ଯୌନ ସମ୍ପର୍କ ଦ୍ଵାରା ବ୍ୟାପୁଥିବା ରୋଗ

ଉପକ୍ରମ

ନିମ୍ନରେ କେତେକ ସାଧାରଣ ରୋଗ ଯାହା ଯୌନ ସମ୍ପର୍କଦ୍ଵାରା ବ୍ୟାପିଥାଏ ତାହା ଆଲୋଚନା କରାଯାଇଅଛି  । ଯଥା – ଗେନେରିଆ, କ୍ଲାମାଇଡିଆ, ସିଫିଲିସ୍ ଓ ବୁଦୋ, ଏଡସ୍ ଗୋଟିଏ ନୂଆ ମାରାତ୍ମକ ରୋଗ, ଓ ଅନ୍ୟ କେତେକ ଯୌନ ସଂଚାରିତ ରୋଗ ଯାହା ଜନନାଙ୍ଗରେ ଘା’ ସୃଷ୍ଟି କରିଥାଏ  । ଏଥିରେ ମଧ୍ୟ ଜନନେନ୍ଦ୍ରିୟରେ ଫୋଟକା ଓ ସାନକ୍ରଏଡ ବାବଦରେ ଆଲୋଚନା କରାଯାଇଛି  ।

ଗେନେରିଆ (ମେହରୋଗ) ଓ କ୍ଲାମାଇଡିଆ

ଏହି ରୋଗଗୁଡିକ ସାଧାରଣତଃ ଯୌନ ସମ୍ପର୍କ ସ୍ଥାପନଦ୍ଵାରା ବ୍ୟାପିଥାଏ  ଓ ଲକ୍ଷଣ ସମାନଥାଏ  । କ୍ଵଚିତ ଏକ ସମୟରେ ଜଣେ ବ୍ୟକ୍ତିଙ୍କୁ ଉଭୟ ଗେନେରିଆ ଓ କ୍ଲାମାଇଡିଆ ହୋଇଥାଏ  । ତେଣୁ ଉଭୟ ରୋଗ ପାଇଁ ଏକ ସମୟରେ ଚିକିତ୍ସିତ ହେବା ଉଚିତ୍ ।

ଲକ୍ଷଣ

ପୁରୁଷ

• ପରିସ୍ରା କରିବାରେ କଷ୍ଟ ବା ଅସୁବିଧା
• ଲିଙ୍ଗରୁ ପୂଜ ବାହାରିବା
• ବେଳେବେଳେ ଅଣ୍ଡକୋଷ ଯନ୍ତ୍ରଣା ସହ ଫୁଲିବା

କେତେ ସପ୍ତାହ ବା କେତେ ମାସ ପରେ

• ଗୋଟିଏ ବା ଉଭୟ ଆଣ୍ଠୁ, ଗଣ୍ଠି ବା ମଣିବନ୍ଧ ଫୁଲିଯାଇ ଯନ୍ତ୍ରଣା ହେବା ବା ଅନ୍ୟ ଅସୁବିଧା ଦେଦେବା   ।
• ଦେହସାରା କୁଣ୍ଡିଆ ବା ଘା’ ହେବା   ।
• ପିଲା ଉତ୍ପାଦିକା ଶକ୍ତି ହରାଇବା (ମହିଳା ଗର୍ଭବତୀ ନ ହେବା)

ସ୍ତ୍ରୀ

• ପ୍ରାରମ୍ଭରୁ ରୋଗର ଚିହ୍ନ ଦେଖାଯାଏ ନାହିଁ   ।
• ପରିସ୍ରା ସମୟରେ ଯନ୍ତ୍ରଣା ହେବା ଓ ସମୟେ ସମୟେ ଯୋନି ସ୍ରାବ ହେବା  ।
• ଯଦି ଜଣେ ଗର୍ଭବତୀ ସ୍ତ୍ରୀ ଲୋକର ଗେନେରିଆ ଥାଏ  ଏବଂ ପିଲା ଜନ୍ମ କରିବା ପୂର୍ବରୁ ଚିକିତ୍ସିତ ହୋଇ ନ ଥାଏ  ତେବେ ଜନ୍ମିତ ଶିଶୁର ଆଖି ଶକ୍ରମଣ ହୋଇ ଶିଶୁ ଅନ୍ଧ ହୋଇଯିବାର ସମ୍ଭାବନା ଥାଏ   ।

ଏକ ସପ୍ତାହ ବା ମାସକ ପରେ

• ତଳି ପେଟରେ ଯନ୍ତ୍ରଣା ହୁଏ  ।
• ଋତୁସ୍ରାବରେ ଅନିୟମିତତା ଦେଖାଦିଏ   ।
• ବନ୍ଧ୍ୟା ହୋଇପାରେ   ।
• ପରିସ୍ରା କରିବାରେ ଅସୁବିଧା  ।

ଗେନେରିଆ ରୋଗକ୍ରାନ୍ତ ନାରୀ ସହ ଯୌନ ସମ୍ପର୍କ ସ୍ଥାପନ କରିବାର ମାତ୍ର ୨ ଦିନରୁ ୫ ଦିନ ମଧ୍ୟରେ ଗୋଟିଏ ସୁସ୍ଥ ପୁରୁଷ ଦେହରେ ଗେନେରିଆ ରୋଗର ଲକ୍ଷଣ ପ୍ରକାଶ ପାଏ   । (ସମୟେ ସମୟେ ଏହି ଲକ୍ଷଣ ପ୍ରକାଶ ପାଇବାକୁ ତିନି ସପ୍ତାହ ବା ସାମାନ୍ୟ ଅଧିକ ସମୟ ଲାଗିଥାଏ   । ମହିଳାମାନଙ୍କଠାରେ ମାସ ମାସ ଧରି ଏପରିକି ବର୍ଷ ବର୍ଷ ଧରି ମଧ୍ୟ କୌଣସି ଲକ୍ଷଣ ପ୍ରକାଶ ପାଏ ନାହିଁ   । ଉପରକୁ କୌଣସି ଲକ୍ଷଣ ଦେଖା ନ ଗଲେ ମଧ୍ୟ ଏହି ରୋଗ ସଂକ୍ରମିତ ହେବାର ମାତ୍ର କେତୋଟି ଦିନ ପରେ, ଉକ୍ତ ନାରୀ ସହ ମୌଥୁନକରୁଥିବା ପ୍ରତ୍ୟକ ପୁରୁଷକୁ ଏହି ରୋଗ ସଂକ୍ରମିତ ହୋଇଥାଏ   ।

ଚିକିତ୍ସା

• ପୂର୍ବେ ଗେନେରିଆ ସାଧାରଣତଃ ପେନିସିଲିନରେ ଭଲ ହୋଇଯାଉଥିଲା  । କିନ୍ତୁ  ବର୍ତ୍ତମାନ ପେନିସିଲିନ  ଏହାକୁ ପ୍ରତିରୋଧ କରିପାରୁ ନାହିଁ   । ତେଣୁ ଏ କ୍ଷେତ୍ରରେ ଅନ୍ୟ ଆଣ୍ଟାବାଇଓଟିକ ବ୍ୟବହାର କରିବା ଉଚିତ୍  । ସ୍ଥାନୀୟ ଉପଦେଶ ଯଥା – ସହଜ ଲବ୍ଧ ଓ କମ୍ ଟଙ୍କାରେ ମିଳୁଥିବା ଔଷଧ ବିଷୟରେ ଜାଣି ଚିକିତ୍ସା କରାଇବା ଉଚିତ୍  । ଗେନେରିଆ ଓ କ୍ଲାମାଇଡିଆ ଔଷଧ ବ୍ୟବହାର ଦେଖନ୍ତୁ  । ଚିକିତ୍ସା କରିବାର ୨/୩ ଦିନ ପରେ ଯଦି ରୋଗ ଭଲ ନ ହୁଏ ବା ଯନ୍ତ୍ରଣା ନ କମେ ତେବେ ଔଷଧର ପ୍ରତିରୋଧ ଶକ୍ତି ନ ଥାଏ ବା ରୋଗୀକୁ କ୍ଲାମାଇଡିଆ ହୋଇପାରେ   ।
• ଯଦି ଜଣେ ସ୍ତ୍ରୀ ଲୋକର କ୍ଲାମାଇଡିଆ ଓ ଗେନେରିଆ ସହିତ ତଳି ପେଟରେ ଯନ୍ତ୍ରଣା ଓ ଜ୍ଵର ହୁଏ ତେବେ ସେହି ମହିଳାଙ୍କର ବସ୍ତି କୋଟରୀୟ ପ୍ରଦାହ  ହୋଇଥାଇପାରେ  ।
• ଯଦି ଜଣେ ପୁରୁଷ ଗେନେରିଆ ରୋଗ ଦ୍ଵାରା ଆକ୍ରାନ୍ତ ହେବାପରେ ସେ ତାଙ୍କର ସ୍ତ୍ରୀଙ୍କ ସହ ମୌଥୁନ କରିଥାନ୍ତି ତେବେ ତାଙ୍କ ସ୍ତ୍ରୀଙ୍କୁ ମଧ୍ୟ ଚିକିତ୍ସା କରାଯିବା ଉଚିତ୍  । ଏପରିକି ତାଙ୍କ ସ୍ତ୍ରୀଙ୍କୁ ମଧ୍ୟ ଚିକିତ୍ସା କରାଯିବା ଉଚିତ୍  । ଏପରିକି ତାଙ୍କ ସ୍ତ୍ରୀଙ୍କ ଦେହରେ ରୋଗ ଲକ୍ଷଣ ପ୍ରକାଶ ନ ପାଇଲେ ବି ତାଙ୍କ ଦେହରେ ରୋଗ ଜୀବାଣୁ ନିଶ୍ଚିତ ରୂପେ ରହିଥାଏ  । ଏକ ସମୟରେ ଚିକିତ୍ସା ନ କଲେ ସେହି ମହିଳାଙ୍କ ଦେହରୁ ରୋଗ ଜୀବାଣୁ ପୁନଶ୍ଚ ତାଙ୍କ ସ୍ଵାମୀଙ୍କ ଶରୀରକୁ ସଂକ୍ରମିତ ହୋଇଥାଏ   ।
• କ୍ଲାମାଇଡିଆ ଓ ଗେନେରିଆରୁ ନବଜାତ ଶିଶୁଙ୍କର ଆଖିକୁ ରକ୍ଷା କରନ୍ତୁ, ଯାହା ଶିଶୁ ଅନ୍ଧ ହୋଇଯିବାର କାରଣ ଅଟେ ।

ସାବଧାନତା

ଗେନେରିଆ ବା କ୍ଲାମାଇଡିଆ ହୋଇଥିବା ବ୍ୟକ୍ତିର ଅଜାଣତରେ ସିଫିଲିସ୍ ମଧ୍ୟ ହୋଇଥାଏ   । ତେଣୁ ବିଳମ୍ବ ନ କରି ଚିକିତ୍ସିତ ହେବା ଉଚିତ୍  । କାରଣ ଗେନେରିଆ ଓ କ୍ଲାମାଇଡିଆ ରୋଗର  ଚିକିତ୍ସା ଦ୍ଵାରା ସିଫିଲିସ୍ ର ଲକ୍ଷଣ ଦେଖାଯାଇ ନ ଥାଏ   । କିନ୍ତୁ ସିଫିଲିସ୍ ରୋଗ ଭଲ ହୋଇ ନ ଥାଏ   ।

ସିଫିଲିସ୍

ଲକ୍ଷଣ

ଏହା ଗୋଟିଏ ସାଧାରଣ ଓ ମାରାତ୍ମକ ରୋଗ ଅଟେ   । ଯାହା ଯୌନ ସମ୍ପର୍କଦ୍ଵାରା ଜଣକଠାରୁ ଅନ୍ୟ ଜଣକୁ ବ୍ୟାପିଥାଏ   ।

• ପ୍ରଥମେ ସାଧାରଣତଃ ଘା’ ପରି ଲକ୍ଷଣ ଦେଖାଯାଏ   । ଏହାକୁ ସାନକ୍ରି କୁହାଯାଏ  । ସିଫିଲିସ୍ ହୋଇଥିବା ବ୍ୟକ୍ତି ସହିତ ଯୌନ ସମ୍ପର୍କ ରଖିବାର ୨ରୁ ୫ ସପ୍ତାହ ପରେ ରୋଗର  ଲକ୍ଷଣ ଦେଖାଦେଇଥାଏ  । ଏହି ସାନକ୍ରି  ବ୍ରଣ, ଫୋଟକା ବା ଘା’ ପରି ଦେଖାଯାଏ  । ଏହା ବିଶେଷ କରି ପୁରୁଷ ବା ସ୍ତ୍ରୀ ଲୋକଙ୍କର ଜନନାଙ୍ଗରେ ଦେଖାଯାଏ   । (କ୍ଵଚିତ ଥୋଡି, ଆଙ୍ଗୁଳି, ମଳଦ୍ଵାର ଓ ପାଟିରେ ଦେଖାଯାଏ) । ଏହି ଘା’ ଜୀବାଣୁରେ ଭରପୁର ଥାଏ, ଯାହା ଅତି ସହଜରେ ଜଣକଠାରୁ ଅନ୍ୟଜଣକୁ ବ୍ୟାପିଥାଏ   । ଏହି ଘା’ ଦ୍ଵାରା ଯନ୍ତ୍ରଣା ହୁଏ ନାହିଁ  । ଯଦି ଏହି ଘା’ ଜଣେ ସ୍ତ୍ରୀ ଲୋକର ଯୋନି ଭିତରେ ହୋଇଥାଏ  ସେ ଜାଣିପାରେ ନାହିଁ କିନ୍ତୁ ରୋଗ ଅନ୍ୟକୁ ବାଣ୍ଟିଥାଏ   ।
• ଘା’ ଅଳ୍ପ ଦିନ ମଧ୍ୟରେ ଚିକିତ୍ସା ବିନା ଭଲ ହୋଇଯାଏ  କିନ୍ତୁ ରୋଗ ଧୀରେ ଧୀରେ ଶରୀରରେ ବଢିଚାଲେ   ।
• ସପ୍ତାହ ବା ମାସକ ପରେ ତଣ୍ଟିରେ ଘା’ ସାମାନ୍ୟ ଜ୍ଵର, ପାଟିରେ ଘା’ ଓ ଗଣ୍ଠି ଫୁଲିଯାଏ, କିମ୍ବା ଚର୍ମରେ ଏହି ସବୁ ଲକ୍ଷଣ ଦେଖାଯାଏ  ।

ଯଦିଓ ଏହି ସବୁ ଲକ୍ଷଣଗୁଡିକ ଧୀରେ ଧୀରେ ଚାଲିଯାଏ କିନ୍ତୁ ଉପଯୁକ୍ତ ଚିକିତ୍ସା ବିନା ରୋଗ ଶରୀରର ଯେ କୌଣସି ଅଙ୍ଗକୁ ବ୍ୟାପିଯାଏ ଓ ହୃଦରୋଗ, ପକ୍ଷାଘାତ ରୋଗ, ଉନ୍ମାଦରୋଗ ଭଳି କୀକ ମାରାତ୍ମକ ରୋଗର କାରଣ ହୁଏ   ।

ସାବଧାନତା

ଜନନାଙ୍ଗରେ ଯଦି ବ୍ରଣ ବା ଘା’ ଦେଖାଯାଏ, ତାହାହେଲେ ତାହା ସିଫିଲିସ୍ ହୋଇପାରେ   । ଏଥିପାଇଁ ଘରୋଇ ଚିକିତ୍ସା କରନ୍ତୁ ନାହିଁ, ବା ସ୍ଥାନୀୟ ଔଷଧ ବା ଅନଭିଜ୍ଞ ଆରୋଗ୍ୟକାରୀଙ୍କ ପାଖରେ ଚିକିତ୍ସିତ ହୁଅନ୍ତୁ ନାହିଁ  । ଏହି ଔଷଧ ଗୁଡିକ ଭଲ ନୁହେଁ   । ସିଫିଲିସ୍ ର ଲକ୍ଷଣଗୁଡିକ ବେଳେବେଳେ ଆପେ ଆପେ ଚାଲିଯାଏ, ମାତ୍ର ଜୀବାଣୁ ମରନ୍ତି ନାହିଁ  । ଠିକ୍ ଚିକିତ୍ସା ବିନା ପୁଣିଥରେ ରୋଗ ହୋଇଥାଏ   । ଡାକ୍ତରୀ ସାହାଯ୍ୟ  ନିଅନ୍ତୁ   ।

ସିଫିଲିସ୍ ର  ଚିକିତ୍ସା

ସିଫିଲିସ୍ ର  ଚିକିତ୍ସା (ଭଲହେବା ପାଇଁ ସମ୍ପୂର୍ଣ୍ଣ ଚିକିତ୍ସା ଆବଶ୍ୟକ)

• ଯଦି ଲକ୍ଷଣଗୁଡିକ ଏକ ବର୍ଷ ମଧ୍ୟରେ ଦେଖାଦେଇଥାଏ, ତାହାହେଲେ ଥରେ ବେଞ୍ଜାଥାଇନ ପେନିସିଲିନ୍ ଇଞ୍ଜେକ୍ସନର ୨.୪ ମିଲିଅନ୍  ୟୁନିଟ ତୁରନ୍ତ ନିଅନ୍ତୁ  । ଏହି ଇଞ୍ଜେକ୍ସନର  ଅଧା ଅଧା ମାତ୍ରା ଉଭୟ ପିଚାରେ ନିଅନ୍ତୁ  । ଯେଉଁମାନଙ୍କର ପେନିସିଲିନ୍ ପ୍ରତି ଆଲାର୍ଜି ଥାଏ, ଟେଟ୍ରାସାଇକ୍ଲିନ ୫୦୦ ମି.ଗ୍ରା. ଦିନକୁ ୪ ଥର ୧୫ ଦିନ ନେବା ଆବଶ୍ୟକ  ।
• ଯଦି ଲକ୍ଷଣ ଗୁଡିକ ବର୍ଷେରୁ ଉପରେ ମଧ୍ୟ ଦେଖାଯାଏ  ତେବେ ବେଞ୍ଜାଥାଇନ ପେନିସିଲିନ୍ ୨.୪ ମିଲିଅନ ୟୁନିଟ୍  ଉଭୟ ପିଚାରେ ସପ୍ତାହକୁ ଥରେ, ତିନି ସପ୍ତାହ ନିଅନ୍ତୁ   । ପେନିସିଲିନ୍ ପ୍ରତି ଆଲାର୍ଜି  ଥିଲେ ଟେଟ୍ରାସାଇକ୍ଲିନ ୫୦୦ ମି.ଗ୍ରା. ଦିନକୁ ୪ ଥର ୩୦ ଦିନ ଖାଆନ୍ତୁ   ।
• ଯଦି କୌଣସି ବ୍ୟକ୍ତିର ବ୍ୟକ୍ତିର ସିଫିଲିସ୍ ଥାଏ, ସେ ତୁରନ୍ତ ସ୍ୱାସ୍ଥ୍ୟକର୍ମୀଙ୍କ ସହିତ ପରାମର୍ଶ କରିବା ଉଚିତ୍  । ସିଫିଲିସ୍  ପାଇଁ ରକ୍ତ ପରୀକ୍ଷା ଆବଶ୍ୟକ ହୁଏ   । ଯଦି ରକ୍ତ ପରୀକ୍ଷା କରାଇପାରୁ ନାହାନ୍ତି ତେବେ ତୁରନ୍ତ ଚିକିତ୍ସା ବନ୍ଦୋବସ୍ତ କରିବା ଉଚିତ୍  ।
• ସିଫିଲିସ୍ ରେ ଆକ୍ରାନ୍ତ ବ୍ୟକ୍ତି ସହିତ ଯୌନ ସମ୍ପର୍କ ରଖୁଥିବା ବ୍ୟକ୍ତି ନିଜର ଦେହ ପରୀକ୍ଷା କରାଇନେବା ଉଚିତ୍  । ବିଶେଷ କରି ସ୍ଵାମୀ ଓ ସ୍ତ୍ରୀ   ।

ମନ୍ତବ୍ୟ

ଗର୍ଭବତୀ ମହିଳା ବା ସ୍ତନ୍ୟପାନ କରାଉଥିବା ମହିଳାଙ୍କର ଯଦି ପେନିସିଲିନ୍ ପ୍ରତି ଆଲର୍ଜି ଥାଏ ତେବେ ସେ ଟେଟ୍ରାସାଇକ୍ଲିନ ମାତ୍ରା ଭଳି  ଏରିଥ୍ରୋମାଇସିନ୍ ନେଇପାରିବେ  । ରୋଗର ଲକ୍ଷଣ ଦେଖା ନ ଯିବାର ୨ବର୍ଷ ପର୍ଯ୍ୟନ୍ତ ନିୟମିତ ସ୍ୱାସ୍ଥ୍ୟ ପରୀକ୍ଷା କରାଇବା ଉଚିତ୍  ।

ଆଧାର – ଓଡିଶା ଭଲ୍ୟୁଣ୍ଟାରୀ ହେଲଥ  ଆସୋସିଏସନ