অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ଆଗାମୀ ପିଢିଙ୍କୁ ଫିଲ୍ମ ତିଆରିର କଳା ଶିଖାଉଛନ୍ତି ମେଘନା

ଆଗାମୀ ପିଢିଙ୍କୁ ଫିଲ୍ମ ତିଆରିର କଳା ଶିଖାଉଛନ୍ତି ମେଘନା

ଉପକ୍ରମ

ମେଘନା ଘାଇ ପୁରିଙ୍କ ବାପା ତଥା ବିଶିଷ୍ଟ ଫିଲ୍ମ ନିର୍ଦ୍ଧେଶକ ସୁଭାଷ ଘାଇ ହିନ୍ଦୀ ଚଳଚ୍ଚିତ୍ର ଜଗତରେ ସୋ ମ୍ୟାନ୍ ଭାବେ ପରିଚିତ । ଖଳନାୟକ, କର୍ଜ, ହିରୋ ଓ ରାମ ଲକ୍ଷ୍ମଣ ଭଳି ବହୁ ସଫଳ ଫିଲ୍ମ କରି ସେ ଦର୍ଶକଙ୍କୁ ଭରପୂର ମନୋରଞ୍ଜନ ଦେଇଛନ୍ତି । ତାଙ୍କ ବାପା ଚଳଚ୍ଚିତ୍ର ଜଗତରେ ଏତେ ନାଁ କମାଇ ସଫଳ ହୋଇଥିଲେ ବି, ମେଘନାଙ୍କୁ ଅଭିନୟ କରିବାକୁ ଇଚ୍ଛା ନଥିଲା। ସେ ଜଣେ କମ୍ୟୁନିକେସନ୍, ଆର୍ଡଭାଟାଇଜିଂ ଓ ମାର୍କେଟିଂ ପ୍ରଫେସନାଲ୍ ଭାବେ ତାଙ୍କ କ୍ୟାରିଅର ଆରମ୍ଭ କରିଥିଲେ । ସୁବାସ ଘାଇଙ୍କ ପରଦେଶ୍, ତାଲ୍ ଓ ୟାଦେଁ ଭଳି ଚଳଚ୍ଚିତ୍ରର ମାର୍କେିଟିଂ କରିବାକୁ ମେଘନା ସହଯୋଗ କରିଥିଲେ ।

ମେଘନା ନିଜେ ଅଭିନୟ କରିନଥିଲେ ବି ସେ ଏହାକୁ ବହୁତ ପାଖରୁ ଦେଖିଥିଲେ । ବଲିଉଡ ତାଙ୍କ ରକ୍ତରେ ଥିଲା। ଏକ ଫିଲ୍ମ ସ୍କୁଲ କରି ଆଗାମୀ ପିଢିଙ୍କୁ ଫିଲ୍ମ ତିଆରି କଳା ଶିଖାଇବା ସୁବାସ ଘାଇଙ୍କର ଏକ ଡ୍ରିମ୍ ପ୍ରୋଜେକ୍ଟ ଥିଲା । ଏହାକୁ ବାସ୍ତବ ରୂପ ଦେବାକୁ ସେ ଏକ ଫିଲ୍ମ ସ୍କୁଲ ଖୋଲିବାକୁ ଚିନ୍ତା କଲେ ଓ ଏହାର ପରିଚାଳନା ଦାୟିତ୍ୱ ମେଘନାଙ୍କୁ ଦେବାକୁ ଭାବିଥିଲେ । ଏଥିପାଇଁ ୟୁକେରେ ଥିବା ମେଘନାଙ୍କୁ ଭାରତ ଫେରି ଆସି ଏହି ଦାୟିତ୍ୱ ଗ୍ରହଣ କରିବାକୁ ଡାକରା ଗଲା ।

 

ପ୍ରଗତିର ଉପାୟ

ମେଘନା କୁହନ୍ତି, ଯଦିଓ ସେ ଜଣେ କ୍ରିଏଟିଭ୍ ଲୋକ ନଥିଲେ । ତଥାପି ତାଙ୍କ ବାପା ତାଙ୍କୁ ସାହସ ଦେଲେ ଓ ଏକ ଗୁରୁ ଦାୟିତ୍ୱ ମୁଣ୍ଡାଇବାକୁ ସୁଯୋଗ ଦେଲେ । ଏହାକୁ ସେ ସେ ଗ୍ରହଣ କରି ନେଇଥିଲେ । ୨୦୦୦ମସିହାରେ ସେ ଏ ବିଷୟରେ ଜାଣିଲେ ଓ ଏହାର ବର୍ଷକ ପରେ ସେ ଭାରତ ଫେରି ଆସିଥିଲେ । ଏହା ପରେ ତାଙ୍କ ସ୍ୱପ୍ନର ଫିଲ୍ମ ସ୍କୁଲ ହ୍ୱିସଲିଂ ଉଡସ୍ ଇଟଂରନ୍ୟାସନାଲ(WWI) ଫିଲ୍ମ ସ୍କୁଲ ପାଇଁ ଶିଳାନ୍ୟାସ ହେଲା । ଏହାର ପ୍ରାୟ ୫ ବର୍ଷ ପର୍ଯ୍ୟନ୍ତ ମେଘନା ତାଙ୍କ କୋର୍ ଟିମକୁ ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ କଲେ । ଏହି ଫିଲ୍ମ ସ୍କୁଲ ଭଲ ଭାବେ ଗଢିବାକୁ ସେ ବହୁ ଗବେଷଣା କରିଛନ୍ତି, ବିଶ୍ୱର ଅନେକ କଲେଜ, ବିଶ୍ୱବିଦ୍ୟାଳୟ ଓ ଫିଲ୍ମ ସ୍କୁଲ ବୁଲିଛନ୍ତି । ତାଙ୍କ ଫିଲ୍ମ ସ୍କୁଲର ଆର୍କୀଟେକ୍ଚରଠୁ ଆରମ୍ଭ କରି ଆଡ୍ମିନଷ୍ଟ୍ରେସନ୍ ଯାଏ ସବୁ କିଛି ଭଲରେ କରିବାକୁ ସେ କଠିନ ପରିଶ୍ରମ କରିଛନ୍ତି ।

ଏହି ଫିଲ୍ମ ସ୍କୁଲ ନିର୍ମାଣ ହେବାକୁ କେବଳ ୩ ବର୍ଷ ଲାଗି ଯାଇଥିଲା । WWI ପାଇଁ ବହୁତ ବଡ କ୍ୟାମ୍ପସ୍ ତିଆରି ହୋଇଥିଲା । ଭବିଷ୍ୟତରେ ଅନ୍ୟ କୋର୍ସ ଆରମ୍ଭ କରିବାକୁ ଆଖି ଆଗରେ ରଖି ଏହାକୁ ଏମିତି ଭାବେ ଗଢାଯାଇଥିଲା ବୋଲି ମେଘନା କୁହନ୍ତି । ସେହିପରି ଏହି ଫିଲ୍ମ ସ୍କୁଲର ପାଠ୍ୟକ୍ରମ ପ୍ରସ୍ତୁତ କରିବା ପାଇଁ ଦେଶ ଓ ଦେଶ ବାହାରୁ ବହୁ ବିଶେଷଜ୍ଞଙ୍କ ମତାମତ ନିଆଯାଇଥିଲା । ବିଭିନ୍ନ କ୍ଷେତ୍ରର ଲୋକେ ଏହାର ପାଠ୍ୟକ୍ରମ ପ୍ରସ୍ତୁତ ପ୍ରକ୍ରିୟାରେ ସାମିଲ ହୋଇଥିଲେ । ଶେଖର କପୁର, ମନମୋହନ ସେଟ୍ଟି, ଆନନ୍ଦ ମହିନ୍ଦ୍ରା ଓ ଶ୍ୟାମ ବେନେଗଲଙ୍କ ଭଳି ବିଶିଷ୍ଟ ଲୋକେ ଏଥିରେ ମଧ୍ୟ ସାମିଲ ହୋଇଥିଲେ ।

 

WWIଇର ପାଠ୍ୟକ୍ରମ ଉଚ୍ଚକୋଟୀର ଥିଲା । ଏଥିପାଇଁ ସିବିଏସ୍ଇ ବୋର୍ଡ ବି ତା ମିଡିଆ ଷ୍ଟଡିଜ୍ ଛାତ୍ରଛାତ୍ରୀଙ୍କ ଏକାଦଶ ଓ ଦ୍ୱାଦଶ ଶ୍ରେଣୀର କୋର୍ସ ମାଟେରିଆଲ୍ ପ୍ରସ୍ତୁତ କରିବାକୁ କହିଥିଲା । ଏହାସହ WWI ମଧ୍ୟ ସିବିଏସ୍ଇ ବୋର୍ଡର ଶିକ୍ଷକଙ୍କ ମାନଙ୍କ ପାଇଁ ବିଭିନ୍ନ ସମୟରେ ପ୍ରଶିକ୍ଷଣ କାର୍ଯ୍ୟକ୍ରମ କରୁଛି । WWIର ପାଠ୍ୟକ୍ରମରେ କ୍ରିଏଟିଭ୍ ଆର୍ଟସ୍, ଥିଏଟର ଓ ଡ୍ରାମାକୁ ମିଡିଆ ଷ୍ଟଡିଜରେ ସାମିଲ କରାଯାଇଛି । ତେବେ ମେଘନା ଏ ବିଷୟରେ କୁହନ୍ତି, ଏଠାରେ ପଢୁଥିବା ସବୁ ପିଲା ଫିଲ୍ମ ତିଆରି ନ କରିଲେ ବି ସେମାନଙ୍କୁ ଏ ବାବଦରେ ଧାରଣା ଦେବାକୁ ଆମେ ପ୍ରୟାସ କରୁଛି ।

ସଫଳତା ଓ ଆହ୍ୱାନ

ପ୍ରଥମେ ୭୦ଜଣ ଛାତ୍ରଛାତ୍ରୀଙ୍କୁ ନେଇ WWIର ଯାତ୍ରା ଆରମ୍ଭ ହୋଇଥିଲା । ଏବେ ଏଥିରେ ୪୦୦ଜଣ ପିଲା ପାଠ ପଢୁଛନ୍ତି ଓ ପ୍ରାୟ ହଜାରେରୁ ଅଧିକ ପାସ୍ କରି ଫିଲ୍ମ ଇଣ୍ଡଷ୍ଟ୍ରିରେ କାମ କରୁଛନ୍ତି । ଧୀରେଧୀରେ WWIର ଲାଭ ବଢୁଛି । ୨୦୧୩ରେ ଏହା ପ୍ରାୟ ୧୯ଲକ୍ଷ ଟଙ୍କାର ଲାଭ ଉଠାଇଥିଲା । ସେହିପରି ଏହି ସ୍କୁଲ ବହୁ ବିରଳ କୃତିତ୍ୱର ଅଧିକାରୀ ବି ହୋଇଛି । ‘ଦ ହଲିଡେ ରିପୋର୍ଟର’ର ୨୦୧୩ ସଂସ୍କରଣର ରାଙ୍କ ଅନୁସାରେ WWI ବିଶ୍ୱର ଟପ୍-୧୦ ତାଲିକା ଭିତରେ ଆସୁଛି ।

ମେଘନା କୁହନ୍ତି, ଛାତ୍ରଛାତ୍ରୀମାନେ ଏବେ ବେଶ୍ ଭଲ ପ୍ରଦର୍ଶନ କରୁଛନ୍ତି । ସେମାନେ ଫିଲ୍ମ ଇଣ୍ଡଷ୍ଟ୍ରିରେ ଧର୍ମା ପ୍ରଡକସନ୍ସ, ଡିସ୍ନେ, ୟଶରାଜ ଫିଲ୍ମସ୍ ଓ ଫିଲ୍ମସ୍ ଭଳି ସୁନାମଧନ୍ୟ ପ୍ରଡକସନ୍ ହାଉସରେ କାମ କରୁଛନ୍ତି। ତାଙ୍କ ସ୍କୁଲର ଜଣେ ଛାତ୍ର ମୋହିତ୍ ଛାବ୍ରା ତିଆରି କରିଥିବା କ୍ଷୁଦ୍ର ଚଳଚ୍ଚିତ୍ର ‘ଦ ରବର ବ୍ୟାଣ୍ଡ ବଲ’ ସମ୍ମାନଜନକ କାନସ୍ କର୍ପୋରେଟ୍ ମିଡିଆ ଓ ଟିଭି ଆୱାର୍ଡ ପ୍ରଦାନ ଉତ୍ସବରେ ସିଲଭର ଡଲଫିନ୍ ପୁରସ୍କାର ପାଇଥିଲେ । ସେହିପରି ସେ ୨୦୧୩ରେ ଦେଓଭିଲେ ଗ୍ରୀନ୍ ଆୱାର୍ଡ ଓ ୨୦୧୨ରେ ଲଣ୍ଡନରେ ଫ୍ରାନ୍ସ ଓ ସିଟି ଷ୍ଟୋରିଜ୍ ପ୍ରୋଜେକ୍ଟ ବିଜୟୀ ହୋଇଛନ୍ତି ।

ସେହିପରି ପ୍ରକାଶ ଝାଙ୍କ ଫିଲ୍ମ ସତ୍ୟାଗ୍ରହ ପ୍ରସ୍ତୁତିରେ କିଛି WW. ପିଲା ଅବଦାନ ଦେଇଛନ୍ତି । ଏହାଛଡା ନିକଟରେ ହକଂ ଟୁରିଜିମକୁ ପ୍ରଚାରପ୍ରସାର ପାଇଁ WW. ଛାତ୍ରଛାତ୍ରୀମାନେ ଏକ କ୍ଷୁଦ୍ର ଚଳଚ୍ଚିତ୍ର ପ୍ରସ୍ତୁତ କରିଥିବାରୁ ହକଂ ଟୁରିଜିମ୍ ବୋର୍ଡ ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧିତ କରିଛି ।

ମେଘନା କୁହନ୍ତି, ପ୍ରଥମେ ଭଲ ପ୍ରଶିକ୍ଷକ ଆଣି ପିଲାଙ୍କୁ ଦେବା ଏକ ବଡ ସମସ୍ୟା ଥିଲା । ପିଲାଙ୍କୁ ଭଲ ପ୍ରଶିକ୍ଷଣ ଦେବାକୁ ହେଲେ ଦକ୍ଷ ଓ ବୃତିଗତ ପ୍ରଶିକ୍ଷକ ଆବଶ୍ୟକ । ଜଣେ ପ୍ରଶିକ୍ଷକ ଯେତେ ଭଲ ହେଲେ ବି ଫିଲ୍ମ ଇଣ୍ଡଷ୍ଟ୍ରିରେ କାମ କରୁନଥିଲେ ଏବେକାର ପିଲା ସନ୍ତୁଷ୍ଟ ହେଉନାହାନ୍ତି । ଆହୁରି ବି ମେଘନା କୁହନ୍ତି, ବେଷ୍ଟ ଟେକ୍ନୋଲୋଜି ଇନଫାଷ୍ଟ୍ରକଚର ପାଇବା ମଧ୍ୟ ଏବେ ପାଇଁ ଏକ ବଡ ସମସ୍ୟା । ତେବେ WWI ଏହି ସମସ୍ୟାକୁ ଏଡାଇବା ପାଇଁ ସୋନି ସହ ମିଶି କ୍ୟାମ୍ପସ୍ ଭିତରେ ଏକ ମିଡିଆ ସେଟଂର ତିଆରି କରିଛି ।

ଭବିଷ୍ୟତର ଯୋଜନା

WWIର ଭବିଷ୍ୟତର ଯୋଜନା ସମ୍ପର୍କରେ ମେଘନା କୁହନ୍ତି, ଫିଲ୍ମ ନିର୍ମାଣ ଛଡା WWIରେ ପିଲାମାନେ ମିଡିଆ, ଜର୍ଣ୍ଣାଲିଜିମ୍, ଫ୍ୟାଶନ୍ ଓ ଆନିମେଶନ୍ ଶିଖି ପାରିବେ । ତେବେ WWIକୁ ଅନ୍ୟ ସହରରେ ଓ ବାହାର ଦେଶରେ ଆରମ୍ଭ କରିବାକୁ ଯୋଜନା ଅଛି । ପୁନେରେ ଏହା ଆରମ୍ଭ କରିବାକୁ ଡି ୱାଇ ପାଟିଲ ସହ ମିଶିଛନ୍ତି । ସେହିପରି ୟୁକେରେ ଏକ କ୍ୟାମ୍ପସ୍ ଖୋଲିବାକୁ ସେମାନେ ବ୍ରାଡ୍ଫୋର୍ଡ କଲେଜ ସହ ପାର୍ଟନର ହୋଇଛନ୍ତି । ସେହିପରି ନାଇଜେରିଆରେ ସେମାନେ ଏକ ଆଫ୍ରିକାନ୍ ଫିଲ୍ମ ଆଣ୍ଡ ଟିଭି ଏକାଡେମୀ ଆରମ୍ଭ କରିବାକୁ ଟ୍ରେଣ୍ଡ ମିଡିଆ ସିଟି ସହ ଯୋଡି ହୋଇଛନ୍ତି । ମେଘନାଙ୍କ ମତରେ ନାଇଜେରିଆ ହେଉଛି ସବୁଠୁ ବଡ ଫିଲ୍ମ ନିର୍ମାଣ ଇଣ୍ଡଷ୍ଟ୍ରି । ମାତ୍ର ଏଠାରେ ଫିଲ୍ମ ଗୁଡିକ ଥିଏଟରରେ କେବେ ରିଲିଜ୍ ହୁଏନି, କେବଳ ଭିଡିଓ ମାଧ୍ୟମରେ ବଜାରକୁ ଆସେ । ଏଠାରେ ବହୁ ପ୍ରତିଭା ଥିଲେ ବି ଉପଯୁକ୍ତ ପ୍ରଶିକ୍ଷଣର ପ୍ରତିଷ୍ଠାନର ଅଭାବ ରହିଛି । ଏଥିପାଇଁ ଏଠାରେ ଏକ WWI ଥିଏଟର ଖୋଲିବାକୁ ଯୋଜନା କରିଛୁ ।

ମେଘନା ନିଜେ ସ୍ୱୀକାର କରି କୁହନ୍ତି, ବାପାଙ୍କ ପ୍ରତିଷ୍ଠା ଓ ନାଁ ବିନା ଏତେ ସଫଳ ହେବା ସମ୍ଭବ ହୋଇନଥାନ୍ତା। ବାପାଙ୍କର ଇଣ୍ଡଷ୍ଟ୍ରିରେ ଥିବା ସମ୍ମାନ ମୋତେ ଆଗକୁ ଯିବାକୁ ବହୁତ ସାହାଯ୍ୟ କରିଥିଲା । ତେବେ ନିଜର ନିଷ୍ଠା ଓ କଠିନ ପରିଶ୍ରମ ଯୋଗୁ ମେଘନା WWIକୁ ଏକ ସ୍ତରରେ ପହଚାଂଇବାକୁ ସକ୍ଷମ ହୋଇଛନ୍ତି । ବିନା ଛୁଟିରେ କାମ କରିବା, କର୍ମଚାରୀଙ୍କ ସହ ଭଲ ବୁଝାମଣା ରଖିବା ଯୋଗୁ ଏସବୁ ହୋଇପାରିଛି ।

ମେଘନା କୁହନ୍ତି, ମହିଳାଙ୍କୁ କାର୍ଯ୍ୟକ୍ଷେତ୍ରର ସୁଯୋଗ ଦେବାରେ ଭାରତ ସବୁଠୁ ଭଲ ସ୍ଥାନ । ଏଠି ମହିଳାମାନେ କାମ କରିବାକୁ ଅନେକ ସହଯୋଗ ମିଳିଥାଏ । ମାତ୍ର ବହୁ ମହିଳା ବ୍ୟସ୍ତତା ଆଳରେ କାମ କରିବାକୁ ଇଚ୍ଛା କରନ୍ତିନି । ସେମାନେ ନିଜ ଚାରିପାଖେ ଏକ କାଚର ଆବଦ୍ଧ ତିଆରି କରି ଦେଇଥାନ୍ତି । ଏସବୁକୁ ଭାଙ୍ଗି ବାହାରକୁ ବାହାରିବା ଦରକାର । କାର୍ଯ୍ୟକ୍ଷେତ୍ରକୁ ଯାଇ କାମ କଲେ ହିଁ ପ୍ରକୃତ ମହିଳା ସଶକ୍ତିକରଣ ସମ୍ଭବ । ଏହା ଖାଲି ମହିଳାଙ୍କୁ ସ୍ୱାବଲମ୍ବୀ କରେନି, ତା ପରିବାରର ଉନ୍ନତିରେ ମଧ୍ୟ ସାହାଯ୍ୟ କରିଥାଏ ।

Aadhar

Smrutiranjan Biswal (freelancer journalist)



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate