନ ଖୋଲାଯାଇଛି । ଗୋ-ମହିଷାଦି କେନ୍ଦ୍ର ସ୍ଥାପିତ ହୋଇଥିବା ଅଞ୍ଚଳରେ ପ୍ରଜନନ ସେବା, ସମନ୍ଵିତ ଘାସ ଚାଷ ଓ ଗୋଖାଦ୍ୟ ପ୍ରକ୍ରିୟାକରଣ କରାଯାଇଛି । ଠିକ ସେହିପରି ୫ଟି ଜିଲ୍ଲାରେ ଯଥା-ବଲାଙ୍ଗୀର, ସୁନ୍ଦରଗଡ, କେନ୍ଦୁଝର,ଦେଓଗଡ ତଥା ମୟୂରଭଞ୍ଜ ଜିଲ୍ଲାରେ ଛେଳିଚାଷର ଉନ୍ନତି ପାଇଁ ଗୁରୁତ୍ଵ ଦିଆଯାଉଛି । ଛେଳିମାନଙ୍କ ପ୍ରଜନନ, ପରିପାଳନ, ଖାଦ୍ୟ ତଥା ଛେଳିପାଳନକାରୀମାନଙ୍କ ଦକ୍ଷତା ବୃଦ୍ଧି ଭଳି କାର୍ଯ୍ୟକ୍ରମମାନ ଯୋଜନାରେ ରଖାଯାଇଛି ।

ଯୋଗାଯୋଗ : ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ/ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ, ପଶୁସମ୍ପଦ ବିକାଶ ସମିତି, ଭୁବନେଶ୍ଵର। ସଂଯୋଜକ, ବେଫ ଫାଉଣ୍ଡେସନ ସମ୍ବଲପୁର

ଗୋପ୍ରଜାତି ଉନ୍ନତିକରଣ ଯୋଜନା

ଅନୁସୂଚିତ ଜାତି ଓ ଜନଜାତି ବିଭାଗ, ଭାରତ ସରକାରଙ୍କ ସହାୟତାରେ ଯେକେଟ୍ରଷ୍ଟ ମାଧ୍ୟମରେ ରାଜ୍ୟରେ ଆଦିବାସୀ ଅଦ୍ଧୁଷିତ ୧୩ଟି ଜିଲ୍ଲାରେ ୬୨୦ଟି କୃତ୍ରିମ ପ୍ରଜନନ କେନ୍ଦ୍ର କାର୍ଯ୍ୟ କରୁଅଛି । ଗୋମହିଷାଦିଙ୍କର କୃତ୍ରିମ ପ୍ରଜନନ ଓ ଅନ୍ୟାନ୍ୟ ଆନୁସଙ୍ଗିକ ସେବା ଚାଷୀଙ୍କ ଦ୍ଵାରଦେଶରେ କ୍ଷେତ୍ର କର୍ମଚାରୀଙ୍କ ମାଧ୍ୟମରେ ଯୋଗାଇ ଦିଆଯାଉଛି ।

ପଶୁଧନ ବୀମାକରଣ ଯୋଜନା

ଏହି ଯୋଜନା ଓଡିଶାର ୩୦ଟି ଜିଲ୍ଲାରେ କାର୍ଯ୍ୟକାରୀ ହେଉଛି । ବୀମା ପ୍ରିମିୟମର ମୂଲ୍ୟକୁ ସରକାର ୫୦% ବହନ କରୁଥିବା ବେଳେ ବଳକା ୫୦% ଚାଷୀମାନେ ବହନ କରିଥାନ୍ତି ।

ଯୋଗାଯୋଗ  : ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ /ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ, ପଶୁ ସମ୍ପଦ ବିକାଶ ସମିତି, ଭୁବନେଶ୍ଵର/ ସ୍ଥାନୀୟ ପ୍ରାଣୀ ଚିକିତ୍ସକ

