অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ଯୌନଗତ ହିଂସାରୁ ଶିଶୁମାନଙ୍କୁ ସୁରକ୍ଷା ବ୍ୟବସ୍ଥା

ଉପକ୍ରମ

୧୪ ନଭେମ୍ବର ୨୦୧୨ରେ ଯୌନଗତ ହିଂସାରୁ ଶିଶୁମାନଙ୍କୁ ସୁରକ୍ଷା (ପ୍ରୋଟେକସନ ଅଫ୍ ଚିଲଡ୍ରେନ ଫ୍ରମ୍ ସେକ୍ସୁଆଲ ଅଫେନସେସ୍ ଆକ୍ଟ) ନାମକ ଏକ ନୂଆ ଆଇନ ପ୍ରଣୟନ ହୋଇଥିଲା । ବିଶେଷ କରି ୧୮ବର୍ଷରୁ କମ୍ ବୟସର ଶିଶୁମାନଙ୍କୁ ଯୌନଗତ ହିଂସାକୁ ରକ୍ଷା କରିବା ଲାଗି ଏହା ଉଦ୍ଦିଷ୍ଟ ଥିଲା । ଏହି ଆଇନର ବିଭିନ୍ନ ଲକ୍ଷ୍ୟ ଓ ଆଭିମୁଖ୍ୟଗୁଡିକ ହେଲା :

  • ଯୌନଗତ ନିର୍ଯାତନାରୁ ଶିଶୁମାନଙ୍କୁ ସୁରକ୍ଷା କରିବା ।
  • ବଳପୂର୍ବକ ବା ପ୍ରରୋଚିତ ଯୌନଗତ କାର୍ଯ୍ୟକଳାପରୁ ଶିଶୁମାନଙ୍କୁ ରକ୍ଷା କରିବା ।
  • ତଦନ୍ତ, ଅପରାଧ ଗୁଡିକର ବିଚାର ତଥା ପ୍ରମାଣଗୁଡିକୁ ରେକର୍ଡ ଅନ୍ତର୍ଭୁକ୍ତ କରିବା କ୍ଷେତ୍ରରେ ଏକ ସାମୂହିକ ଆଇନଭିତିକ ବ୍ୟବସ୍ଥା
  • ମାମଲାଗୁଡିକର ତ୍ଵରିତ ବିଚାର ସକାଶେ ସ୍ପେଶାଲ କୋର୍ଟ ପ୍ରତିଷ୍ଠା କରିବା ।

୧୮ବର୍ଷ ବୟସରୁ କମ ବୟସର ବାଳକ ଓ ବାଳିକାମାନଙ୍କ ପ୍ରତି ହେଉଥିବା ସମସ୍ତ ପ୍ରକାର ଯୌନ ଅପରାଧ କୁ ଏହାର ପରିସରଭୁକ୍ତ କରାଯାଇଛି । ସେହିପରି ଯୌନଗତ ହିଂସା ଓ ଧର୍ଷଣର ସଂଜ୍ଞାକୁ ଅଧିକ ପରିବ୍ୟାପ୍ତ କରାଯାଇଛି । ତଦନ୍ତ ଓ ବିଚାର ସମୟରେ ଶିଶୁମାନଙ୍କୁ ସୁରକ୍ଷା ଦେବା ପାଇଁ ବ୍ୟବସ୍ଥା ଅବଲମ୍ବନ କରାଯାଇଥିବା ବେଳେ ଦୋଷୀ କୁ କଠୋର ଦଣ୍ଡର ବ୍ୟବସ୍ଥା କରାଯାଇଛି । ତେବେ ଏହି ନୂଆ ଆଇନ ସମ୍ପର୍କରେ ଗଣମାଧ୍ୟମରେ ବିଶେଷ କିଛି ପ୍ରକାଶିତ ହୋଇପାରିନାହିଁ  ଏବଂ ଶିଶୁମାନଙ୍କ ବିରୋଧରେ ହେଉଥିବା ଯୌନହିଂସା  ପରିପ୍ରେକ୍ଷୀରେ ପୋଲିସ ପୂର୍ବରୁ ଥିବା ଆଇପିସି ଧାରାଗୁଡ଼ିକ ପ୍ରୟୋଗ କରୁଥିବା ପରିଲକ୍ଷିତ ହେଉଛି ।

