অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ପରିଚ୍ଛନ୍ନତା ପାଇଁ ସାଧାରଣ ନିୟମାବଳୀ

ବ୍ୟକ୍ତିଗତ  ପରିଚ୍ଛନ୍ନତା  (ସ୍ୱାସ୍ଥ୍ୟରକ୍ଷା)

  1. ସକାଳେ  ଉଠିବା  ସମୟରେ,  ଝାଡା  ଯିବାପରେ,  ଖାଇବା  ପୂର୍ବରୁ  ଓ  ଖାଦ୍ୟ  ପ୍ରସ୍ତୁତ  କରିବା  ପୂର୍ବରୁ  ସାବୁନରେ  ହାତ  ଧୁଅନ୍ତୁ  । ହାତ  ଧୋଇବା  ପାଇଁ  କାଦୁଅ ବା  ମାଟି  ବ୍ୟବହାର  କରନ୍ତୁ  ନାହିଁ  ।
  2. ପାଗ  ଗରମ  ଥିବା  ସମୟରେ  ବାରମ୍ବାର  ଗାଧାନ୍ତୁ   । କଠିନ  ପରିଶ୍ରମ  କରିବା  ପରେ  ବା  ଝାଳ  ବାହାରିବା  ପରେ  ଗାଧାନ୍ତୁ   । ବାରମ୍ବାର  ଗାଧୋଇଲେ  କୁଣ୍ଡିଆ, ମୁଣ୍ଡର ରୂପି,  କ୍ଷୁଦ୍ରବ୍ରଣ  ଓ  କୁଣ୍ଡିଆ  ଇତ୍ୟାଦି  ଚର୍ମରୋଗ  ହୋଇ  ନ  ଥାଏ   । ରୋଗାକ୍ରାନ୍ତ  ବ୍ୟକ୍ତି,  ପିଲା  ହୋଇଥିଲେ  ମଧ୍ୟ  ପ୍ରତିଦିନ  ଗାଧୋଇବା  ଉଚିତ୍  ।
  3. ଯେଉଁ  ଅଞ୍ଚଳରେ  ଅଙ୍କୁଶ  କୃମି  ଖୁବ୍ ସାଧାରଣ,  ସେଠାରେ  ଖାଲି  ପାଦରେ  ଚାଳନ୍ତୁ  ନାହିଁ  ଓ  ପିଲାଙ୍କୁ  ମଧ୍ୟ  ଚାଲିବାକୁ  ଛାଡନ୍ତୁ  ନାହିଁ  ନାହିଁ  କାରଣ  ଅଙ୍କୁଶ  କୃମିମାନେ  ପାଦବାଟେ  ଶରୀର  ମଧ୍ୟକୁ  ପ୍ରବେଶ  କରିଥାନ୍ତି   । ଅଙ୍କୁଶ  କୃମି  ସଂକ୍ରମଣରୁ  ରକ୍ତହୀନତା  ସାଘାଂତିକ  ରୂପ  ଧାରଣ  କରିଥାଏ   ।
  4. ପ୍ରତିଦିନ  ସକାଳେ  ଓ  ମିଠା  ଖାଇଲା  ପରେ  ଦାନ୍ତ  ଘଷନ୍ତୁ  । ଦାନ୍ତ  ଘଷିବା  ବ୍ରଶ୍  ବା  ପେଷ୍ଟ  ନ ଥିଲେ  ଲୁଣ,  ଖାଇବା  ସୋଢାରେ  ଘଷନ୍ତୁ  ।

