ସ୍ଵାସ୍ଥ୍ୟରକ୍ଷା
ସ୍ଵାସ୍ଥ୍ୟରକ୍ଷା
- ଉପକ୍ରମ
- ଯାହା ଜାଣିବା ହେଉଛି ପ୍ରତ୍ୟକ ପରିବାର ଓ ଗୋଷ୍ଠୀର ଅଧିକାର
- ନିରାପଦ ଭାବରେ ମଳକୁ ଫିଙ୍ଗାଯିବା ଉଚିତ
- ସାବୁନ କିମ୍ବା ପାଉଁଶ ଓ ପାଣିରେ ହାତ ଭଲ କରି ଧୋଇବା ଜରୁରୀ
- ଆଖି ସଂକ୍ରମଣରୁ ରକ୍ଷା
- ପାଣି ରଖୁଥିବା ପାତ୍ରକୁ ଘୋଡାଇ ରଖିବା ଜରୁରୀ
- କଞ୍ଚା ବା ବାସି ଖାଦ୍ୟ ମାରାତ୍ମକ ହୋଇପାରେ
- ଖାଦ୍ୟ, ବାସନ ଓ ରନ୍ଧା ଜାଗା ପରିଷ୍କାର ରଖିବା ଜରୁରୀ
- ଘରର ଅଳିଆକୁ ନିରାପଦ ଜାଗାରେ ଫିଙ୍ଗିଲେ ରୋଗ ଦାଉରୁ ରକ୍ଷା ମିଳିଥାଏ
ଉପକ୍ରମ
ଶିଶୁଙ୍କ ଭିତରେ ଅଧାରୁ ବେଶୀ ମୃତ୍ୟୁ ବା ଅସୁସ୍ଥତା ଜୀବାଣୁ ଦ୍ଵାରା ହୋଇଥାଏ ଏବଂ ଏହି ଜୀବାଣୁ ଖାଦ୍ୟ , ପିଇବା ପାଣି କିମ୍ବା ମଇଳା ହାତ ଦେଇ ପେଟକୁ ଯାଇଥାଏ । ଏଭିତରୁ ଅଧିକାଂଶ ଜୀବାଣୁ ମଣିଷର ବା ଜୀବଜନ୍ତୁଙ୍କ ମଳରୁ ଆସିଥାଏ ।
ଉତ୍ତମ ସ୍ଵାସ୍ଥ୍ୟରକ୍ଷା ଅଭ୍ୟାସ ସାହାଯ୍ୟରେ ବହୁତଗୁଡିଏ ରୋଗର , ବିଶେଷ କରି ତରଳ ଝାଡାର , ପ୍ରତିରୋଧ କରାଯାଇପାରେ । ପାଇଖାନାରେ ଝାଡା ବସିବା , ଝାଡା ଯିବା ପରେ ଏବଂ ଶିଶୁକୁ ଖୁଆଇବା ଆଗରୁ ହାତକୁ ସାବୁନ ବା ପାଉଁଶ ଓ ପାଣିରେ ଭଲ କରି ଧୋଇବା , ଜୀବଜନ୍ତୁଙ୍କ ମଳ ଘର , ରାସ୍ତା , କୂଅ ଓ ପିଲାଙ୍କ ଖେଳିବା ଜାଗାଠାରୁ ଦୂରରେ ରଖିବା ହେଉଛି ଉତ୍ତମ ସ୍ଵାସ୍ଥ୍ୟରକ୍ଷା ଅଭ୍ୟାସର କିଛି ଉଦାହରଣ ।
ଗୋଷ୍ଠୀରେ ସମସ୍ତେ ଏକାଠି ମିଶି ପାଇଖାନା ତିଆରି କରିବା ଓ ବ୍ୟବହାର କରିବା , ପିଇବା ପାଣିକୁ ସୁରକ୍ଷିତ ରଖିବା , ମଇଳା ପାଣି ଓ ଅଳିଆ ଠିକ ଜାଗାରେ ପକାଇବା ଉଚିତ । ସରକାର ମଧ୍ୟ ସମସ୍ତେ ବସାଇ ପାରିବା ଭଳି ଅଳ୍ପ ମୂଲ୍ୟର ପାଇଖାନା ତିଆରି ଓ ବ୍ୟବହାର ବିଷୟରେ ଲୋକଙ୍କୁ ବୁଝାଇବା ଦରକାର । ସହର ଅଞ୍ଚଳରେ ଅଳ୍ପ ମୂଲ୍ୟର ପାଇଖାନା ପରିମଳ ବ୍ୟବସ୍ଥା , ମଇଳା ପାଣି ନିଷ୍କାସନ , ପିଇବା ପାଣି ଯୋଗାଣ ଏବଂ ମଇଳା ସଂଗ୍ରହ ପାଇଁ ସରକାର ବ୍ୟବସ୍ଥା କରିବା ଆବଶ୍ୟକ ।
ଯାହା ଜାଣିବା ହେଉଛି ପ୍ରତ୍ୟକ ପରିବାର ଓ ଗୋଷ୍ଠୀର ଅଧିକାର
୧. ନିରାପଦ ଭାବରେ ମଳକୁ ଫିଙ୍ଗାଯିବା ଉଚିତ । ଏଥିପାଇଁ ପାଇଖାନାର ବ୍ୟବହାର ସବୁଠାରୁ ନିରାପଦ ।
୨. ପିଲାଠାରୁ ବଡ ଯାଏଁ ଘରର ସମସ୍ତେ ଝାଡା ଯିବା ପରେ , ଖାଇବା ଆଗରୁ ଓ ଶିଶୁକୁ ଖୁଆଇବା ଆଗରୁ ସାବୁନ କିମ୍ବା ପାଉଁଶ ଓ ପାଣିରେ ହାତ ଭଲ କରି ଧୋଇବା ଜରୁରୀ ।
୩. ସାବୁନରେ ମୁହଁ ଧୋଇଲେ ଆଖି ସଂକ୍ରମଣରୁ ରକ୍ଷା ମିଳିଥାଏ । ପୃଥିବୀର କେତେକ ଅଞ୍ଚଳରେ ଆଖିର ସଂକ୍ରମଣରୁ ଟ୍ରକୋମା ଆରମ୍ଭ ହୁଏ ଓ ଶେଷରେ ଅନ୍ଧତ୍ଵ ଆସିଥାଏ ।
୪. ପାତ୍ରକୁ ଉତ୍ସରୁ ବା ବିଶୋଧିତ ହୋଇଥିବା ପାଣି ବ୍ୟବହାର କରନ୍ତୁ । ପାଣି ରଖୁଥିବା ପାତ୍ରକୁ ଘୋଡାଇ ରଖିବା ଜରୁରୀ ।
୫. କଞ୍ଚା ବା ବାସୀ ଖାଦ୍ୟ ମାରାତ୍ମକ ହୋଇପାରେ । କଞ୍ଚା ଖାଦ୍ୟ ଭଲକରି ଧୁଆହେବା ବା ରନ୍ଧାହେବା ଆବଶ୍ୟକ । ରନ୍ଧା ଖାଦ୍ୟକୁ ଡେରି ନକରି ବା ପୁଣି ଥରେ ଭଲ ଭାବରେ ଗରମ କରି ଖାଇବା ଉଚିତ ।
୬. ଖାଦ୍ୟ , ବାସନ ଓ ରନ୍ଧା ଜାଗା ପରିଷ୍କାର ରଖିବା ଆବଶ୍ୟକ । ଖାଦ୍ୟକୁ ଘୋଡାଇ ରଖିବା ଉଚିତ ।
୭. ଘରର ଅଳିଆକୁ ନିରାପଦ ଜାଗାରେ ଫିଙ୍ଗିଲେ ରୋଗ ଦାଉରୁ ରକ୍ଷା ମିଳିଥାଏ ।
ନିରାପଦ ଭାବରେ ମଳକୁ ଫିଙ୍ଗାଯିବା ଉଚିତ
ନିରାପଦ ଭାବରେ ମଳକୁ ଫିଙ୍ଗାଯିବା ଉଚିତ । ଏଥିପାଇଁ ପାଇଖାନାର ବ୍ୟବହାର ସବୁଠାରୁ ନିରାପଦ ।
ତରଳ ଝାଡା ଭଳି ଅନେକ ରୋଗ ମଣିଷର ମଳ ଜରିଆରେ ବ୍ୟାପିଥାଏ । ଏଥିରୁ ଜୀବାଣୁ ପିଇବା ପାଣି , ଖାଦ୍ୟ , ହାତ , ବାସନ କିମ୍ବା ରନ୍ଧାଜାଗାକୁ ଆସେ । ଏସବୁକୁ ବ୍ୟବହାର କଲେ ଜୀବାଣୁ ଦେହକୁ ଆସି ରୋଗ କରାଏ ।