ତେବେ ଜାନୁଆରୀ ୨୦୧୩ରେ ନୂଆଦିଲ୍ଲୀରେ ୨୩ବର୍ଷ ବୟସ୍କା ଜଣେ ମେଡିକାଲ ଛାତ୍ରୀଙ୍କୁ ଗଣଧର୍ଷଣ ଓ ହତ୍ୟା ପରେ ଦେଶବ୍ୟାପୀ ପ୍ରବଳ ବିରୋଧ କରଯାଇଥିଲା ଏବଂ ଭାରତରେ ମହିଳାମାନଙ୍କ ବିରୋଧରେ ହେଉଥିବା ଯୌନହିଂସା ଆର୍ନ୍ତଜାତିକ ସ୍ତରରେ ଦୃଷ୍ଟିଆକର୍ଷଣ କରିଥିଲା । ଯୌନହିଂସା ରୋକିବା କ୍ଷେତ୍ରରେ ଭାରତରେ ପ୍ରଚଳିତ ଆଇନ ଯଥେଷ୍ଟ କି ନୁହେଁ ସେ ସମ୍ପର୍କରେ ଗଣମାଧ୍ୟମରେ ବିତର୍କ ପ୍ରକାଶ ପାଇଥିଲା । ଏହି ଘଟଣା ପରେ ଯୌନଗତ ହିଂସା ରୋକିବା ସକାଶେ ଏକ ନୂଆ ଆଇନ ତିଆରି କରିବା ପାଇଁ ସରକାର ସ୍ଵର୍ଗତ ଜଷ୍ଟିସ ଜେ.ଏସ.ବର୍ମାଙ୍କ ନେତୃତ୍ଵରେ ଏକ କମିଟି ଗଠନ କରିଥିଲେ । ଏହି କମିଟିର ସୁପାରିଶଗୁଡିକ ଅନୁସାରେ ସଂସଦରେ ଏକ ବିଲ ଦାଖଲ ହୋଇଥିଲା ଏବଂ ୩ ଏପ୍ରିଲ ୨୦୧୩ରେ ସଂଶୋଧିତ ଆଇନ ବଳବତର ହୋଇଥିଲା । ଏଥିରେ ଭାରତୀୟ ପିଙ୍ଗଳ କୋଡ (ଆଇପିସି), ଅପରାଧ ଆଚରଣ ସଂହିତା (ସିଆରପିସି) ଓ ଭାରତୀୟ ପ୍ରମାଣ ଆଇନ (ଆଇଇଏ ) ରେ କେତେକ ଆବଶ୍ୟକୀୟ ପରିବର୍ତ୍ତନ କରାଯାଇଥିଲା ।

ପୋକ୍ସୋ ଆଇନ୨୦୧୨

ଏହି ଆଇନ ଅନୁସାରେ କେଉଁମାନେ ଅନ୍ତର୍ଭୁକ୍ତ ହୋଇ ପାରିବେ : ଯେକୌଣସି ପୁଅ ବା ଝିଅ ଯାହାର ବୟସ ୧୮ବର୍ଷରୁ କମ୍ ହୋଇଥିବ ।

ଶିଶୁମାନଙ୍କ ଉପରେ ହେଉଥିବା ଯୌନଗତ ହିଂସା ପରିପ୍ରେକ୍ଷୀରେ ଏହି ଆଇନ ହେଉଛି ସମ୍ପୂର୍ଣ୍ଣ ନିରପେକ୍ଷ । ଏହାଛଡା ପୋସ୍କୋ ଆଇନରେ “ଧର୍ଷଣ” ଶବ୍ଦ ବ୍ୟବହୃତ ହୋଇନଥାଏ ଏବଂ ଏହା ବଦଳରେ “ଯୌନଗତ ଅତ୍ୟାଚାର“ ବ୍ୟବହୃତ ହୋଇଥାଏ । ଏହି ସଂଜ୍ଞା ଅଧିକ ବ୍ୟାପକ ଏବଂ ଏପରିକି ବିଭିନ୍ନ ପ୍ରକାର ଅପ୍ରାକୃତିକ ଯୌନକ୍ରିୟାକୁ ଏଥିରେ ଅନ୍ତର୍ଭୁକ୍ତ କରାଯାଇଛି ।

