ସ୍ଵୟଂ ସହାୟକ ଗୋଷ୍ଠୀର କାର୍ଯ୍ୟକାରିତା

ନିୟମିତ ବୈଠକ କରିବା

ସ୍ଵୟଂ ସହାୟକ ଗୋଷ୍ଠୀର ବୈଠକ ସଦସ୍ୟାମାନଙ୍କର ସୁବିଧା ଅନୁସାରେ ନିର୍ଦ୍ଧାରିତ ଦିବସ, ସମୟ ଓ ସ୍ଥାନରେ ଅନୁଷ୍ଠିତ ହେବ  । ସମସ୍ତ ସଦସ୍ୟା ନିର୍ଦ୍ଧାରିତ ତାରିଖ, ସମୟ ଓ ସ୍ଥାନରେ ଉପସ୍ଥିତ ରହିବେ  । ସ୍ଵୟଂ ସହାୟକ ଗୋଷ୍ଠୀର ସମସ୍ତ ସଦସ୍ୟା ବୈଠକର ନିର୍ଦ୍ଧାରିତ ସମୟର ୫ ମିନିଟ୍ ପୂର୍ବରୁ ବୈଠକ ସ୍ଥାନରେ ଉପସ୍ଥିତ ରହିବେ  । ଉକ୍ତ ବୈଠକରେ ସ୍ଵୟଂ ସହାୟକ ଗୋଷ୍ଠୀର ସଦସ୍ୟାମାନେ ସ୍ଵୟଂସହାୟକ ଗୋଷ୍ଠୀର ଆବଶ୍ୟକତା ଏବଂ ଗୁରୁତ୍ଵ, ଉଦ୍ଦେଶ୍ୟ, ସ୍ଵୟଂ ସହାୟକ ଗୋଷ୍ଠୀର ବିଭିନ୍ନ କାରଜ୍ୟକରମ ଯଥା – ନିୟମିତ ବୈଠକ, ନିୟମିତ ଋଣ ପ୍ରଦାନ, ନିୟମିତ ଋଣ ପରିଶୋଧ, ସ୍ଵୟଂ ସହାୟକ ଗୋଷ୍ଠୀଦ୍ଵାରା ପ୍ରସ୍ତୁତ ଦ୍ରବ୍ୟର ବିକ୍ରୟ ଏବଂ ଖାତାପତ୍ର ଲେଖିବା ଇତ୍ୟାଦି ସମ୍ପର୍କରେ ଆଲୋଚନା କରିବା  ।

ସଞ୍ଚୟ

ସମସ୍ତ ସଦସ୍ୟା ସଞ୍ଚୟ କାର୍ଯ୍ୟକ୍ରମରେ ଅଂଶଗ୍ରହଣ କରିବେ  । ସଞ୍ଚୟ ରାଶି ସ୍ଵୟଂ ସହାୟକ ଗୋଷ୍ଠୀ ସଦସ୍ୟାମାନଙ୍କର ଆବଶ୍ୟକତା ସମୟରେ ଭବିଷ୍ୟତରେ ସାହାଯ୍ୟରେ ଆସିବ ଏବଂ ତା’ ସହିତ ଗୋଷ୍ଠୀର ନିଜସ୍ଵ ପାଣ୍ଠି ମଧ୍ୟ ବୃଦ୍ଧି ହେବ  । ସଦସ୍ୟାମାନଙ୍କ ସାମର୍ଥ୍ୟ ଅନୁଯାୟୀ ସଞ୍ଚୟର ପରିମାଣ ଗୋଷ୍ଠୀର ବୈଠକରେ ସ୍ଥିର କରାଯିବ  । ସ୍ଵୟଂ ସହାୟକ ଗୋଷ୍ଠୀର ସଦସ୍ୟାମାନେ ବୈଠକରେ ସଞ୍ଚୟ ରାଶି ଜମା କରିବେ  । ଗୋଷ୍ଠୀର ପାଣ୍ଠି ବୃଦ୍ଧି ନିମନ୍ତେ ସମସ୍ତ ସଦସ୍ୟା ନିୟମିତ ସଞ୍ଚୟ କରିବେ  । ଉକ୍ତ ସଞ୍ଚୟ ରାଶି ଗୋଷ୍ଠୀର ଅନ୍ତଃଋଣ, ରୋଜଗାର ଭିତ୍ତିକ କାର୍ଯ୍ୟକ୍ରମ ଏବଂ ସଦସ୍ୟାଙ୍କ ଜରୁରୀ ପରିସ୍ଥିତିରେ ଆବଶ୍ୟକତା ପୂରଣ ନିମନ୍ତେ ବ୍ୟବହାର କରାଯିବ  ।

