ତରଭୁଜ ଚୋପାରୁ ହୋଇପାରିବ ମୃଦୁପାନୀୟ ବ୍ୟବସାୟିକ ଭିତ୍ତିକ

ବ୍ୟବସାୟିକ ଭିତ୍ତିକ ତରଭୁଜ

ବର୍ତ୍ତମାନ ବଜାରରେ ତରଭୁଜ ପ୍ରଚୁର ପରିମାଣରେ ମିଳୁଛି । ଏଥିରେ ବିଭିନ୍ନ ଖାଦ୍ୟ ଉପାଦାନ ସହିତ ଅନେକ ଭିଟାମିନ୍ ଓ ଧାତବ ଲବଣ ରହିଛି ।

ସାଧାରଣତଃ ଆମେ ତରଭୁଜର ନାଲି ଅଂଶଟିକୁ ଖାଇବା ପରେ ବଳକା ଅଂଶକୁ ଫୋପାଡି ଦେଇଥାଉ । ହେଲେ ତରଭୂଜର ଚୋପା ସହିତ ଲାଗି ରହିଥିବା ଧଳା ଅଂଶଟିର ଉପାଦେୟ ଅନେକ ।

ତେଣୁ ଏହାକୁ ନଷ୍ଟ ନକରି କିଛି ମୂଲ୍ୟଯୁକ୍ତ ପଦାର୍ଥ ପ୍ରସ୍ତୁତ କରାଯାଇପାରିବ । ଏଥିରୁ ଆମେ ମୃଦୁ ପାନୀୟ, ଜାମ୍ ଓ ମୁରବା ପ୍ରସ୍ତୁତ କରିପାରିବା ।

ଏଥିପାଇଁ ପ୍ରଥମେ ତରଭୁଜର ଉପର ଭାଗରେ ଥିବା କଠିନ ପଦାର୍ଥରୁ ସବୁଜ ଅଂଶକୁ ଚାଞ୍ଚି ବାହାର କରି ଧଳା ଅଂଶକୁ ବିଭିନ୍ନ ଆକୃତିର କାଟି ପ୍ରସ୍ତୁତ କରାଯାଏ ।

ଚୋପାରୁ ମୃଦୂପାନୀୟ

ଧଳା ଅଂଶକୁ ଛୋଟ ଖଣ୍ଡ କରି କାଟି ବେଣ୍ଡର ସାହାଯ୍ୟରେ ବାଟି ଛାଣି ଦିଅନ୍ତୁ । ସେଥିରେ ଉପଯୁକ୍ତ ପରିମାଣର ଚିନିଶିରା ଓ ଲେମ୍ବୁ ରସ ଏବଂ ପସନ୍ଦ ଅନୁଯାୟୀ ଅଦାରସ ଓ ପୁଦିନୀପତ୍ର ଛୋଟ ଛୋଟ ଖଣ୍ଡ କରି ମିଶାନ୍ତୁ । ଏହା ଖରାଦିନରେ ମଣିଷ ଶରୀରର ରୋଗପ୍ରତିରୋଧକ ଶକ୍ତି ବୃଦ୍ଧି କରିବା ସହ ଶରୀରର ଜଳସ୍ତରକୁ ସନ୍ତୁଳିତ ରଖିବାରେ ସାହାଯ୍ୟ କରେ ।

ଜାମ

୫୦୦ ଗ୍ରାମ୍ ତରଭୁଜ ଖଣ୍ଡ ବା କୋରା (ଧଳା ଅଂଶ) ସହିତ ୪୦୦ ଗ୍ରାମ୍ ଚିନି ଗୋଳାଇ ପ୍ରାୟ ଅଧ ଘଣ୍ଟାରୁ ଘଣ୍ଟାଏ ପର୍ଯ୍ୟନ୍ତ୍ର ସାଧାରଣ ତାପମାତ୍ରାରେ ରଖନ୍ତୁ । ଏହାଦ୍ଵାରା ତରଭୁଜରୁ ପାଣି ବାହାରି ଚିନି ମିଳେଇ ଯାଏ । ଏହି ମିଶ୍ରଣକୁ କ୍ରମାଗତ ଘାଣ୍ଟିବା ଅବସ୍ଥାରେ ପୁରା ମିଶିଗଲା ପର୍ଯ୍ୟନ୍ତ ରନ୍ଧନ୍ତୁ । ଏଥିରେ ପ୍ରାୟ ପାଞ୍ଚ ଗ୍ରାମ୍ ସାଇଟ୍ରିକ୍ ଅମ୍ଳ ମିଶାଇଲେ ଏହାର ସ୍ଵାଦ ବଢିବା ସହ ସଂରକ୍ଷଣ କ୍ଷମତା ମଧ୍ୟ ବଢିଯାଏ । ଜାମ୍ ପ୍ରସ୍ତୁତିର ଶେଷ ପର୍ଯ୍ୟାୟରେ ୧୦ ଗ୍ରାମ୍ ପେକଟିନ୍ ପାଉଡର ଅଳ୍ପ ତରଭୁଜ ରସରେ ଗୋଳାଇ ସେଥିରେ ମିଶେଇଲେ ମିଶ୍ରଣଟି ଜୋଲିପରି ବାନ୍ଧି ହୋଇଯିବ । ଗରମ ଅବସ୍ଥାରେ ଏହାକୁ ବିଶୋଧିତ କାଚ ବୋତଲରେ ସିଲ କରି ରଖିବାକୁ ହେବ ।

ମୁରରବା

ଏଥିପାଇଁ ତରଭୁଜର ଧଳା ଅଂଶକୁ ଛୋଟ ଛୋଟ ଖଣ୍ଡ କରି ପ୍ରାୟ ଏକ ଇଞ୍ଚ ଲମ୍ବର କାଟନ୍ତୁ । ଏକ ବଡ ପାତ୍ରରେ ଥଣ୍ଡା ପାଣି ରଖି ପ୍ରାୟ ଏକ କେଜି ତରଭୁଜ ଖଣ୍ଡ ବୁଡିଗଲା ପରି ରଖନ୍ତୁ । ସେଥିରୁ ୨ରୁ ୩ ଚାମଚ୍, କ୍ୟାଲସିୟମ୍ କ୍ଲୋରାଇଡ ପକାଇ ଦୁଇ ଘଣ୍ଟା ପର୍ଯ୍ୟନ୍ତ ବତୁରାଇ ଦିଅନ୍ତୁ । ଯଦ୍ଵାରା ଖଣ୍ଡଗୁଡିକ ଟିକେ ଟଣ ହୋଇଯିବ ଓ ରାନ୍ଧିବା ସମୟରେ ତାର ଆକୃତି ବଜାୟୀ ରହିବ । ଖଣ୍ଡଗୁଡିକୁ ଏହି ପାଣିରୁ ଛାଣି ଏକ ଅଲଗା ପାତ୍ରରେ ୨ ମିନିଟ୍ ପର୍ଯ୍ୟନ୍ତ ଫୁଟେଇ ପୁଣି ଛାଣିଦିଅନ୍ତୁ । ବର୍ତ୍ତମାନ ପ୍ରାୟ ୧ କେଜି ଚିନି ଓ ଦେଢରୁ ଦୁଇ ଲିଟର ପାଣି ମିଶାଇ ମଧ୍ୟମ ଆଞ୍ଚରେ ରାନ୍ଧନ୍ତୁ ଓ ମଝିରେ ମଝିରେ ଘାଣ୍ଟନ୍ତୁ ।

ଏପରି ପ୍ରାୟ ୨ଘଣ୍ଟା ପର୍ଯ୍ୟନ୍ତ ରାନ୍ଧନ୍ତୁ ଯେମିତି ଚିନି ସିରପଟି ବହଳିଆ ହୋଇଯିବ । ଏହି ସମୟକୁ ତରଭୁଜର ଖଣ୍ଡଗୁଡିକ ସୁନେଲି ରଙ୍ଗ ହୋଇଯିବ । ମନେ ରଖନ୍ତୁ ଅଧିକ ରାନ୍ଧି ଦେଲେ ତାହା ଟାଣ ହୋଇଯିବାର ଆଶଙ୍କା ଥାଏ । ସେଥିରେ ପସନ୍ଦ ଅନୁଯାୟୀ ଲେମ୍ବୁ ବା ଅଦା ରସ ମିଶାଇ ପାରିବେ । ମୁରବବା ପ୍ରସ୍ତୁତ ହୋଇଗଲେ ଗରମ ଅବସ୍ଥାରେ ପୂର୍ବରୁ ବିଶୋଧିତ ହୋଇଥିବା କଚ ବେତଲରେ ଭର୍ତ୍ତି କରିବେ ଯେମିତି କି ତରଭୁଜ ଖଣ୍ଡଗୁଡିକ ଚିନିଶିରାରେ ବୁତି ରହିବ । ଉପଯୁକ୍ତ ପଦ୍ଧତିରେ ବିଶୋଧିତ ବୋତଲରେ ପ୍ୟାକିଙ୍ଗ କଲେ ଏହା ଚାରିମାସ ପର୍ଯ୍ୟନ୍ତ - ସୁରକ୍ଷିତ ରହିପାରିବ ଏବଂ ବ୍ୟବସାୟିକ ଭିତ୍ତିରେ ମଧ୍ୟ ଏହାକୁ କରାଯାଇ ବେଶ୍ ଦୁଇ ପଇସା ଉପର୍ଜନ କରିପାରିବେ ।

ଲେଖା ଏବଂ ପ୍ରାପ୍ତ  - ପ୍ରଫେସର କଳ୍ପନା ରାୟଗୁରୁ  ଓୟୁଏଟି, ମୋ – ୯୪୩୭୬୩୧୮୧୨