ଧାରା ୩: ଯୌନ ଅତ୍ୟାଚାର : ଏକ ଶିଶୁ ବା ଶରୀରର କୌଣସି ଅଂଶରେ ଯୌନ ନିର୍ଯାତନା ବା ଅପ୍ରାକୃତିକ କ୍ରିୟା ।

ଧାରା ୭: ଯୌନଗତ ଅତ୍ୟାଚାର :ଯୌନଗତ ଭାବନା ଥାଇ ଏକ ଶିଶୁକୁ ଛୁଇଁବା ।

ଧାରା ୧୧: ଯୌନଗତ ନିର୍ଯ୍ୟାତନା : ଯୌନକାମନା ରଖି କିଛି କହିବା, ଅଙ୍ଗଭଙ୍ଗୀ ପ୍ରଦର୍ଶନ କରିବା, ଶରୀରର କିଛି ଅଂଶ ଦେଖାଇବା, ଯୌନୋଦ୍ଦୀପକ ଦୃଶ୍ୟ ଦେଖାଇବା । ଶିଶୁର କୌଣସି ଅଂଶ ପ୍ରଦର୍ଶନ କରିବା, ଶିଶୁକୁ ବିଭିନ୍ନ ଭାବେ ବ୍ୟବହାର କରିବା, ଯୌନୋଦ୍ଦୀପକ ଦୃଶ୍ୟ ଦେଖାଇବା ଲାଗି ଧମକ ଦେବା ।

ଧାରା ୧୩ ଓ ଧାରା ୧୫ :ଯୌନୋଦ୍ଦୀପକ ଦୃଶ୍ୟ: ଯୌନୋଦ୍ଦୀପକ ଦୃଶ୍ୟ ଉଦ୍ଦେଶ୍ୟରେ ଶିଶୁକୁ ବ୍ୟବହାର କରିବା । ବ୍ୟବସାୟିକ କାର୍ଯ୍ୟକଳାପ ସକାଶେ ଜଣେ ଶିଶୁର ଯୌନୋଦ୍ଦୀପକ ଦୃଶ୍ୟକୁ ମହଜୁଦ କରିବା ।

ପୋସ୍କୋ ଆଇନ ଅନୁସାରେ ସମସ୍ତ ଅପରାଧକୁ ଅତି ଗୁରୁତ୍ଵର ଅପରାଧ ବୋଲି ବିବେଚନା କରାଯିବ । ଏଣୁ ସେଗୁଡିକ କ୍ଷେତ୍ରରେ ଜାମିନ ମିଳିବ ନାହିଁ ଏବଂ ଜ୍ଞାତସାରରେ ଘଟିଥିବା ଅପରାଧ  ବୋଲି ବିବେଚନା କରାଯିବ ଏବଂ କୋର୍ଟ ଜରିଆରେ ସେଗୁଡିକର ବିଚାର କରାଯିବ ।

ଭାରତୀୟ ପିଙ୍ଗଳ କୋର୍ଡ ଅଧୀନରେ ହୋଇଥିବା ସଂଶୋଧିତ ବ୍ୟବସ୍ଥା:

ଧାରା ୩୭୬ : କୌଣସି ମହିଳାଙ୍କ ଯୌନ ନିର୍ଯାତନା ଦେବା ।

ଧାରା ୩୭୬ ଖ: ସ୍ତ୍ରୀ ଅଲଗା ରହୁଥିବା ବେଳେ ତାଙ୍କ ଉପରେ ସ୍ଵାମୀତ୍ଵ ଯାହିର କରିବା ।

ଧାରା ୩୭୬ଗ : କର୍ତୃତ୍ଵ ଥିବା ବ୍ୟକ୍ତି ଦ୍ଵାରା ଅପରାଧ ।

ଧାରା ୩୭୬ଘ : ଗଣଧର୍ଷଣ ।

ଏଗୁଡିକ ଅତି ଗୁରୁତ୍ଵର ଅପରାଧ । ଏଣୁ ସେଗୁଡିକ କ୍ଷେତ୍ରରେ ଜାମିନ ମିଳିବ ନାହିଁ ଏବଂ ଜାଣତରେ ଘଟିଥିବା ଅପରାଧ । ଏହି ମାମଲା ଗୁଡିକର ବିଚାର କୋର୍ଟରେ ହିଁ ହୋଇଥାଏ ।

