ମାଧ୍ୟାକର୍ଷଣ ତରଙ୍ଗ କହିବ କୃଷ୍ଣଗର୍ତ୍ତର ଜନ୍ମ

କୃଷ୍ଣଗର୍ତ୍ତର ଜନ୍ମ

ମହାକାଶରେ ଆୟତ୍ତ କରାଯାଇଥିବା ମାଧ୍ୟାକର୍ଷଣ ତରଙ୍ଗ ବ୍ରହ୍ମାଣ୍ଡର କେତେକ ବୃହତ୍ କୃଷ୍ଣଗର୍ତ୍ତର ଜନ୍ମ ବୃତ୍ତାନ୍ତ ସମ୍ପର୍କରେ ସୂଚନା ଦେବ ।  ବ୍ରିଟେନସ୍ଥିତ ଦୁର୍ହାମ ବିଶ୍ଵବିଦ୍ୟାଳୟର  ଗବେଷକଙ୍କ ନେତୃତ୍ଵରେ ବୈଜ୍ଞାନିକମାନେ ବ୍ରହ୍ମାଣ୍ଡ ସମ୍ପର୍କିତ ପୁନଃ ସୃଷ୍ଟି ପ୍ରକ୍ରିୟା ନେଇ ବିସ୍ତୃତ ଅନୁଧ୍ୟାନ କରିଥିଲେ । ବୃହଦାକାର କୃଷ୍ଣଗର୍ତ୍ତଗୁଡିକ ମଧ୍ୟରେ ଧକ୍କା ହେବା ଫଳରେ କିପରି ମାଧ୍ୟାକର୍ଷଣ ତରଙ୍ଗ ଓ କ୍ଷୁଦ୍ର ତରଙ୍ଗ ସୃଷ୍ଟି ହୋଇଥିଲା, ଏଥିରେ ସେମାନେ ତାହା ଜାଣିବାକୁ ଚେଷ୍ଟା  କରିଥିଲେ । ପ୍ରାୟ ୧୩ ବିଲିୟନ ବର୍ଷ ପୂର୍ବେ ସୃଷ୍ଟି ହୋଇଥିବା  କୃଷ୍ଣଗର୍ତ୍ତଗୁଡ଼ିକ କେଉଁ ଆଦ୍ୟ ପିଣ୍ଡର ବିଜରୁ ପ୍ରାଥମିକ ଅବସ୍ଥାରେ ବଢିଛନ୍ତି  ସେ ସମ୍ପର୍କରେ ଏହି ତରଙ୍ଗଗୁଡିକର ବିସ୍ତାର ଓ ବାରମ୍ବାରତା ତଥ୍ୟ ପ୍ରଦାନ କରିବ । ଏଥିସହ କେଉଁ କାରଣରୁ ଓ କେଉଁଠି ସେଗୁଡ଼ିକ ସୃଷ୍ଟି ହୋଇଛନ୍ତି ସେ ନେଇ ମଧ୍ୟ ସଙ୍କେତ ଦେବ ବୋଲି ଗବେଷକମାନେ କହିଛନ୍ତି ।

ଇଏଜିଏଲ୍ଇ ପ୍ରକଳ୍ପ ଦ୍ଵାରା ମିଳିତ ଅନୁଧ୍ୟାନ

ଇଏଜିଏଲ୍ଇ ପ୍ରକଳ୍ପ ସହ କରାଯାଇଥିବା ଏହି ମିଳିତ ଅନୁଧ୍ୟାନର  ଉଦ୍ଦେଶ୍ୟ ହେଉଛି କମ୍ପ୍ୟୁଟରରେ ଏକ ମଡେଲ ବ୍ୟବହାର କରି ଜ୍ଞାତ ବ୍ରହ୍ମାଣ୍ଡ ସମ୍ପର୍କରେ ବାସ୍ତବବାଦୀ ପୁନଃ ସୃଷ୍ଟି ପ୍ରକ୍ରିୟା ଆରମ୍ଭ କରିବା । ଏହାଦ୍ୱାରା ମାଧ୍ୟାକର୍ଷଣ ତରଙ୍ଗର ସଙ୍କେତଗୁଡିକୁ ଗଣନା କରାଯାଇପାରିବ । ଦୁଇଟି ବୃହଦାକାର କୃଷ୍ଣଗର୍ତ୍ତ ପରସ୍ପର ସହ ଧକ୍କା ହେବା ଫଳରେ ସୃଷ୍ଟି ହେଉଥିବା ମାଧ୍ୟାକର୍ଷଣ ତରଙ୍ଗକୁ ମହାକାଶ ଯନ୍ତ୍ରପାତି ଦ୍ଵାରା ପ୍ରତିବର୍ଷ ଚିହ୍ନଟ କରାଯିବ । ଏଭଳି ଏକ ଉପକରଣ ହେଉଛି ଇଭଲଭଡ ଲେଜର ଇଣ୍ଟରଫେରୋମିଟର ସ୍ପେସ୍ ଆଣ୍ଟିନା (ଇନଲଆଇଏସ୍ଏ) ସୂଚକ, ଯାହାକୁ ୨୦୩୪ରେ  ପ୍ରେରଣ କରାଯିବ ।

ଗତ ଫେବୃୟାରୀରେ ଏଲ୍ଆଇଜିଓ ଏବଂ ଭିର୍ଗୋର ମିଳିତ ଆନୁକୂଲ୍ୟରେ  ଭୂତଳ ଉପକରଣ ବ୍ୟବହାର କରାଯାଇ ପ୍ରଥମଥର ପାଇଁ ମାଧ୍ୟାକର୍ଷଣ ତରଙ୍ଗ ଚିହ୍ନଟ କରାଯାଇଥିଲା । ଇଏଲ୍ଆଇଏସ୍ଏ ମହାକାଶରେ ରହିବ । ଭୂମିରେ ରହିବାକୁ ଥିବା ସୂଚକଠାରୁ ଏହା ୨,୫୦,୦୦୦ ଗୁଣ ବଡ । ସୂର୍ଯ୍ୟଙ୍କ ପିଣ୍ଡଠାରୁ  ୧ ନିୟୁତ ଗୁଣ ବଡ କୃଷ୍ଣଗର୍ତ୍ତଗୁଡ଼ିକ ପରସ୍ପର ସହ ଧକ୍କା ହେବା ଫଳରେ  ସୃଷ୍ଟି ହେବାକୁ ଥିବା ନିମ୍ନ  ବାରମ୍ବାରତାର ମାଧ୍ୟାକର୍ଷଣ ତରଙ୍ଗକୁ ଏହା ଚିହ୍ନଟ କରିବାରେ ସକ୍ଷମ ହେବ ବୋଲି ଆଶା କରାଯାଉଛି । ଆଧ୍ୟାକର୍ଷଣ ତରଙ୍ଗ ସମ୍ପର୍କରେ ପ୍ରଥମେ ୧୦୦ ବର୍ଷ ତଳେ ବୈଜ୍ଞାନିକ ଆଲବର୍ଟ ଆଇନଷ୍ଟାଇନ୍ ତାଙ୍କ ଆପେକ୍ଷିକ ସିଦ୍ଧାନ୍ତରେ  ସୂଚନା ଦେଇଥିଲେ ।

ଆଧାର – ଦୈନିକ ଧରିତ୍ରୀ