ଏଥିରୁ ରକ୍ଷା ପାଇବାର ଏକମାତ୍ର ଉପାୟ ହେଲା ମଣିଷ ଓ ଜୀବଜନ୍ତୁଙ୍କ ମଳକୁ ସୁରକ୍ଷିତ ଭାବରେ ଦୂରେଇବା । ମଣିଷ ପରିଷ୍କାର ପାଇଖାନା ବ୍ୟବହାର କରିବା ଭଲ ଜୀବଜନ୍ତୁଙ୍କ ମଳ ଘର , ଏବଂ ପିଲାଙ୍କ ଖେଳିବା ଜାଗାଠାରୁ ଦୂରରେ ଗଦାଇବା ଦରକାର ।
ଯଦି ପାଇଖାନା ବ୍ୟବହାର କରିବା ସମ୍ଭବ ନୁହେଁ ତେବେ ଘର , ରାସ୍ତା , ପିଇବା ପାଣି ଏବଂ ପିଲାଙ୍କ ଖେଳ ଜାଗାଠାରୁ ଦୂରରେ ଝାଡା ଯିବା ଏବଂ ତାକୁ ସାଙ୍ଗେ ସାଙ୍ଗେ ପୋତିଦେବା ଉଚିତ ।
ସମସ୍ତଙ୍କ ମଳରେ , ଏପରିକି ଛୋଟ ପିଲାଙ୍କ ମଳରେ , ବି ଅନେକ ଜୀବାଣୁ ରହିଥାଏ । ତେଣୁ ତାହା ବିପଦଜନକ । ଯଦି ପିଲା ପାଇଖାନା ବା ମଳପାତ୍ର ବ୍ୟବହାର କରୁ ନଥାଏ , ତେବେ ତା’ ମଳକୁ ସାଙ୍ଗେ ସାଙ୍ଗେ ସଫା କରି ପାଇଖାନାରେ ପକାଇବା ବା ପୋତିଦେବା ଜରୁରୀ ।
ପାଇଖାନାକୁ ସବୁବେଳେ ସଫା ରଖିବା ଏବଂ ତାହାକୁ ଘୋଡାଇ ରଖିବା ଦରକାର ।
ସରକାର ଏବଂ ବେସରକାରୀ ସଂସ୍ଥା ଅଳ୍ପ ମୂଲ୍ୟର ପାଇଖାନା ତିଆରି କରିବା ପାଇଁ ଲୋକଙ୍କୁ ବୁଝାଇବା ଆବଶ୍ୟକ ।
ସାବୁନ କିମ୍ବା ପାଉଁଶ ଓ ପାଣିରେ ହାତ ଭଲ କରି ଧୋଇବା ଜରୁରୀ
ପିଲାଠାରୁ ବଡ ଯାଏଁ ଘରର ସମସ୍ତେ ଝାଡା ଯିବା ପରେ , ଖାଇବା ଆଗରୁ ଓ ଶିଶୁକୁ ଖୁଆଇବା ଆଗରୁ ସାବୁନ କିମ୍ବା ପାଉଁଶ ଓ ପାଣିରେ ହାତ ଭଲ କରି ଧୋଇବା ଜରୁରୀ ।
ସାବୁନ କିମ୍ବା ପାଉଁଶରେ ହାତ ଧୋଇଲେ ଜୀବାଣୁ ନଷ୍ଟ ହୋଇଯାଆନ୍ତି । କେବଳ ପାଣିରେ ଧୋଇବା ଯଥେଷ୍ଟ ନୁହେଁ , ଦୁଇ ହାତକୁ ସାବୁନ ବା ପାଉଁଶରେ ଘଷି ଧୋଇବା ଦରକାର । ଏହାଦ୍ୱାରା ଜୀବାଣୁ ଖାଦ୍ୟକୁ ଯାଇପାରେ ନାହିଁ । ହାତ ଧୋଇବା ଦ୍ଵାରା କୃମିରୁ ବି ରକ୍ଷା ମିଳିଥାଏ । ତେଣୁ ପାଇଖାନା ପାଖରେ ସାବୁନ ବା ପାଉଁଶ ରଖିବା ଆବଶ୍ୟକ ।