ଗୃହର  ପରିଚ୍ଛନ୍ନତା

  1. ଘର  ଭିତରକୁ  ବା  ପିଲାମାନେ  ଖେଳୁଥିବା  ଜାଗାକୁ  ଘୁଷୁରୀକୁ  ପଶିବାକୁ  ଦିଅନ୍ତୁ  ନାହିଁ   ।
  2. କୁକୁରକୁ  ପିଲାକୁ  ଚାଟିବା  ବା  ବିଛଣାରେ  ଚଢିବାପାଇଁ  ଦିଅନ୍ତୁ   ନାହିଁ  । କୁକୁର  ମଧ୍ୟ  ରୋଗ  ସଂକ୍ରମଣରେ  ସାହାଯ୍ୟ  କରିଥାଏ   ।
  3. ଘର  ପାଖରେ  ପିଲା  କିମ୍ବା  ପଶୁ  ଝାଡା  ଫେରିଲେ  ତାକୁ  ତୁରନ୍ତ  ସଫା  କରି  ଦିଅନ୍ତୁ   । ପାଇଖାନା  ବ୍ୟବହାର  ବା  ଘରଠାରୁ  ଦୂରରେ  ଝାଡାଯିବା  ପାଇଁ  ସେମାନଙ୍କୁ  ଶିଖାନ୍ତୁ   ।
  4. ଲୁଗାପଟା, ବିଛଣା  ଚାଦର  ଓ  କମ୍ବଳ  ଇତ୍ୟାଦିକୁ  ଖରାରେ  ଶୁଖାନ୍ତୁ   । ଖଟରେ  ଓଡଶ  ଥିଲେ  ଗରମ  ପାଣି  ଢାଳନ୍ତୁ  ଓ  ଲୁଗାପଟା  ଓ  କମ୍ବଳ  ଇତ୍ୟାଦି  ସେହିଦିନ  ଗରମପାଣିରେ  ସଫା  କରନ୍ତୁ   ।
  5. ସାରା  ପରିବାରକୁ  ଉକୁଣୀମୁକ୍ତ  କରନ୍ତୁ   । ଉକୁଣୀ  ଓ  କୁକୁର  ମାଛି  ଅନେକ  ରୋଗର  ବାହକ  ଅଟନ୍ତି   । କୁକୁର  କିମ୍ବା  ଅନ୍ୟାନ୍ୟ  ପଶୁ  ଯାହା  ଦେହରେ  କୁକୁର  ମାଛି  ଥାଏ,  ତାକୁ  ଘରେ  ପଶିବାକୁ  ଦିଅନ୍ତୁ  ନାହିଁ   ।
  6. ଚଟାଣରେ  କେବେବି  ଛେପ  ପକାନ୍ତୁ  ନାହିଁ   । ଛେପ  ଦ୍ଵାରା  ମଧ୍ୟ  ରୋଗ  ବ୍ୟାପିଯାଇପାରେ,  କାଶିବା  କିମ୍ବା  ଛିଙ୍କିବାବେଳେ  ମୁହଁକୁ  ହାତ  କିମ୍ବା  ଲୁଗା  ବା  ରୁମାଲରେ  ଘୋଡାଇ  ରଖନ୍ତୁ   ।
  7. ଘର  ସବୁବେଳେ  ପରିଷ୍କାର  କରନ୍ତୁ  । ଚଟାଣ,  କାନ୍ଥ  ଓ  ଆସବାପତ୍ର  ଇତ୍ୟାଦି  ସଫା  କରନ୍ତୁ  । ଚଟାଣ  ଓ  କାନ୍ଥରେ  ଥିବା  କଣାରେ  ଓଡଶ,  ବିଛା  ଇତ୍ୟାଦି  ଲୁଚି  ରହିପାରନ୍ତି,  ତେଣୁ  ସେଗୁଡିକୁ  ବନ୍ଦ  କରନ୍ତୁ  ।
  8. ମାଟି  ଘରକୁ  ନିୟମିତ ଓଦା  ଓ ଚିକ୍କଣ  ମାଟିରେ  ଲିପନ୍ତୁ  । ଏହାଦ୍ଵାରା  ପୋକ  ମାଛିଙ୍କଠାରୁ  ରକ୍ଷା  ପାଇପାରିବେ ।

ଖାଇବା  ଓ  ପିଇବାରେ  ପରିଚ୍ଛନ୍ନତା

  1. ପାଣିକୁ  ପିଇବା  ପୂର୍ବରୁ  ଫୁଟାଇବା  ସବୁଠାରୁ  ଭଲ   । ବିଶେଷତଃ  ଛୋଟ  ପିଲାଙ୍କ  କ୍ଷେତ୍ରରେ  ଓ  ଆମାଶୟ,  ଟାଇଫଏଡ,  ହେପାଟାଇଟସ୍   ବା  ହଇଜା  ହେଉଥିବା  ସମୟରେ  ଏହା  ଖୁବ୍ ମହତ୍ତ୍ଵପୂର୍ଣ୍ଣ   । ଯଦି  ପିଇବା  ପୂର୍ବରୁ  ଫୁଟା  ଯାଇ  ନ ଥାଏ  ତେବେ  ପରିଷ୍କାର  ଦେଖାଯାଉଥିବା  ନଦୀ,  ନାଳର  ପାଣି  ମଧ୍ୟ  ରୋଗ  ବଢାଇପାରେ   ।

ଗରମ  ପାଣିକୁ ଢାଙ୍କୁଣୀ  ଥିବା  ମାଟି  ପାତ୍ରରେ  ରଖନ୍ତୁ

  1. ମାଛି  କିମ୍ବା  ଅନ୍ୟାନ୍ୟ  ପୋକକୁ  ଖାଦ୍ୟ  ଉପରେ  ବସିବାକୁ  ଦିଅନ୍ତୁ ନାହିଁ  ଏଗୁଡିକ  ରୋଗର  ବାହକ  ଅଟନ୍ତି   । ଅଇଁଠା  ଖାଦ୍ୟ  ବା  ବାସନ  ଛାଡନ୍ତୁ  ନାହିଁ  କାରଣ  ଏହା  ମାଛିକୁ  ଆକର୍ଷଣ  କରିଥାଏ  ଓ  ଜୀବାଣୁ  ବଢାଇବାରେ  ସାହାଯ୍ୟ  କରେ   । ଖାଦ୍ୟକୁ  ଢାଙ୍କି  ଜାଲି  ମଧ୍ୟରେ  ରଖନ୍ତୁ   ।

ସବୁବେଳେ  ଘୋଡାହୋଇ  ରଖାଯାଇଥିବା  ଖାଦ୍ୟ  ଖାଆନ୍ତୁ

  1. ଘୋଡାହୋଇ  ରକ୍ଷା  ଯାଇ  ନ ଥିବା  ଖାଦ୍ୟ  ଖାଆନ୍ତୁ  ନାହିଁ   । ବାହାରେ  ବିକ୍ରି  ହେଉଥିବା  ମିଠାଇ, ଜିଲାପି  ଓ  କଟାଫଳ  ସବୁ  ବିନାଢାଙ୍କୁଣୀରେ  ରକ୍ଷା  ଯାଇଥାଏ   । ସେଥିରେ  ମାଛି  ବସିଥିବାର  ମଧ୍ୟ  ଲକ୍ଷ୍ୟ  କରାଯାଇପାରିବ   । ଏମାନେ  ଖାଦ୍ୟକୁ  ଦୂଷିତ  କରି  ଦିଅନ୍ତି  । ଏହି  ସବୁ  ଖାଦ୍ୟ  ଖାଇଲେ  ଆମାଶୟ  ହୋଇପାରେ   । ହଇଜା  ଓ  ଟାଇଫଏଡ  ମଧ୍ୟ  ଏହି  ଉପାୟରେ  ବ୍ୟାପେ   ।
  2. ଚାଷ  କାମରେ  କିମ୍ବା  ବାଡିବଗିଚାରେ  ସବୁବେଳେ  ପରିଷ୍କାର  ଜଳ  ବ୍ୟବହାର  କରାଯାଇପାରେ  ନାହିଁ   । ଆମାଶୟ  ରୋଗ  ଜୀବାଣୁ  ସେ  ପାଣିରେ  ଥାଏ  । ଫଳ  ଓ  ପନିପରିବା, ବିଶେଷତଃ  ମୂଳା, ସାଲଗମ୍, ଗାଜର ଆଦି  ପାରିବା  ଯାହାକି  ମାଟିତଳେ  ବଢିଥାଏ, ଏହି  ପାଣିରେ  ରହିବା  ଫଳରେ  ଜୀବାଣୁମାନେ  ସେ  ସବୁଥିରେ  ରହିଥାନ୍ତି  । ଖାଇବା  ପୂର୍ବରୁ ସବୁବେଳେ  ପାରିବା  ଓ  ଫଳମୂଳକୁ  ପରିଷ୍କାର  କରନ୍ତୁ  ।
  3. ତଳେ  ପଡିଥିବା  ଫଳ  ଖାଇବା  ପୂର୍ବରୁ  ଭଲଭାବରେ  ଧୁଅନ୍ତୁ   । ତଳେ  ପଡିଥିବା  ଖାଦ୍ୟକୁ  ଉଠାଇ  ପିଲାକୁ  ଦିଅନ୍ତୁ  ନାହିଁ  । ପ୍ରଥମେ  ଏହାକୁ  ଧୁଅନ୍ତୁ   ।
  4. ଭଲଭାବରେ  ସିଝା  ହୋଇଥିବା  ମାଂସକୁ  ଖାଆନ୍ତୁ   । ଭଜା  ମାଂସ  (ବିଶେଷତଃ  ଘୁଷୁରୀ  ମାଂସ) ଭିତରେ  ଯେପରି  କଞ୍ଚାମାଂସ  ରହି  ନ ଥାଏ,  ସେଥିପ୍ରତି  ଦୃଷ୍ଟି  ଦିଅନ୍ତୁ  କଞ୍ଚା  ଘୁଷୁରୀ  ମାଂସ  ବିପଦଜନକ  ରୋଗ  ଆଣିପାରେ   ।
  5. ବାସି ବା  ପୁରୁଣା  ଓ  ଗନ୍ଧ  ହେଉଥିବା  ଖାଦ୍ୟ  ଖାଆନ୍ତୁ  ନାହିଁ  । ଏହା  ବିଷାକ୍ତ  ହୋଇପାରେ, ଯଦି  ଡିବା  ଚେପା  କିମ୍ବା  ଫୁଲିଥାଏ,  ସେଥିରେ  ଥିବା  ଖାଦ୍ୟ  ଖାଆନ୍ତୁ  ନାହିଁ   । ବିଶେଷତଃ  ଡବା – ମାଛ  ପ୍ରତି  ସାବଧାନ  ରୁହନ୍ତୁ  ।

ନିଜ  ପିଲାର  ସ୍ୱାସ୍ଥ୍ୟ  କିପରି  ରକ୍ଷା  କରିବେ  :

  1. ଅସୁସ୍ଥ ପିଲା  ସୁସ୍ଥ  ପିଲାଙ୍କ  ଠାରୁ  ଅଲଗା  ଶୋଇବା  ଉଚିତ୍  ।

ଅସୁସ୍ଥ  ପିଲା  କିମ୍ବା  କାଛୁ, କୁଣ୍ଡିଆ  ବା ଉକୁଣୀ  ହୋଇଥିବା  ପିଲାମାନେ  ସବୁବେଳେ  ସୁସ୍ଥ  ଲୋକଙ୍କଠାରୁ  ଅଲଗା  ଶୋଇବା  ଦରକାର   । ହୁପିଙ୍ଗ କାଶ,  ଶର୍ଦ୍ଦିଜ୍ଵର  ଓ  ମିଳିମିଳା  ପରି  ସଂକ୍ରାମକ  ରୋଗ  ହୋଇଥିବା  ପିଲାମାନଙ୍କୁ  ଅଲଗା  ଘରେ  ଶୋଇବାକୁ  ଦିଅନ୍ତୁ  ଓ  ସେମାନଙ୍କୁ  ଛୋଟ  ପିଲାଙ୍କୁ  ପାଖକୁ  ଯିବାକୁ  ଦେବା  ଉଚିତ୍  ନୁହେଁ   ।

  1. ପିଲାମାନଙ୍କୁ  ଟି.ବି.ରୁ  ରକ୍ଷା  କରନ୍ତୁ   । ବହୁଦିନ  ଧରି  କାଶ  ଲାଗି  ରହିବା  କିମ୍ବା  ଟି.ବି.ର  ଅନ୍ୟାନ୍ୟ  ଲକ୍ଷଣ  ଥିଲେ  କାଶିବା  ସମୟରେ  ମୁହଁ  ଢାଙ୍କିବା  ଦରକାର   । ସେମାନେ  ପିଲାଙ୍କ  ସହିତ  କଦାପି  ଗୋଟିଏ  ଘରେ  ଶୋଇବା  ଉଚିତ୍ ନୁହେଁ   । ସ୍ୱାସ୍ଥ୍ୟକର୍ମୀଙ୍କୁ  ଦେଖାଇ  ଯେତେ  ଶୀଘ୍ର  ସମ୍ଭବ  ଚିକିତ୍ସା  କରାଇନେବା  ଉଚିତ୍  ।

ଟି.ବି. ହୋଇଥିବା  ବ୍ୟକ୍ତିଙ୍କ  ସହ  ରହୁଥିବା  ପିଲା  ଟି.ବି. ପ୍ରତିରୋଧକ  ନେବା  ଉଚିତ୍  ।

  1. ପିଲାମାନଙ୍କୁ  ସବୁବେଳେ  ଗାଧୋଇ  ଦିଅନ୍ତୁ,  ତାଙ୍କର  ଲୁଗା  ବଦଳାନ୍ତୁ ଓ  ନଖ  କାଟି  ଦିଅନ୍ତୁ  । ଲମ୍ବା  ନଖ  ତଳେ  ଜୀବାଣୁ  ଓ  କୃମି  ଡିମ୍ବ  ରହିଥାଇ  ପାରନ୍ତି   ।
  2. ସଂକ୍ରାମକ  ରୋଗଦ୍ଵାରା  ପୀଡିତ  ପିଲାଙ୍କୁ  ଯେତେଶୀଘ୍ର  ସମ୍ଭବ  ଚିକିତ୍ସା  କରନ୍ତୁ  ଯାହାଦ୍ଵାରା  ରୋଗ  ଅନ୍ୟକୁ  ବ୍ୟାପି  ପାରିବ  ନାହିଁ   ।
  3. ଏହି  ଅଧ୍ୟାୟରେ  ବର୍ଣ୍ଣନା  କରାଯାଇଥିବା  ପରିଚ୍ଛନ୍ନତା  ସମ୍ବନ୍ଧୀୟ  ଉପଦେଶାବଳୀ  ପାଳନ  କରନ୍ତୁ   । ପିଲାମାନଙ୍କୁ  ଏହି  ଉପଦେଶ  ଗୁଡିକ  ପାଳନ  କରିବା  ପାଇଁ  ଶିକ୍ଷା  ଦିଅନ୍ତୁ   ।

ଏବଂ  ଏଗୁଡିକ  ମହତ୍ତ୍ଵପୂର୍ଣ୍ଣ  ବୋଲି  ସେମାନଙ୍କୁ  ବୁଝାଇ  ଦିଅନ୍ତୁ   । ଗୃହ  ଓ  ଗାଁକୁ  ସ୍ୱାସ୍ଥ୍ୟକର  କରିବାରେ  ପିଲାମାନଙ୍କୁ  ପ୍ରୋତ୍ସାହିତ  କରନ୍ତୁ   ।

  1. ପିଲାମାନଙ୍କୁ  ଯଥେଷ୍ଟ  ପରିମାଣର  ଭଲ  ଖାଦ୍ୟ  ଦିଅନ୍ତୁ   । ଉତ୍ତମ  ପୁଷ୍ଟିସାଧନ  ଅନେକ ରୋଗର  ସଂକ୍ରମଣରୁ  ଶରୀରକୁ  ରକ୍ଷା  କରିଥାଏ   । ଯେଉଁ  ସଂକ୍ରାମକ  ରୋଗ  ଗୋଟିଏ  ପୁଷ୍ଟିହୀନ  ପିଲାର  ଜୀବନ  ନେଇପାରେ,  ଜଣେ  ସ୍ୱାସ୍ଥ୍ୟବାନ  ପିଲା  ସେ  ରୋଗ  ସହିତ  ସହଜରେ  ଲଢିପାରେ  ବା  ପ୍ରତିରୋଧ  କରିପାରେ  ।

ସାର୍ବଜନୀନ  ପରିଚ୍ଛନ୍ନତା

  1. କୂଅ ଓ  ସର୍ବସାଧାରଣ  ବ୍ୟବହାର  କରୁଥିବା  ପୋଖରୀ  ସଫା  ରଖନ୍ତୁ   । ପିଇବା  ପାଣି  ପାଇଁ  ବ୍ୟବହୃତ  ହେଉଥିବା  ସ୍ଥାନକୁ  ପଶୁମାନଙ୍କୁ   ଛାଡନ୍ତୁ  ନାହିଁ   । ଯଦି  ଦରକାର  ହୁଏ,  ଚାରିପଟେ  ବାଡ  କରି  ପଶୁମାନଙ୍କୁ  ଦୂରେଇ  ରଖନ୍ତୁ   ।

କୂଅ, ପୋଖରୀ  ନିକଟରେ   ଝାଡା  ବସନ୍ତୁ  ନାହିଁ  ବା  ମଇଳା  ପକାନ୍ତୁ  ନାହିଁ  । ନଦୀ, ନାଳ  ଯେଉଁଠାରୁ  ପିଇବା  ପାଣି  ନିଆଯାଏ  ସେ  ସ୍ଥାନ  ପରିଷ୍କାର  କରିବାପାଇଁ  ଯତ୍ନଶୀଳ  ରୁହନ୍ତୁ   ।

  1. ପୋଡା  ଯାଇପାରୁଥିବା  ସମସ୍ତ  ମଇଳା  ପୋଡି  ଦିଅନ୍ତୁ   । ଯାହା  ପୋଡି  ହେବ  ନାହିଁ,  ତାକୁ  ଘରଠାରୁ  ଓ  ପିଇବା  ପାଣି  ନେଉଥିବା  ଜାଗାରୁ  ଏକ  ସ୍ଵତନ୍ତ୍ର  ଗାତ  ପୋତି  ଦିଅନ୍ତୁ   ।
  2. ପାଇଖାନା  ତିଆରି  କରନ୍ତୁ  ଯାହାଦ୍ଵାରା  ଘୁଷୁରୀ  ଓ  ଅନ୍ୟାନ୍ୟ  ପଶୁ  ମନୁଷ୍ୟ  ମଳ  ନିକଟରେ  ପହଞ୍ଚି  ପାରିବ  ନାହିଁ   । ଗଭୀର  ଗାତଟିଏ   ଖୋଳି  ତା  ଉପରେ  ଛୋଟିଆ  ଘରଟିଏ  ତିଆରି  କରିଦେଲେ  ତାହା  ଖୁବ୍  ଭଲ  କାମଦିଏ   ।

ଏଠାରେ  ଖୁବ୍  ସହଜରେ  ତିଆରି  କରାଯାଇ  ପାରୁଥିବା  ଏକ  ପାଇଖାନାର  ଚିତ୍ର  ଦିଆଯାଇଛି

ମାଛି  ତଥା  ଗନ୍ଧରୁ  ରକ୍ଷାପାଇବା  ପାଇଁ  ପ୍ରତିଥର  ବ୍ୟବହାର  ପରେ  କିଛି  ପାଉଁଶ,  ଧୂଳି, ଓ  ଚୂନ  ଢାଳି  ଦିଅନ୍ତୁ   ।

ଘର  ତଥା  ପାଣି  ଅଣାଯାଉଥିବା  ଜାଗାଠାରୁ  ଅତି  କମ୍ ରେ  ୨୦ମିଟର  ଦୂରରେ  ଏହା  ତିଆରି  ହେବା  ଉଚିତ୍  ।

ଯଦି  ଆପଣଙ୍କର  ପାଇଖାନା  ନାହିଁ,  ତେବେ  ଲୋକେ  ଗାଧୋଉଥିବା  ତଥା  ପିଇବା  ପାଣି  ନିଆଯାଉଥିବା  ଜାଗାରୁ  ବହୁ  ଦୂରରେ  ଝାଡା  ବସନ୍ତୁ   । ଆପଣଙ୍କ  ପିଲାକୁ  ମଧ୍ୟ  ଏହା  ଶିକ୍ଷା  ଦିଅନ୍ତୁ   ।

ପାଇଖାନା  ବ୍ୟବହାର  ବହୁତ  ରୋଗ  ନିବାରଣ  କରିଥାଏ   ।

ଉତ୍ତମ  ପାଇଖାନା

ଏହି  ପାଇଖାନା  ତିଆରି  ଅତି  ସହଜ  ଓ  ଅଳ୍ପ  ବ୍ୟୟସାପେକ୍ଷ  । ମାତ୍ର  ଏହା  ଉପର  ଖୋଲା  ଥିବାରୁ  ଝାଡା  ଉପରେ  ମାଛି  ବସିପାରନ୍ତି   ।

ବନ୍ଦ  ପାଇଖାନା  ଅଧିକ  ଭଲ  କାରଣ  ଏଥିରେ  ଗନ୍ଧ  ବାହାରକୁ  ଆସେ  ନାହିଁ  କିମ୍ବା  ମାଛି   ଭିତରକୁ   ପଶିପାରେ  ନାହିଁ   । ବନ୍ଦ  ପାଇଖାନାରେ  ଗୋଟିଏ  ଚଉତରା   କିମ୍ବା  ମଝିରେ  କଣା  ଓ  ଉପରେ  ଢାଙ୍କୁଣୀ  ଥିବା  ଗୋଟିଏ  ଫଳକ ଥାଏ   । ଏହି  ଫଳକଟି  ସିମେଣ୍ଟ  କିମ୍ବା  କାଠରେ  ତିଆରି  ହୋଇଥାଏ  ସିମେଣ୍ଟରେ   ତିଆରି  ହୋଇଥିଲେ   ଅଧିକ  ଭଲ  କାରଣ  ଏହା   ଭଲ  ଭବାରେ  ବସିଯାଏ  ଓ  ନଷ୍ଟ  ହୋଇଯାଏ  ନାହିଁ  ।

ସିମେଣ୍ଟର  ଫଳକ  ତିଆରି  କରିବାର  ଗୋଟିଏ  ଉପାୟ :

  1. ୧ ମିଟର  ଲମ୍ବା, ୧ ମିଟର  ଚଉଡା  ଓ  ୭ ସେ.ମି.  ଗଭୀରର  ଗୋଟିଏ  ଗାତ  ଖୋଳନ୍ତୁ   । ଗାତର  ତଳ  ସମତଳ  ଓ  ମସୃଣ  ହୋଇଥିବା  ଦରକାରୀ   ।
  2. ୧ ମିଟରରେ  ୧ ମିଟରର  ଗୋଟିଏ  ତାର  ଜାଲି  କାଟନ୍ତୁ  ବା  ତିଆରି  କରନ୍ତୁ   ।  ତାର  ୧/୨ ରୁ  ୧/୪ ସେ.ମି. ମୋଟା  ହୋଇଥିବ ଓ  ପ୍ରାୟ  ୧୦ ସେ.ମି. ଦୂରତାରେ  ତାରକୁ   ଯୋଡି  ଜାଲି  ତିଆରି  କରନ୍ତୁ,  ଜାଲିର  ମଝି  ଅଂଶରେ  ୨୫ ସେ.ମି.  ଗୋଳେଇ  ବିଶିଷ୍ଟ  ଏକ କଣା  କରନ୍ତୁ   ।
  3. ଗାତ ଉପରେ  ଜାଲିଟି  ପକାଇଦିଅନ୍ତୁ   । ତାରର  ଶେଷ  ଅଂଶ  ବଙ୍କାଇ  ଦିଅନ୍ତୁ  କିମ୍ବା  ପ୍ରତି  କୋଣରେ  ଛୋଟିଆ  ପଥରଟିଏ   ଦିଅନ୍ତୁ  ଯେପରି  କି  ଜାଲିଟି  ୩ ସେ.ମି.  ଉଚ୍ଚରେ  ରହିବ   ।
  4. ଜାଲିର  କଣାରେ  ଗୋଟିଏ  ପୁରୁଣା  ବାଲ୍ଟି  ରଖନ୍ତୁ   ।
  5. ସିମେଣ୍ଟରେ  ଗେଟି, ବାଲି  ଓ  ପାଣି  ମିଶାଇ  ଘାଣ୍ଟନ୍ତୁ   । ୫ ସେ.ମି. ଉଚ୍ଚତା  ହେଲା  ପର୍ଯ୍ୟନ୍ତ ଏହାକୁ  ଢାଳନୁ  । (ଗୋଟିଏ  କଡେଇ  ସିମେଣ୍ଟରେ  ୩ କଡେଇ  ଗେଟି  ଓ ୨ କଡେଇ  ବାଲି  ମିଶାନ୍ତୁ )
  6. ସିମେଣ୍ଟ  ଟାଣ  ହେବାକୁ  ଆରମ୍ଭ  କଲେ  ବାଲ୍ଟି  କାଢି  ଦିଅନ୍ତୁ  । ତା’ ପରେ  ସିମେଣ୍ଟ  ଉପରେ  ଚିରା  ଲୁଗା,  ବାଲି,  ଘାସ  କିମ୍ବା  ଗୋଟିଏ  ପ୍ଲାଷ୍ଟିକ  ଫଳକ  ଦିଅନ୍ତୁ   ଓ  ଏହାକୁ  ଓଦା  ରଖନ୍ତୁ   । ୩ ଦିନ  ପରେ  ସିମେଣ୍ଟ  ଫଳକୁ  କାଢି  ଦିଅନ୍ତୁ   ।

ବନ୍ଦ  ପାଇଖାନା  ତିଆରି  ପାଇଁ  ଭୁଇଁରେ   ଥିବା  ଗୋଲ  ଗାତ  ଉପରେ  ଏକ  ଫଳକ  ଲଗାଯିବ   । ଏକ  ମିଟରରୁ  ଅଳ୍ପ  ଗୋଳେଇ  ଓ  ଏକ  ମିଟରରୁ  ୨ ମିଟର  ଗଭୀର  ଗାତ  ଖୋଳନ୍ତୁ  ।

ପାଇଖାନା  ଘର, କୂଅ, ନଈ, ନାଳ  ବା  ପୋଖରୀଠାରୁ  ୨୦ମି. ଦୂରରେ  ରହିବା  ଉଚିତ୍  । ଯେଉଁଠାରୁ  ଲୋକେ  ପିଇବାକୁ  ପାଣି  ନେଉଛନ୍ତି  ଯଦି  ସେଠାରେ  ପାଇଖାନା  ତିଆରି  କରିବାକୁ  ପଡେ, ତେବେ  ଜଳସ୍ରୋତର  ତଳ  ମୁହାଁଣରେ  କରନ୍ତୁ   ।

ପାଇଖାନା  ପରିଷ୍କାର  ରଖନ୍ତୁ   । ଫଳକକୁ  ବାରମ୍ବାର  ସଫା  କରନ୍ତୁ   । ଏହାକୁ  ମଇଳା  ନ କରିବା  ପାଇଁ  ପିଲାମାନଙ୍କୁ  ଓ  ଅନ୍ୟମାନଙ୍କୁ  ଶିଖାନ୍ତୁ   ।

ପାଇଖାନା  ଗାତ  ପାଇଁ  ଘୋଡଣୀଟିଏ  ନିଶ୍ଚୟ  ଥିବା  ଦରକାର   । କାଠରେ  ଗୋଟିଏ  ସାଧାରଣ  ଘୋଡଣୀ  ତିଆରି  କରାଯାଇପାରିବ   ।

ଝାଡା  ଯିବା  ସମୟରେ  ବସିବାକୁ  ଚାହୁଁଥିଲେ  ଏହିପରି  ଗୋଟିଏ  ସିମେଣ୍ଟର  ଚେୟାର  ତିଆରି  କରିପାରନ୍ତି   ।

ଏଥିପାଇଁ  ଆପଣଙ୍କୁ  ଗୋଟିଏ  ଛାଞ୍ଚ  ତିଆରି  କରିବାକୁ  ହେବ  କିମ୍ବା  ଅଲଗା  ଆକାରର  ଦୁଇଟି  ବାଲ୍ଟି  ନେଇ  ଗୋଟିକ  ଭିତରେ  ଅନ୍ୟଟିକୁ  ରଖିବାକୁ  ହେବ   ।

ଏହି  ଭି.ଆଇ.ପି. ପାଇଖାନା  ତିଆରି  କରିବା  ପାଇଁ  ୨ ମିଟର  ବର୍ଗ  ଆକାରରେ  ୨ଟି  କଣା  ଥାଇ  ଏକ ସ୍ଲାବ  ନିଅନ୍ତୁ    । ଗୋଟିଏ  କଣା  ଉପରେ  ମଶା  ନ ଯାଇପାରିବା  ଜାଲ  ବାୟୁ  ଚଳାଚଳ  ପାଇପରେ  ଲଗାନ୍ତୁ   । ଅନ୍ୟ  କଣାଟିରେ  ଏକ  ବର୍ହିକୋଠରୀ  ତିଆରି  କରନ୍ତୁ   । ଏହି  କଣାକୁ  ଘୋଡାନ୍ତୁ  ନାହିଁ   । ଏହାଦ୍ଵାରା  ଗନ୍ଧ  ଓ  ମଶାମାନଙ୍କଠାରୁ  ରକ୍ଷା  ପାଇପାରିବେ   ।

ଆଧାର – ଓଡିଶା ଭଲ୍ୟୁଣ୍ଟାରୀ ହେଲଥ ଆସୋସିଏସନ

Last Modified : 5/1/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate