অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ସଅଳ କିସମ କୋବି ଚାଷ ପାଇଁ ଚାରା ପ୍ରସ୍ତୁତି

ସଅଳ କିସମ କୋବି ଚାଷ ପାଇଁ ଚାରା ପ୍ରସ୍ତୁତି

ଫୁଲକୋବି ଏକ ଶୀତଦିନିଆ ପରିବା । ସମତଳ ଅଞ୍ଚଳରେ ଏହା ଚାଷ କରାଯାଏ । କିନ୍ତୁ ଉଚ୍ଚ ପାହାଡିଆ ଅଞ୍ଚଳରେ ବର୍ଷସାରା ଫୁଲକୋବି ଚାଷ କରାଯାଇ ପାରିବ । ସାଧାରଣତଃ କୋବିଚାଷ ବର୍ଷସାରା ହୋଇପାରିବ । କିନ୍ତୁ ସଅଳ କିସମର କୋବି ଚାଷକରି ଚାଷୀଭାଇ ମାନେ ଅଧିକ ଉତ୍ପାଦନ କରିବା ସହ ସେମାନଙ୍କର ଆର୍ଥିକ ଅଭିବୃଦ୍ଧି ମଧ୍ୟ ଘଟାଇ ପାରିବେ ।

ଫୁଲକୋବି ଏକ ସୁସ୍ଵାଦୁ ଏବଂ ରୁଚିକର ପରିବା । ଏଥିରେ ପ୍ରଚୁର ପରିମାଣର ପୃଷ୍ଟିସାର, ଅନେକ ଧାତବ ଲବଣ ଓ ଖାଦ୍ୟସାର କ, ଖ, ଗ ମିଳିଥାଏ । ଏହାକୁ ଉଭୟ ସାଲାଡ ଏବଂ ତରକାରି ଅବସ୍ଥାରେ ଖାଇହୁଏ । ପ୍ରକ୍ରିୟାକରଣ କରି ଫୁଲକୋବିକୁ ସାଇତା ଯାଇପାରେ ।

କିସମ

ଜଳବାୟୁ ଅନୁସାରେ ଫୁଲକୋବି କିସମକୁ ୩ଭାଗରେ ବିଭକ୍ତ କରାଯାଇଅଛି- ସଅଳ କିସମ, ବିଳମ୍ବ କିସମ ଏବଂ ବିଳମ୍ବ କିସମ । ସଅଳ କିସମରେ କମ ଦିନରେ ଫୁଲ ଆସେ । ଫୁଲଗୁଡିକ ଛୋଟ ଆକାରର । ସଅଳ କିସମଗୁଡିକ ହେଲା- ପୁଷା କଟକୀ, ପୁଷା ଦୀପାଳୀ, ସହଳ ପାଟଣା, ୟାର୍ଲି କୁଆଁରୀ । ଆମ ରାଜ୍ୟରେ ପାହାଡିଆ ଅଞ୍ଚଳରେ ବର୍ଷାଦିନେ ସଅଳ କିସମଗୁଡିକ ଚାଷ କରିବା ।