- ନିଜେ ଝାଡା ଗଲା ପରେ ବା ଶିଶୁ ଝାଡା ଯିବା ପରେ ମଳଦ୍ଵାର ସଫା କରିସାରି ହାତ ଧୋଇବା ବହୁତ ଜରୁରୀ । ଜୀବଜନ୍ତୁଙ୍କୁ ବା କଞ୍ଚା ମାଂସ ଆଦି ଛୁଇଁଲେ ମଧ୍ୟ ହାତ ଧୋଇବା ବହୁତ ଜରୁରୀ ।
- ଖାଦ୍ୟ ତିଆରି କରିବା , ବାଢିବା , ଖାଇବା କିମ୍ବା ଶିଶୁକୁ ଖୁଆଇବା ଆଗରୁ ହାତ ଧୋଇବା ବହୁତ ଜରୁରୀ । ଝାଡା ଯିବା ପରେ ଏବଂ ଖାଇବା ଆଗରୁ ଦୁଇଟି ଯାକ ହାତ ଭଲ କରି ଧୋଇବା କଥା ଶିଶୁକୁ ଶିଖାଇବା ଦରକାର ।
ଶିଶୁ ଅନେକ ସମୟରେ ପାଟିରେ ହାତ ପୂରାଇଥାଏ । ତେଣୁ ଶିଶୁର ହାତକୁ ବାରମ୍ବାର ଧୋଇବା ଦରକାର । ବିଶେଷ କରି ସେମାନେ ମଇଳାରେ ବା ଜୀବଜନ୍ତୁଙ୍କ ସହ ଖେଳିବା ପରେ ଧୋଇବା ବହୁତ ଜରୁରୀ ।
ଶିଶୁ ପେଟରେ ଅତି ସହଜରେ କୃମି ହୁଏ । କୃମି ଓ ତା’ର ଅଣ୍ଡା ମଣିଷ ଏବଂ ଜୀବଜନ୍ତୁଙ୍କ ମଳମୂତ୍ରରେ , ନଈପୋଖରୀ ଭଳି ଉପର ଜଳ , ମାଟି ଏବଂ ଅସିଝା ମାଂସରେ ଥାଏ । ତେଣୁ ପାଇଖାନା ବା ଝାଡା ଯାଉଥିବା ପଡିଆ ପାଖରେ ପିଲା ଖେଳିବା ଉଚିତ ନୁହେଁ । ପାଦ ବାଟେ କୃମି ଦେହ ଭିତରକୁ ନପଶିବା ପାଇଁ ପାଇଖାନା ଯିବା ବେଳେ ଚପଲ ପିନ୍ଧିବା ଆବଶ୍ୟକ ।
- କୃମି ହେଉଥିବା ଅଞ୍ଚଳରେ ରହୁଥିବା ଶିଶୁକୁ ବର୍ଷକୁ ଦୁଇ ତିନି ଥର କୃମି ଔଷଧ ଦେବା ଦରକାର ।
ଆଖି ସଂକ୍ରମଣରୁ ରକ୍ଷା
ସାବୁନରେ ମୁହଁ ଧୋଇଲେ ଆଖି ସଂକ୍ରମଣରୁ ରକ୍ଷା ମିଳିଥାଏ । ପୃଥିବୀର କେତେକ ଅଞ୍ଚଳରେ ଆଖିର ସଂକ୍ରମଣରୁ ଟ୍ରାକୋମା ଆରମ୍ଭ ହୁଏ ଓ ଶେଷରେ ଅନ୍ଧତ୍ଵ ଆସିଥାଏ ।
ମଇଳା ମୁହଁରେ ମାଛି ବସନ୍ତି ଏବଂ ମାଛିର ଗୋଡରେ ଜୀବାଣୁ ଆସନ୍ତି । ଏଥିଯୋଗୁ ଆଖି ସଂକ୍ରମିତ ହୋଇପାରେ , ଏପରିକି ଦୃଷ୍ଟିଶକ୍ତି ମଧ୍ୟ ନଷ୍ଟ ହୋଇଯାଇପାରେ ।