ସବୁଜ ଘାସ ଉତ୍ପାଦନ ଓ ଖାଦ୍ୟ ବ୍ୟବସ୍ଥା

ଘାସ ମଞ୍ଜି ଆବଣ୍ଟନ ଯୋଜନା (ମିନିକିଟ ପ୍ରୋଗ୍ରାମ)

କେନ୍ଦ୍ର ସରକାରଙ୍କ ସହାୟତାରେ ନିଜ ଜମିରେ ଗୋଖାଦ୍ୟ ଫସଲ କରିବା ପାଇଁ ରାଜ୍ୟର ଆଗ୍ରହୀ ଗୋପାଳକଙ୍କୁ ଘାସମଞ୍ଜି ପୁଡିଆ ବଣ୍ଟନ କରାଯାଇଥାଏ । ଏଥିପାଇଁ ତୃଣ ଉନ୍ନୟନ ଅଫିସରମାନେ ଚାଷୀଙ୍କ ପାଇଁ ଗୋଖାଦ୍ୟ ଫସଲ ଉତ୍ପାଦନ ପ୍ରଣାଳୀ ବିଷୟରେ ପ୍ରଶିକ୍ଷଣର ଆୟୋଜନ କରିଥାନ୍ତି । ଏତଦବ୍ୟତୀତ ସରକାରୀ ଘାସ ଫାର୍ମରୁ ଘାସ ମୂଳ, କାଣ୍ଡ ଆଗ୍ରହୀ ଚାଷୀଙ୍କୁ ସ୍ୱଳ୍ପ ମୂଲ୍ୟରେ ଯୋଗାଇ ଦିଆଯାଉଛି ।

ଯୋଗାଯୋଗ: ନିକଟସ୍ଥ ପ୍ରାଣୀ ଚିକିତ୍ସା କେନ୍ଦ୍ର /ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟରେ କାର୍ଯ୍ୟରତ ତୃଣ ଉନ୍ନୟନ ଅଧିକାରୀ/ଉପନିର୍ଦେଶକ ପଶୁପାଳନ ଓ ପଶୁ ଚିକିତ୍ସା ନିର୍ଦ୍ଦେଶାଳୟ ମଙ୍ଗଳାବାଗ, କଟକ

ଗୋ –ବନ୍ଧ୍ୟା ନିରାକରଣ ଶିବିର

ରାଷ୍ଟ୍ରୀୟ କୃଷି ବିକାଶ ଯୋଜନା ଆନୁକୁଲ୍ୟରେ ୧୭୦୦ ଟି ଗୋସମୃଦ୍ଧ ଗ୍ରାମପଞ୍ଚାୟତର ଦୁଧିଆଳୀ ଗାଈମାନଙ୍କ ପ୍ରଜନନ ସମ୍ବନ୍ଧୀୟ ସମସ୍ୟା ଦୂରୀକରଣ ନିମନ୍ତେ ଏହି ବ୍ୟବସ୍ଥା ଆରମ୍ଭ ହୋଇଛି । ପ୍ରତ୍ୟେକ ଗ୍ରାମପଞ୍ଚାୟତରେ ବର୍ଷକୁ ଦୁଇଟି ସ୍ୱାସ୍ଥ୍ୟ ଶିବିର ଆୟୋଜନ କରାଯାଉଛି । ସେହିପରି ଜାତୀୟ ଗୋ-ପ୍ରଜନନ ଯୋଜନାରେ ପ୍ରତ୍ୟେକ ବ୍ଲକରେ ବର୍ଷରେ ଦୁଇଟି କରି ଗୋବନ୍ଧ୍ୟା ନିରାକରଣ ଶିବିର ଆୟୋଜନ କରାଯାଉଛି । ବିଶେଷଜ୍ଞମାନଙ୍କ ତତ୍ଵାବଧାନରେ ଏପରି ଶିବିର ଅନୁଷ୍ଠିତ ହେଉଥିବାରୁ ଚାଷୀଙ୍କ ଦ୍ଵାରଦେଶରେ ଅତ୍ୟାଧୁନିକ ବୈଷୟିକ ଜ୍ଞାନକୌଶଳ ଉପଲବ୍ଧ ହୋଇପାରୁଛି । କେବଳ ବ୍ୟବହାରିକ ଦେୟ ପ୍ରଦାନ କରି ଚାଷୀମାନେ ବିଭିନ୍ନ ଆବଶ୍ୟକୀୟ ଔଷଧ ପାଇପାରୁଛନ୍ତି ।

ଯୋଗାଯୋଗ : ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ/ଉପନିର୍ଦ୍ଦେଶକ, ରୋଗ ନିୟନ୍ତ୍ରଣ, ନିର୍ଦ୍ଦେଶାଳୟ, କଟକ/ସ୍ଥାନୀୟ ପ୍ରାଣୀ ଚିକିତ୍ସକ

ପଶୁ ରୋଗ ନିୟନ୍ତ୍ରଣ ପାଇଁ କେନ୍ଦ୍ରୀୟ ସହାୟତା

ଏହି ଯୋଜନାରେ କେନ୍ଦ୍ର ସରକାର ୭୫ଭାଗ ଅନୁଦାନ ଦେଉଥିବା ବେଳେ, ଓଡିଶା ସରକାର ୨୫ଭାଗ ବହନ କରିଥାନ୍ତି । ମୁଖ୍ୟତଃ ପଶୁପକ୍ଷୀମାନଙ୍କୁ ଟୀକାଦାନ ମାଧ୍ୟମରେ ଜୀବାଣୁ ଓ ଭୂତାଣୁଜନିତ ସଂକ୍ରାମକ ରୋଗର ନିୟନ୍ତ୍ରଣ ବ୍ୟବସ୍ଥା କରାଯିବା ସଙ୍ଗେ ସଙ୍ଗେ ରୋଗ ନିରୀକ୍ଷକ ଓ ନିରୂପଣ ବ୍ୟବସ୍ଥା କରାଯାଉଛି । ଏହି ଯୋଜନା ମାଧ୍ୟମରେ ଗୃହପାଳିତ ପଶୁମାନଙ୍କର ବିଭିନ୍ନ ସଂକ୍ରାମକ ରୋଗ ଯଥା ସାହାଣ, ବାଜବଜିଆ, ଫାଟୁଆ, ଆନ୍ଥ୍ରାକ, ଛେଳି ବସନ୍ତ, ଆନ୍ତ୍ରିକ ବିସଜ୍ଵର, ଛେଳି ମଡକର ନିୟନ୍ତ୍ରଣ ପାଇଁ ପ୍ରତିଷେଧକ ଟିକା ଯୋଗାଇ ଦିଆଯାଉଛି । ପ୍ରତ୍ୟେକ ବ୍ଲକ ଏବଂ ଜିଲ୍ଲା ସ୍ତରରେ ପ୍ରାଣୀ ଚିକିତ୍ସା ଶିବିର ଆୟୋଜନ କରି ପଶୁପକ୍ଷୀମାନଙ୍କର ଚିକିତ୍ସା କରାଯାଉଛି । ଜିଲ୍ଲାସ୍ତରୀୟ ରୋଗ ନିରୂପଣ କେନ୍ଦ୍ର ଏବଂ ରାଜ୍ୟସ୍ତରୀୟ ପ୍ରାଣୀ ରୋଗ ଗବେଷଣା କେନ୍ଦ୍ରରେ ରୋଗ ଚିହ୍ନଟ ପାଇଁ ଆବଶ୍ୟକୀୟ ସୁବିଧା ଯୋଗାଇ ଦିଆଯାଇଛି । ଚାଷୀମାନଙ୍କର ସଚେତନତା ପାଇଁ ରୋଗ ସମ୍ବନ୍ଧୀୟ ବିଭିନ୍ନ ତଥ୍ୟ ସୁଚାଇ ଦିଆଯାଇଛି ।

ଯୋଗାଯୋଗ : ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ /ଉପନିର୍ଦ୍ଦେଶକ, ରୋଗ ନିୟନ୍ତ୍ରଣ, ନିର୍ଦ୍ଦେଶାଳୟ, କଟକ/ଉପନିର୍ଦ୍ଦେଶକ, ଜୈବିକ ଟିକା ଉତ୍ପାଦନ କେନ୍ଦ୍ର, ଭୁବନେଶ୍ଵର

ଆତ୍ମନିଯୁକ୍ତି ନିମନ୍ତେ ଦକ୍ଷତା ବୃଦ୍ଧି ଓ ସଚେତନ ଶିକ୍ଷା କାର୍ଯ୍ୟକ୍ରମ

ଏହି ଯୋଜନା ମାଧ୍ୟମରେ ପ୍ରଶିକ୍ଷଣ ଦ୍ଵାରା ବିଭିନ୍ନ ପ୍ରାଣିପାଳନ ତଥା ଶିକ୍ଷିତ ବେକାର ଯୁବକ/ଯୁବତୀଙ୍କ ଜ୍ଞାନକୌଶଳ ବୃଦ୍ଧି କରାଯାଇଥାଏ ଫଳରେ ପ୍ରାଣୀ ତଥା କୁକୁଡା ପାଳନ କରି ଆତ୍ମନିଯୁକ୍ତି ପାଇଥାନ୍ତି । ଏ କାର୍ଯ୍ୟକ୍ରମ ମାଧ୍ୟମରେ ଲୋକଙ୍କୁ ବିଭିନ୍ନ ଉନ୍ନତ ଗୋପାଳନ , ଛେଳିପାଳନ, କୁକୁଡା ପାଳନ,ଓ ଘୁଷୁରୀ ପାଳନ ସମ୍ବନ୍ଧୀୟ ସିନେମା ଦେଖାଇବା , ବାଛୁରୀ ଶୋଭାଯାତ୍ରା କରିବା, ପ୍ରଦର୍ଶନୀରେ ଭାଗ ନେବା, ଜିଲ୍ଲା ମହୋତ୍ସବମାନଙ୍କରେ ଯୋଗଦାନ କରିବା, ଟିଭି କାର୍ଯ୍ୟକ୍ରମ ତଥା ଗ୍ରାମସ୍ୟାଟ କାର୍ଯ୍ୟକ୍ରମରେ ଯୋଗଦାନ ଇତ୍ୟାଦି କରାଯାଇଥାଏ ।

ଯୋଗାଯୋଗ : ସମ୍ବାଦ ସରବରାହ ଅଧିକାରୀ, ନିର୍ଦ୍ଦେଶାଳୟ, କଟକ/ପ୍ରାଣୀ ବିପଣନ ଅଧିକାରୀ, ନିର୍ଦ୍ଦେଶାଳୟ, କଟକ/ସଂଯୋଜକ, ସ୍ମାଇଲ,ଭୁବନେଶ୍ଵର

ଜାତୀୟ ଗୋକୁଳା ମିଶନ

ଦେଶୀୟ ଗୋ-ପ୍ରଜାତିମାନଙ୍କର ଉନ୍ନତି ନିମନ୍ତେ ଜାତୀୟ ଗୋକୁଳ ମିଶନ ମାଧ୍ୟମରେ କେନ୍ଦ୍ରସରକାର ଏକ ସ୍ଵତନ୍ତ୍ର ଯୋଜନା ଚଳିତ ବର୍ଷରୁ ଆରମ୍ଭ କରିଛନ୍ତି । ଏହି ଯୋଜନାରେ ପ୍ରାକୃତିକ ପ୍ରଜନନ ପାଇଁ ଦେଶଜ ତଥା ଉନ୍ନତ ପ୍ରଜାତିର ଷଣ୍ଢମାନ ଯୋଗାଇବାର ଲକ୍ଷ୍ୟ ରହିଛି । ଆମ ରାଜ୍ୟରେ ଥିବା କମ ଗୁଣ ମାନର ଗୋରୁଙ୍କର ଅନୁବଂଶୀୟ ଗୁଣର ବିକାଶ କରିବା ହେଲା ଏ ଯୋଜନାର ମୂଳଲକ୍ଷ । ରାଜ୍ୟର ମାନ୍ୟତାପ୍ରାପ୍ତ ଗୋପ୍ରଜାତିଙ୍କର ବସବାସ ଅଞ୍ଚଳରେ ଗୋକୁଳ ଗ୍ରାମ ସ୍ଥାପନ କରି ଏବଂ ଗୋପାଳନ ସଂଘ ସୃଷ୍ଟି କରି ଏହି ପ୍ରଜାତିଙ୍କର ସୁରକ୍ଷା ଓ ଉନ୍ନତି କରାଯିବା ଲକ୍ଷ୍ୟ ରଖାଯାଇଛି । ଚାଷୀମାନଙ୍କୁ ଦେଶୀ ଗୋପ୍ରଜାପତି ପାଳନ କରିବା ପାଇଁ ସରକାରୀ ପ୍ରୋତ୍ସାହନ ବ୍ୟବସ୍ଥା ମଧ୍ୟ ରହିଅଛି ।

ରାଷ୍ଟ୍ରୀୟ ଗୋସମ୍ପଦ ମିଶନ

ଏହି ମିଶନ ମାଧ୍ୟମରେ ରାଜ୍ୟରେ ଗୋ ସମ୍ପଦର ସାମୁହିକ ବିକାଶ ପାଇଁ ବିଭିନ୍ନ କାର୍ଯ୍ୟକ୍ରମ ଧାର୍ଯ୍ୟ କରାଯାଇଛି । ଏହି ଯୋଜନାରେ ମୁଖ୍ୟତଃ ସବୁଜ ଗୋଖାଦ୍ୟ ଫସଲ ଉତ୍ପାଦନ ଏବଂ ବିନିଯୋଗ ପାଇଁ ଚାଷୀମାନଙ୍କୁ ଘାସ ବିହନ, ଘାସକଟା ଯନ୍ତ୍ର ଆଦି ଯୋଗାଇବା ବ୍ୟବସ୍ଥା ଅଛି । ଛୋଟ ଧରଣର ବ୍ରଏଲର କୁକୁଡା ପାଳନ ପାଇଁ ମୋଟ ପୁଞ୍ଜିର ୨୫% ରିହାତିରେ ଋଣ ଦିଆଯିବାର ବ୍ୟବସ୍ଥା ଅଛି । ଛେଳି ଓ ମେଣ୍ଢାଙ୍କ ସମୂହ କୃମି ନିବାରଣ ପାଇଁ ସ୍ଵତନ୍ତ୍ର ଚିକିତ୍ସା ଶିବିର ଆୟୋଜନ କରାଯିବ । ଛେଳିଙ୍କ ବୀମାକରଣ ପାଇଁ ମଧ୍ୟ ପ୍ରିମିୟମ ଟଙ୍କାର ୫୦% ସରକାର ବହନ କରିବେ । ଏବଂ ଅବଶିଷ୍ଟ ୫୦% ଚାଷୀଙ୍କୁ ଦେବାକୁ ପଡିବ । ଚାଷୀଙ୍କର ସଚେତନତା ଓ ଦକ୍ଷତା ବୃଦ୍ଧି ସକାଶେ ବିଭିନ୍ନ ପ୍ରକାର ତାଲିମ କାର୍ଯ୍ୟକ୍ରମକୁ ଗୁରୁତ୍ଵ ଦିଆଯିବ ।

ଆଧାର - ଶିକ୍ଷାଓ ସମ୍ପ୍ରସାରଣ ପରିଚାଳନା ସମିତି