ମାନସିକତାରେ ପରିବର୍ତ୍ତନ ଜରୁରୀ

ସମାଜର ଦୃଷ୍ଟିଭଙ୍ଗୀ

ଆଧୁନିକତା ସହ ତାଳ ଦେଇ ସମାଜ ଯେତିକି ଅଗ୍ରସର ହେଉଛି ମହିଳାମାନେ ବି ବିଭିନ୍ନ କ୍ଷେତ୍ରରେ ସେମାନଙ୍କର ଉପସ୍ଥିତିକୁ ସେତେ ଜାହିର କରିପାରୁଛନ୍ତି । ତଥାପି ୟା ମଧ୍ୟରେ ରହିଯାଉଥିବା କିଛି ଅସଙ୍ଗତି ପାଇଁ ଦୈନନ୍ଦିନ ନାନା ବିଭ୍ରାଟ ସୃଷ୍ଟି ହେଉଛି। ତେବେ ନାରୀମାନଙ୍କ ପ୍ରତି ସମାଜର ଦୃଷ୍ଟିଭଙ୍ଗୀ ବଦଳିବା ସହ ମହିଳାମାନେ ସଚେତନ ଓ ଜାଗ୍ରତ ହେବାର ଆବଶ୍ୟକତା ଆସିଛି ବୋଲି ସାଧାରଣରେ ମତପ୍ରକାଶ ପାଇଛି ।

ମହିଳାମାନଙ୍କୁ ସଚେତନ ଓ ଜାଗ୍ରତ ବିଷୟରେ ମତ

1. ଲୋପାମୁଦ୍ରା ବକ୍ସିପାତ୍ର - ସମାଜରେ ପ୍ରତ୍ୟେକ ମଣିଷର ମାନସିକତା ତଥା ଆଭିମୂଖ୍ୟରେ ପରିବର୍ତ୍ତନ ହେବା ଉଚିତ । ସମାଜରେ ପ୍ରତ୍ୟେକ ମଣିଷର ବଞ୍ଚିବାର ଅଧିକାର ଅଛି । ପୁରୁଷ ଓ ମହିଳା ସମସ୍ତେ  ସମାନ । ମହିଳାଙ୍କ ସୁରକ୍ଷା ପ୍ରତି ସଚେତନତାର ଆବଶ୍ୟକତା ରହିଛି । ଏହାଛଡା ମହିଳାମାନେ ଶିକ୍ଷିତ ହେବା ନିତାନ୍ତ ଆବଶ୍ୟକ । ସେମାନଙ୍କ ଆତ୍ମସମ୍ମାନ ରହିବା ଉଚିତ ଏବଂ ମହିଳାମାନେ ସ୍ଵାବଲମ୍ବୀ ହେବା ଦରକାର । ତା’ହେଲେ ମହିଳାମାନେ ସମାଜର ବିକାଶରେ ସାମିଲ ହୋଇପାରିବେ। ସମାଜରେ କ୍ରୂର ମାନସିକତା ଓ ଦୃଷ୍ଟିଭଙ୍ଗୀରେ ପରିବର୍ତ୍ତନ ଅଣାଗଲେ ନାରୀମାନଙ୍କ ପ୍ରତି ହେଉଥିବା ଅତ୍ୟାଚାର କିଛି ମାତ୍ରାରେ କମିଯାଆନ୍ତା ।
2. ଭାରତୀ ଚକ୍ର - ବର୍ତ୍ତମାନ ବିଭିନ୍ନ କ୍ଷେତ୍ରରେ ମହିଳାମାନେ ଆଗକୁ ବଢିଲେଣି । ତେଣୁ ସେମାନଙ୍କ ସୁରକ୍ଷା ଏବେ ଗୋଟେ  ବଡ ପ୍ରଶ୍ନବାଚୀ ହୋଇ ଛିଡା ହୋଇଛି । ତା’ମାନେ ନୁହେଁ ମହିଳା ଆଉ ଆଗକୁ ଆସିବେନି । ତେବେ ସମାଜରେ ଉଭୟ ମହିଳା ଓ ପୁରୁଷ ସଚେତନ ହେବା ଉଚିତ । ଉଭୟ ଉଭୟଙ୍କୁ ସମ୍ମାନ  ଦେବା ଉଚିତ ।  ବର୍ତ୍ତମାନ ମହିଳାମାନେ ସେମାନଙ୍କ ଚିନ୍ତାଧାରାକୁ ବଦଳାଇଲେଣି । ନିଜ ନିଷ୍ପତ୍ତି ନେବାରେ ଭାଗୀଦାର ହେଲେଣି । ତେଣୁ ଏହାକୁ ଦେଖିଲେ ମୁଁ ଭାବେ ଆମେ କିଛି ମାତ୍ରାରେ ସଫଳ ହୋଇଛୁ । ଏହାବାଦ୍ ନାରୀ ସୁରକ୍ଷା ପାଇଁ ପୋଲିସର ସହାୟତା, ବିଭିନ୍ନ ସଚେତନତା କାର୍ଯ୍ୟକ୍ରମର ଆବଶ୍ୟକତା ରହିଛି ।
3. ସ୍ଵପ୍ନା ପାଣି - ପ୍ରତ୍ୟେକ କ୍ଷେତ୍ରରେ ନାରୀ ଅସୁରକ୍ଷିତ ମନେ କରୁଛି । ନାରୀମାନେ ଶିକ୍ଷିତ ହେବା ଜରୁରୀ । ଏହାଛଡା  ସମାଜରେ ସଚେତନତାର  ଆବଶ୍ୟକ ରହିଛି। ତେଣୁ ଯେପର୍ଯ୍ୟନ୍ତ ଲୋକେ ସଚେତନ ହେବେ ନାହିଁ, ସେପର୍ଯ୍ୟନ୍ତ ଏହା ସଫଳ ହୋଇପାରିବ ନାହିଁ ଏବଂ ଏହାର ରୂପରେଖ ବଦଳିବ ନାହିଁ । ମୁଁ ଜଣେ । ମହିଳା। କିନ୍ତୁ ମୋ ଜୀବନରେ କେବେ ସେଭଳି ପରିସ୍ଥିତ ଆସିନାହିଁ । କାରଣ ମୋ ବାପା ଜଣେ ସ୍ଵାଧୀନତା ସଂଗ୍ରାମୀ ଥିଲେ । ସମାଜରେ କ’ଣ ହେବା ଆବଶ୍ୟକ ଓ ଅନାବଶ୍ୟକ ତାହା ମୁଁ ଘରେ ଜାଣିଲି । ଛୋଟବେଳୁ ସେହି ପରିବେଶରେ ବଢିଲି । ତେଣୁ ସମାଜରେ ମହିଳାମାନେ ଯେପରି ଅସୁବିଧାର ସମ୍ମୁଖୀନ ହେଉଛନ୍ତି ମୁଁ ସେଭଳି କିଛି ସମସ୍ୟାର ସମ୍ମୁଖୀନ ହୋଇନାହିଁ ।
4. ଅରୁଣା ମହାନ୍ତି - କଳାକାର ହିସାବରେ ଯଦି କହିବି ତା’ହେଲେ ଆମେ ସୁରକ୍ଷିତ । ସାମାଜିକ ଦୃଷ୍ଟିକୋଣରେ ଦେଖିଲେ  ଆମେ ଅସୁରକ୍ଷିତ। ତେବେ ମହିଳାମାନେ ନିଜକୁ ସୁରକ୍ଷିତ ରଖିବା ପାଇଁ ଜାଗ୍ରତ ହେବା ଆବଶ୍ୟକ । ଏହାଛଡା ସମାଜରେ ସଚେତନତାର ଆବଶ୍ୟକତା ମଧ୍ୟ ରହିଛି ।
5. ଶକୁନ୍ତଳା ବଳିଆର ସିଂ - ନାରୀମାନେ ସୁରକ୍ଷିତ ଅଛନ୍ତି । ତଥାପି କହିବି ପ୍ରତ୍ୟେକ ନାରୀ ଶିକ୍ଷିତ ହେବା ସହିତ ସ୍ଵାବଲମ୍ବୀ  ହେବା ଆବଶ୍ୟକ ।ପରିବାର ଲୋକେ ପୁଅ ଝିଅ ଭିତରେ ଭେଦଭାବ ନ ରଖିବା ଉଚିତ । ଶିକ୍ଷା କ୍ଷେତ୍ରରେ ଝିଅକୁ ଅଧିକ ଗୁରୁତ୍ଵ ଦେବା ଆବଶ୍ୟକ ।
6. ପ୍ରଫେସର ଡାକ୍ତର ଦୀପ୍ତିରଣୀ ସାମନ୍ତ – ପୂର୍ବାପେକ୍ଷା ଝିଅମାନେ ବିଭିନ୍ନ କ୍ଷେତ୍ରରେ ପୁଅମାନଙ୍କ ତୁଳନାରେ ଉତ୍କର୍ଷତା ହାସଲ  କଲେଣି । ତଥାପି ସାମଗ୍ରିକ ଭାବେ ଝିଅମାନେ ଶିକ୍ଷା କ୍ଷେତ୍ରରେ ସେତେଟା ଆଗେଇ ପାରିନାହାନ୍ତି । ଝିଅମାନେ ଭଲଭାବେ ଶିକ୍ଷିତ ହେଲେ ସମାଜରେ ଶିଶୁମୃତ୍ୟୁ ଓ ମାତୃମୃତ୍ୟୁ ହାର ହ୍ରାସ ପାଇବ । ପୁରୁଷମାନଙ୍କଠାରୁ ମହିଳାମାନେ ଟିକେ କମ୍ ଏଭଳି ମନୋଭାବ ତାରତମ୍ୟ ସୃଷ୍ଟି କରିଛି । ପୁରୁଷମାନେ ସହଯୋଗ କଲେ ମହିଳାମାନେ ସୁରକ୍ଷିତ ହେବା ସହ ପ୍ରତି କ୍ଷେତ୍ରରେ ଏକ ସମଭାବାପନ୍ନତା ଆସିପାରନ୍ତା । ଅଧିକାଂଶ କ୍ଷେତ୍ରରେ ଦେଖାଦେଉଥିବା ପାରିବାରିକ ହିଂସାକୁ ରୋକିବା ବେଳ ଉପନୀତ ହୋଇଛି ।
7. ଲଳିତା ଶତପଥୀ - ଲୋକେ ସଚେତନ  ନ ହେଲେ ନାରୀଙ୍କ  ସୁରକ୍ଷା ଅସମ୍ଭବ । ନାରୀମାନେ ପୂର୍ଣ୍ଣ ଶିକ୍ଷିତ ହେଲେ ଯାଇ  ସେମାନେ ସବୁକ୍ଷେତ୍ରରେ  ପାରଙ୍ଗମ ହୋଇପାରିବେ । ପୁସ୍ତକଗତ ଜ୍ଞାନ ହାସଲ କରିଦେଲେ ହେବ ନାହିଁ । ସାମାଜିକ, ଅର୍ଥନୈତିକ ଓ ରାଜନୈତିକ ଆଦି କ୍ଷେତ୍ର ସମ୍ପର୍କରେ ନାରୀମାନଙ୍କ ଯଥେଷ୍ଟ ଜ୍ଞାନ ରହିବା ଦରକାର । ସମାଜର କୁସଂସ୍କାରଗୁଡିକୁ ଦୂରେଇ ପୁରୁଷ ନାରୀଙ୍କୁ ସହଯୋଗ କରିବା ଉଚିତ । ଅନ୍ୟପକ୍ଷରେ କେତେକ କ୍ଷେତ୍ରରେ ନାରୀ ହିଁ  ନାରୀଙ୍କ ଶତ୍ରୁ ପାଲଟୁଛି । ଏଭଳି ମାନସିକତା ବଦଳିଲେ ସମାଜ ସମୃଦ୍ଧ ହୋଇପାରିବ ।
8. ସଂଯୁକ୍ତା ବେହେରା - ମହିଳା ସଶକ୍ତୀକରଣ ପାଇଁ ପ୍ରଥମେ ସେମାନେ ସ୍ୱାବଲମ୍ବୀ ହେବା ଦରକାର । ସେଥିପାଇଁ ଆମ ସଂଗଠନ ପକ୍ଷରୁ ସେମାନଙ୍କୁ ସିଲେଇ, ବଡି, ପାମ୍ପଡ ତିଆରି ଆଦି ଶିକ୍ଷା ଦିଆଯାଇଛି । ସହରଠୁ ଗାଁ ଯାଏ ସମସ୍ତେ ସଚେତନ ହୋଇପାରିଲେ ମହିଳାମାନଙ୍କର ପ୍ରକୃତ ଅଗ୍ରଗତି ହୋଇଛି ବୋଲି ଜଣାଯିବ । ମାତ୍ର ଏଥିପାଇଁ ବିଭିନ୍ନ କ୍ଷେତ୍ରରେ ଆନ୍ତରିକତା ଓ ସହଯୋଗ ଲୋଡା ।
9. ମୀରା ବେଉରା - ସରକାର ଯେତେ ବି ଯୋଜନା କରୁଛନ୍ତି ଫଳପ୍ରଦ ହେଉନାହିଁ । ଆର୍ଥିକ ସ୍ଵଚ୍ଛଳ ହୋଇଗଲେ ହେବ ନାହିଁ ।  ସବୁକ୍ଷେତ୍ରରେ ମହିଳାମାନେ ଯେତିକି ସମ୍ମାନ ପାଇବା କଥା ପାଉନାହାନ୍ତି । ଉପରସ୍ତରରେ ଥିବା ମହିଳାମାନେ ତଳସ୍ତରରେ ଥିବା ମହିଳାମାନଙ୍କୁ ସହଯୋଗ କରିବା ମଧ୍ୟ ଦରକାର । ମହିଳାମାନେ ନିଜ ଘରେ ତଥା ଅଫିସରେ ସୁରକ୍ଷିତ ନୁହେଁ । ଏଭଳି ପରିସ୍ଥିତିରେ ଯେଉଁଦିନ ସୁଧାର ଆସିବ ସେଦିନ ମହିଳାମାନେ ମୁଣ୍ଡଟେକି ଗର୍ବର ସହ ବଞ୍ଚିପାରିବେ ।

ଆଧାର- ଦୈନିକ ଧରିତ୍ରୀ