(ସଭିଏଁ ହୋଇଲେ ଆମେ ଏକାଠି, ବଢିବ ଆମର ସଞ୍ଚୟ ପାଣ୍ଠି)

ଋଣ ପରିଚାଳନା

ଗୋଷ୍ଠୀରେ ଜମା କରାଯାଇଥିବା ପାଣ୍ଠିକୁ ସଦସ୍ୟାମାନେ ବିଭିନ୍ନ ସାମାଜିକ ଓ ଆର୍ଥିକ କାର୍ଯ୍ୟକ୍ରମ କରିବା ନିମନ୍ତେ ଋଣ ଭାବରେ ବ୍ୟବହାର କରିପାରିବେ  । ସ୍ଵୟଂ ସହାୟକ ଗୋଷ୍ଠୀ ବୈଠକରେ ସଦସ୍ୟାଙ୍କ ଆବଶ୍ୟକତାର ଗୁରୁତ୍ଵକୁ ବିଚାରକରି କେଉଁ ସଦସ୍ୟାଙ୍କୁ ଋଣ ପ୍ରଦାନ କରାଯିବ, ତାହା ସମସ୍ତ ସଦସ୍ୟାଙ୍କ ସହମତିରେ ନିଷ୍ପତ୍ତି ନିଆଯିବ  । ସମସ୍ତ ସଦସ୍ୟା ରୋଜଗାରଭିତ୍ତିକ କାର୍ଯ୍ୟକ୍ରମ କରିବା, କ୍ଷୁଦ୍ର ଉଦ୍ୟୋଗ ଏବଂ  ସାମାଜିକ କାର୍ଯ୍ୟକ୍ରମ ଉଦ୍ଦେଶ୍ୟରେ ଗୋଷ୍ଠୀରୁ ଋଣ ନେଇପାରିବେ  ।

ଖାତା ପତ୍ର ଲେଖିବା / ପରିଚାଳନା

ସ୍ଵୟଂ ସହାୟକ ଗୋଷ୍ଠୀରେ ଗୁରୁତ୍ଵପୂର୍ଣ୍ଣ ଖାତାପତ୍ର ରଖାଯିବ  । ଏହି ଖାତାପତ୍ର ଗୁଡିକରେ ଆର୍ଥିକ ଦେଶ ନେଣ ଏବଂ ପ୍ରଶାସନ ସମ୍ବନ୍ଧୀୟ ବିବରଣୀ ଲେଖାଯିବ  । ଉକ୍ତ ଖାତାପତ୍ରଗୁଡିକ ଗୋଷ୍ଠୀ ନିମନ୍ତେ ଅତ୍ୟନ୍ତ ଗୁରୁତ୍ଵପୂର୍ଣ୍ଣ  । ଉକ୍ତ ଖାତା ପତ୍ର ସହାୟତାରେ ଗୋଷ୍ଠୀର ଆର୍ଥିକ ଦେଣନେଣ ସମ୍ବନ୍ଧରେ ସମ୍ପୂର୍ଣ୍ଣ ବିବରଣୀ ଜାଣିହେବ ଏବଂ ଗୋଷ୍ଠୀର ବିକାଶ ସମ୍ପର୍କରେ ଜାନାପଡିବ  । ଏହା ଗୋଷ୍ଠୀରେ ସଦସ୍ୟାମାନଙ୍କର ବିଶ୍ଵାସକୁ ଦୃଢୀଭୂତ କରିବାରେ ସାହାଯ୍ୟ କରିଥାଏ ଏବଂ ଗୋଷ୍ଠୀର ଗୁରୁତ୍ଵ ବୃଦ୍ଧିରେ ସହାୟକ ହୋଇଥାଏ  ।

ରୋଜଗାରଭିତ୍ତିକ କାର୍ଯ୍ୟକ୍ରମ କରିବା

ସ୍ଵୟଂ ସହାୟକ ଗୋଷ୍ଠୀ ସଦସ୍ୟାମାନଙ୍କର ଆର୍ଥିକ ସ୍ଥିତି ସୁଦୃଢ କରିବା ନିମନ୍ତେ ରୋଜଗାରଭିତ୍ତିକ କାର୍ଯ୍ୟକ୍ରମ ଅତ୍ୟନ୍ତ ଗୁରୁତ୍ଵପୂର୍ଣ୍ଣ  । ସ୍ଵୟଂ ସହାୟକ ଗୋଷ୍ଠୀ କ୍ଷୁଦ୍ର / ଛୋଟ ବ୍ୟବସାୟ ଆରମ୍ଭ କରିବା ଉଚିତ୍ ଏବଂ ଗୋଷ୍ଠୀର ସଦସ୍ୟାମାନଙ୍କୁ ବ୍ୟବସାୟ କରିବା ନିମନ୍ତେ ଉତ୍ସାହିତ କରିବା ଆବଶ୍ୟକ  । ସ୍ଵୟଂ ସହାୟକ ଗୋଷ୍ଠୀର ସଦସ୍ୟାମାନେ ଏହି ବ୍ୟବସାୟିକ କାର୍ଯ୍ୟକ୍ରମ ବ୍ୟକ୍ତିଗତ କିମ୍ବା ଦଳଗତ ଭାବରେ ସମସ୍ତ ସଦସ୍ୟାଙ୍କୁ ନେଇ ମିଳିତ ଭାବରେ କରିପାରିବେ  । ଗୋଷ୍ଠୀର ସଦସ୍ୟାମାନେ ନିଜର ପସନ୍ଦ ଅନୁସାରେ କେଉଁ କାର୍ଯ୍ୟକ୍ରମ କରିବେ ତାହା ସ୍ଥିର କରିବେ  ।

ସଂଯୋଗୀକରଣ / ସମନ୍ଵୟ

ସ୍ଵୟଂ ସହାୟକ ଗୋଷ୍ଠୀର ସ୍ଥାୟିତ୍ଵ ପାଇଁ ବିଭିନ୍ନ ସୂତ୍ରରୁ ସମ୍ବଳ / ଅର୍ଥ ଯୋଗାଡ କରିବା ନିମନ୍ତେ ସ୍ଵୟଂ ସହାୟକ ଗୋଷ୍ଠୀ ବିଭିନ୍ନ ଗୋଷ୍ଠୀ ଏବଂ ଅନୁଷ୍ଠାନ ଯଥା ବ୍ୟାଙ୍କ, ପୋଷ୍ଟ ଅଫିସ୍ ଏବଂ ବିଭିନ୍ନ ସରକାରୀ ବିଭାଗ ମଧ୍ୟରେ ସମନ୍ଵୟ ଏବଂ ସୁସମ୍ପର୍କ ସ୍ଥାପନ କରିବେ  ।

ସରକାରୀ ଯୋଜନାରେ ସମ୍ପୃକ୍ତି

ସ୍ଵୟଂ ସହାୟକ ଗୋଷ୍ଠୀର ଆର୍ଥିକ ସ୍ଥିତି ସୁଦୃଢ କରିବା ସହିତ ଦଳର ନିଜସ୍ଵ ପାଣ୍ଠି ବୃଦ୍ଧି ଓ ସ୍ଥାୟିତ୍ଵ ନିମନ୍ତେ ଏବଂ ସରକାରୀ ଯୋଜନାର ସଫଳ ରୂପାୟନ ନିମନ୍ତେ ବିଭିନ୍ନ ସରକାରୀ ଯୋଜନାରେ ସ୍ଵୟଂ ସହାୟକ ଗୋଷ୍ଠୀ ସକ୍ରିୟ ଭାବରେ ଅଂଶଗ୍ରହଣ କରିବା ଆବଶ୍ୟକ  । ବିଭିନ୍ନ ସରକାରୀ ଯୋଜନା / କାର୍ଯ୍ୟକ୍ରମ ଯଥା – ଗ୍ୟାସ ଡିଲରସିପ୍, ମାଛଚାଷ ନିମନ୍ତେ ଗ୍ରାମପଞ୍ଚାୟତ ପୋଖରୀ ଲିଜ୍, କୁକୁଡା ପାଳନ, ଛେଳି ପାଳନ, ଫୁଲଚାଷ, ପନିପରିବା ଚାଷ, ଜଙ୍ଗଲଜାତ ଦ୍ରବ୍ୟ ସଂଗ୍ରହ ଓ ବିକ୍ରୟ, ପୁଷ୍ଟିକର ଖାଦ୍ୟ ପ୍ରସ୍ତୁତି ଓ ବଣ୍ଟନ, ମଧ୍ୟାହ୍ନ ଭୋଜନ ପ୍ରସ୍ତୁତି ଓ ବଣ୍ଟନ, କ୍ଷୁଦ୍ର / ଛୋଟ ବ୍ୟବସାୟ ଇତ୍ୟାଦି  ।

ପ୍ରଶିକ୍ଷଣ କାର୍ଯ୍ୟକ୍ରମରେ ଅଂଶଗ୍ରହଣ ଓ ଦକ୍ଷତା ବୃଦ୍ଧି

ସ୍ଵୟଂ ସହାୟକ ଗୋଷ୍ଠୀର ସଦସ୍ୟାଙ୍କ ଦକ୍ଷତା ବୃଦ୍ଧି ନିମନ୍ତେ ବିଭିନ୍ନ ତାଲିମ୍ କାର୍ଯ୍ୟକ୍ରମ ଅତ୍ୟନ୍ତ ଗୁରୁତ୍ଵପୂର୍ଣ୍ଣ  । ସ୍ଵୟଂ ସହାୟକ ଗୋଷ୍ଠୀ ସଦସ୍ୟାମାନେ ବିଭିନ୍ନ ବିଭାଗ / ଅନୁଷ୍ଠାନଗୁଡିକର ବିଭିନ୍ନ  ପ୍ରଶିକ୍ଷଣ / ସଚେତନତା କାର୍ଯ୍ୟକ୍ରମ ଏବଂ ସଫଳ ଗୋଷ୍ଠୀ ନିକଟକୁ ପରିଭ୍ରମଣ କାର୍ଯ୍ୟକ୍ରମରେ ସକ୍ରିୟ ଅଂଶଗ୍ରହଣ କରିବେ  ସମସ୍ତ ସଦସ୍ୟାଙ୍କୁ ସଚେତନ / ଅନୁପ୍ରାଣିତ କରିବା ନିମନ୍ତେ ସ୍ଵୟଂ ସହାୟକ ଗୋଷ୍ଠୀ ବିଭିନ୍ନ ତାଲିମ୍, ସଚେତନତା କାର୍ଯ୍ୟକ୍ରମ ନିଜ ସ୍ତରରେ ଆୟୋଜନ କରିବେ  ।

ଗୋଷ୍ଠୀଭିତ୍ତିକ କାର୍ଯ୍ୟକ୍ରମ

ସ୍ଵୟଂ ସହାୟକ ଗୋଷ୍ଠୀର ସଦସ୍ୟାମାନେ ଗ୍ରାମ ସ୍ତରରେ ମିଳିତ ଭାବରେ ବିଭିନ୍ନ ଉନ୍ନୟନ / ବିକାଶମୂଳକ କାର୍ଯ୍ୟକ୍ରମ ଏବଂ ଗୋଷ୍ଠୀର ବିଭିନ୍ନ ଭିତ୍ତିଭୂମିର ସୁପରିଚାଳନା ନିମନ୍ତେ ପ୍ରୟାସ କରିବେ  । ଏହି ପ୍ରକାର କାର୍ଯ୍ୟକ୍ରମରେ ସମ୍ପୃକ୍ତି ରହିବା ଫଳରେ ସ୍ଵୟଂ ସହାୟକ ଗୋଷ୍ଠୀର ସଦସ୍ୟାମାନଙ୍କ ମଧ୍ୟରେ ଆତ୍ମବିଶ୍ଵାସ ବଢିବା ସହିତ ଗ୍ରାମରେ ସ୍ଵୟଂ ସହାୟକ ଗୋଷ୍ଠୀର ଉପସ୍ଥିତି ଉପଲବ୍ଧି କରିବାରେ ସକ୍ଷଣ ହୋଇପାରିବେ ଏବଂ ଗ୍ରାମରେ ସମସ୍ତଙ୍କର ଆସ୍ଥାଭାଜନ ହୋଇପାରିବେ  ।

ସାମାଜିକ କାର୍ଯ୍ୟକ୍ରମ

ସ୍ଵୟଂ ସହାୟକ ଗୋଷ୍ଠୀର ସଦସ୍ୟା ବିଭିନ୍ନ ସାମାଜିକ ସମସ୍ୟା ଯଥା – ବାଲ୍ୟବିବାହ, ଯୌତୁକ ପ୍ରଥା, କୁସଂସ୍କାର ଓ ଅନ୍ଧବିଶ୍ଵାସ, କନ୍ୟା ଭ୍ରୁଣହତ୍ୟା, ମଦ ବିରୋଧୀ ଆନ୍ଦୋଳନ, ମାନବ ଚାଲାଣ, ସ୍ୱାସ୍ଥ୍ୟ, ପୁଷ୍ଟି ଓ ପରିମଳ ଜନିତ ସମସ୍ୟା ସମ୍ପର୍କରେ ସଚେତନ ହେବେ ଏବଂ ଏହାର ସମାଧାନ ନିମନ୍ତେ ସଦସ୍ୟାମାନେ ମିଳିତ ଭାବରେ ସକ୍ରିୟ ଅଂଶଗ୍ରହଣ କରିବେ  ।

ଆଧାର – ମହିଳା ଓ ଶିଶୁ ବିକାଶ ଏବଂ ମିଶନଶକ୍ତି ବିଭାଗ