ଯଦି ଆଖି ସୁସ୍ଥ ଥାଏ , ତେବେ ଧଳା ଡୋଳା ସୁସ୍ଥ ରହିବ , ଆଖି ଓଦାଳିଆ ହୋଇ ଚିକଚିକ କରିବ ଏବଂ ଦୃଷ୍ଟିଶକ୍ତି ଠିକ ରହିବ । ଯଦି ଆଖି ଶୁଖିଲା ହୋଇ ଲାଲ ଦେଖା ଯାଉଥିବ , ଆଖିରୁ ପାଣି ବୋହୁଥିବ ବା ଶିଶୁ ଠିକ ଭାବରେ ଦେଖି ପାରୁନଥିବ ତେବେ ଶିଶୁକୁ ସାଙ୍ଗେ ସାଙ୍ଗେ ସ୍ୱାସ୍ଥ୍ୟକର୍ମୀଙ୍କୁ ଦେଖାଇବା ଜରୁରୀ ।
ପାଣି ରଖୁଥିବା ପାତ୍ରକୁ ଘୋଡାଇ ରଖିବା ଜରୁରୀ
ପରିଷ୍କାର ଉତ୍ସରୁ ବା ବିଶୋଧିତ ହୋଇଥିବା ପାଣି ବ୍ୟବହାର କରନ୍ତୁ । ପାଣି ରଖୁଥିବା ପାତ୍ରକୁ ଘୋଡାଇ ରଖିବା ଜରୁରୀ ।
ପରିବାର ପାଇଁ ଯଥେଷ୍ଟ ପରିମାଣର ପରିଷ୍କାର ପିଇବା ପାଣି ମିଳୁନଥିଲେ ଓ ପାଣିକୁ ଜୀବାଣୁମୁକ୍ତ ରଖିବା ବିଷୟରେ ତାଙ୍କୁ ଜଣାଥିଲେ ର୍ପ୍ଗା ବହୁତ କମ୍ ହୁଏ ,
ପାଣି ପରିଷ୍କାର ନଥିଲେ ତାକୁ ଛାଣି , ଫୁଟାଇ ପରିଷ୍କାର କରାଯାଇ ପାରିବ ।
ଠିକ ଭାବରେ ବସାଯାଇଥିବା ପାଣି ପାଇପ , ନଳକୂଅ , ସୁରକ୍ଷିତ କୂଅ ଏବଂ ଝରଣା ଆଦି ପରିଷ୍କାର ପାଣିର ଉତ୍ସ । ପୋଖରୀ , ନଈ , ଖୋଲା ବନ୍ଧ ଆଦିର ଅପରିଷ୍କାର ପାଣିକୁ ଫୁଟାଇ ବିଶୋଧିତ କରାଯାଇ ପାରିବ । ପାଣିକୁ ସଫା ରଖିବା ପାଇଁ ତାକୁ ଘୋଡାଇ ରଖିବା ଦରକାର ।
ପରିବାର ଓ ଗୋଷ୍ଠୀ ପାଣିକୁ ସୁରକ୍ଷିତ କରିପାରିବେ :
- କୂଅକୁ ଢାଙ୍କି ରଖି ଏବଂ ନଳକୂଅ ବସାଇ
- ମଇଳା ଓ ବଳକା ପାଣି (ବିଶେଷ କରି ପାଇଖାନା ଓ ଘରଧୁଆ ପାଣି)କୁ ପିଇବା , ରାନ୍ଧିବା , ଏବଂ ଧୁଆଧୋଇ ପାଇଁ ବ୍ୟବହାର କରୁଥିବା ପାଣି ଉତ୍ସଠାରୁ ଦୂରରେ ଫିଙ୍ଗି ,
- ପାଣି ଉତ୍ସଠାରୁ ଅତି କମ୍ ରେ ୧୫ ମିଟର ଦୂରରେ ତଳ ଆଡକୁ ପାଇଖାନା ତିଆରି କରି
- କୂଅରୁ ପାଣି କାଢିବା ବାଲ୍ଟି , ଦଉଡି , ମାଠିଆ ଆଦିକୁ ତଳେ ନରଖି ଗୋଟିଏ ସଫା ଜାଗାରେ ରଖି
- ମଣିଷ ରହିବା ଜାଗାଠାରୁ ଏବଂ ପିଇବା ପାଣି ଉତ୍ସଠାରୁ ଜୀବଜନ୍ତୁଙ୍କୁ ଦୂରରେ ରଖି
- ପାଣିର ଉତ୍ସ ପାଖରେ କୀଟନାଶକ କିମ୍ବା ଅନ୍ୟ ରାସାୟନିକ ନପକାଇ
ଲୋକମାନେ ଘରେ ପାଣି ସଫା ରଖିପାରିବେ
- ସଫା ଢାଙ୍କୁଣୀ ବାଲା ପାତ୍ରରେ ପିଇବା ପାଣି ରଖି
- ମଇଳା ହାତରେ ପାଣି ନଛୁଇଁ
- ପରିଷ୍କାର ହାଣ୍ଡଲଲଗା ଗଡୁରେ ପାଣି କାଢି
- ପାଣି ଥିବା ପାତ୍ରରେ ଗୋଟିଏ କଳ ଲଗାଇ
- ପିଇବା ପାଣି ପାତ୍ରରେ ହାତ ନପୂରାଇ ବା ସିଧା ସେଥିରୁ ପାଣି ନପିଇ
- ପାଣିର ଉତ୍ସ ପାଖରୁ ଜୀବଜନ୍ତୁଙ୍କୁ ଦୂରେଇ ରଖି
ପାଣିର ଉତ୍ସ ବିଷୟରେ ନିଶ୍ଚିତ ନଥିଲେ ସ୍ଥାନୀୟ ଅଧିକାରୀଙ୍କ ସହ ଯୋଗାଯୋଗ କରିବା ଆବଶ୍ୟକ ।
କଞ୍ଚା ବା ବାସି ଖାଦ୍ୟ ମାରାତ୍ମକ ହୋଇପାରେ
କଞ୍ଚା ବା ବାସି ଖାଦ୍ୟ ମାରାତ୍ମକ ହୋଇପାରେ । କଞ୍ଚା ଖାଦ୍ୟ ଭଲକରି ଧୁଆ ବା ରନ୍ଧାହେବା ଆବଶ୍ୟକ । ରନ୍ଧା ଖାଦ୍ୟକୁ ଡେରି ନକରି ବା ପୁଣି ଥରେ ଭଲ ଭାବରେ ଗରମ କରି ଖାଇବା ଉଚିତ ।
ଖାଦ୍ୟ ଭଲକରି ରନ୍ଧା ହେଲେ ଜୀବାଣୁ ନଷ୍ଟ ହୋଇଯାଆନ୍ତି । ବିଶେଷ କରି କୁକୁଡା ଓ ଅନ୍ୟ ମାଂସକୁ ଭଲ କରି ରାନ୍ଧିବା ଦରକାର ।
ଉଷୁମ ଖାଦ୍ୟରେ ଜୀବାଣୁ ବହୁତ ଶୀଘ୍ର ବଢନ୍ତି । ତେଣୁ ରନ୍ଧା ହେବା ପରେ ଯେତେ ଶୀଘ୍ର ସମ୍ଭବ ଗରମ ଥିବା ଅବସ୍ଥାରେ ଖାଇଦେବା ଉଚିତ । ତାହେଲେ ଜୀବାଣୁ ବଢିବା ପାଇଁ ସମୟ ପାଇବେ ନାହିଁ ।
- ଦୁଇ ଘଣ୍ଟାରୁ ଅଧିକ ସମୟ ପାଇଁ ଖାଦ୍ୟ ରଖିବା ପାଇଁ ହେଲେ ତାକୁ ଅତି ଗରମ ବା ଥଣ୍ଡା ରଖିବା ଜରୁରୀ ।
- ରନ୍ଧା ଖାଦ୍ୟ ଆଉ ଗୋଟିଏ ଓଳି ପାଇଁ ରଖିବାକୁ ହେଲେ ତାକୁ ଭଲ କରି ଘୋଡାଇ ରଖିବା ଏବଂ ଖାଇବା ଆଗରୁ ଗରମ କରି ଖାଇବା ଆବଶ୍ୟକ ।
- ଖାଦ୍ୟରେ ଦହି ବା ସେହିଭଳି ଖଟା ଜିନିଷ ଜୀବାଣୁ ବଢିବାକୁ ଦେଇ ନଥାଏ ।