ଧାରା ୩୫୪: ବ୍ୟକ୍ତିତ୍ଵକୁ ନଷ୍ଟ କରିବା ଉଦ୍ଦେଶ୍ୟରେ ଅତ୍ୟାଚାର କରିବା ବା ବଳପ୍ରୟୋଗ କରିବା: ଜଣେ ମହିଳାଙ୍କ ବ୍ୟକ୍ତିତ୍ଵକୁ ନଷ୍ଟ କରିବା ଉଦ୍ଦେଶ୍ୟରେ ଯଦି ତାଙ୍କ ଉପରେ ଜଣେ ପୁରୁଷ ଅତ୍ୟାଚାର କରେ ବା ଅପରାଧିକ ଶକ୍ତି ପ୍ରୟୋଗ କରେ ।

ଧାରା ୩୫୪କ : ଯୌନଗତ ନିର୍ଯାତନା: ଯଦି ଜଣେ ପୁରୁଷ ଶାରିରୀକ ସମ୍ପର୍କ ରକ୍ଷା କରେ ଏବଂ ଯୌନତୃପ୍ତି ପାଇଁ ଦାବି କରେ ବା ଅନୁରୋଧ କରେ, ଜଣେ ମହିଳାଙ୍କ ଇଚ୍ଛା ବିରୋଧରେ ଯୌନୋଦ୍ଦୀପକ ଦୃଶ୍ୟ ପ୍ରଦର୍ଶନ କରେ ବା ଯୌନଗତ ଇଙ୍ଗିତ ପ୍ରଦର୍ଶନ କରେ ।

ଧାରା ୩୫୪ଗ:ଅଶାଳୀନ ଦୃଶ୍ୟ ପ୍ରସାରଣ କରିବା : ଯଦି ଜଣେ ପୁରୁଷ ଜଣେ ମହିଳାଙ୍କ କୌଣସି ବ୍ୟକ୍ତିଗତ ଦୃଶ୍ୟ ଉତ୍ତୋଳନ କରି ଏହାକୁ ପ୍ରସାରଣ କରନ୍ତି ।

ଧାରା ୩୫୪ ଘ:ବିଭିନ୍ନ ଉପାୟରେ ଆକର୍ଷଣ କରିବା: ଜଣେ ଅନାଗ୍ରହୀ ମହିଳାଙ୍କ ସହ ସମ୍ପର୍କ ରକ୍ଷା କରିବା ପାଇଁ ଜଣେ ପୁରୁଷଙ୍କ ବାରମ୍ବାର ଉଦ୍ୟମ ।

ଧାରା ୫୦୯: ବିଭିନ୍ନ ଶବ୍ଦ, ଅଙ୍ଗଭଙ୍ଗୀ ପ୍ରଦର୍ଶନ ବା ଅନ୍ୟାନ୍ୟ କାର୍ଯ୍ୟ ଜରିଆରେ ଜଣେ ମହିଳାଙ୍କୁ ଜଣେ ପୁରୁଷ ଅପମାନିତ କରିବା: ଯଦି ଜଣେ ପୁରୁଷ ଜଣେ ମହିଳାଙ୍କ ଉଦ୍ଦେଶ୍ୟରେ କୌଣସି ଶବ୍ଦ, ଭାଷା, ଅଙ୍ଗଭଙ୍ଗୀ ପ୍ରଦର୍ଶନ, କୌଣସି ସାମଗ୍ରୀ ପ୍ରଦର୍ଶନ କରେ । ଏଗୁଡିକ କମ ଗୁରୁତ୍ଵର ଅପରାଧ ବୋଲି ବିବେଚନା କରାଯାଏ ଏବଂ ଏଥିପାଇଁ ବିଚାରବିଭାଗୀୟ ପ୍ରଥମ ଶ୍ରେଣୀ ମାଜିଷ୍ଟ୍ରେଟ (ଜେଏମଏଫସି) ବା ମେଟ୍ରୋପଲିଟାନ ମାଜିଷ୍ଟ୍ରେଟ (ଏମଏମ )ଙ୍କ ଜରିଆରେ ଏହାର ବିଚାର କରାଯାଇଥାଏ । ଏଥିରୁ କେତେକ ଅପରାଧରେ ଜାମିନ ମିଳିପାରୁଥିବା ବେଳେ ଅନ୍ୟ କେତେକ ଜାମିନବିହୀନ ହୋଇଥାଏ।

ନିରାପତ୍ତା ବ୍ୟବସ୍ଥା

ଯୌନଗତ ହିଂସା ଆଇନ କ୍ଷେତ୍ରରେ ଏଫଆଇଆର ଦାଏର  ହେବାଠାରୁ ଆରମ୍ଭ କରି ଏହାର ବିଚାର ଶେଷ ହେବା ଯାଏ ପୀଡ଼ିତା ଓ ଶିଶୁଙ୍କୁ ନିରାପତା  ଯୋଗାଇଦିଆଯାଇଥାଏ । ଯେତେବେଳେ ପୋଲିସ ଥାନାରେ ପ୍ରାଥମିକ ସୂଚନା ରିପୋର୍ଟ (ଏଫଆଇଆର) ଦାଏର କରାଯାଏ: ଏଫଆଇଆର ଦାଏର କରିବା ପାଇଁ ଜଣେ ପୀଡ଼ିତା ଥାନାକୁ ଆସିବା ଜରୁରୀ ନୁହେଁ । ଜଣେ ବନ୍ଧୁ ବା ଜଣେ ଜ୍ଞାତିଜନଙ୍କ ଜାରିଆରେ ଏହାକୁ ଥାନାକୁ ପଠାଇଦିଆଯାଇଥାଏ ଏବଂ ସେ ଅଭିଯୋଗକର୍ତା ହୋଇଥାନ୍ତି ।

ଏଫଆଇଆରକୁ ଲିଖିତ ଆକାରରେ ପଞ୍ଜିକରଣ କରାଯାଏ ଏବଂ ଅଭିଯୋଗକାରୀଙ୍କୁ ପଢାଇ ଶୁଣାଇଦିଆଯାଇଥାଏ । ଅଭିଯୋଗକାରୀଙ୍କୁ ଏହାର ଏକ ନକଲ ମାଗଣା ଯୋଗାଇ ଦିଆଯାଇଥାଏ । ଏକ ନକଲ ମାଗଣା ଯୋଗାଇ ଦିଆଯାଇଥାଏ । ଏକ ଏଫଆଇଆରକୁ ପଞ୍ଜିକରଣ ନ କରିବା ଏକ ଅପରାଧ ବୋଲି ବିବେଚିତ ହେବ । ଗଣମାଧ୍ୟମ ବା ସର୍ବସାଧାରଣରେ ପୋଲିସ ପୀଡିତାଙ୍କ ପରିଚୟ ପ୍ରକାଶ କରିବ ନାହିଁ । ରାତିରେ ଜଣେ ମହିଳା ବା ଜଣେ ଶିଶୁକୁ ଏକ ଥାନା ଭିତରେ ରଖାଯାଇପାରିବ ନାହିଁ । ସୂଚନା ପାଇବାର ୨୪ ଘଣ୍ଟା ମଧ୍ୟରେ ପୀଡିତଙ୍କ ମେଡିକାଲ ପରୀକ୍ଷା ନିମନ୍ତେ ତାଙ୍କୁ ନିକଟସ୍ଥ ମେଡିକାଲ ହସ୍ପିଟାଲଙ୍କୁ ନିଆଯାଇ ଯତ୍ନ କରାଯିବ । ଯଦି ପୀଡ଼ିତା କୌଣସି ସ୍ଵତନ୍ତ୍ର ଆବଶ୍ୟକତା ଚାହାନ୍ତି ତେବେ ତାହା ତାଙ୍କୁ ଯୋଗାଇଦିଆଯିବ ।

ଯଦି ପୀଡ଼ିତ ଶିଶୁ ହୋଇଥାଏ ତେବେ : ଯେଉଁଠାରେ ଉକ୍ତ ଶିଶୁ ରହୁଛି ସେଠାରେ କିମ୍ବା ସେ ଯେଉଁଠି ଉଚିତ ବୋଲି ଭାବୁଛି ସେଠାରେ ତା’ର ବିବୃତି ରେକର୍ଡ କରାଯିବ । ରେକର୍ଡ କରୁଥିବା ଅଫିସର ସବଇନ୍ସପେକ୍ଟର ପାହ୍ୟା ତଳକୁ ହୋଇପାରିବେ ନାହିଁ ଏବଂ ଅଗ୍ରାଧିକାର ଭିତିରେ ସେ ଜଣେ ମହିଳା ଅଫିସର ହେଲେ ଭଲ । ପୋଲିସ ଅଫିସରଜଣକ ୟୁନିଫର୍ମ ନ ପିନ୍ଧିବା ଆବଶ୍ୟକ । ଅଭିଯୁକ୍ତଙ୍କ ସହ ଶିଶୁଟି ସମ୍ପର୍କରେ ନ ଆସିବା ଦରକାର । ଶିଶୁ ଯାହାକୁ ବିଶ୍ଵାସ କରିଥିବ ସେ ଉପସ୍ଥିତ ରହିବା ଉଚିତ। ମାନସିକ ବା ଶାରିରୀକ ଭିନ୍ନକ୍ଷମ ଶିଶୁ କ୍ଷେତ୍ରରେ ଜଣେ ସ୍ଵତନ୍ତ୍ର ପ୍ରଶିକ୍ଷକ/ବିଶେଷଜ୍ଞ ରହିବା ଜରୁରୀ । ଯଦି ଆବଶ୍ୟକ ପଡେ ତେବେ ପୋଲିସ ଉକ୍ତ ଶିଶୁକୁ ନିକଟସ୍ଥ ସ୍ଵଧାର ଗୃହକୁ ନେଇଯିବ ଏବଂ ଶିଶୁ କଲ୍ୟାଣ କମିଟି ନିକଟରେ ହାଜର କରାଇବ।୨୪ ଘଣ୍ଟା ମଧ୍ୟରେ ପୋଲିସ ଶିଶୁ କଲ୍ୟାଣ କମିଟି ଓ ସ୍ଵତନ୍ତ୍ର କୋର୍ଟ ନିକଟରେ ଶିଶୁ ବିରୋଧରେ ହୋଇଥିବା ଯୌନ ଅପରାଧ ସମ୍ପର୍କରେ ଅବଗତ କରାଇବ ।

ମେଡିକାଲ ଓ ଫରେନସିକ ପରୀକ୍ଷା -

ମେଡିକାଲ ପରୀକ୍ଷା ସମୟରେ ଶିଶୁଟି ଯାହାଙ୍କୁ ବିଶ୍ୱାସକୁ ନେଇଥିବ ସେ ତା’ ନିକଟରେ ରହିବେ । ଜଣେ ମହିଳା ଡାକ୍ତର ହିଁ ଜଣେ ପୀଡିତାଙ୍କୁ  ପରୀକ୍ଷା କରିବେ । ହସ୍ପିଟାଲର ସଂଗୃହୀତ ନମୁନାକୁ ଯେପରି ଫରେନସିକ ପରୀକ୍ଷାଗାରକୁ ତୁରନ୍ତ ପଠାଯାଏ ସେଥିପ୍ରତି ପୋଲିସ ନିଶ୍ଚିତ ହେବ । ଶିଶୁର କ୍ଷତ, ଆଘାତ, ଲିଙ୍ଗରେ ହୋଇଥିବା ଆଘାତ ଆଦି ସମ୍ପର୍କରେ ଡାକ୍ତର ପରୀକ୍ଷା କରିବେ । ସମ୍ଭାବ୍ୟ ଗର୍ଭାବସ୍ଥା ଓ ଜରୁରୀକାଳୀନ ଗର୍ଭନିରୋଧକ ସମ୍ପର୍କରେ ଡାକ୍ତରଜଣକ ଶିଶୁ ବା ଯାହାଙ୍କୁ ଶିଶୁଜଣକ ବିଶ୍ଵସ୍ତ ବୋଲି ଭାବୁଛି ତାଙ୍କ ସହ ଆଲୋଚନା କରିବେ । ପୀଡ଼ିତାଙ୍କୁ ମାନସିକ, ମନସ୍ତାତ୍ଵିକ ବା ଅନ୍ୟାନ୍ୟ ପରାମର୍ଶ ପାଇଁ ପଠାଯାଇପାରେ । ଧାରା ୧୬୬ଖ ଅନୁସାରେ ଯଦି ଜଣେ ପୀଡ଼ିତାଙ୍କୁ ହସ୍ପିଟାଲ ପକ୍ଷରୁ ଚିକିତ୍ସା କରାଯାଏ ନାହିଁ ତେବେ ଏକ୍ଷେତ୍ରରେ ଏକ ବର୍ଷ ଯାଏ ଜେଲଦଣ୍ଡ ବା ଜୋରିମାନା ବା ଉଭୟ ଲାଗୁ ହୋଇପାରେ ।

ପୀଡ଼ିତାଙ୍କୁ ଆର୍ଥିକ ସହାୟତା ବା କ୍ଷତିପୂରଣ ବ୍ୟବସ୍ଥା

ପୀଡ଼ିତାଙ୍କୁ ଆର୍ଥିକ ସହାୟତା ବା କ୍ଷତିପୂରଣ ଦେବା ସକାଶେ ଅନେକ ରାଜ୍ୟ ବିଭିନ୍ନ ଯୋଜନା କାର୍ଯ୍ୟକାରୀ କରିଛନ୍ତି । ମହାରାଷ୍ଟ୍ରରେ ଧର୍ଷଣ ଓ ଏସିଡ ଆକ୍ରମଣର ଶିକାର ହୋଇଥିବା ମହିଳାଙ୍କ ସକାଶେ ଏକ ସ୍ଵତନ୍ତ୍ର ଯୋଜନା କାର୍ଯ୍ୟକାରୀ କରାଯାଇଛି । ଏହି ଯୋଜନାରେ ଏଫଆଇଆର ଦାଏର କରିବାର କିଛି ସପ୍ତାହ ମଧ୍ୟରେ କ୍ଷତିପୂରଣ ପ୍ରଦାନ କରାଯାଇଥାଏ । ବିଚାର କରାଯିବା ସକାଶେ ସ୍ଵତନ୍ତ୍ର ଶିଶୁ ସମ୍ପର୍କିତ କୋର୍ଟ ପ୍ରତିଷ୍ଠା ଉପରେ ପୋସ୍କୋ ଆଇନରେ ବ୍ୟବସ୍ଥା ରହିଛି । ମହିଳା ଓ ଶିଶୁ ସମ୍ପର୍କିତ ବିଭିନ୍ନ ଯୌନଗତ ଅପରାଧର ବିଚାର ସକାଶେ ଅନେକ ରାଜ୍ୟରେ ସ୍ଵତନ୍ତ୍ର କୋର୍ଟ ପ୍ରତିଷ୍ଠା ହୋଇଛି । ଯୌନନିର୍ଯାତନା ସଂକ୍ରାନ୍ତ ସମସ୍ତ ବିଚାର କ୍ୟାମେରା ଆଗରେ କରାଯିବ । ଯଦି ଶିଶୁର ବୟସ ୭ବର୍ଷରୁ କମ ହୋଇଥାଏ ତେବେ ତାକୁ ସିଧାସଳଖ ଜେରା କରାଯାଇପାରିବ ନାହିଁ । ବିଚାରପତିଙ୍କୁ ଲିଖିତ ଆକାରରେ ଓକିଲ ତାଙ୍କ ପ୍ରଶ୍ନ ଦେବେ ଏବଂ ବିଚାରପତି ଏହାକୁ ପଢିବା ପରେ ଶିଶୁକୁ ବୁଝାଇବେ । ଯଦି ସମସ୍ତ ସୁରକ୍ଷିତ ବ୍ୟବସ୍ଥାବଳୀକୁ କଠୋର ଭାବେ କାର୍ଯ୍ୟକାରୀ କରାଯାଏ ତେବେ ପୀଡ଼ିତାଙ୍କୁ ସ୍ଵାଭିମାନର ସୁରକ୍ଷା ହୋଇପାରିବ ଏବଂ ପୀଡ଼ିତଜଣକ ଦୟନୀୟ ପରିସ୍ଥିତିର ସମ୍ମୁଖୀନ ହେବାକୁ ପଡିବନାହିଁ ।

ଆଧାର - ମହିଳା ଓ ଶିଶୁ କଲ୍ୟାଣ ବିଭାଗ ଓଡିଶା ତଥା ଭାରତ ସରକାର



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate