অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ପନିପରିବାରେ ଝାଉଁଳା ରୋଗ

ଆମ ରାଜ୍ୟର ଅଧିକାଂଶ ଜମିରେ 'ସୋଲାନାସି' ଜାତୀୟ ପରିବା ବା ବିଲାତି ବାଇଗଣ, ଲଙ୍କା, ଆଳୁ, କ୍ୟାପସିକମ୍ ବହୁ ମାତ୍ରାରେ ଚାଷ କରାଯାଏ ।

ଅଧିକାଂଶ ସମୟରେ ଏହି ପରିବାରେ ଝାଉଁଳା ରୋଗ ଦେଖାଯାଉଥିବାରୁ ଚାଷୀକୁ ମଧ୍ୟ କ୍ଷତି ସହିବାକୁ ପଡିଥାଏ । ଏନେଇ ଝାଉଁଳା ରୋଗ ବିଷୟରେ ଜାଣି ତାର' ଉପଯୁକ୍ତ ପ୍ରତିକାର କରିବା ଆବଶ୍ୟକ ।

ଝାଉଁଳା ରୋଗ ମୁଖ୍ୟତଃ ତିନି ପ୍ରକାରର । ସୂତ୍ରକୃମି ଜନିତ ଝାଉଁଳା, କବକ ଜନିତ ଝାଉଁଳା ଏବଂ ବୀଜାଣୁ ଜନିତ ଝାଉଁଳା ।

ସୂତ୍ରକୃମିଜନିତ

ସୂତ୍ର ଜୀବଗୁଡିକ ସୂତା ଭଳି ଦେଖାଯାଉଥିବା କୃମିଜାତୀୟ ଜୀବ । ଏମାନେ ଖାଲି ଆଖିରେ ଦେଖାଯାଆନ୍ତି ନାହିଁ । ଏମାନେ ସୋଲାନାସି ଜାତୀୟ ପରିବା ଗଛର ଚେରରେ ଗଣ୍ଠି ସୃଷ୍ଟି କରନ୍ତି । ଗଣ୍ଠି ମଧ୍ୟରେ ଗଛର ଜଳୀୟ ଅଂଶ ଓ ଖାଦ୍ୟ ଶୋଷଣ କରନ୍ତି।

ଲକ୍ଷଣ : ଗଛର ଚେରରେ ଗଣ୍ଠି ଦେଖାଯାଏ । ଗଛ ଦିନ ବେଳେ ଝାଉଁଳି ପଡ଼ୁଥିବା ବେଳେ ରାତିରେ ପୁଣି ସତେଜ ହୋଇଯାଏ । ସୂତ୍ର ଜୀବର ବଂଶବୃଦ୍ଧି ହେଲେ ଶେଷ ଭାଗରେ ଗଛ ମରିଯାଏ ।

ପ୍ରତିକାର: ଜମି ପ୍ରସ୍ତୁତି ସମୟରେ ଜମିରେ ଫ୍ୟୁରାଡନ୍ କିମ୍ବା ନିମାଗନ୍ ପ୍ରୟୋଗ କରନ୍ତୁ । ବିଲାତି ବାଇଗଣ, ଲଙ୍କା ଆଦି ଲଗାଇବା ଜମିରେ ମଝିରେ ମଝିରେ ଗେଣ୍ଡୁ ଲଗାନ୍ତୁ । ସୂତ୍ରଜୀବୀ ସହଣୀ କିସମ ଜମିରେ ଲଗାନ୍ତୁ । ନିମାଗନ୍୨ ମିଲି.ଲିଟର ହିସାବରେ ମାଟିକୁ ଓଦା କରନ୍ତୁ ।

କବକ ଜନିତ

ଏହା ମାଟିରେ ଥିବା ଫ୍ୟୁଜାରିୟମ୍ କବକ ଦ୍ଵାରା ହୋଇଥାଏ । କବକ ଗୁଡିକ ଗଛର କୌଣସି ଦୁର୍ବଳ ଅଂଶ ଦେଇ ଗଛରେ ପ୍ରବେଶ କରନ୍ତି ଓ ଗଛରେ ଥିବା ଖାଦ୍ୟ ପରିବହନ ବ୍ୟବସ୍ଥା (ଜାଇଲେମ୍, ଫ୍ଲୋଏମ୍.)କୁ ବନ୍ଦ କରିଦିଅନ୍ତି । ଯାହା ଫଳରେ ଗଛ ଝାଉଁଳିଯାଏ ।

ଲକ୍ଷଣ: ପତ୍ରଗୁଡିକ ହଳଦିଆ ପଢିଯାଏ ଓ ଧୀରେ ଧୀରେ ଝାଉଁଳେ । ସମ୍ପୂର୍ଣ୍ଣ ଗଛ ନଝାଉଁଳି କେବଳ ଗୋଟିଏ ବା ଦୁଇଟି କାଣ୍ଡ ବା ଆଶିକ ଝାଉଁଳା ମଧ୍ୟ ପରିଲକ୍ଷିତ ହୁଏ । ମାଟିରେ ଛୁଇଁଥିବା କାଣ୍ଡକୁ ଭଙ୍ଗି ଦେଖିଲେ ସେଥିରେ କର୍କ ଭଳି ଦେଖାଯାଏ ଓ କାଣ୍ଡ ଶୁଖିଲା ଓ ଟାଣ ଥାଏ ।

ପ୍ରତିକାର: ସାହଣୀ କିସମ ଲଗାନ୍ତୁ, ଜମିରେ ଅମ୍ଳତା ୬-୭ ମଧ୍ୟରେ ରଖନ୍ତୁ । ମାନକୋଜେବ୍ ୨ ଗ୍ରା/ଲି କିମ୍ବା ମେଟାଲାକ୍ସିଲ୍ + ମାନ୍‌କୋଜେବ୍ (ରିଡୋମିଲ) ୧ ଗ୍ରା/ଲି ଗଛରେ ସ୍ପ୍ରେ କରନ୍ତୁ ।

  • ଟିଚୁକୋନାଖୋଲ (ଫଲିକ୍ୟୁର) ୧.୫ ଗ୍ରା/ଲି ହିସାବରେ ପକାଇ ମାଟିକୁ ଓଦା କରନ୍ତୁ ।

ବୀଜାଣୁ ଜନିତ

ମୃତ୍ତିକା ସଂକ୍ରମିତ ବୀଜାଣୁ ଦ୍ଵାରା ଏହା ହୋଇଥାଏ । ବୀଜାଣୁ ଗୁଡିକ ଗଛର ଚେରରେ ପ୍ରବେଶ କରି ଗଛର କୋଷଗୁଡିକୁ ଆକ୍ରମଣ କରିବା ଦ୍ଵାରା ଚେର ପଚିଯାଏ ।

ଲକ୍ଷଣ: ଚେରଗୁଡିକ ସଢିଯାଏ । ଚେରକୁ ଚିପିଲେ। ସେଥିରୁ ପାଣି ବାହାରେ ଓ ଦୁର୍ଗନ୍ଧ ହୁଏ । ଆକ୍ରାନ୍ତ ଗଛକୁ ମୂଳରୁ କାଟି ସଫା କାଚ ଗ୍ଳାସରେ ପାଣିରେ ପକାଇଲେ ସେଥିରୁ ଧଳା ରଙ୍ଗର ପୂଜ ବାହାରିଲା ପରି ଦେଖାଯାଏ । ଗଛଗୁଡିକ ସମ୍ପୁର୍ଣ୍ଣ ମରିଯାଆନ୍ତି ଓ ଏହା ଅକସ୍ମାକ ହୋଇଥାଏ।

ପ୍ରତିକାର: ଫସଲ ପର୍ଯ୍ୟାୟ ଅବଲମ୍ବନ କରନ୍ତୁ । ଜମିରେ ପାଣି ଜମି ରହିବାକୁ ଦିଅନ୍ତୁ ନାହିଁ । ପ୍ଲାଣ୍ଟୋମାଇସିନ୍ ୧ ଗ୍ରାମ/ ଲିଟର କିମ୍ବା ଷ୍ଟେପଟୋସାଇକ୍ଳିନ୍ ୧୦ ଲିଟର ପାଣିରେ  ୧ ଗ୍ରାମ୍ ହିସାବରେ ସ୍ପ୍ରେ କରନ୍ତୁ । ବେଳେ ବେଳେ  ସମସ୍ତ ପ୍ରକାରର ଝାଉଁଳା ମିଶି ଏକା ସାଙ୍ଗରେ ଗଛକୁ  ଆକ୍ରାନ୍ତ କରିଥାଏ । ସେ କ୍ଷେତ୍ରରେ ୨-୩ ପ୍ରକାର  ଔଷଧ ମିଶାଇ ସିଞ୍ଚନ କରିବାକୁ ପଡେ । ସୂତ୍ରଜୀବ  ଆକ୍ରମଣ କରିବା ଫଳରେ ସେହି ଦୁର୍ବଳ ଅଂଶ ଦେଇ  କବକ ଓ ବୀଜାଣୁ ଗଛ ମଧ୍ୟକୁ ପ୍ରବେଶ କରନ୍ତି ଓ ଆକ୍ରମଣ କରନ୍ତି ।

କେତେକ ସାବଧାନତା

ଜମି ପ୍ରସ୍ତୁତି ସମୟରେ ମୃତ୍ତିକା ବିଶୋଧନ ଫର୍ମାଲିନ୍ କିମ୍ବା ସୂର୍ଯ୍ୟକିରଣ ଦ୍ଵାରା କରନ୍ତୁ।

  • ଗୋଟିଏ ଫସଲ ବାରମ୍ବାର ନକରି ଅନ୍ୟ ପରିବାରର ପରିବା ସହ ଫସଲ ପର୍ଯ୍ୟାୟ ଅବଲମ୍ବନ କରନ୍ତୁ ।
  • ଝାଉଁଳା (ମୁଖ୍ୟତଃ ବୀଜାଣୁ ଜନିତ) ଦେଖାଯାଉଥିବା ମାଟିରେ ୨-୩ ବର୍ଷ ପର୍ଯ୍ୟନ୍ତ ସୋଲାନାସି ପରିବା କରନ୍ତୁ ନାହିଁ ।
  • ବୀଜାଣୁ ଜନିତ ଝାଉଁଳା ଦେଖାଯାଉଥିବା ମାଟିରେ ବ୍ଲିଚିଂ ପାଉଡର ପ୍ରୟୋଗ କରନ୍ତୁ । ମାଟିର ଅମ୍ଳତା ସର୍ବଦା (୬.୫-୭) ମଧ୍ୟରେ ରଖନ୍ତୁ । ଆକ୍ରାନ୍ତ ଗଛଗୁଡିକୁ ଦୂର ସ୍ଥାନକୁ ନେଇ ପୋଡି ବା ପୋଡି ଦିଅନ୍ତୁ ।
  • ଝାଉଁଳା ସହଣୀ କିସମ ବ୍ୟବହାର କରନ୍ତୁ ।
  • ଜମିରେ ନିମ୍ବ ପିଡିଆ ପ୍ରୟୋଗ କରନ୍ତୁ (ମୁଖ୍ୟତଃ ସୂତ୍ର ଜୀବ ପାଇଁ)
  • ଖତ ସହ ଟ୍ରାଇକୋଡର୍ମା ମିଶାଇ ଜମିରେ ପ୍ରୟୋଗ କରନ୍ତୁ । ଏହା କବକକୁ ମାରିବା ସହ ଏହା ବଂଶବୃଦ୍ଧି ଯୋଗୁଁ ବୀଜାଣୁ ମାନଙ୍କର ମଧ୍ୟ ବଂଶବୃଦ୍ଧି ହୋଇନଥାଏ ।
  • ଝାଉଁଳା ହେଲେ ତତକ୍ଷଣାତ କୌଣସି ଔଷଧ ପ୍ରୟୋଗ କରନ୍ତୁ ନାହିଁ । ଏଥିରେ ଗୋଟିଏ ଦିନ ପାଣି ଦେଇ ଦେଖନ୍ତୁ । ଏହା ଜଳଭାବ ଜନିତ ଝାଉଁଳା ମଧ୍ୟ ହୋଇପାରେ ।

ସଂଗୃହିତ - ତପନ କୁମାର ଗିରି ଗବେଷଣାରତ ଛାତ୍ର, ଓୟୁଏଟି



© 2006–2019 C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate