କେନ୍ଦ୍ରାପଡା ପ୍ରଜାତି ମେଣ୍ଢାକୁ ମିଳିବ ଜାତୀୟ ମାନ୍ୟତା

ଉପକ୍ରମ

କେନ୍ଦ୍ରାପଡା ପ୍ରଜାତିର ମେଣ୍ଢାଙ୍କୁ ଜାତୀୟ ମାନ୍ୟତା ମିଳିବ । ଓଡିଶା ପ୍ରାଣୀ ସମ୍ପଦ ବିକାଶ ବିଭାଗ, ଓଡିଶା ପ୍ରାଣୀ ସମ୍ପଦ ବିକାଶ ସମିତି ଓ ପ୍ରାଣୀ ଚିକିତ୍ସା ବିଜ୍ଞାନ ମହାବିଦ୍ୟାଳୟ ପକ୍ଷରୁ ଏହି ପ୍ରଜାତିର ମେଣ୍ଢାଙ୍କ ଉପରେ ମିଳିତ ଭାବରେ ଗବେଷଣା ଚାଲିଥିଲା । ଦୀର୍ଘ ୧୨ ମାସର ଗବେଷଣା ପରେ ଏହି ପ୍ରଜାତିର ମେଣ୍ଢାଙ୍କ ନିକଟରେ କେତେକ ବିଶେଷତ୍ଵ ଓ ଗୁଣ ବିଶେଷଜ୍ଞମାନେ ଜାଣିବାକୁ ପାଇଛନ୍ତି । କାରଣ ଏହି ମେଣ୍ଢାଙ୍କ ନିକଟରେ ଫେକବି ନିଉଟେସନ ଗୁଣସୂତ୍ର ବା ଜିନ ନିହିତ ଥିବାରୁ ସେମାନେ ଥରକେ ୨ ରୁ ଅଧିକ ଛୁଆ ଦେବାର ସକ୍ଷମ ହୋଇଥାନ୍ତି । ଗବେଷଣା ରୁ ଜଣାପଡିଛି ଯେ ଏହି ପ୍ରଜାତିର ଶତକଡା ୮୦ପ୍ରତିଶତ ମେଣ୍ଢା ଥରକେ ୨ ରୁ ଅଧିକ ଛୁଆ ଦେଉଥିବା ବେଳେ ୭୧ ପ୍ରତିଶତ ଅଧିକ ଦୁଇଟି ଛୁଆ ୯ ପ୍ରତିଶତ ୩ ଟି ଛୁଆ ଓ ୧ ପ୍ରତିଶତ ମେଣ୍ଢା ଚାରୋଟି ଲେଖାଏଁ ଛୁଆ ଜନ୍ମ କରିଥାନ୍ତି । ତେଣୁ ଏହି ପ୍ରଜାତିର ମେଣ୍ଢା ଅର୍ଥକାରୀ ଓ ଅଧିକ ଛୁଆ ଜନ୍ମ କରୁଥିବା ବିଶ୍ଵର ମେଣ୍ଢାଙ୍କ ମଧ୍ୟରେ ୬ ନମ୍ବର ସ୍ଥାନରେ ରହିଥିବା ବେଳେ ଭାରତରେ ୨ୟ ସ୍ଥାନରେ ରହିଛନ୍ତି ।

ବିଶ୍ଵରେ ଷଷ୍ଠ : ଭାରତରେ ଦ୍ଵିତୀୟ

ଏଥି ପୂର୍ବରୁ ବିଶ୍ଵର ଅଷ୍ଟ୍ରେଲିଆ, ଓ ନିଉଜିଲ୍ୟାଣ୍ଡରେ ଚାରୋଟି ପ୍ରଜାତିର ମେଣ୍ଢାଙ୍କ ଶରୀରରେ ଏହି ଜିନ ଆବିଷ୍କୃତ ହୋଇଥିଲା । ଭାରତରେ ପଶ୍ଚିମବଙ୍ଗର ଗାରୋଲେ ପ୍ରଜାତିର ମେଣ୍ଢାଙ୍କ ଶରୀରରେ ଏହି ଜିନ ପୂର୍ବରୁ ଆବିଷ୍କୃତ ହୋଇଥିଲା ବୋଲି ଗବେଷକ ପ୍ରଫେସର ଡଃ ସୁଶାନ୍ତ କୁମାର ଦାସ କହିଛନ୍ତି । କିନ୍ତୁ ଏହି ୬ଟି ପ୍ରଜାତିର ମେଣ୍ଢାଙ୍କ ମଧ୍ୟରେ କେନ୍ଦ୍ରାପଡା ମେଣ୍ଢା ସବୁଠାରୁ ଉତ୍କୃଷ୍ଟ ପ୍ରମାଣିତ ହୋଇଛି ବୋଲି ଡାକ୍ତର ଦାସ ସୂଚନା ଦେଇଛନ୍ତି ।

କେନ୍ଦ୍ରାପଡା ମେଣ୍ଢାଙ୍କୁ ଜାତୀୟ ମାନ୍ୟତା

ପୂର୍ବରୁ ରାଜ୍ୟରେ ବିଭିନ୍ନ ଗୋ ପ୍ରଜାତି ଯଥା ବିଞ୍ଚାରପୁର, ଘୁମସରି, ଖରିଆଳ। କୁ ମୋଟୁ ଗାଈକୁ ଜାତୀୟ ମାନ୍ୟତା ମିଳିଥିବା ବେଳେ ଚିଲିକା ଓ କଳାହାଣ୍ଡି ମଇଁଷିକୁ ମଧ୍ୟ ଜାତୀୟ ମାନ୍ୟତା ମିଳିସାରିଛି । ଏବେ କେନ୍ଦ୍ରାପଡା ମେଣ୍ଢା ସହିତ ରାଈଘର ଓ ଘୁମସରୀ ଛେଲି ଜାତୀୟ ମାନ୍ୟତା ପାଇବାକୁ ଯାଉଛି , ଯାହା ରାଜ୍ୟ ପାଇଁ ଏକ ଶୁଭ ଖବର । ରାଜ୍ୟର ବହୁ ଗରିବ ଚାଷୀ ଏହାର ଉପକାର ପାଇ ପାରିବେ । କାରଣ ଏହି ପ୍ରଜାତିର ପ୍ରାଣୀଙ୍କ ସଂରକ୍ଷଣ ଓ ବଂଶବୃଦ୍ଧି ନିମନ୍ତେ ଅଧିକ କେନ୍ଦ୍ରୀୟ ଅନୁଦାନ ମିଳିବ । ଏଥିରୁ ଏହି ମେଣ୍ଢା ଓ ଛେଲି ପାଳନ ପାଇଁ ଚାଷୀ ପ୍ରୋତ୍ସାହନ ପାଇ ପାରିବେ ।

ଆଧାର :ସମାଜ ଖବର କାଗଜ