ଜାମ ଶକ୍ତିର କରାମତି

ଜାମ ଶକ୍ତିର କାର୍ଯ୍ୟକାରିତା

ଜାମ ପରିଦୃଶ୍ୟ, ଆଗକୁ କାର୍ଯ୍ୟକାରୀ ହେବାକୁ ଥିବା ବିଭିନ୍ନ ଯୋଜନାର ଏକ ସ୍ୱରୂପ । ମୋ ପାଇଁ ଜାମ ହେଉଛି ସର୍ବାଧିକ ପ୍ରାପ୍ତ କରିବା । ଖର୍ଚ୍ଚ କରାଯାଇଥିବା ପ୍ରତି ପଇସାର ସର୍ବାଧିକ ମୂଲ୍ୟ । ଦରିଦ୍ରମାନଙ୍କ ପାଇଁ ସର୍ବାଧିକ କ୍ଷମତା । ଯୁବବର୍ଗଙ୍କ କ୍ଷେତ୍ରରେ ସର୍ବାଧିକ କାରିଗରୀ କୌଶଳର ଉପଯୋଗ ପ୍ରଧାନମନ୍ତ୍ରୀ କହିଛନ୍ତି ।

ସ୍ୱାଧୀନତାର ୬୭ ବର୍ଷ ପରେ ମଧ୍ୟ ଭାରତର ଜନସଂଖ୍ୟାର ଏକ ବଡ ଅଂଶ ବ୍ୟାଙ୍କ ସେବାରୁ ବଂଚିତ ଥିଲେ । ଏହାର ଅର୍ଥ ସେମାନଙ୍କ ପାଖରେ ସଂଚୟର କୌଣସି ସୁବିଧା ନଥିଲା କି ସଂସ୍ଥାଗତ ଉଧାର ପାଇବାର ସୁଯୋଗ ନଥିଲା । ପ୍ରଧାନମନ୍ତ୍ରୀ ଶ୍ରୀ ମୋଦୀ ମୌଳିକ ସମସ୍ୟାକୁ ଦେଖି ପ୍ରଧାନମନ୍ତ୍ରୀ ଜନ ଧନ ଯୋଜନା ଅଗଷ୍ଟ ୨୮ ତାରିଖରେ ଶୁଭାରମ୍ଭ କରିଥିଲେ । ମାସକ ମଧ୍ୟରେ ଏହି ଯୋଜନା ଲକ୍ଷ ଲକ୍ଷ ଭାରତୀୟଙ୍କର ରୂପରେଖ ବଦଳାଇଦେଲା । ବର୍ଷକ ମଧ୍ୟରେ ୧୯.୭୨ କୋଟି ବ୍ୟାଙ୍କ ସଂଚୟ ଖାତା ଖୋଲିଥିଲା । ଏ ପର୍ଯ୍ୟନ୍ତ ୧୬.୮ କୋଟି “ରୂପେ କାର୍ଡ” ପ୍ରଦାନ କରାଯାଇଛି । ୨୮୬୯୯.୬୫ କୋଟି ଟଙ୍କା ଜମା କରାଯାଇଛି । ୧,୨୫,୬୯୭ ଜଣ ବ୍ୟାଙ୍କ ମିତ୍ରଙ୍କୁ ମଧ୍ୟ ନିଯୁକ୍ତି ପ୍ରଦାନ କରାଯାଇଛି । ଗୋଟିଏ ସପ୍ତାହ ମଧ୍ୟରେ ୧,୮୦,୯୬,୧୩୦ ବ୍ୟାଙ୍କ ଖାତା ଖୋଲାଯିବା ଗିନିଜ ବିଶ୍ୱ ରେକର୍ଡ କରିଥିଲା ।

ଲକ୍ଷ୍ୟ

ଯେତେବେଳେ ଲକ୍ଷ ଲକ୍ଷ ବ୍ୟାଙ୍କ ଏକାଉଣ୍ଟ ଖୋଲାଯିବା ଏକ ଆହ୍ୱାନ ଥିଲା ସେତେବେଳେ ଲୋକମାନଙ୍କ ମାନସିକତାର ପରିବର୍ତ୍ତନ କରାଇ ସେମାନଙ୍କୁ ବ୍ୟାଙ୍କ ସଂଚୟ ଖାତାର ବ୍ୟବହାର କରାଇବା ଆଉ ଏକ ବଡ ଆହ୍ୱାନ ଥିଲା । ଶୂନ ବାଲାନ୍ସ ଜମା ଖାତା ସେପ୍ଟେମ୍ବର ୨୦୧୪ରେ ୭୬.୮ ପ୍ରତିଶତ ଥିଲାବେଳେ ଡିସେମ୍ବର ୨୦୧୫ରେ ଏଥିରେ ହ୍ରାସ ଘଟି ୩୨.୪ ପ୍ରତିଶତରେ ପହଂଚିଥିଲା । ୧୩୧ କୋଟି ଟଙ୍କାରୁ ଅଧିକ ଓଭରଡ୍ରାଫ୍ଟ ହୋଇଛି ।

ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କର ଯୁବଗୋଷ୍ଠୀଙ୍କୁ କର୍ମତତ୍ପର କରାଇବାର ଶକ୍ତି ଏବଂ ସରକାରୀ କଳ ଯୋଗୁ ଏହା ସମ୍ଭବ ହୋଇପାରିଛି । ଏହି ଦୁଃସାହସିକ କାର୍ଯ୍ୟ ମିଶନ ମୋଡରେ କରାଯାଇଥିଲା । ଏଥିରେ ସରକାର ଏବଂ ଜନସାଧାରଣଙ୍କ ଭାଗିଦାରୀ ଏବଂ ଅଂଶଗ୍ରହଣ ଯୋଗୁ ଉଲ୍ଲେଖନୀୟ ସଫଳତା ମିଳିଲା ।

ବ୍ୟାଙ୍କ ଖାତା ଲକ୍ଷ ଲକ୍ଷ ଭାରତୀୟଙ୍କୁ ବ୍ୟାଙ୍କ ସେବା ପାଇବାର ସୁଯୋଗ ଦେବା ସହିତ ଭ୍ରଷ୍ଟାଚାର ରୋକିବାରେ ଏକ ପ୍ରମୁଖ ଭୂମିକା ଗ୍ରହଣ କରିପାରିଲା । ବର୍ତ୍ତମାନ ଡାଇରେକ୍ଟ ବେନିଫିଟ ଟ୍ରାନ୍ସଫର ଆଧାରରେ ରିହାତି ଅର୍ଥ ବ୍ୟାଙ୍କ ଜମା ଖାତାରେ ସିଧାସଳଖ ଭାବେ ଜମା କରାଯାଉଛି । ଏହା ଫଳରେ ବାଟମାରଣା ଏବଂ ମନଇଚ୍ଛା କାର୍ଯ୍ୟ କରିବାରେ ରୋକ ଲଗାଯାଇପାରିଛି । “ପହଲ” ଯୋଜନା ବିଶ୍ୱର ସର୍ବବୃହତ ସିଧାସଳଖ ଅର୍ଥ ପ୍ରେରିତ ଯୋଜନା ଯାହା ଗିନିସ୍ ବୁକ୍ ଅଫ ୱାର୍ଲ୍ଡ ରେକର୍ଡରେ ସ୍ଥାନ ପାଇଛି । ପହଲ ଯୋଜନା ମାଧ୍ୟମରେ ଏଲପିଜି ରିହାତି ଅର୍ଥ ସଂଚୟ ଖାତାରେ ସିଧାସଳଖ ଜମା କରାଯାଉଛି । ଏହି ଯୋଜନାରେ ୧୪.୬୨ କୋଟିରୁ ଅଧିକ ଲୋକ ସିଧାସଳଖ ଭାବେ ରିହାତି ଅର୍ଥ ପାଉଛନ୍ତି । ଏହି ଯୋଜନାରେ ପ୍ରାୟ ୩.୩୪ କୋଟି ନକଲି କିମ୍ବା କାର୍ଯ୍ୟକାରୀ ହେଉନଥିବା ଆକାଉଣ୍ଟ ଚିହ୍ନଟ କରି ହଜାର ହଜାର କୋଟି ଟଙ୍କା ବଂଚାଯାଇପାରୁଛି । ବର୍ତ୍ତମାନ ସରକାର ୩୫-୪୦ ଟି ଯୋଜନାରେ ଡାଇରେକ୍ଟ ବେନିଫିଟ ଟ୍ରାନ୍ସଫର ବ୍ୟବସ୍ଥା କରିଛନ୍ତି ଏବଂ ୨୦୧୫ରେ ପ୍ରାୟ ୪୦ ହଜାର କୋଟି ଟଙ୍କା ସିଧାସଳଖ ଭାବେ ହିତାଧିକାରୀଙ୍କ ଆକାଉଣ୍ଟରେ ଜମା କରାଯାଇଛି ।

ବ୍ୟାଙ୍କ ମାନଙ୍କରେ ମୌଳିକ ସୁବିଧା ଲୋକମାନଙ୍କ ପାଖରେ ପହଂଚିଲେ, ଏନଡିଏ ସରକାର ନାଗରିକମାନଙ୍କୁ ବୀମା କିମ୍ବା ପେନସନ ସୁବିଧା ପ୍ରଦାନ କରିବା ପାଇଁ ଏକ ଐତିହାସିକ ପଦକ୍ଷେପ ନେବେ । ବର୍ଷକୁ ମାତ୍ର ୧୨ ଟଙ୍କା ଦେଲେ ୨ ଲକ୍ଷ ଟଙ୍କାର ଦୁର୍ଘଟଣା ବୀମା ଅର୍ଥ ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନାରେ ପ୍ରଦାନ କରାଯିବ । ସେହିଭଳି ବାର୍ଷିକ ମାତ୍ର ୩୩୦ ଟଙ୍କାରେ ପ୍ରଧାନମନ୍ତ୍ରୀ ଜୀବନ ଜ୍ୟୋତି ବୀମା ଯେଜନା ମାଧ୍ୟମରେ ଜୀବନ ବୀମା ଯୋଗାଇ ଦିଆଯାଉଛି । ନିଜର ଅଂଶଦାନ ଆଧାରରେ ଅଟଳ ପେନସନ ଯୋଜନାରେ ମାସକୁ ୫ ହଜାର ଟଙ୍କା ପର୍ଯ୍ୟନ୍ତ ପେନସନ ପ୍ରଦାନ କରାଯାଉଛି । ୯.୨ କୋଟିରୁ ଅଧିକ ଲୋକ ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନାରେ ଅନ୍ତର୍ଭୁକ୍ତ । ପ୍ରାୟ ୧୫.୮୫ ଲକ୍ଷ ଲୋକ ଅଟଳ ପେନସନ ଯୋଜନାରେ ପଂଜିକୃତ ହୋଇଛନ୍ତି ।

ଆଧାର - ଜାମ ଶକ୍ତି