ବିହନ ବିଶୋଧନ ଓ ଚାରା ପ୍ରସ୍ତୁତି

ସାଧାରଣତଃ ତଳିଘେରାର ଆକାର ୩-୫ ମିଟର ଲମ୍ବ, ୧ମିଟର ଓସାର ଏବଂ ୧୫-୨୦ ସେମି ଉଚ୍ଚ ରଖାଯାଏ । ଦୁଇଟି ତଳିଘେରା ମଧ୍ୟରେ ୩୦-୪୫ସେମି ବ୍ୟବଧାନ ରଖିବା ଦରକାର । ୧ଏକର ଜମିରେ ଫସଲ କରିବା ପାଇଁ ୪୦ବର୍ଗମିଟର ତଳିଘେରା ଆବଶ୍ୟକ । ମାଟିକୁ ଭଲଭାବରେ ଗୁଣ୍ଡକରି ୫୦ଗ୍ରାମ ୧୫:୧୫:୧୫ ସାର ଏବଂ ଉଚ୍ଚ ନହେବା ପାଇଁ ୫୦ଗ୍ରାମ କ୍ଳୋରୋପାଇରିଫସ ଗୁଣ୍ଡ ବିହନ ବୁଣିବାର ୭ଦିନ ପୂର୍ବରୁ ମିଶାଇ ଦିଅନ୍ତୁ । ଗୋଟିଏ ଏକର ଫୁଲକୋବି ଚାଷକରିବା ପାଇଁ ୨୦୦ଗ୍ରାମ ବିହନ ଆବଶ୍ୟକ । ତଳି ଉତାରିବା ପୂର୍ବରୁ ବିହନକୁ ବିଶୋଧନ କରାଯାଏ । ପ୍ରତି କେଜି ବିହନ ପ୍ରତି ୨ଗ୍ରାମ ଥିରାମ ବ୍ୟବହାର କରାଯାଏ । ଏହାଦ୍ୱାରା ତଳିଘେରାରେ ଫୁଲକୋବି ଚାରା ପଚେ ନାହିଁ । ଫୁଲକୋବି ତଳି ବର୍ଷସାରା ଆବଶ୍ୟକ ଅନୁସାରେ ଉତ୍ପାଦନ କରାଯାଇପାରିବ । ୧ମିଟର ଓସାର, ୩ମିଟର ଲମ୍ବ ଏବଂ ୬ଇଞ୍ଚ ଉଚ୍ଚ ତଳି ଘେରାରେ ବିହନ ବୁଣନ୍ତୁ । ବିହନଗୁଡିକୁ ୫ସେଣ୍ଟିମିଟର ଦୂରତାରେ ଧାଡିରେ ବୁଣାଯାଏ । ମଞ୍ଜି ବୁଣିବା ପରେ ପଲିଥିନ, ଚଦର କିମ୍ବା ନଡାରେ ଘୋଡାଇ ଦିଆଯାଏ । ଏହାଦ୍ୱାରା ମଞ୍ଜି ଭଲ ଗଜାହୁଏ । ମଞ୍ଜି ଗଜା ହେବା ପରେ ଘୋଡା ଯାଇଥିବା ପଲିଥିନ ଚଦର କିମ୍ବା ନଡାକୁ ବାହାର କରିଦିଅନ୍ତୁ । ତଳିଗୁଡିକୁ ନୀରୋଗ ରଖିବା ପାଇଁ ଇଣ୍ଡୋଫିଲ ୩-୪୫ ପ୍ରତି ଲିଟର ପିଛା ୪ଗ୍ରାମ ମିଶାଇ ତଳିଘେରାରେ ପକାନ୍ତୁ । ତଳିଘେରାରେ ପାଣି ନ ଥିଲା ବେଳେ ଝରା ବ୍ୟବହାର କରିବା ଆବଶ୍ୟକ ।

ବନ୍ୟା ଓ ପ୍ରାକୃତିକ ବିପର୍ଯ୍ୟୟ ଯୋଗୁ ଠିକ୍ ସମୟରେ ଚାରା ଉତ୍ପାଦନ ହୋଇପାରେ ନାହିଁ । ତେଣୁ ବନ୍ୟା ଅଞ୍ଚଳରେ ଭାଡିକରି ତଳିଘେରା ପ୍ରସ୍ତୁତ କରାଯାଇପାରେ । ସାଧାରଣତଃ ୩.୫ ମିଟର ଲମ୍ବ, ୧ମିଟର ଓସାର ଏବଂ ୧ମିଟର ଉଚ୍ଚତା ବିଶିଷ୍ଟ ବାଉଁଶ ଭାଡିକରି ବ୍ୟବହାର କରାଯାଇପାରିବ ଏବଂ ବର୍ଷାଦାଉରୁ ରକ୍ଷା କରାଯାଇପାରିବ ।

ଚାରାର ପରବର୍ତ୍ତୀ ଯତ୍ନ

ସୂର୍ଯ୍ୟକିରଣ ପଡିବା ପାଇଁ ଚାରା ମଧ୍ୟରେ ଉପଯୁକ୍ତ ବ୍ୟବଧାନ ରଖିବା ଆବଶ୍ୟକ । ଚାରାର ପତ୍ର ଟାଣ ହେବା ପରେ (ବୁଣିବାର ୧୫ଦିନ ପରେ) କ୍ୟାଲସିୟମ ନାଇଟ୍ରେଟ (୨ଗ୍ରାମ) ପଟାସିୟମ ନାଇଟ୍ରେଟ(୨ଗ୍ରାମ) ଓ ସିଙ୍ଗଲ ସୁପର ଫସଫେଟ(୧୦ଗ୍ରାମ) ୧ଲିଟର ପାଣିରେ ମିଶାଇ ସିଞ୍ଚନ କରନ୍ତୁ । ଚାରା ଉପାଡିବାରେ ୧୫ଦିନ ପୂର୍ବରୁ କାର୍ବୋଫୁରାନ ବା ଫୁରାଡନ (୫୦ଗ୍ରାମ ପ୍ରତି ବର୍ଗମିଟର) ପ୍ରୟୋଗ କଲେ ରୋଗ ପୋକ କମିଯାଏ ।

ଜଳସେଚନ

ଆବଶ୍ୟକତା ଅନୁସାରେ ଝରା ସାହାଯ୍ୟରେ ଜଳସେଚନ କରନ୍ତୁ । ଯେପରି ଚେର ମୂଳରେ ପାଣିଜମି ରହିବନି । ପାଣି କମିଲେ ମୂଳଶଢା ରୋଗ ହେବାର ଆଶଙ୍କା ଅଧିକ ଥାଏ । ଚାରା ଉପାଡିବାର ୭ଦିନ ପୂର୍ବରୁ ଜଳସେଚନ ବନ୍ଦକରି ଏବଂ ଉତ୍ତାପ କମାଇଦେଲେ ଚାରା ଟାଣ ହୋଇଯିବ । ଚାରା ଉପାଡିବା ପୂର୍ବରୁ ଭଲ ଭାବରେ ଜଳସେଚନ କରି ଚାରା ଉପାଡନ୍ତୁ । ଚେରଗୁଡିକୁ ବାଭିଷ୍ଟିନ ଦ୍ରବଣରେ (୧୦ଗ୍ରାମ ପ୍ରତି ଲିଟର ପାଣି) ୫-୧୦ ମିନିଟ ଭିଜାଇ ମୁଖ୍ୟ ଜମିରେ ରୋପଣ କରନ୍ତୁ ।

ତଳିଘେରରେ ରୋଗ ଓ ପୋକ ପରିଚାଳନା

ମୂଳଶଢା- ଏଥିରେ ଗଛର ମୂଳ ଓ କାଣ୍ଡ ଶଢିଯାଏ ଏବଂ ଗଛ ମରିଯାଏ । ଏହି ରୋଗ ହେଲେ ବାଭିଷ୍ଟିନ (୧.୫ଗ୍ରାମ) କିମ୍ବା କ୍ୟାପଟାନ (୨ଗ୍ରାମ) କିମ୍ବା ଥିରାବ (୨ଗ୍ରାମ) ପ୍ରତି ଲିଟର ପାଣିରେ ମିଶାଇ ମାଟିରେ ସ୍ପ୍ରେ କରନ୍ତୁ ।

ପାଉଁଶିଆ ରୋଗ- ପତ୍ର ଡେମ୍ଫରେ ପାଉଁଶ ରଙ୍ଗର ଚିହ୍ନ ଦେଖାଯାଏ ଏବଂ ପତ୍ର ଝଡିପଡେ । ଏହି ରୋଗରେ ପ୍ରତିକାର ପାଇଁ ୨ଗ୍ରାମ ୱେଟବୁଲ ସଲଫର ୧ଲିଟର ପାଣିରେ ମିଶାଇ ସ୍ପ୍ରେ କରନ୍ତୁ ।

ପତ୍ରଦାଗ ରୋଗ- ତଳିଘେରାରେ ପତ୍ରଦାଗ ରୋଗ ଦେଖାଦେଲେ ୨ଗ୍ରାମ ବାଭିଷ୍ଟିନ କିମ୍ବା ୩ଗ୍ରାମ ମାନକୋଜେନ ୧ଲିଟର ପାଣିରେ ମିଶାଇ ସ୍ପ୍ରେ କରନ୍ତୁ ।

ଜଉପୋକ- ତଳିଘେରାରେ ୦.୨ ଗ୍ରାମ ଏସିଟାମିପ୍ରିଡ କିମ୍ବା ୦.୨ ଗ୍ରାମ ଥାୟୋମେଥୋକଜାମ ସ୍ପ୍ରେ କରନ୍ତୁ । ୨ମିଲି ନିମତେଲ କିମ୍ବା କରଞ୍ଜ ତେଲ ସ୍ପ୍ରେ କରନ୍ତୁ ।

ଆଧାର: ଫାର୍ମ ମ୍ୟାନେଜର, କୃଷି ବିଜ୍ଞାନ କେନ୍ଦ୍ର, କେନ୍ଦ୍ରାପଡା



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate