ସେଆର କରନ୍ତୁ

କଦଳୀ ଚାଷ

କଦଳୀ ଚାଷ ର ସୂଚନା

ପ୍ରାଧାନ୍ୟ

କଦଳୀ ଏକ ପୁରାତନ ଫଳ  । ଏହା ଆମ ସଂସ୍କୃତି ଓ ପର୍ବପର୍ବାଣୀ ସହ ଜଡିତ  । କଦଳୀ ସୁସ୍ଵାଦୁ ଓ ପୁଷ୍ଟିକର  । ଏଥିରେ ବହୁତ ପରିମାଣରେ ଶ୍ଵେତସାର ଅଛି  । କଦଳୀକୁ ପାଚିଲା ଏବଂ ତରକାରୀ କରି ଖିଆଯାଏ  । କଦଳୀରେ ଅନେକ ଲବଣ ଏବଂ ଖାଦ୍ୟପ୍ରାଣ ଅଛି  । ସେଗୁଡିକ ମଧ୍ୟରେ ଲୌହ, ପଟାସିୟମ, ମ୍ୟାଗ୍ନେସିୟମ, କ୍ୟାଲସିୟମ ଏବଂ ଖାଦ୍ୟପ୍ରାଣ ‘କ’, ‘ଖ’, ‘ଗ’ ପ୍ରଧାନ  । କଦଳୀ ପତ୍ରକୁ ପ୍ଲେଟ୍ ଭଳି ଖାଇବା ପାଇଁ ବ୍ୟବହାର କରାଯାଏ  ।

ଜଳବାୟୁ ଓ ମୃର୍ତ୍ତିକା

ଉଷ୍ମ, ଆର୍ଦ୍ର ଜଳବାୟୁ କଦଳୀ ଚାଷ ପାଇଁ ଉପଯୁକ୍ତ  । ୧୦ରୁ ୪୦ ଡିଗ୍ରୀ ସେଣ୍ଟିଗ୍ରେଡ ଉତ୍ତାପ ମଧ୍ୟରେ କଦଳୀ ଚାଷ କରାଯାଇପାରେ  । ୧୦ ଡିଗ୍ରୀ ସେଣ୍ଟିଗ୍ରେଡରୁ ଉତ୍ତାପ କମିଗଲେ, ଗଛ ଭଲ ବଢେ ନାହିଁ ଏବଂ ପତ୍ର ହଳଦିଆ ପଡିଯାଏ  । କେତେକ ପାହାଡିଆ କଦଳୀ ଥଣ୍ଡା ସହିପାରେ  । କଦଳୀ ଚାଷ ପାଇଁ ନିଗିଡା, ଉର୍ବର, ଦୋରସା, ପଟୁ ମାଟି ଓ ମତାଳ ମାଟି ଉପଯୁକ୍ତ ଅଟେ  । ସନ୍ତସନ୍ତିଆ ସ୍ଥାନରେ ଏହା ଭଲ ବଢେ ନାହିଁ  । ମାଟିର ଅମ୍ଳତା ୬ରୁ ୭ ଭିତରେ ରହିଲେ କଦଳୀ ଭଲ ଫଳେ  । କଦଳୀ ଫସଲ ଅଧିକ ଜଳ ଆବଶ୍ୟକ କରେ  । ବାର୍ଷିକ ୧୫୦୦ ମି.ମି. ରୁ ୨୫୦୦ ମି.ମି. ବର୍ଷା ହେଉଥିବା ଅଞ୍ଚଳରେ କଦଳୀ ଚାଷ ଭଲ ହୋଇଥାଏ  ।

କିସମ

ବ୍ୟବହାରକୁ ଆଧାର କରି କଦଳୀ ମୁଖ୍ୟତଃ ଦୁଇ ପ୍ରକାରର ହୋଇଥାଏ  । ବନ୍ତଳ ବା ତରକାରୀ କଦଳୀ ଏବଂ ଅନ୍ୟଟି ପାଚିଲା କଦଳୀ ବନ୍ତଳ କିସମଗୁଡିକ ହେଲା ପାଉଁଶିଆ ବନ୍ତଳ, ମେଣ୍ଢୀ ବନ୍ତଳ ଇତ୍ୟାଦି  । ପାଚିଲା କଦଳୀ କିସମଗୁଡିକ ହେଲା ଫାଟକପୁରା, ଚମ୍ପା, ଚକ୍ରକେଳି, ଲାଲ କଦଳୀ, ଭୁଷାବଲ, ରୋବଷ୍ଟା, କାବୁଲି ଇତ୍ୟାଦି  । ଶେଷ ତିନି କିସମର ଗଛ ଗେଡା ବା ବାମନ ହୋଇଥିବା ବେଳେ ବନ୍ତଳ ଓ ଅନ୍ୟ କିଆମର ଗଛଗୁଡିକ ଡେଙ୍ଗା  । ବିରୁପାକ୍ଷୀ, ମୁଗୁନି, ବୁକୁଫଟା, ଲାଲ, ପୋଢଶିଙ୍ଗା କିସମଗୁଡିକ ଆମ ରାଜ୍ୟର ପାହାଡିଆ ଅଞ୍ଚଳରେ ଦେଖାଯାଏ  ।

ଜମି ପ୍ରସ୍ତୁତି

ଜମିକୁ ଚାରି ପାଞ୍ଚ ଓଡ ଚାଷ କରି ଜଳ ନିଷ୍କାସନର ସୁବିଧା ଦୃଷ୍ଟିରୁ ୧୫ ରୁ ୨୦ ଫୁଟ ଚଉଡାର ପଟାଳି କରାଯାଏ  । ପଟାଳି ମଧ୍ୟରେ ଡେଙ୍ଗା ଗଛ ପାଇଁ ୮X୮ ଫୁଟ ବ୍ୟବଧାନରେ ଏବଂ ଗେଡା ବା ବାମନ କଦଳୀ ପାଇଁ ୬X୬ ଫୁଟ ବ୍ୟବଧାନରେ ଗାତ ଖୋଳାଯାଏ  । ଗାତଗୁଡିକର ଲମ୍ବ, ଓସାର ଓ ଗଭୀରତା ଦେଢ ଫୁଟ ରଖାଯାଏ  ।

  • ପ୍ରତି ଗାତରେ ଏକ ଝୁଡି ସଢା ଗୋବରଖତ ଦିଆଯାଏ  ।
  • ଉଈ ଦମନ ପାଇଁ ୨୦ ଗ୍ରାମ କ୍ଳୋରୋପାଇଫସ୍ କିମ୍ବା ୨୦୦ ଗ୍ରାମ୍ ନିମ ପିଡିଆ ଖତସାର ସହ ମାଟିରେ ମିଶାଯାଏ ।

କଦଳୀ ପୁଆ ନିରୂପଣ

  • କଦଳୀ ଗଛରେ ଦୁଇ ପ୍ରକାର ପୁଆ ଦେଖାଯାଏ  । ଯଥା : ଖଣ୍ଡା ପୁଆ ଓ ପାଣି ପୁଆ  । ଖଣ୍ଡା ପୁଆରୁ ଭଲ ଅମଳ ମିଳିଥାଏ  । ଏଣୁ ଦୁଇ ତିନିମାସର ତିନି ଚାରି ଫୁଟିଆ ନିରୋଗ ଖଣ୍ଡା ପୁଆ ଲଗାଯାଏ  ।
  • ଟିସୁ କଲଚର ଗଛ ସଂଗ୍ରହ କରି ଲଗାଇବା ଉତ୍ତମ  । ଏହି ଚାରାଗୁଡିକ ନିରୋଗ, ଅଧିକ ଅମଳକ୍ଷମ, ଏକମଚ୍ଛା ଓ ସମ ସମୟ ବୟସର ହୋଇଥାଏ  । ଏଣୁ ଫଳ ଏକ ସମୟରେ ଆସେ ଏବଂ ଏକାସଙ୍ଗରେ କାନ୍ଧି କାଟିବା ସମ୍ଭବପର ହୁଏ  ।
  • ପୁଆଗୁଡିକୁ ଇଣ୍ଡୋଫିଲ – ଏମ୍ ୪୫ ରେ ବିଶୋଧନ କରି ଲଗାଯିବା ଦରକାର  । ୪ ଇଣ୍ଡୋଫିଲ – ଏମ୍ ୪୫ କିମ୍ବା ୨ ଗ୍ରାମ୍ ବେଭିଷ୍ଟିନ ୧ ଲିଟର ପାଣିରେ ମିଶାଇ ୨୦ ରୁ ୩୦ ମିନିଟ୍ ବୁଡାଯିବା ଦ୍ଵାରା ମୁଣ୍ଡାଗୁଡିକ ବିଶୋଧିତ ହୁଏ  ।
  • ପୁଆଗୁଡିକୁ ବର୍ଷର ଅଧିକାଂଶ ସମୟରେ ଲଗାଯାଇପାରିବ  । ବର୍ଷା ଦିନର ଠିକ୍ ପୂର୍ବରୁ ପୁଆ ଲଗାଯାଏ  । ଜଳସେଚନର ସୁବିଧା ଥିଲେ ଅନ୍ୟ ସମୟରେ ମଧ୍ୟ ଲଗାଯାଇପାରିବ  । ଖୁବ୍ ଖରାଦିନରେ କଦଳୀ ପୁଆ ଲଗାଇବା ଅନୁଚିତ୍  ।
  • ଅଧିକ ଅମଳ ପାଇଁ ଗଛ ମଧ୍ୟରେ ଦୂରତାକୁ କମ୍ କରି ଅଧିକ ସଂଖ୍ୟକ ଗଛ ଲଗାଯାଇଥାଏ  । ଏହା ଦ୍ଵାରା ଅଧିକ କାନ୍ଧି ମିଳିବା ସମ୍ଭବପର  । କିନ୍ତୁ କାନ୍ଧିର ଓଜନ, ଆକାର ତଥା ଫଳ ସଂଖ୍ୟା ଅନେକ କମିଯାଏ  । ଏକ ଏକର ଜମିରେ ଏହି ପ୍ରଣାଳୀରେ   ୩ ଗୁଣ ସଂଖ୍ୟକ ପୁଆ ଲଗାଯାଇଥାଏ  ।

ଅନ୍ତଃ ଫସଲ

  • କଦଳୀ ପୁଆ ଲଗାଯିବାର ତିନି ଚାରି ମାସ ପରେ ଗଣ୍ଡି ବଢେ  । ଗଛର ପତ୍ର ଜମିକୁ ଢାଙ୍କି ରଖେ  । ଏହି ଫସଲ ମଝିରେ ପ୍ରଥମ ତିନି ଚାରିମାସ ପନିପରିବା ଯଥା : ଭେଣ୍ଡି, କଖାରୁ, ଜହ୍ନି, ଝୁଡଙ୍ଗ ଏବଂ ମୁଗବିରି ଆଦି ଅନ୍ତଃଫସଲ କରାଯାଇ ପାରେ  ।

ଖତସାର

  • ପ୍ରତି ଗଛକୁ ୨୦୦ ଗ୍ରାମ୍ ଯବକ୍ଷାରଜାନ, ୮୦ ଗ୍ରାମ୍ ଫସଫରସ୍ ଓ ୫୦୦ ଗ୍ରାମ୍ ପଟାସ ଦେଲେ ଭଲ ଅମଳ ମିଳେ  । ସାରକୁ ପୁଆ ଲଗାଯିବା ବେଳେ, ଦ୍ଵିତୀୟ ଥର ୬୦ ଦିନ ପରେ, ତୃତୀୟ ଥର ୯୦ ଦିନ ପରେ ଏବଂ ଚତୁର୍ଥ ଥର ୧୨୦ ଦିନ ପରେ ପ୍ରୟୋଗ କରାଯାଏ  । ଏହି ଉପାଦାନଗୁଡିକୁ ବିଭିନ୍ନ ସାର ଆକାରରେ ନିମ୍ନ ଭାବରେ ମଧ୍ୟ ପ୍ରୟୋଗ କରାଯାଇଥାଏ  ।
  • ଗଛ ଲଗାଯିବା ବେଳେ – ୨୫୦ ଗ୍ରାମ୍ ଯାବିକ ସାର ଯଥା ଷ୍ଟେରାମିଲ, ହିଣ୍ଡୋମିଲ ୨୫୦ ଗ୍ରାମ୍ ସୁପର ଫସଫେଟ୍

୬୦ ଦିନ ପରେ     - ୧୦୦ ଗ୍ରାମ୍ ସି.ଏ.ଏନ., ୧୦୦ ଗ୍ରାମ୍ ମ୍ୟୁରେଟ ଅଫ୍ ପଟାସ୍

୯୦ ଦିନ ପରେ     - ୧୫୦ ଗ୍ରାମ୍ ସି.ଏ.ଏନ୍., ୧୦୦ ଗ୍ରାମ୍ ମ୍ୟୁରେଟ ଅଫ୍ ପଟାସ୍

୧୨୦ ଦିନ ପରେ   - ୧୫୦ ଗ୍ରାମ୍ ସି.ଏ.ଏନ୍., ୧୦୦ ଗ୍ରାମ୍ ମ୍ୟୁରେଟ ଅଫ୍ ପଟାସ୍

ସି.ଏ.ଏନ୍. ପ୍ରତିବଦଳରେ ଅର୍ଦ୍ଧ ମାତ୍ରାର ୟୁରିଆ ସାର ପ୍ରୟୋଗ କରାଯାଇପାରେ  ।

ସାରକୁ ଗଛ ଠାରୁ ଏକ ଫୁଟ ଦୂରରେ ଓ ଏକ ଫୁଟ ଚଉଡାରେ ଗାତ ଖୋଳି ଦିଆଯାଏ  ।

ଗେଡା କିସମରେ କିଛି ଅଧିକ ସାର ପ୍ରୟୋଗ କରାଯାଇପାରେ  ।

ଜଳସେଚନ

କଦଳୀ ଫସଲକୁ ଶୀତମାସରେ ଦୁଇ ତିନି ଥର ଏବଂ ଖରାମାସରେ ଚାରି ପାଞ୍ଚ ଥର ଜଳସେଚନ କରାଯାଏ  ।

ଅନ୍ତଃଚାଷ

ନିୟମିତ କୋଡାଖୁସା, ଘାସବଛା କରି ଦୁଇ ତିନିମାସରେ ଥରେ ମାଟିକୁ ହାଣି ସଫା ରଖିଲେ ମାଟି ହାଲୁକା ହୁଏ ଏବଂ  ରୋଗପୋକ କମ୍ ଲାଗେ  । ମାଟିର ଆର୍ଦ୍ରତା ଅଧିକ ଦିନ ରହେ  । କାନ୍ଧି ପଡିବା ଆରମ୍ଭ ହେଲେ କୋଡାଖୁସା କରିବା ଅନୁଚିତ୍  ।

ପୁଆ ବାହାର କରିବା

ପ୍ରତିଗଛରୁ ଅନେକ ପୁଆ ବାହାରେ  । ଏଗୁଡିକ ବଢିଲେ କାନ୍ଧି ଛୋଟ ହୋଇଯାଏ  । କମିଯାଏ  । ପ୍ରଥମ କାନ୍ଧି ଆସିବା ପରେ ଗୋଟିଏ ମାତ୍ର ସୁସ୍ଥ ପୁଆ ଛଡ଼ାଯାଏ  । ତହିଁରୁ ଦ୍ଵିତୀୟ ଫସଲ ଅମଳ କରାଯାଏ  । ମାଟି ପତ୍ତନରୁ ଅଦରକାରୀ ପୁଆଗୁଡିକୁ କାଟି ବାହାର କରିଦିଆଯାଏ  କଟାଯାଇଥିବା ପୁଆର ମୂଳ ଅଂଶରେ ଗୋଟିଏ ଲେଖାଏଁ ଗାତ କରି ତହିଁରେ କିରୋସିନ ଏକ ଚାମଚ ପକାଇଲେ ପୁଆଗୁଡିକ ଆଉ ବଢେ ନାହିଁ  ।

  • କାନ୍ଧି ଆସିବା ପରେ ଶେଷ ଫେଣାରୁ ୨୦ ସେ.ମି. ଛାଡି କଦଳୀ ଭଣ୍ଡାଟିକୁ କାଟି ଦିଆଯାଏ  ।
  • କଦଳୀ କାନ୍ଧି ଆସିଲେ ସାଧାରଣତଃ ସେହି ଗଛଟି ଭାରାକ୍ରାନ୍ତ ହୋଇ ନଇଁ ପଡେ କିମ୍ବା ପବନରେ ଭାଙ୍ଗିଯାଏ  । ଏହାର ସୁରକ୍ଷା ପାଇଁ କାଠ ବାଉଁଶର ଢିରା ଦେବା ଆବଶ୍ୟକ  ।
  • କାନ୍ଧି ପଡିବା ପରେ ଗଛର ଶୁଖିଲା ପତ୍ରଗୁଡିକୁ କାଟି ବାହାର କରିଦିଆଯାଏ  ।
  • କଦଳୀ ଗଛର ପତ୍ର କାଟି ନେଲେ କାନ୍ଧି ଓ କଦଳୀର ଆକାର ଛୋଟ ହୋଇଯାଏ  । କାନ୍ଧି ଆସିଲା ପରେ ଅତ୍ୟଧିକ ସୂର୍ଯ୍ୟକିରଣ ଫଳଗୁଡିକର ମାନ ନିକୃଷ୍ଟ କରିଦିଏ  । ଏଣୁ ସେହି ଗଛର ପତ୍ର ଦ୍ଵାରା କାନ୍ଧିକୁ ଘୋଡାଇ ରଖିବା ଦରକାର  । ଗଛରେ ଦଶଟି ପତ୍ର ରହିବା ଆବଶ୍ୟକ  ।

ରୋଗପୋକ

କଦଳୀରେ ବିଶେଷ ରୋଗପୋକ ଦେଖାଯାଉ ନଥିଲେ ମଧ୍ୟ ଦୁଇ ତିନି ମାସ ଅନ୍ତରରେ ମାଲାଥିୟନ  ବା ମେଟା ସିଷ୍ଟକ ୨ ମି.ଲି. ଏକ ଲିଟର ପାଣିରେ ମିଶାଇ ଗଛକୁ ସିଞ୍ଚନ କରାଯାଏ  । ଏହା ସହିତ ଏକ ଲିଟର ପାଣିରେ ବେଭିଷ୍ଟିନ ଏକ ଗ୍ରାମ୍ କିମ୍ବା ୨ ଗ୍ରାମ୍ ଏଣ୍ଡୋଫିଲ ଏମ୍ – ୪୫ ମିଶ୍ରଣ କରି ସିଞ୍ଚନ କଲେ ରୋଗପୋକ ଦାଉରୁ ରକ୍ଷା ମିଳେ  ।

ଅଣକଦଳିଆ

ଅଣକଦଳିଆ ରୋଗ ହେଲେ ପତ୍ରଗୁଡିକ ଛୋଟ ଛୋଟ ହୋଇଯାଏ  । ଛାଞ୍ଚୁଣୀ ମୁଣ୍ଡା ପରି ମେଞ୍ଚା ହୋଇ ବାହାରେ ଏହା  ଏକ ଭୂତାଣୁ ଜନିତ ରୋଗ  । ଏପରି ରୋଗାକ୍ରାନ୍ତ ଗଛ ଦେଖାଗଲେ ତାକୁ ତୁରନ୍ତ କାଟି ପୋତି କିମ୍ବା ପୋଡି ଦେବା ଉଚିତ୍  । ଫଳରେ ଅନ୍ୟ ଗଛଗୁଡିକୁ ଏହି ଭୂତାଣୁ ଆକ୍ରମଣରୁ ଦୂରରେ ରଖାଯାଇପାରିବ  । ଜମିରେ ମାଲାଥିଅନ ବା ମେଟାସିଡ ସିଞ୍ଚନ କରାଗଲେ ଏହି ରୋଗବାହୀ ପୋକଗୁଡିକ ମରିଯାଆନ୍ତି  ।

ଝାଉଂଳା ରୋଗ

ଏହି ରୋଗ ଲାଗିଲେ ପତ୍ର ଝାଉଂଳି ଯାଏ ହଳଦିଆ ପଡିଯାଏ  ।  ବାହୁଙ୍ଗା ଭାଙ୍ଗି ଗଛରେ ଝୁଲେ  । କାନ୍ଧି ପଡିବା ସମୟରେ ଏହି ରୋଗ ଦେଖାଦେଇଥାଏ  । କାନ୍ଧି ଛୋଟ ହୋଇଯାଏ  । ଏହା ଏକ ଫିମ୍ପିଜନିତ ରୋଗ ପାଟକପୁରା କିସମରେ ଏହା ଅଧିକ ଦେଖାଦିଏ  । ଚମ୍ପା ଓ କାବୁଲି କଦଳୀରେ କମ୍ ଦେଖାଦିଏ  । ଏହି ରୋଗ ନିରାକରଣ ପାଇଁ ନିରୋଗା ଗଛର ସୁସ୍ଥ ପୁଆ ସଂଗ୍ରହ କରାଯିବା ଉଚିତ୍  । ଏକ ଲିଟର ପାଣିରେ ବେଭିଷ୍ଟିନ ୧ ଗ୍ରାମ୍ ମିଶାଇ ତହିଁରେ ପୁଆକୁ ବିଶୋଧନ କରାଯାଏ  । ଏକ ଲିଟର ପାଣିରେ ୧୦ ଗ୍ରାମ୍ ବେଭିଷ୍ଟିନ ମିଶାଇ ସେଥିରୁ ୧୦ ମି.ଲି. କଦଳୀ ମୂଳ କନ୍ଦାରେ ଇଞ୍ଜେକ୍ସନ ଦେଲେ ମଧ୍ୟ ଏ ରୋଗ ଦମନ ହୁଏ  ।

ପତ୍ରଦାଗ

ଏହା ଏକ କବକ ଜନିତ ରୋଗ  । ପତ୍ରରେ ଗାଢ ବବାଦାମୀ ଦାଗ ଦେଖାଯାଏ  । ଅନେକ ଦାଗ ଏକତ୍ରିତ ହୋଇ ପତ୍ରଟି ଶୁଖିଯାଏ  । ଏହି ରୋଗର ଦମନ ପାଇଁ ବୋର୍ଡର ମିକ୍ସଚର ୧ ଶତାଂଶ ଗଛକୁ ସିଞ୍ଚନ କରାଯାଏ  ।

ପୋକ

କଦଳୀ ଫସଲରେ କାଣ୍ଡବିନ୍ଧା ପୋକ ବେଳେ ବେଳେ ଦେଖାଦିଏ  । ଏହି କୀଟ କଦଳୀ ମୁଣ୍ଡାରେ ଓ ପତ୍ର ସନ୍ଧିରେ ରହୁଥିବାରୁ ସାଧାରଣ ସିଞ୍ଚନ ଔଷଧରେ ସହଜରେ ଦମନ ହୁଏ ନାହିଁ  । ଏଣୁଗଛ ମୂଳରେ ୨୦ରୁ ୪୦ ଗ୍ରାମ୍ ଫୁରାଡନ ଦାନା ପ୍ରୟୋଗ କରାଯାଏ  ।

ଅମଳ

କଦଳୀ ପୁଆ ଲଗାଯିବାର ୮ରୁ ୧୨ ମାସ ମଧ୍ୟରେ କାନ୍ଧି ଆସେ  । ତିନି ଚାରି ମାସରେ ତାହା ପାକଲା ହୁଏ  । ଦ୍ଵିତୀୟ ଫସଲ ୭ରୁ ୧୦ ମାସ ମଧ୍ୟରେ ଆସେ  । କଦଳୀ ଅମଳର ସାତ ଦିନ ପୂର୍ବରୁ ପାଣି ମଡା ବନ୍ଦ କରିବା ଉଚିତ୍  । ବାମନ କଦଳୀଗଛଗୁଡିକରେ ଡେଙ୍ଗା କିସମ ଅପେକ୍ଷା ଦୁଇ ତିନି ମାସ ପୂର୍ବରୁ କାନ୍ଧି ଆସେ  । କାନ୍ଧିର ଓଜନ କିସମ ଅନୁଯାୟୀ  ୧୨ ରୁ ୨୦ କେଜି ପର୍ଯ୍ୟନ୍ତ ହୋଇଥାଏ  ।

କଦଳୀ ପଚାଇବା ବିଧି

କଦଳୀ କାନ୍ଧିଗୁଡିକ ତିନି ଚତୁର୍ଥାଂଶ ପାକଲା ହୋଇଗଲେ ଅମଳ କରାଯାଏ  । ପ୍ରତି କାନ୍ଧିକୁ କଦଳୀ ପତ୍ରରେ ଗୁଡାଇ ଦୂରଦୂରାନ୍ତକୁ ଚାଲାଣ କରାଯାଏ  । ଏହା ଦ୍ଵାରା କାନ୍ଧିଗୁଡିକ ଆଠ ଦଶ ଦିନ ପର୍ଯ୍ୟନ୍ତ ନପାଚି କଞ୍ଚା ରହିଥାଏ  । ଶୀଘ୍ର ପାଚିବା ଆବଶ୍ୟକ ଥିଲେ ଇଥ୍ରେଲ ବ୍ୟବହାର କରାଯାଏ  । କଦଳୀ ପାଚିବାକୁ ଇଥିଲିନ ଗ୍ୟାସ ତ୍ୱରାନ୍ୱିତ କରେ  । କାନ୍ଧିକୁ କାଲସିୟମ କାର୍ବାଇଡ ପାଣିରେ ଭିଯାଇ ବା ଓଦା ଅଖାରେ ଗୁଡାଇ ରଖିଲେ ସେଥିରୁ ଇଥିଲିନ ଗ୍ୟାସ ନିର୍ଗତ ହୋଇ କଦଳୀକୁ ଶୀଘ୍ର ପାଚିବାରେ ସାହାଯ୍ୟ କରେ ।

ଆଧାର – ଓଡିଶା ଜଳବିଭାଜିକା ଉନ୍ନୟନ ମିଶନ

2.69230769231
ଆପଣଙ୍କର ପରାମର୍ଶକୁ ପୋଷ୍ଟ କରନ୍ତୁ

( ଯ଼ଦି ଆପଣଙ୍କର କିଛି କମେଣ୍ଟ / ପରାମର୍ଶ ଉକ୍ତ ବିଷଯ଼ବସ୍ତୁକୁ ନେଇ ରହିଛି ତେବେ ଦଯାକରି ତାହାକୁ ଏଠାରେ ପୋଷ୍ଟ କରନ୍ତୁ

Enter the word
ନେବିଗତିଓଂ
Back to top