କଞ୍ଚା ଖାଦ୍ୟ ବିଶେଷ କରି କୁକୁଡା ଓ ମାଂସ ଏବଂ ସମୁଦ୍ର ଖାଦ୍ୟରେ ସାଧାରଣତଃ ଜୀବାଣୁ ଥାଏ । ରନ୍ଧା ଖାଦ୍ୟ କଞ୍ଚା ଖାଦ୍ୟ ସହ ମିଶିଲେ ସେଥିରେ ଜୀବାଣୁ ବଢେ । ତେଣୁ କଞ୍ଚା ଓ ରନ୍ଧା ଖାଦ୍ୟ ଅଲଗା ରଖିବା ଜରୁରୀ । ରାନ୍ଧିବା ପରେ ଛୁରୀ , ପାରିବା କଟା ପଟା , ରୋଷେଇ ଜାଗା ଆଦି ସଫା କରିବା ଉଚିତ ।
- ଶିଶୁ ପାଇଁ ମା’କ୍ଷୀର ସବୁଠାରୁ ସୁରକ୍ଷିତ । ଫୁଟା ଗାଈକ୍ଷୀର ଅଫୁଟା କ୍ଷୀରଠାରୁ ବେଶୀ ନିରାପଦ ।
- ବାହାର କରାଯାଇଥିବା ମା’କ୍ଷୀର ସାଧାରଣ ତାପମାତ୍ରାରେ ଗୋଟିଏ ସଫା ଘୋଡାଣି ଦିଆ ପାତ୍ରରେ ଆଠ ଘଣ୍ଟା ଯାଏଁ ରଖାଯାଇ ପାରିବ ।
- ଶିଶୁଙ୍କ ଖାଦ୍ୟ ତିଆରି କରିବା ବେଳେ ଅଧିକ ସାବଧାନ ହେବା ଜରୁରୀ । ଯଦି ସମ୍ଭବ ସେମାନଙ୍କର ଖାଦ୍ୟ ଠିକ୍ ଖାଇବା ଆଗରୁ ତିଆରି କରିବା ଉଚିତ ।
- କଞ୍ଚା ଫଳ ଓ ପଡ଼ିବାରୁ ଚୋପା ଛଡାଇବା ଏବଂ ତାକୁ ଭଲ କରି ଧୋଇବା ଜରୁରୀ । ବିଶେଷ କରି ଶିଶୁକୁ କଞ୍ଚା ଦେଲା ବେଳେ ଏହା ଅଧିକ ଜରୁରୀ । କୀଟନାଶକ କିମ୍ବା ରାସାୟନିକ ପଦାର୍ଥ ଖାଦ୍ୟ ଉପରେ ଦେଖାଯାଉ ନଥିଲେ ବି ସେଗୁଡିକ ବିପଦଜନକ ।
ଖାଦ୍ୟ, ବାସନ ଓ ରନ୍ଧା ଜାଗା ପରିଷ୍କାର ରଖିବା ଜରୁରୀ
ଖାଦ୍ୟ , ବାସନ ଓ ରନ୍ଧା ଜାଗା ପରିଷ୍କାର ରଖିବା ଜରୁରୀ । ଖାଦ୍ୟକୁ ଘୋଡାଇ ରଖିବା ଉଚିତ ।
ଖାଦ୍ୟ ବାଟେ ଜୀବାଣୁ ଦେହକୁ ଯାଇ ରୋଗ କରିପାରେ । ଖାଦ୍ୟକୁ ଜୀବାଣୁମୁକ୍ତ ରଖିବାକୁ ହେଲେ :
- ରୋଷେଇ ଘର ସଫା ରଖିବା ଆବଶ୍ୟକ
- ଛୁରୀ , ବାସନ , ପାତ୍ର ଏବଂ ଥାଳି ଆଦି ସଫାକରି ଓ ଢାଙ୍କି ରଖିବା ଜରୁରୀ
- ବାସନ ପୋଛା କନାକୁ ସବୁଦିନ ସଫା କରି ଖରାରେ ଶୁଖାଇବା ଦରକାର । ଖାଇ ସାରିବା ପରେ ପରେ ବାସନ ଧୋଇ ଶୁଖିବା ପାଇଁ ଥାକ ଉପରେ ରଖିବା ଦରକାର ।
- ମାଛି ଓ ଅନ୍ୟ ଜୀବଙ୍କ ଦାଉରୁ ରକ୍ଷା ପାଇବା ପାଇଁ ଖାଦ୍ୟ ଘୋଡାଇ ରଖିବା ଉଚିତ ।
- ଶିଶୁ ପାଇଁ ବୋତଲ ବ୍ୟବହାର କରିବା ଉଚିତ ନୁହେଁ । କାରଣ ଠିକରେ ସଫା ନହେଲେ ସେଥିରେ ଜୀବାଣୁ ଯାଇ ତରଳ ଝାଡା ହୋଇପାରେ । ତେଣୁ ସେସବୁକୁ ଗରମ ପାଣିରେ ଧୋଇବା ଜରୁରୀ । ସବୁଠାରୁ ଭଲ ଶିଶୁକୁ ମା’କ୍ଷୀର ଦେବା ।
ଘରର ଅଳିଆକୁ ନିରାପଦ ଜାଗାରେ ଫିଙ୍ଗିଲେ ରୋଗ ଦାଉରୁ ରକ୍ଷା ମିଳିଥାଏ
ମାଛି , ଅସରପା , ମୂଷାଙ୍କ ଦ୍ଵାରା ଜୀବାଣୁ ବ୍ୟାପିପାରେ । ପାରିବା , ଫଳଚୋପା ବା ଖାଦ୍ୟ ଟୁକୁଡା ପଡି ରହିଲେ ଏମାନେ ବଢନ୍ତି ।
କୌଣସି ଅଞ୍ଚଳରେ ସାମୂହିକ ଭାବରେ ମଇଳା ସଂଗ୍ରହ କରାଯାଉ ନଥିଲେ ଘରେ ଗୋଟିଏ କମ୍ପୋଷ୍ଟ ଗାତା ଖୋଲି ପ୍ରତିଦିନର ମଇଳା ପୋତିଦେବା ଜରୁରୀ ।
ଘର ଓ ତା’ର ଆଖପାଖ ଅଞ୍ଚଳ ସଫା ରଖିଲେ ରୋଗ ଦାଉରୁ ରକ୍ଷା ମିଳିଥାଏ । ଘରର ମଇଳା ପାଣି ଗୋଟିଏ ସୋକ୍ ପିଟ୍ କରି ବା ବଗିଚାରେ ମଡାଯାଇ ପାରିବ ।
ଅଳ୍ପ ପରିମାଣରେ ହେଲେ ବି କୀଟନାଶକ ବା ରାସାୟନିକ ଖାଦ୍ୟ ବା ପାଣିକୁ ବିଷାକ୍ତ କରିପାରନ୍ତି । ଦେହରେ ଲାଗିଲେ ମଧ୍ୟ ତାହାର ବିଷାକ୍ତ କରିପାରନ୍ତି । ଦେହରେ ଲାଗିଲେ ମଧ୍ୟ ତାହାର ବିଷାକ୍ତ ପ୍ରଭାବ ପଡେ । ତେଣୁ କୀଟନାଶକ ବା ରାସାୟନିକ ବ୍ୟବହାର କରିବା ବେଳର ଲୁଗାପଟା ଘରର ପାଣି ଉତ୍ସ ପାଖରେ ଧୋଇବା ଉଚିତ ନୁହେଁ ।
ଘରର ଆଖପାଖରେ ବା ପାଣିର ଉତ୍ସ ପାଖରେ କୀଟନାଶକ ବ୍ୟବହାର କରିବା ଉଚିତ ନୁହେଁ । ପିଇବା ପାଣି ବା ଖାଦ୍ୟ ପାଖରେ ଏସବୁକୁ ରଖିବା ବି ଉଚିତ ନୁହେଁ । କୀଟନାଶକ ବା ରାସାୟନିକ ସାରା ଥିବା ଡବା ବା ବୋତଲରେ କେବେ ବି ଖାଦ୍ୟ ରଖନ୍ତୁ ନାହିଁ ।
ଆଧାର :UNICEF
Last Modified : 5/11/2021
